Nshɛ 104 - EBƆRƐ BE KAWƆL

Enyɛnpe Ebɔrɛ na ka bee keni mbe asɔ toso so be asheŋ

¹ Ma kagbene kikɛ nɛ n ta a kpaŋ fo, Enyɛnpe Ebɔrɛ na, ŋkpal manɛ so, kemaŋkuragboŋ nɛ kela kikɛ buu fo fanɛ kuwurpiŋi nna,

² nɛ kefulto kulti fo n wɔtɔ kaplɛkama. Fo e parga kuwɔlpa to n sɔ kaplɛkama fanɛ wajɛbu, a wɔ kumo to.

³ Fo alɛ e pɔr fo kowu n shin nɛ tekugboŋ wɔ kumo be kaseto. Bɔrɛwɔlpa nɛ k bee bɔla afu so a nite na du fanɛ gbaŋɛturko nna n sa fo.

⁴ Fo e ta afuana fanɛ fo mbɔ nsaa ta bɔrɛ be kenyɛkpɛ malɛ fanɛ fo nyɛrbi.

⁵ Fo e to durnya n yili kumo be gbaltɔlase so, nɛ k maaŋ tiŋ ŋ gbuŋgbuŋ na.

⁶ Fo alɛ e to eteku chiŋgeliŋana nɛ e bee bɔlɔ a dii abee so, nsaa buu durnya so fanɛ piŋi na.

⁷ Ama nɛ fo baŋ ponte, nchuana kikɛ bee shile nna

⁸ a gbelge abee so a bɔla ataŋɛ to a yɔ kakpa nɛ fo bela ase n yili amo na.

⁹ Fo e yili amo be egbaŋ n sa amo nɛ a sa maŋ bɔlɔ n dii kepla m buu kasawule na kikɛ so.

¹⁰ Fo e shin nɛ abuye bee pete ataŋɛ to a ki elɔr a shile abee to a choŋ,

¹¹ saŋɛ na so ekurma nɛ kupuŋ to be asɔbɔya beeŋ baa nya nchu a nuu a tuge achukoŋ.

¹² Mbuibi malɛ beeŋ tɔ bumo be asha ndibi nɛ a yil m mata eboŋana na be ayabi to nsaa jɔŋɛ amo so a shu.

¹³ Fo e naa shin nɛ bɔrɛchu bee shi awɔlpa so a ba abee so nɛ kasawule bee nya kayul nɛnɛ.

¹⁴ Fo alɛ e naa shin nɛ afitiri bee kɔr nɛ kowu be asɔbɔya bee nya a ji, nɛ dimɛdi malɛ bee duu asɔ kasawule so a nya ajibi a ji,

¹⁵ nsaa nya yabra a nuu nɛ mbe kagbene bee fuli mo, mo alɛ naa nya ŋku a gbiti mbe anishito nɛ k bee nyɛkpɛ nsaa nya ajibi be yiri kikɛ a ji a nya eleŋ nɛ alenfia.

¹⁶ An Nyɛnpe Ebɔrɛ, fo ndibi bee nya nchu nna jemanɛ kikɛ, aloŋ nɛ ndibigboŋ nɛ baa tre sida nɛ fo duu Lebanɔn be efuli so na gba bee nya nchu.

¹⁷ Ndibi na so nɛ mbuibi bee tɔ bumo be asha; nɛ etɔkɔrkɔ malɛ gba bee tɔ bumo be asha ashi ndibi tenteŋ nɛ baa tre fir na so.

¹⁸ Kupuŋ to be mboe wɔ abee jeŋgreŋ so nna, nɛ asɔbɔya wurbi fanɛ eshiboe malɛ wɔ abee na be afalta to.

¹⁹ Fo e to kufɔl nɛ k bee ŋini anyi kananɛ jemanɛ bee ba a yɔ; nɛ epeŋi malɛ nyi saŋɛ nɛ k bee tɔr.

²⁰ Fo e to tentembiri nɛ kanyɛ bee biri, nɛ kupuŋ to be asɔbɔya bee nya lar a nite a kulti a fin kusɔ jiso a ji.

²¹ Ebuluŋ bee munto a shu nna a fin keji, nɛ Ebɔrɛ beeŋ sa bumo.

²² Epeŋi baŋ pete, nɛ b naŋ bɛta n yɔ bumo be edesekpaana.

²³ Kumo be kaman nɛ edimɛdi e koso n yɔ ashuŋ to n ya shuŋ n tɔr epeŋi.

²⁴ Enyɛnpe Ebɔrɛ, kanyiasheŋ so nɛ fo bɔla n to asɔ damta. Fo asɔ to so nɛ e kɔ ŋkpa sɔ kasawule so kikɛ nna.

²⁵ Asɔ keniso be yiri yiri damta e wɔ teku nɛ k shi a dese palɛlɛ na to; Asɔgboŋ nɛ asɔwurbi kikɛ e wɔ kumo to.

²⁶ Teku so nɛ ekuloŋgboŋ bee nite a yɔ a ba; Kubɔya lubi gboŋgboŋi nɛ baa tre Liviatan na gba wɔ teku to nna.

²⁷ Le be asɔ keniso ere kikɛ bee keni fo anishito nna nɛ fo sa amo kusɔ jiso jemanɛ nɛ k daga.

²⁸ Fo alɛ bee bugi enɔ to nna a sa amo kusɔ jiso nɛ a bee nya a ji a moɛ.

²⁹ Ama nɛ fo baŋ pal kaman n sa amo, kufugboŋ bee tɔr amo so nna nɛ a chicha. Fo alɛ baŋ naŋ lara amo be efute, a bee wu nna a bɛta a yɔ eshishɛr to.

³⁰ Fo Kiyoyu so nɛ fo bɔla n to amo be ekama nsaa shin nɛ ŋkpa popɔr bee ba kasawule so.

³¹ An Nyɛnpe Ebɔrɛ, anyee kule nna fanɛ fo kemaŋkura e baa wɔtɔ mbaanaayɔ; saŋɛ na so, fo kagbene beeŋ baa fuli kusɔ kama nɛ fo wora so.

³² Fo baŋ to kenishi ŋ keni kasawule, k bee gbuŋgbuŋ nna. Fo alɛ baŋ beta abee, e bee kaa edishi nna.

³³ Meeŋ boŋ nshɛ ŋ kpaŋ fo Enyɛnpe ma Ebɔrɛ na, ashi ma kebaawɔtɔ kikɛ to.

³⁴ Mee tama fanɛ ma nfɛra fɛso beeŋ baa par fo, ŋkpal manɛ so, ma kagbene fuli fo so.

³⁵ Shin nɛ alubiworapoana kikɛ e mur ashi kasawule ere so, n shin nɛ kumukpakpasowuraana e sa maŋ naa wɔtɔ kuraa. Meeŋ kpaŋ fo Enyɛnpe Ebɔrɛ na ashi ma kagbene to kikɛ.