Nehemaya 9 - EBƆRƐ BE KAWƆL

Basa na ka bugi to ŋ kaŋɛ bumo be alubi be asheŋ

¹ Kufɔl shunusopo na be kachɛ adunyɔ nɛ ana na nɛ Israɛlebi na shɛr ŋ kishi nseŋ buu nli be nle nseŋ wora eshishɛr ŋ gbiti bumo be amu to a ŋini bumo be ŋgbene ka jija bumo ŋkpal bumo be alubi so so.

² B daŋ barga bumo amu ashi befɔ na kutɔ nna nseŋ ya yili m bugi to ŋ kaŋɛ bumo nɛ bumo nanaana be alubi nɛ b wora.

³ Awa asa nɛ b yil a nu b ka bee kraŋ Enyɛnpe bumo be Ebɔrɛ na be mbra be kawɔl na. Kumo be kaman nɛ b naŋ ta awa asa malɛ ŋ kule Ebɔrɛ ŋ kaŋɛ bumo be alubi nseŋ bunyaŋ Enyɛnpe Ebɔrɛ na.

⁴ Ndoŋ nna nɛ Joshuwa nɛ Kadmiɛl nɛ Bani nɛ Shebania nɛ Bunni nɛ Sherebia nɛ Bani nɛ Chenani dii n yili kejaŋ nɛ k yuu n sa Livaiebi na so ŋ kule Enyɛnpe bumo be Ebɔrɛ na awɔrso.

⁵ Ndoŋ nna nɛ Joshuwa nɛ Kadmiɛl nɛ Bani nɛ Hashabnaya nɛ Sherebia nɛ Hodia nɛ Shebania nɛ Petahiya nɛ b shi Livai be yiri to na kaŋɛ basa le: “Men koso n yili nseŋ boŋ to m maŋkura Enyɛnpe menyi be Ebɔrɛ nɛ e wɔ ŋkpa to mbaanaayɔ na. Men maŋkura mbe mamachi be Ketre na, E shi ga nɛ kɔnɔ to be mmalga maaŋ tiŋ n ji mbe asheŋ.”

Basa na ka kule Ebɔrɛ be asheŋ

⁶ Ndoŋ nna nɛ basa na kule Ebɔrɛ ŋ kaŋɛ: “Fo nawule e la Enyɛnpe anyi be Ebɔrɛ na. Fo e to ebɔrɛso nɛ achɛkpabi kikɛ, Fo e to kasawule nɛ asɔ nɛ e wɔ kumo so kikɛ. Fo e to teku nɛ kumo to be asɔ keniso kikɛ Ŋkpa kikɛ shi fo kutɔ nna, nɛ achɛkpabi nɛ a wɔ awɔlpa to kikɛ bee fur fo a kpaŋ fo.

⁷ Fo e la Enyɛnpe anyi be Ebɔrɛ Fo e lara an nananyɛn Eebram dra dra na ashi kade nɛ baa tre Ur nɛ k wɔ Babilɔn be efuli so nseŋ chɛrga mbe ketre ŋ ki Eebraham na.

⁸ Ŋkpal e ka daa ji kashenteŋ a sa fo so fo nɛ mo daŋ wora kɔnɔkoŋwule be ŋkre nna fanɛ feeŋ ta Keenanebi nɛ Hitebi nɛ Amɔriebi nɛ Pɛrizebi nɛ Jebusiebi nɛ Giigaebi be nsawule n sa mbe kaman to ebi. Naniere fo wora fo kɔnɔ naseso na m bɔlɔ so fanɛ kananɛ fee wora saŋkikɛ na.

⁹ An nanaana ka daa wɔ Ijipt be efuli so na, fo daŋ wu awurfoŋ nɛ b daa ji. B ka ya fo Teku Peper na ase nɛ b shu a fin fo kechɛto, nɛ fo alɛ nu bumo be kushu nseŋ chɛ bumo to.

¹⁰ Fo daa nyi kananɛ Ijipt be ewurgboŋ Fɛɛro nɛ mbe ekrachiana nɛ efuli na kikɛ be basa daŋ kɔrfɛ fo basa. Amoso fo daŋ wora emamachisheŋ nɛ e bee keta kufu nna ŋ gbiti Ijipt be efuli so be ewura Fɛɛro nɛ mbe basa nseŋ nya ketre lela nɛ k wɔtɔ hale nɛ mbre.

¹¹ Fo e daŋ shin nɛ Teku chiŋgeliŋ na ku to nɛ fo basa nite kasawule wɔlso so m bɔla kumo to n dii n choŋ. Ama fo daŋ shin nna nɛ bumo doŋana bre mur nchu na to nna fanɛ kananɛ kejembu bee tɔr nchu to na.

