Nshɛ 101 - EBƆRƐ BE KAWƆL

Ewura be kɔnɔ naseso be asheŋ

¹ O Enyɛnpe Ebɔrɛ, meeŋ boŋ kashɛ a laŋɛ fo kasha nɛ keji asheŋ nɛ amo be ekpa so be kaplɛa so.

² Jande, chɛ ma to nɛ ŋ koya kebaawora asheŋ niŋiso; saŋɛ na so meeŋ baa ji kashenteŋ nsaa maa kɔ ŋkpɛato ashi ma kuwurji to.

³ Ma alɛ beeŋ kishi kusɔ nɛ basa nɛ b pal kaman n sa Ebɔrɛ bee wora na kikɛ.

⁴ Ma shɛŋ maaŋ baa wɔ basa nɛ b maa ji kashenteŋ nsaa wɔtɔ a wora asheŋ lubi to.

⁵ M maaŋ sa ekama nɛ e bee nite a ji basa be asheŋ ekpa nɛ e baa wora loŋ. Ma alɛ maaŋ sa kamoowuwura ŋko keŋkenshiwura kashuli kikɛ nɛ b baa du loŋ.

⁶ Basa nɛ b kɔ kashenteŋji nɛ meeŋ shin nɛ b baa wɔ ŋ kutɔ a ji ma asoe to. Basa nɛ b maŋ kɔ amoso malɛ e naŋ ki ma ekrachi a shuŋ a sa ma.

⁷ Esa kama nɛ e bee puni ŋko a fule kikɛ maaŋ nya ma lambu to n chena.

⁸ Karechɛ kikɛ, m maaŋ sa kumukpakpasowuraana kashuli ashi anyi be kasawule so. Meeŋ ju basa lubi kikɛ ashi Enyɛnpe Ebɔrɛ be kadegboŋ na to.