Nshɛ 107 - EBƆRƐ BE KAWƆL

KENUSOPO ( Nshɛ 107—150 ) Ebɔrɛ ka la esa n sa mbe basa be asheŋ

¹ Men di Enyɛnpe Ebɔrɛ na epaŋ, ŋkpal manɛ so, e walɛ, nɛ mbe kasha nɛ k maa chɛrga na, malɛ wɔtɔ mbaanaayɔ.

² Basa kama nɛ Enyɛnpe Ebɔrɛ mɔlga bumo ashi bumo doŋana be enɔ to na e kpaŋ mo.

³ Bekama nɛ b shi efuli pɔtɛana nɛ a kulti na so m bɛta m ba na kikɛ, e kpaŋ mo nseŋ di mo epaŋ.

⁴ Menyi be beko daŋ foe ashi keshishɛrsawule nɛ k maŋ kɔ shɛŋ na so nna, nsaa maŋ naŋ wu ekpa nɛ men bɛta m ba chena kadegboŋ na to.

⁵ Akoŋ nɛ achukoŋ e daa mɔ menyi, nɛ men daa shin nɛ men wu.

⁶ Men ka daa wɔ kenishipere be tɔrɔ to nseŋ shu n tre Enyɛnpe Ebɔrɛ na, e daŋ nu nna nseŋ mɔlga menyi.

⁷ Kumo be kaman nɛ e juŋkpar menyi tinini m ba chena kadegboŋ na to.

⁸ A daga fanɛ men di Ebɔrɛ epaŋ ŋkpal mbe kasha nɛ k maa chɛrga, nɛ emamachisheŋ nɛ e bee wora a sa edimɛdi kikɛ na so.

⁹ E bee sa ekama nɛ achukoŋ kɔ kusɔnuuso nna nɛ e bee nuu. Ekama malɛ nɛ akoŋ kɔ, e bee sa mo kusɔ jiso lela nna.

¹⁰ Menyi be beko daa wɔ kabuti to nna, a ji awurfoŋ tentembiri mina to nɛ ŋgbɛlɛbi kre menyi,

¹¹ ŋkpal men ka daŋ kini Enyɛnpetale Ebɔrɛ na n lɛ, nseŋ kplaŋ mbe kasotoji so na so.

¹² Amoso nɛ men daŋ shuŋ fanɛ anya ŋ gben a chul to, nɛ esa kikɛ maŋ chɛ menyi to na.

¹³ Men ka daa wɔ kenishipere be tɔrɔ to nseŋ shu n tre Enyɛnpe Ebɔrɛ na, e daŋ nu nna nseŋ mɔlga menyi.

¹⁴ Tentembiri mina to nɛ e lara menyi nseŋ tuge menyi be ŋgbɛlɛbi nɛ men nya menyi be amu a ji.

¹⁵ A daga fanɛ men di Ebɔrɛ epaŋ ŋkpal mbe kasha nɛ k maa loge nɛ emamachisheŋ nɛ e bee wora a sa edimɛdi kikɛ so.

¹⁶ Mo e naa bure danyaŋ be mbunagboŋ to, nsaa buri abɛlso be abersobi to cheche na.

¹⁷ Menyi to be beko wora alubi kawuliso nna nsaa ji awurfoŋ.

¹⁸ Men daa maa sha kewu ajibi kenishiso gba, a daŋ ka gbrɛ nɛ men wu gba.

¹⁹ Men ka daa wɔ kenishipere be etɔrɔ to nseŋ shu n tre Enyɛnpe Ebɔrɛ na, e daŋ nu nna nseŋ mɔlga menyi.

²⁰ Mo gbagba be kamalga be eleŋ to nɛ e daŋ bɔla so n chɛ menyi to, m mɔlga menyi ashi kemur to.

²¹ A daga fanɛ men di Ebɔrɛ epaŋ ŋkpal mbe kasha nɛ k maa loge nɛ emamachisheŋ nɛ e bee wora a sa edimɛdi kikɛ na so.

²² A daga fanɛ men lara esarga n di mo epaŋ a boŋ nshɛ kagbenefuliso a kaŋɛ asheŋ nɛ e wora be asheŋ.

