Nshɛ 106 - EBƆRƐ BE KAWƆL

Kelela nɛ Enyɛnpe Ebɔrɛ na wora mbe basa be asheŋ

¹ Men kpaŋ Enyɛnpe Ebɔrɛ na! Men ta kechɔrɔ n sa Enyɛnpe Ebɔrɛ, ŋkpal manɛ so, e walɛ nna nɛ mbe kasha malɛ maa chɛrga hale mbaanaayɔ.

² Esa kikɛ maaŋ tiŋ m malga mbe asheŋgboŋ be asheŋ n ya loge kikɛ. Esa kikɛ malɛ maaŋ tiŋ ŋ kpaŋ mo gba n ya loge.

³ Kagbenefuli la bekama nɛ baa ji asheŋ nɛ amo be ekpa so nsaa wora asheŋ niŋiso jemanɛ kikɛ na peya nna.

⁴ Enyɛnpe Ebɔrɛ, baa nyiŋi ma, jemanɛ nɛ fee chɛ fo basa to nsaa mɔlga bumo na.

⁵ Shin nɛ n ti fo basa laraso so n nyalɛ, saŋɛ na so ma alɛ gba beeŋ ji eyur fanɛ kananɛ baa ji eyur kagbenefuliso ŋkpal b ka la fo basa so na.

⁶ Anyi nɛ an nanaana kikɛ wora asheŋ lubi ga.

⁷ An nanaana ka daa wɔ Ijipt be efuli so na, bumo be lakal daa maa wɔ Ebɔrɛ be mamachi be asheŋ woraso so; ŋko kasha so. Jemanɛ nɛ b daa dii teku peper na, b daŋ pal kaman nna n sa mo.

⁸ Ama e daŋ mɔlga bumo, fanɛ kananɛ e nase kɔnɔ na; nseŋ ŋini bumo mbe eleŋgboŋ.

⁹ E daŋ kaŋɛ teku peper na nna fanɛ k ku to, nɛ k ku to. Ndoŋ nna nɛ e juŋkpar bumo kasawule wɔlso so m bɔla kumo to n choŋ.

¹⁰ E daŋ mɔlga bumo kikɛ ashi basa nɛ b kishi bumo be enɔ to nna,

¹¹ nseŋ shin nɛ nchu na ji bumo doŋana nɛ b daa ju a buu bumo so na bre. Hale ekoŋwule gba daa maŋ ji efute.

¹² Ndoŋ nna nɛ mbe basa na nyiŋi mbe nnɔ naseso nseŋ naŋ yirda mo a boŋ nshɛ a kpaŋ mo.

¹³ Ama k maŋ chɛr ko nɛ b naŋ teŋ kusɔ nɛ e wora so nsaa maŋ naa sɔ mbe kasotoji.

¹⁴ Ajibi be kayɛlgagboŋ daŋ pɛ bumo ashi keshishɛrsawule na so nna nɛ b wora Ebɔrɛ ŋ keni.

¹⁵ Amoso e daŋ sa bumo kusɔ nɛ b daa sha na nna, ama e daŋ ta kulɔ lubi nna ŋ gberge bumo kusoe.

¹⁶ Bumo be ekama ashi bumo be keeyi to daa besa Mosis nɛ Ɛɛrɔn, nɛ b la Ebɔrɛ be nyɛrbi nɛ e lara n sa mbe kumu na eyur nna.

¹⁷ Epul na to nɛ kasawule baŋɛ n ta Datan nɛ Abiram nɛ bumo be nnaŋ m min. Ŋkpal manɛ so, b daŋ kini kenu n sa Mosis nɛ Ɛɛrɔn nna.

¹⁸ Kumo be kaman nɛ edɛ suse n chɔɔ kumukpakpasowuraana nɛ b daa bɛ bumo so na kikɛ m mur.

¹⁹ B ka ya fo kebee nɛ baa tre Sainai na ase, b daŋ ta shuwa nna n lɔŋɛ gbolu fɔlbi nna a bunyaŋ kumo.

²⁰ B daŋ ta Ebɔrɛ be kemaŋkura nna n sa gbolu fɔlbi nɛ k la kusɔbɔya nɛ k bee ji afitiri na, be kapɔrduli.

²¹ B daŋ teŋ Ebɔrɛ nɛ e daŋ wora asheŋgboŋ ashi Ijipt be efuli so m mɔlga bumo na so nna.

²² Bumo alɛ daŋ naŋ teŋ alemaŋkarsheŋ nɛ e wora ashi teku peper na ase na be asheŋ so nna.

²³ Ebɔrɛ daŋ nya agbo nna ŋ kaŋɛ fanɛ e beeŋ mur mbe basa na; ama Mosis nɛ e lara nɛ e baa la mbe kayɛrbi na, e mata mo nɛ e maŋ naŋ mur bumo.

