Nehemaya 6 - EBƆRƐ BE KAWƆL

Kananɛ baa kre Nehemaya nia lubi be asheŋ

¹ Sanballat nɛ Tobaya, nɛ Geshɛm nɛ an doŋana nɛ b ka na be beko nu fanɛ an pɔr egbal na n loge. Kusɔ nɛ an daa maŋ wora e la akuloŋ na be keta n wɔtɔ mbunaana na to.

² Ŋkpal Sanballat nɛ Geshɛm ka bee sha fanɛ b tɔrɔ ma so, b ta kubɔya nna n shoŋi ma fanɛ m ba nɛ ma nɛ bumo e wu abar ashi ndebiana nɛ e wɔ kakpa nɛ baa tre Ono be Ketaŋɛ na be kuko to.

³ Nɛ ma alɛ shuŋi mbɔ ŋ kaŋɛ bumo le: “Ŋ kɔ kushuŋ kpakpaso nna a wora, amoso m maaŋ tiŋ n yɔ ndoŋ. M maaŋ tiŋ ŋkpal ma nɛ menyi be kewu abar so n yige kushuŋ ere.”

⁴ Ale ana nɛ b kela n tre ma, ama saŋkama kamalga koŋwule na nɛ ma alɛ bee kaŋɛ bumo.

⁵ Ndoŋ nna nɛ Sanballat naŋ shuŋi krachi ko fanɛ e ta kawɔl m ba sa ma.

⁶ Le nɛ kawɔl na bee kaŋɛ: “Geshɛm kaŋɛ ma fanɛ basa bee kuli a malga asheŋ ko a kaŋɛ fanɛ fo nɛ fo basa bee kre anyi nia nna nɛ men lar Pɛshiya be efuli so be ewurgboŋ na kaman. Aloŋ malɛ so nɛ fee lɔŋɛ a pɔr egbal na. Mo alɛ naa kaŋɛ gba fanɛ fee sha keta fo kumu nna ŋ ki Jerusalɛm be ewura.

⁷ E naŋ kaŋɛ gba fanɛ fo nɛ anebiana ko wora kɔnɔkoŋwule nna fanɛ b baa malga a sa Jerusalɛm be kade to ebi fanɛ fo e la Juda be ewura. Kesheŋ ere la kusɔ nɛ Pɛshiya be ewurkpa ebi na tiŋ n nu nna, kumo so nɛ mee bar nfɛra fanɛ k daga fanɛ ma nɛ fo e chena m malga nɛnɛ a laŋɛ kumo be kaplɛa so na.”

⁸ Kumo be kaman nɛ ma alɛ sa mo ebɔl nseŋ kaŋɛ mo le: “Kashenteŋ maŋ wɔ kusɔ nɛ fee kaŋɛ ere to kikɛ. Fo gbagba be keblɔmbi nɛ fo wora na.”

⁹ B daa sha fanɛ b funti anyi nna nɛ an sa maŋ tiŋ n loge kushuŋ na. Nɛ ŋ kule Ebɔrɛ ŋ kaŋɛ le: “Ebɔrɛ sa ma eleŋ naniere!”

¹⁰ Kachako nɛ n yɔ nɛ n ya bɔɔ Delai pibinyɛn Shemaya nɛ e la Mehetabel mo nanabi nyɛnso nɛ e daŋ shir a wɔ mbe laŋ to na so nɛ e kaŋɛ ma le: “A daga fanɛ ma nɛ fo ka ŋana bɔrɛlambu na be kakpa cheembi na nseŋ ti akuloŋ, ŋkpal fo doŋana kaa bee sha fanɛ b mɔ fo na so. Baŋ yili kanyɛ ere a yɔ baŋ ba mɔ fo.”

¹¹ Ndoŋ nna nɛ ŋ kaŋɛ: “Ma ere maŋ la basa nɛ baa shile a ŋana na be ako nna. Fee fɛ nna fanɛ meeŋ shile ŋ ŋana bɔrɛlambu ere to nna ŋkpal ma kumɔlga so a? M maaŋ wora loŋ kikɛ.”

¹² Ŋ ka lɔŋɛ n fɛ kesheŋ ere be nfɛra nɛnɛ na nɛ n pin fanɛ Ebɔrɛ maŋ malga Shemaya kutɔ, ama Tobaya nɛ Sanballat e daŋ sa mo brɔbu nseŋ kaŋɛ mo fanɛ e kpele ma kusoe.

¹³ B daŋ ber mo paa nna fanɛ e funti ma nɛ n wora kulubi, saŋɛ na so ma ketre beeŋ jija nɛ anishinyɔr e pɛ ma.

¹⁴ Ndoŋ nna nɛ ŋ kule Ebɔrɛ le: “Ebɔrɛ nyiŋi kusɔ nɛ Tobaya nɛ Sanballat wora nɛ anebiche nɛ baa tre Nodaya nɛ anebiana nɛ b ka na be kananɛ b fin ekpa nɛ b funti ma. Jande gberge bumo kikɛ kusoe n sa ma.”

Kushuŋ na be lalaloge be asheŋ

¹⁵ Nchɛ adunu nɛ anyɔ nɛ an ta m pɔr Jerusalɛm be egbalana na n loge. Juwebi be kufɔl nɛ baa tre Elul na be kachɛ adunyɔ nɛ anusopo na nɛ egbal na be kushuŋ loge.

¹⁶ Anyi doŋana nɛ b wɔ efuli pɔtɛ so na ka nu loŋ nɛ kufu pɛ bumo, ŋkpal ekama na ka pin fanɛ Ebɔrɛ be kechɛto so nɛ kushuŋ na tiŋ n loge.

¹⁷ Loŋ be jemanɛ na so Juda be bejuŋkparpoana na nɛ Tobaya e daa sibɛ nwɔl a shoŋi abar.

¹⁸ Basa damta daa yil Tobaya be kaman nna ŋkpal Ara pibinyɛn, Shekanaya ka la mo shanyɛn so. Kusɔ nɛ k naŋ ti so e la fanɛ mo pibinyɛn Jehohanan e ta Berekia pibinyɛn, Mɛshulam pibiche a kil.

¹⁹ Basa bee kaŋɛ ma ashuŋ lela nɛ Tobaya bee wora kikɛ nna saŋɛ na so baaŋ nu ma kɔnɔ to be kamalga n ya kaŋɛ mo. Saŋkama mo alɛ bee sibɛ nwɔl nna a funti ma.