Nshɛ 105 - EBƆRƐ BE KAWƆL

Ebɔrɛ nɛ mbe basa be asheŋ

¹ Men baa di Enyɛnpe Ebɔrɛ na epaŋ nsaa kule Ebɔrɛ ashi mbe ketre to! Men baa kaŋɛ efuli kikɛ so ebi kusɔ nɛ e wora be asheŋ.

² Men baa boŋ nshɛ a kpaŋ Enyɛnpe Ebɔrɛ na; nsaa malga emamachisheŋ nɛ e wora be asheŋ.

³ Men baa ji eyur nsaa bunyaŋ mbe ketre cheembi na ashi men be ŋgbene to kikɛ.

⁴ Men ta men be yirda n deŋi Enyɛnpe Ebɔrɛ na nɛ mbe eleŋgboŋ so nsaa bunyaŋ mo jemanɛ kikɛ.

^5-6 Menyi nɛ men la Eebraham nɛ e shuŋ Ebɔrɛ na, nɛ Jeekɔb nɛ Ebɔrɛ lara dra dra na mo nanabiana na, e baa nyiŋi Ebɔrɛ be mamachi be asheŋ woraso nɛ kananɛ e bee ji asheŋ nɛ amo be ekpa so be asheŋ.

⁷ Enyɛnpe Ebɔrɛ na e la anyi be Ebɔrɛ. E bee ji asheŋ nɛ amo be ekpa so nna kasawule so kikɛ.

⁸ E bee nyiŋi a bɛ mbe kɔnɔkoŋwule be ŋkre nɛ mbe nnɔ naseso nɛ e nase n sa menyi na so hale n ya fo yili kenana ko m ba tu kenana ko be ntuŋ kagboŋ so nna.

⁹ Le be kɔnɔkoŋwule be ŋkre nɛ mo nɛ men nananyɛn Eebraham kre, nɛ e bɔ ntaŋ n nase kɔnɔ n sa men nananyɛn Aizek malɛ dra dra na.

¹⁰ Enyɛnpe Ebɔrɛ na nɛ an nananyɛn Jeekɔb gba daŋ wora kɔnɔkoŋwule be ŋkre nɛ k beeŋ baa wɔtɔ mbaanaayɔ nna.

¹¹ E yɛ: “Meeŋ ta Keenan be kasawule n sa fo nɛ k baa la feya mbaanaayɔ.”

¹² Loŋ be jemanɛ na nɛ Ebɔrɛ be basa na daa maŋ shi, bumo alɛ daa la befɔ ashi Keenan be kasawule so nna.

¹³ B daa nite nna a kilgi to ashi efuli pɔtɛana so nɛ bewuraana be nsawule so.

¹⁴ Ama Ebɔrɛ daa maŋ shin nɛ ekama mɛaŋ bumo. E daŋ fɛa bewurjipo so nna ŋkpal e ka daa kuŋ mo basa so.

¹⁵ E yɛ: “Men sa maŋ kaa tɔrɔ bejuŋkparpo nɛ n lara na, ŋko ma anebiana!”

¹⁶ Enyɛnpe Ebɔrɛ na daŋ shin nɛ ewule ba efuli na so nna nɛ bumo be adɔjibi kikɛ mur.

¹⁷ Ndoŋ nna nɛ e shin nɛ bumo kurgepo Josɛf, nɛ b daŋ fa fanɛ kenya na, juŋkpar n yɔ Ijipt be efuli so.

¹⁸ B daŋ wɔtɔ Josɛf be aya nɛ mbe kubɔ to ŋgbɛlɛbi nna, nɛ e pɛge so;

¹⁹ nɛ kusɔ nɛ Ebɔrɛ kaŋɛ na bɔlɔ so. Enyɛnpe Ebɔrɛ na be kamalga e shin nɛ kusɔ nɛ Josɛf kaŋɛ na ki kashenteŋ.

²⁰ Kumo be kaman nɛ Ijipt be efuli so be ewura shin nɛ b lara Josɛf ashi kabuti to.

²¹ Ewura na daŋ shin nna nɛ e bee keni mbe laŋ nɛ asɔ kikɛ so.

²² Josɛf e daa keni ekrachiana na so nsaa ŋini benimuana na kasheŋwora.

