Nshɛ 103 - EBƆRƐ BE KAWƆL

Ebɔrɛ be kasha be asheŋ

¹ Meeŋ ta ma kagbene kikɛ n fur Enyɛnpe Ebɔrɛ na, nseŋ ta ma kebaawɔtɔ kikɛ ŋ kpaŋ mbe ketre cheembi na!

² Meeŋ ta ma kagbene kikɛ ŋ kpaŋ Enyɛnpe Ebɔrɛ na! Ma alɛ maaŋ teŋ asheŋ lela nɛ e wora ma na kikɛ so.

³ Enyɛnpe Ebɔrɛ na e naa ta anyi be alubi a paŋ anyi. Mo alɛ e naa chɛ anyi be alɔana kikɛ,

⁴ nsaa kuŋ anyi ashi luwu to. Mbe kuwɔrwu nɛ kasha malɛ shi anyi so ga.

⁵ Karechɛ kikɛ e bee sa anyi asɔ nɛ a tir anyi nna, nsaa shin nɛ anyee nya eleŋ a ti so fanɛ kusore fɔlbi na.

⁶ Enyɛnpe Ebɔrɛ na bee ji asheŋ nɛ amo be ekpa so nna a sa bumo nɛ beko bee mɛaŋ na.

⁷ Mo e daŋ juŋkpar an nananyɛn Mosis dra dra na n wora asheŋ, nseŋ shin nɛ Israɛl be basa wu mbe asheŋgboŋ nɛ e wora na.

⁸ Enyɛnpe Ebɔrɛ na la ewɔrwupo nna, nsaa kɔ kanyiti; mbe kasha malɛ maa chɛrga kikɛ.

⁹ E maa wu basa kulubi jemanɛ kikɛ; mo alɛ maa nya agbo mbaanaayɔ.

¹⁰ E maa gberge anyi kusoe kananɛ a daga fanɛ e gberge anyi kumo na; ŋko a laŋɛ anyi be alubi a ka anyi kukɔ.

¹¹ Kasha nɛ e kɔ n sa basa nɛ baa bunyaŋ mo na shi ga; k shi a chɔ yili kasawule so n ya fo awɔlpa so.

¹² Kananɛ epeŋilarkpa nɛ epeŋitɔrkpa barga abar a wɔ kufɔ na, aloŋ nɛ Enyɛnpe Ebɔrɛ na lara anyi be alubi ashi anyi so.

¹³ Kananɛ bekurgepo bee sha bumo be mbia ga na, aloŋ nɛ Enyɛnpe Ebɔrɛ gba bee sha bekama nɛ baa bunyaŋ mo na ga.

¹⁴ Ŋkpal manɛ so, e nyi fanɛ eshishɛr nɛ e ta m pɔr anyi.

¹⁵ Anyi edimɛdi be nchɛ du fanɛ afitiri ŋko kupuŋ to be atoto nɛ a bee purge manaŋ manaŋ nna;

¹⁶ ama afu baŋ chela amo so nɛ a bolo, n wu n tɔr nseŋ bɛ n luri kasawule to; nɛ esa maaŋ naŋ wu amo gba kuraa.

¹⁷ Enyɛnpe Ebɔrɛ na bee lara mbe kasha nɛ k maa chɛrga na a ŋini bekama nɛ baa bunyaŋ mo mbaanaayɔ nna; mo alɛ nsaa wora a bɔlɔ mbe nnɔ naseso so a sa bumo be kaman to ebi

¹⁸ nɛ basa nɛ baa bɛ mbe kɔnɔkoŋwule be ŋkre so nsaa wora mbe mbraana kasonu kashenteŋto na.

¹⁹ Ebɔrɛ taŋɛ mbe kuwurji ebɔrɛso nna, mo alɛ nsaa ji kuwura asɔ toso kikɛ so.

²⁰ Menyi emalaika lempoana, nɛ menyee nu Enyɛnpe Ebɔrɛ be kɔnɔ nsaa wora mo kasonu na kikɛ e kpaŋ mo!

²¹ Menyi ebɔrɛso be apɔrso nɛ menyee shuŋ a sa Ebɔrɛ nsaa wora mo kasonu na kikɛ e baa kpaŋ Enyɛnpe Ebɔrɛ!

²² Menyi, Ebɔrɛ be asɔ toso kikɛ, nɛ e bee ji kuwura menyi so na, e baa kpaŋ men Nyɛnpe Ebɔrɛ na! Ma ere be kagbene kikɛ nɛ ŋ kɔ a kpaŋ Enyɛnpe Ebɔrɛ na!