¹² B ka dii teku na be kaman, karechɛ kikɛ fo daa bɔla awɔlpa to nna a juŋkpar fo basa kapaso, nsaa bɔla edɛ be kabɔlpi so a juŋkpar a ŋini bumo ekpa kanyɛso.

¹³ Fo daŋ shi ebɔrɛso nna ŋ gbelge m ba Sainai be kebee na so m ba sa fo basa mbra nɛ keŋini nɛ a walɛ ga n sa bumo.

¹⁴ Fo yili kumo n sa bumo fanɛ b baa ta fo kewushiachɛ na fanɛ kachɛ cheembi. Fo daŋ kaŋɛ fo kayɛrbi Mosis nna fanɛ e ŋini bumo fo mbraana na.

¹⁵ Akoŋ ka daŋ pɛ bumo fo sa bumo ajibi nɛ a shi ebɔrɛso nna. Achukoŋ ka daa kɔ bumo, fo daŋ shin nɛ nchu lar kefalta to nna nɛ b nuu. Kumo be kaman nɛ fo kaŋɛ bumo fanɛ b kɔ n suge kasawule nɛ fo nase kumo be kɔnɔ na nna.

^16-17 Ama an nanaana nɛ b la ŋgbene kpakpasowuraana na daa maŋ wora fo kasonu. B daŋ teŋ emamachisheŋ nɛ fo daŋ wora n sa bumo na so nna, nseŋ daŋ yili kumo fanɛ baaŋ bɛta n yɔ Ijipt be efuli so n naŋ ya ki anya ndoŋ. Ama fo, anyi be Ebɔrɛ na bee wu kuwɔr, nsaa ta alubi a paŋ manaŋ manaŋ nna. Fo la alelaworpo nna nsaa kɔ kasha nɛ kanyiti. Jemanɛ nɛ b lɔŋɛ kenabi be kapɔrduli a bunyaŋ kumo na,

¹⁸ fo daa maŋ lar bumo kaman.” B daa tege fo nna a kaŋɛ: “Kegbir nɛ k kɔ n suge anyi ashi Ijipt be efuli so nna na.”

¹⁹ “Ŋkpal fo kuwɔrwu ka shi ga so fo daa ŋini bumo ekpa nna saŋkikɛ, fo alɛ daa maŋ yige bumo n lɛ keshishɛrsawule so. Fo daa bɔla kuwɔlpa so nna a ŋini bumo ekpa kapaso nsaa bɔla edɛ be kabɔlpi so a juŋkpar bumo kanyɛso.

²⁰ Fo Kiyoyu lela e ŋini bumo kusɔ nɛ k daga nseŋ sa bumo ajibi nɛ baa tre manna na nɛ b ji. Kumo be kaman nɛ fo sa bumo nchu nɛ b nuu.

²¹ Fo daŋ keni bumo so nɛnɛ, Nfɛ adena nɛ shɛŋ maŋ tir bumo. Bumo be asɔbuuso daa maŋ wu. Bumo be asɛbta daa maŋ ji, nɛ bumo be aya malɛ daa maŋ puŋi.

²² Fo daŋ chɛ bumo to nɛ b pɔɔ bewura so n suge bumo be nsawule. Hɛshbɔn be efuli so be ewura Sihɔn, nɛ Baashan be efuli so be ewura Ɔg gba daŋ ti bewura nɛ b daŋ pɔɔ so na so nna.

²³ Fo daŋ bar bumo kasawule nɛ fo nase kumo be kɔnɔ n sa bumo nanaana na so nna. Kumo be kaman nɛ fo nɛfa bumo nɛ k wora fanɛ bumo be efuli so be basa ka daa shi a chɔ achɛkpabi nɛ e wɔ awɔlpa to na.

²⁴ Ade kikɛ be kaman nɛ bumo nanaana kɔ n suge Keenanebi be kasawule. Fo e daŋ chɛ bumo to nɛ b kɔ m pɔɔ bewuraana nɛ efuli pɔtɛana so. Fo e shin nɛ b tiŋ n wora bumo doŋana kusɔ kama nɛ baa sha kikɛ.

²⁵ Kumo be kaman nɛ b suge ndegboŋ nɛ egbalana kulti na nɛ adɔsawule nɛ e walɛ. B daŋ suge nwu nɛ basa daa wɔ amo to nɛ atirbu nɛ b kur n laa to a saŋ nchu, nɛ ndibi sɔrso be adɔana, nɛ ɔlifs be ndibi be adɔana nɛ ndibi sɔrso damtaana nna. B daa ji nna a moɛ nseŋ daa ji eyur ŋkpal fo enɛfa damta so.