²³ Menyi to be beko be kebaawɔtɔ baa yil kebaa luri nchu so be ekuloŋgboŋ to a nite teku so a ji yawu so nna.

²⁴ Menyi alɛ wu emamachisheŋ nɛ Enyɛnpe Ebɔrɛ na wora ashi teku na so.

²⁵ Mo e daŋ malga kenishipereso n sa afugboŋ nɛ k ku atili teku so na.

²⁶ Atili na daa kpata nchu so be ekuloŋgboŋ na a yɔ esoso nɛ kaseto nna, nɛ kenishipere tu menyi nɛ men paŋ tama.

²⁷ Men daa wɔ ekuloŋgboŋ na to nna, a lente nchu na so fanɛ basa ka boo nsa nseŋ paŋ tama kikɛ na.

²⁸ Men ka daa wɔ kenishipere be tɔrɔ to, nseŋ shu n tre Enyɛnpe Ebɔrɛ na, e daŋ nu nna nseŋ mɔlga menyi.

²⁹ Kumo be kaman nɛ e shin nɛ afugboŋ na yige kebaa ber eleŋso nɛ atili na lo dindiŋ.

³⁰ Menyi be ŋgbene daŋ fuli menyi, ŋkpal loŋ so, e keta menyi nna n yɔ kakpa nɛ men daa sha keyɔ na.

³¹ A daga fanɛ men di Ebɔrɛ epaŋ, ŋkpal mbe kasha nɛ k maa loge nɛ emamachisheŋ nɛ e bee wora a sa edimɛdi kikɛ na so.

³² Jemanɛ kikɛ nɛ men shɛr abar so, men baa ji Enyɛnpe Ebɔrɛ na be keshi be asheŋ. Menyi nɛ men be bejuŋkparpo malɛ baŋ shɛr, men ta bunyaŋ n sa Enyɛnpe Ebɔrɛ na.

³³ E shin nɛ elɔr wɔlto ŋ ki keshishɛrsawule, nɛ achubu malɛ ki nsawule wɔlso,

³⁴ nɛ adɔsawule lela ki nsawule wuso a dese, ŋkpal basa nɛ b wɔ ndoŋ be amu kpakpaso so.

³⁵ Ama Enyɛnpe Ebɔrɛ na kraa beeŋ tiŋ n shin nɛ keshishɛrsawule e kilgi kubuye a bul nchu, nɛ kasawule wɔlso e ki kabombi a shile.

³⁶ Nɛ akoŋ pɛ menyi, menyeeŋ tiŋ n yuu menyi be nde n chena mbombi na ase n dɔ n ji.

³⁷ Menyeeŋ tiŋ n dɔ n duu asɔduuso nɛ ndibi sɔrso, nɛ a wora nɛnɛ nɛ men teŋi ŋko n chuge amo ga.

³⁸ Enyɛnpe Ebɔrɛ na beeŋ nɛfa menyi, nseŋ shin nɛ menyi be mbia e wora keshi; mo alɛ maaŋ shin nɛ menyi be ana e duga so.

³⁹ Jemanɛ ko beeŋ ba nɛ tɔrɔ nɛ awurfoŋ nɛ bedoŋ be kamɛaŋ e shin nɛ men duga so ŋ ki basa gbrɛbi.

⁴⁰ Ama Enyɛnpe Ebɔrɛ na beeŋ sɔ menyi be kɔnɔ so ŋ kɔ basa nɛ b daŋ pɔɔ menyi so na n shin nɛ b baa nite cham cham keshishɛrsawule so.

⁴¹ Nɛ asheŋ baŋ tir menyi nɛ menyee ji awurfoŋ, e beeŋ ba mɔlga menyi nseŋ shin nɛ menyi be nnaŋ e salga fanɛ mboe nɛ mbolpɔ.

⁴² Menyeeŋ wu le be asheŋ ere nɛ menyi be ŋgbene e fuli, ŋkpal men ka bee wora Enyɛnpe Ebɔrɛ na kasonu so. Ama kumukpakpasowuraana bre maaŋ nya nnɔ bugi gba.

⁴³ Ekama nɛ e kɔ kanyiasheŋ, e baa nyiŋi asheŋ ere nsaa fɛ Enyɛnpe Ebɔrɛ na be kasha nɛ k maa loge na be asheŋ.