Nehemaya 8 - EBƆRƐ BE KAWƆL

Ɛzra ka kraŋ mbra na n sa basa na be asheŋ

¹ Afɔl ashunu nɛ Israɛlebi na daŋ ta n chena bumo be ndeana to n loge. Kufɔl shunusopo na to be kachɛ sososo na nɛ bumo kikɛ gama abar so ashi Jerusalɛm be kadegboŋ na to be kelɔnɛ nɛ k dese kabuna nɛ baa tre Nchu be Kabuna na ase. Kumo be kaman nɛ b kaŋɛ bɔrɛmatapo Ɛzra, nɛ e daa ŋini mbra nɛ Ebɔrɛ daŋ bɔla an nananyɛn Mosis so n ta n sa Israɛlebi na, fanɛ e ya ta mbra be kawɔl na m ba.

² Ndoŋ nna nɛ Ɛzra ya ta mbra be kawɔl na m ba. Benyɛn nɛ beche nɛ mbia nɛ baa pin asheŋ to na kikɛ e daŋ shɛr ndoŋ.

³ Yili kachipurdidi n ya fo kapiidi nɛ e yili kelɔnɛ nɛ k mata kabuna so a kraŋ mbra be kawɔl na a sa basa na nɛ baa nu kumo nɛnɛ.

⁴ B daŋ ta ndibi n yuu kejaŋ nna nɛ Ɛzra yili kumo so loŋ be kachɛ nna. Basa nɛ b daa yil mbe jisoso a la Mattitia nɛ Shema nɛ Anaya nɛ Yuriya nɛ Hilkiya nɛ Maseya. Bumo nɛ bumo alɛ daa yil mbe bena so malɛ e daa la Pedaya nɛ Mishaal nɛ Malkiya nɛ Hashum nɛ Hash Badaana nɛ Zakareya nɛ Mɛshulam.

⁵ Ɛzra daŋ yili kejaŋ jeŋgreŋ na so nna a keni basa na kaseto nɛ bumo alɛ gba be anishi yuu mo so. E ka bugi kawɔl na to a kraŋ na kikɛ nɛ basa na kikɛ yil nna.

⁶ Ɛzra ka kraŋ kawɔl na n loge nɛ e kaŋɛ: “Kemaŋkura e baa la Enyɛnpe Ebɔrɛ nɛ e shi ga na peya!” Nɛ basa na kikɛ maŋ bumo be enɔana esoso nseŋ shuli so ŋ kaŋɛ: “Amɛn! Amɛn!” Kumo be kaman nɛ b gbir ŋ kurgi bumo be amu n yuu to m bunyaŋ Enyɛnpe Ebɔrɛ na.

^7-8 B ka wora loŋ n loge nɛ b koso n yili nɛ Joshuwa nɛ Bani nɛ Sherebia nɛ Jamin nɛ Akkub nɛ Shebataya nɛ Hodia nɛ Maaseia nɛ Kɛlita nɛ Azariya nɛ Jozabad nɛ Hanan nɛ Pɛleeyaa nɛ b la Livaiebi na luri basa na to n ya kaa kute mbra nɛ Ɛzra kraŋ na be afito a ŋini bumo.

⁹ Basa na ka nu kusɔ nɛ mbra na bee kaŋɛ na nɛ k luri bumo to ga nɛ b fara a shu. Amoso Nehemaya nɛ e daa la gomena na nɛ bɔrɛmatapo Ɛzra nɛ e la mbra na be eŋinipo na nɛ Livaiebi nɛ baa kute mbra na be afito a sa basa na kaŋɛ: “Kabre la kachɛ cheembi nna n sa Enyɛnpe menyi be Ebɔrɛ na. Amoso k maŋ daga fanɛ men baa shu a wora kuwɔr be asheŋ.”

¹⁰ Kumo be kaman nɛ Nehemaya kaŋɛ basa na: “Naniere men yɔ epe n ya wora kejigboŋ n ji menyi be nnɔ nseŋ ku ajibi na be ako n sa bumo nɛ b maŋ kɔ shɛŋ nɛ b ji na. Kabre la kachɛ cheembi nna n sa Enyɛnpe anyi be Ebɔrɛ na. Amoso men sa maŋ shin nɛ men be ŋgbene a baa jija menyi. Enyɛnpe Ebɔrɛ beeŋ sa menyi kagbenefuli nɛ k beeŋ sa menyi eleŋ.”

¹¹ Ndoŋ nna nɛ Livaiebi na bee nite a kulti a leŋ basa na to fanɛ b yige kushu n saa maŋ shin nɛ bumo be ŋgbene e baa jija bumo kachɛ cheembi ere.

¹² Kumo be kaman nɛ basa na kikɛ lar n yɔ bumo peana n ya ji nseŋ nuu kagbenefuliso Bumo alɛ daŋ chige ajibi nɛ asɔnuuso nna n sa beko, ŋkpal manɛ so, b pin kusɔ nɛ mbra nɛ b kraŋ n sa bumo na bee ŋini.

Kebaawɔ Abuu to be Kachɛgboŋ na be asheŋ

¹³ Kumo be ŋklade nɛ nnaŋ to be benimuana na kikɛ, nɛ bɔrɛmatopoana na nɛ Livaiebi na yɔ Ɛzra kutɔ nɛ e ya ŋini bumo mbra na.

¹⁴ B ba pin fanɛ mbra nɛ Ebɔrɛ bɔla bumo nananyɛn Mosis so n sa bumo na bee ŋini fanɛ jemanɛ kama nɛ baa ji Abuu to be Kachɛgboŋ na kufɔl shunusopo na to na, a daga fanɛ b baa yuu abuu nɛ a maa chɛr nsaa wɔ amo to hale nɛ kachɛgboŋ na e fo ekar.

¹⁵ Bumo alɛ daŋ naŋ koya fanɛ a daga fanɛ b ber kebomboŋ efuli na kikɛ so fanɛ b yɔ kupuŋ to n ya ku ndibi nɛ amo be afantaŋ maa gbaŋgbaŋ fanɛ ɔlifdibi nɛ ŋkubadibi be ayabi m ba yuu abuu na.

¹⁶ Ndoŋ nna nɛ basa na ya ku ndibi nɛ amo be afantaŋ maa gbaŋgbaŋ na be ayabi m ba yuu abuu bumo be achoŋiana so nɛ bumo be elaŋ to be alɔnɛ so nɛ bɔrɛlambu na be kelɔnɛ so nɛ alɔnɛ nɛ a dese m mata mbuna nɛ baa tre Nchu be Kabuna nɛ Efrayim be Kabuna ase na so.

¹⁷ Bekama nɛ b shi Babilɔn be kadegboŋ na to m bɛta m ba daŋ yuu abuu nna a wɔ amo to a ji Abuu to be Kachɛgboŋ na kagbenefuliso nna. Ŋkpal manɛ so, yili Nun pibinyɛn Joshuwa, nɛ e fara n juŋkpar Israɛlebi na ŋ kɔ n sɔ kasawule na be jemanɛ na kikɛ b maŋ daŋ naŋ ji kachɛgboŋ na kikɛ ama loŋ be kachɛ na.

¹⁸ Baŋ yili kachɛ nɛ b fara kachɛgboŋ na be keji n ya fo kumo be kachɛ shunusopo na, Ɛzra daa kraŋ mbra be kawɔl na nna a sa basa na karechɛ kikɛ. Kachɛ burwasopo na nɛ ekama gama abar so nɛ b bunyaŋ Ebɔrɛ, fanɛ kananɛ mbra na ŋini na.