Nshɛ 102 - EBƆRƐ BE KAWƆL

Esa nɛ e wɔ tɔrɔ to be kabɔrɛkule be asheŋ

¹ Mee kule fo nna, Enyɛnpe Ebɔrɛ! Jande, nu ma kekule.

² Sa maŋ ŋana ma so jemanɛ nɛ n wɔ tɔrɔ to. Kaŋ kusoe n nu ma kekule, nseŋ tuge ma manaŋ manaŋ.

³ Ma nchɛ bee choŋ nna fanɛ edishi nɛ ma awibi to bee chɔɔ ma to fanɛ edɛ.

⁴ M baa wɔl fanɛ afitiri nna, ajibi kikɛ malɛ maa yɛlga ma.

⁵ M baa shu to awɔrso a tekeŋ nna, nseŋ nyɔr ŋ ki fanɛ awibi nawule.

⁶ M baŋ ki fanɛ gbuŋgbula koŋko ashi keshishɛrsawule so nna.

⁷ Mee dese a keni nna a klade; n du fanɛ kabuibi koŋko nɛ e jɔŋ ebu so nna.

⁸ N doŋana bee tege ma karechɛ kikɛ nna; nɛ bumo nɛ baa wora ma eyurto malɛ bee ti ma ketre fanɛ shoduu be kusɔ na.

^9-10 Ŋkpal fo ka nya agbo ga nseŋ ta ma n lɛ so, nsunɔ e ki ma ajibi jiso, nɛ anishichubi malɛ ki ma nchu nuuso.

¹¹ Ma kebaawɔtɔ bee choŋ nna fanɛ kaaseso be kiyoyul; nɛ ŋ gbagba malɛ bee wɔl fanɛ afitiri na.

¹² Ama fo, Enyɛnpe Ebɔrɛ na la ewura nna mbaanaayɔ; nɛ yili kenana ko m ba tu kenana ko to ebi bee nyiŋi fo asheŋ.

¹³ Fo e naaŋ shu Jerusalɛmebi so, ŋkpal manɛ so, jemanɛ fo nɛ feeŋ wu bumo kuwɔr.

¹⁴ Anyi fo anya bee sha kejembu kama nɛ k wɔ kadegboŋ na to nna; amoso kumo be kebure a dese loŋ na shin nɛ kagbenejija tɔr anyi so ga.

¹⁵ Efuli pɔtɛana so be basa beeŋ ŋana fo, Enyɛnpe Ebɔrɛ na, be ketre na. Nɛ durnya to be bewuraana kikɛ e ta bunyaŋ gboŋ gboŋi n sa fo.

¹⁶ Ŋkpal manɛ so, Enyɛnpe Ebɔrɛ na beeŋ lɔŋɛ Jerusalɛm be kadegboŋ na m pɔr nseŋ shin nɛ mbe kemaŋkura e dii efuli.

¹⁷ E beeŋ wu betentaŋasepo kuwɔr nseŋ nu bumo be kabɔrɛkule.

¹⁸ Men sibɛ kusɔ nɛ Ebɔrɛ wora n nase n sa kaman to ebi nɛ baaŋ ba echefoso na; saŋɛ na so, bumo alɛ gba beeŋ ba kpaŋ Enyɛnpe Ebɔrɛ na ŋ kaŋɛ le:

¹⁹ “Ebɔrɛso nɛ Enyɛnpe Ebɔrɛ na wɔ nsaa to kenishi a keni kasawule so.

²⁰ E daŋ nu basa nɛ b wɔ kabuti to ka bee shu to nna, nseŋ sɔ bumo nɛ b daŋ daga luwu na n yige.

²¹ Amoso Jerusalɛmebi kikɛ e ber mbe asheŋ be kubomboŋ, nseŋ kpaŋ Enyɛnpe Ebɔrɛ be ketre na,

²² jemanɛ nɛ efuli pɔtɛana nɛ kuwurjiana kikɛ be basa beeŋ shɛr abar so m bunyaŋ mo na.

²³ Kebifɔlbi e kraa la ma, ama Enyɛnpe Ebɔrɛ na shin nɛ ŋ ki esa pɔso nɛ ma nchɛ duga so.

²⁴ Ndoŋ nna nɛ ŋ kaŋɛ le: O ma Ebɔrɛ, sa maŋ ta ma, nɛ ma nchɛ maŋ naŋ fo. Fo ere wɔtɔ nna mbaanaayɔ.

²⁵ Sososo na kikɛ nɛ fo to durnya n yili kumo be gbaltɔlase so. Fo gbagba be enɔ nɛ fo ta n to ebɔrɛso gba.

²⁶ Amo kikɛ beeŋ choŋ fanɛ asɔbuuso ka wu na. Fee chɛrga amo nna fanɛ esa ka bee chɛrga mbe asɔbuuso dra nsaa kini amo na.

²⁷ Ama fo ere maa chɛrga kikɛ; fo alɛ maa bel kikɛ.

²⁸ Basa nɛ baa shuŋ fo be mbia beeŋ baa wɔ fo kutɔ, nɛ fo baa kuŋ bumo nɛ bumo be kaman to ebi kikɛ.”