²⁴ B daa maŋ yirda kɔnɔ nɛ Ebɔrɛ nase n sa bumo, fanɛ e beeŋ sa bumo bumo gbagba be kasawule na; amoso kasawule lela na be asheŋ daa maa tir bumo.

²⁵ B daŋ kini kewora Ebɔrɛ kasonu nna, nseŋ daa munto a bile asheŋ ashi bumo be ewajɛbu to.

²⁶ Amoso e daŋ kpele bumo kusoe kenishipereso nna fanɛ e beeŋ shin nɛ b wu n tɔr keshishɛrsawule na so.

²⁷ E yɛ e beeŋ pesaŋ bumo kaman to ebi nɛ baaŋ ka na n yɔ nnyamase to, saŋɛ na so baaŋ ya wu n tɔr efuli pɔtɛana so.

²⁸ Ebɔrɛ be basa na be beko daŋ ya kaa bɛ kegbir nɛ baa tre Baal Piyɔɔ na so nna, nseŋ daa ji agbir be nlɔŋɛjibi.

²⁹ B daŋ wora asheŋ lubi ga nna nɛ Ebɔrɛ be kagbene kaa, nɛ e shin nɛ kulɔ lubi ko ba bumo so.

³⁰ Ama kanyɛn nɛ baa tre Finihas na e koso ŋ gberge alubiworapoana na kusoe, nɛ kulɔ lubi na kuu.

³¹ Ŋkpal loŋ so, baa nyiŋi mo nna jemanɛ kikɛ nsaa sa mo bunyaŋ ga.

³² Basa na daŋ wɔtɔ Enyɛnpe Ebɔrɛ na agbo to nna ashi kubuye nɛ baa tre Mɛriba na ase, nɛ Mosis daŋ ŋkpal bumo so n wora n da Ebɔrɛ so.

³³ B daŋ shin nɛ kabɔlar pɛ Mosis nna nɛ e nya agbo a malga.

³⁴ B ka ya fo kɔnɔ naseso be kasawule na so, Enyɛnpe Ebɔrɛ daŋ kaŋɛ bumo nna fanɛ b mur nnyamase na kikɛ nɛ b kini.

³⁵ Ama b daŋ ji bumo keteri nna hale a wora asheŋ nnyamase na be edaŋkare be ekpa so.

³⁶ Ebɔrɛ be basa na daŋ shuŋ agbirana nna, nɛ kumo be loŋ shin nɛ kemur ba bumo so.

³⁷ B daŋ ta bumo be mbia n lara esarga nna n sa ayoyu lubi.

³⁸ Bumo be mbia nɛ b maŋ nyi kulubi nɛ kelela na be ŋklaŋ nɛ b daŋ ta n lara esarga n sa Keenan be efuli so be agbirana n jija kasawule na.

³⁹ Kusɔ nɛ b daŋ wora na shin nɛ b wora eyurpi daŋkare be ekpa so nna. B daa maŋ ji kashenteŋ n sa Ebɔrɛ.

⁴⁰ Amoso Enyɛnpe Ebɔrɛ na daŋ nya agbo n wora mbe basa nna nseŋ daŋ kishi bumo be asheŋ.

⁴¹ E daŋ kplaŋ bumo so nna nseŋ yige bumo n sa efuli pɔtɛana so be basa; nɛ bumo doŋana daa ji kuwura bumo so.

⁴² Bumo doŋana daŋ kɔrfɛ bumo nseŋ ji eleŋ bumo so ga.

⁴³ Ale damta nɛ Enyɛnpe Ebɔrɛ na daŋ mɔlga mbe basa; ama b daŋ kute n lar mo kaman a wora asheŋ gela m bɔla amo so n tɔr alubi damta to.

⁴⁴ Ama b ka shu n tre Enyɛnpe Ebɔrɛ kagbenejijaso, e daŋ nu bumo be kushu na nna.

⁴⁵ E daŋ nyiŋi mbe kɔnɔkoŋwule be ŋkre na nna, nseŋ kpal kashagboŋ nɛ e kɔ n sa bumo na so n chɛrga mbe nfɛra a maŋ gberge bumo kusoe.

⁴⁶ E daŋ shin nɛ bumo doŋana shu bumo so nna.

⁴⁷ O Enyɛnpe anyi be Ebɔrɛ, mɔlga anyi, nseŋ lara anyi efuli pɔtɛana so m bɛta m ba epe. Saŋɛ na so anyeeŋ di fo epaŋ nseŋ kpaŋ fo ketre cheembi na.

⁴⁸ Enyɛnpe, Israɛl be Ebɔrɛ, fo e daga esa ka kpaŋ fo mbaanaayɔ. Shin nɛ ekama e kaŋɛ, “Amɛn!” Men kpaŋ Enyɛnpe Ebɔrɛ na!