²³ Kumo be kaman nɛ Jeekɔb nɛ mbe kanaŋ ya ki befɔ n chena Ijipt be efuli so.

²⁴ B ka la Enyɛnpe Ebɔrɛ be basa so, e daŋ shin nna nɛ b salga to nseŋ nya eleŋ a chɔ bumo doŋana.

²⁵ E daŋ shin nna nɛ Ijiptebi na kishi mbe basa nsaa kre bumo asheŋ lubi be nia.

²⁶ Kumo be kaman nɛ e shuŋi mbe kayɛrbi Mosis nɛ Ɛɛrɔn nɛ mo gbagba daŋ lara na mbe basa kutɔ.

²⁷ B daŋ wora emamachisheŋ nɛ asheŋ tumase gboŋ ashi Ijipt be efuli so nna.

²⁸ Ebɔrɛ daŋ shin nɛ tentembiri ba buu efuli na kikɛ so nna, ama Ijiptebi na daa maŋ nu n sa Ebɔrɛ.

²⁹ E daa naŋ shin nɛ bumo be elɔrana be nchuana kilgi ŋklaŋ nɛ ekɔrɔtɔ kikɛ wu nna.

³⁰ Epulo daŋ ba sɔ efuli na kikɛ be kaplɛkama nna; hale bumo be edesekpaana nɛ ewurkpa gba daŋ bɔlɔ epulo na nna.

³¹ Ebɔrɛ daŋ malga nna nɛ ashushombi firgiso nɛ asɔ duŋso fanɛ epini ba mel efuli na kikɛ so.

³² Ade be kaman nɛ e shin nɛ bumo be bɔrɛchu ki abɔrɛjembu nɛ bɔrɛ bee nyɛkpɛ kasawule na kikɛ so;

³³ e daŋ mur bumo be greep be afeelebi nɛ ndibi nɛ baa tre figi na nɛ ndibi nɛ a ka na kikɛ gba nna.

³⁴ E daŋ malga gba nna nɛ elotɔr ŋgboŋto ŋgboŋto ba sɔ efuli na kikɛ so.

³⁵ Elotɔr ere daŋ ji afitiri bumbuŋ kikɛ nɛ asɔ nɛ b duu ndɔana kikɛ to nna m mur.

³⁶ Ade kikɛ nyam be kaman nɛ Ebɔrɛ shin nɛ Ijiptebi be ewurkoŋnyɛn kikɛ nyam wu.

³⁷ Kumo be kaman nɛ e juŋkpar Israɛlebi na n lar Ijipt be efuli so. Bumo be eyiriana na to be esa koŋwule gba daa maŋ ka kaman. B daŋ sulɔ shuwa nɛ gbiti nna n lar.

³⁸ Jemanɛ nɛ b lar a yɔ na, Ijiptebi na be ŋgbene daŋ fuli bumo nna, ŋkpal manɛ so, kufu daŋ pɛ bumo nna.

³⁹ Ebɔrɛ daa bɔla kuwɔlpa so kapaso nɛ edɛ be kabulpi so kanyɛso nna a ŋini bumo ekpa ashi bumo be enite na to.

⁴⁰ B ka daŋ kule mo ajibi, mbuibi nɛ baa tre kweels na nɛ ebɔrɛso be ajibi nɛ baa tre manna na nɛ e sa bumo, nɛ b daa nya a ji a moɛ.

⁴¹ E daŋ shin nɛ kefalta pante nɛ nchu lar kumo to eleŋso, a shile keshishɛrsawule na so fanɛ lɔr na nna.

⁴² E daa nyiŋi mbe nnɔ naseso cheembi nɛ e nase n sa mbe kayɛrbi Eebraham na nna.

⁴³ Enyɛnpe Ebɔrɛ na ka kɔ n suge mbe basa laraso ashi Ijipt be efuli so na, b daŋ boŋ nshɛ n ji eyur kagbenefuliso nna.

⁴⁴ E daŋ suge efuli pɔtɛana ko be nsawule nɛ asɔ kama nɛ b gben n nya nna n sa Israɛlebi na.

⁴⁵ E wora loŋ nna nɛ mbe basa e baa wora mbe mbraana kasonu. Men kpaŋ Enyɛnpe Ebɔrɛ na!