²⁶ Ade kikɛ be kaman b kraŋ lar fo kaman nseŋ kini kewora fo mbra kasonu. B daŋ mɔ fo anebiana nɛ b daŋ kpele bumo kusoe fanɛ b bɛta m ba fo kutɔ na nna. Kumo be kaman nɛ b shoduu fo ketre.

²⁷ Amoso fo ta bumo nna m bɔɔ bumo doŋana enɔ, nɛ b kɔrfɛ bumo ga. Ama bumo be awurfoŋ na to, b daŋ kule fo fanɛ fo chɛ bumo to nna. Ebɔrɛso nɛ fo wɔ nseŋ nu bumo be kekule, ŋkpal fo kuwɔrwu ka shi ga so, fo daŋ shuŋi bejuŋkparpo nna nɛ b ba kɔ n suge bumo ashi bedoŋ be enɔ to.

²⁸ Ama b baŋ nya kayurwushi, baa kilgi nna a wora alubi a da fo so, nɛ fo naŋ ta bumo m bɔɔ bumo doŋana enɔ. Kumo be kaman nɛ b naŋ kule n fin fo kechɛto, ŋkpal fo kuwɔrwu ka shi ga so, fo naŋ laŋɛ m mɔlga bumo.

²⁹ Fo kpele bumo kusoe fanɛ b bɛ fo keŋini so ama ŋkpal bumo be kamoowuso, b kini kebɛ fo mbra na so amo nɛ esa beeŋ bɛ so nseŋ nya kebaawɔtɔ lela, ama ŋkpal bumo be ŋgbene kpakpaso so b kini kewora fo kasonu.

³⁰ Nfɛ damta nɛ fo kpele bumo kusoe kanyitiso, fo Kiyoyu malɛ bɔla anebiana so m malga kenishipereso n sa bumo, ama b kini kenu n sa fo. Amoso nɛ fo ta bumo bɔɔ bumo doŋana enɔ na.

³¹ Ŋkpal fo kuwɔrwu kaa shi ga so, fo maŋ pal kaman n sa bumo ŋko m mur bumo na, ŋkpal manɛ so, fo la kuwɔrwu be Ebɔrɛ nna.

³² O, anyi be Ebɔrɛ mo nɛ eleŋ kikɛ bɔɔ fo enɔ, nɛ fo asheŋ kɔ kufu; fo maa lar fo kamalga kaman kikɛ, kasha malɛ bɔlɔ fo to kiŋkiŋ. Nyiŋi awurfoŋ nɛ k ba anyi nɛ anyi be bewura nɛ bejuŋkparpo nɛ bɔrɛmatapoana nɛ anebiana nɛ an nanaana nɛ anyi be basa kikɛ so, yili Asiriya be ewura be jemanɛ kikɛ so m ba fo kabre.

³³ Fo kɔ ekpa nɛ fo tɔrɔ anyi ŋkpal fo kashenteŋ so, ama fo yige alubi nɛ an wora ere kikɛ m paŋ anyi.

³⁴ Anyi be bewura nɛ bejuŋkparpo nɛ bɔrɛmatapoana nɛ an nanaana maŋ bɛ fo mbra nɛ mmalga kpakpaso mo nɛ fo ŋini bumo fanɛ b bɛ so na so.

³⁵ Ŋkpal fo nɛfa nɛ fo daŋ ta n sa fo basa so bewura e daa juŋkpar bumo. Loŋ be saŋɛ na, nɛ b daa wɔ kasawule nɛ fo ta n sa bumo na so, ama b kini nsaa wɔ kulubi to.

³⁶ Kabre an ki anya ashi kasawule lela nɛ fo ta n sa an nanaana fanɛ b baa ji kumo be tɔnɔ na; an ki anya kashenteŋto.

³⁷ Kasawule na malɛ be asɔrso lela kikɛ ki bewura nɛ fo lara fanɛ b baa ji kuwura anyi so ŋkpal anyi be alubi so na peya nna; bumo alɛ naa ji eleŋ anyi nɛ anyi be asɔbɔya so, ŋkpal loŋ so an wɔ kagbenejija to nna.”

³⁸ Ŋkpal le so an sibɛ ŋkre kpakpaso n nase, nɛ anyi be bejuŋkparpo nɛ Livaiebi nɛ bɔrɛmatapoana shuli so nɛ ŋkre na yili.