Nehemaya 5 - EBƆRƐ BE KAWƆL

Kananɛ betirpo bee wu tɔrɔ be asheŋ

¹ Jemanɛ ko ka fo nɛ benyɛn nɛ beche na be beko fara a fubel a bile asheŋ a malga a gbiti bumo braana.

² Le nɛ beko daa kaŋɛ: “Nnaŋgboŋ nɛ anyi be beko kɔ a bela. Ayu damta nɛ e daga fanɛ an nya a ji nseŋ tiŋ a wɔ ŋkpa to.”

³ Nɛ beko malɛ kaŋɛ le: “Akoŋ be jemanɛ na, anyi be adɔsawule nɛ ndibi sɔrso be adɔ nɛ nwu nɛ an daŋ ta n yili tarma nseŋ nya ayu n ji.”

⁴ Kumo be kaman nɛ beko malɛ kaŋɛ le: “An paŋ amansherbi nna pɔɛŋ nseŋ tiŋ ŋ ka anyi be adɔsawule nɛ ndibi sɔrso be akɔ n sa ewura.

⁵ Anyi alɛ gba la Juwebi nna, nɛ anyi be mbia nɛ bumo be mbia kikɛ la kukoŋwule. Ama anyi ere bee fa anyi be mbia nna nɛ baa ki anya. Naniere anyi maŋ naa kɔ kechɛto kikɛ be tama ŋkpal an ka ta anyi be adɔsawule nɛ ndibi sɔrso be adɔana ŋ n chɛr ayu so.”

⁶ Ŋ ka nu b kaa bee fubel a bile asheŋ na nɛ agbo pɛ ma ga.

⁷ Ndoŋ nna nɛ n fɛ kumo be asheŋ nseŋ kaŋɛ bejuŋkparpoana na nɛ ekrachiana na le: “Manɛ nna nɛ menyee paŋ menyi be basa gbagba amansherbi nsaa wɔtɔ bumo nchu? Kumo be kaman nɛ n tre ekama n shɛr nseŋ malga ŋ gbiti bejuŋkparpoana na ŋ kaŋɛ bumo le,

⁸ An wora ania n tɔ anyi be basa nɛ b pɛ anya n yɔ efuli pɔtɛana so na m bɛta m ba. Ama naniere menyi e naa fa bumo be bedamta na, nɛ an naŋ ya tɔ bumo!” Ekrachi na nɛ bejuŋkparpoana na daa maŋ kaŋɛ shɛŋ, ŋkpal b ka nyi k kaa la kashenteŋ so.

⁹ Ndoŋ nna nɛ n naŋ kaŋɛ le: “Kusɔ nɛ men wora na maŋ daga kuraa! A daga fanɛ anyi be kebaawɔtɔ e baa sa Ebɔrɛ bunyaŋ, saŋɛ na so nnyamase na maaŋ wu kulubi anyi to.

¹⁰ Naniere n shin nɛ basa na paŋ amansherbi nɛ aboyu ma kutɔ nna. Nteriana nɛ basa nɛ baa shuŋ a sa ma na gba ti so. Naniere men shin nɛ an kikɛ e ta asɔ nɛ b paŋ anyi na ŋ kɛ bumo.

¹¹ Men yige menyi be akɔ kama nɛ b ji na ŋ kɛ bumo, hale nɛ a la amansherbi ŋko aboyu ŋko asɔnuuso ŋko ɔlif be ŋku gba. Men bɛta bumo be nsawule nɛ ndibisɔrso be adɔana nɛ ɔlif be ndibi be mboŋana nɛ bumo be elaŋana n sa bumo manaŋ.”

¹² Nɛ bejuŋkparpo na kaŋɛ le: “Kusɔ kama nɛ fo kaŋɛ, anyeeŋ wora loŋ. Anyi beeŋ ta bumo be mpetɛ n sa bumo, anyi alɛ maŋ naŋ bishi bumo anyi be akɔ nɛ b ji na gba.” Ndoŋ nna nɛ n tre bɔrɛmatapoana na nseŋ shin nɛ bejuŋkparpoana na nase kɔnɔ bumo be anishito saŋɛ na so baaŋ bɛ bumo be nnɔ nɛ b nase na so.

¹³ Kumo be kaman nɛ n saŋɛ kreso nɛ n ta n chɛ ma kashɛr to na nseŋ gbaŋgbaŋ kumo to a ŋini fanɛ loŋ nɛ Ebɔrɛ beeŋ gbaŋgbaŋ bekama nɛ b maa bɛ bumo be nnɔ nase so so na. Kumo alɛ be kaman nɛ ŋ kaŋɛ le: “Ebɔrɛ beeŋ sɔ men be ebuana nɛ kusɔ kama nɛ men kɔ, saŋɛ na so, men maa naa kɔ shɛŋ.” Ndoŋ nna nɛ bekama nɛ b daa wɔ ndoŋ na shuli so ŋ kaŋɛ: “Amɛn!” Kumo be kaman nɛ b di Enyɛnpe Ebɔrɛ na epaŋ. Ade kikɛ be kaman nɛ bejuŋkparpoana na bɛ bumo be nnɔ naseso so.

Nehemaya ka maa fɛ mo nawule be asheŋ

¹⁴ Atazɛzɛs ka ji kuwura be nfɛ adunyɔ n ya fo nfɛ adesa nɛ anyɔsopo to nɛ ma e la Juda be efuli so be gomena. Nfɛ kuduanyɔ nɛ n la gomena na kikɛ, ma ŋko ŋkurgepoana maŋ sɔ ajibi nɛ a daga ma fanɛ gomena na.

¹⁵ Egomena kama nɛ b juŋkpar na daa tɔrɔ basa na nna ga. B daa sɔ gbiti be ndarbi adena nna a tɔ ajibi nɛ asɔnuuso karechɛ kikɛ nna. Bumo be nyɛrbi gba daa tɔrɔ basa na nna, ama ŋkpal ma ere ka bee ŋana Ebɔrɛ na so nɛ ma kebaawɔtɔ daa kɔr bumo to na.

¹⁶ Ma ere ta ma eleŋ kikɛ nna n wɔtɔ egbal na be kepɔr to nsaa maa fin shɛŋ kumo to. Ma alɛ maŋ tɔ nsawule ŋko nwu n sa ma kumu. Bekama nɛ bumo alɛ bee shuŋ a sa ma na kikɛ chɛ to nna m pɔr egbal na.

¹⁷ Basa nɛ b shi efuli pɔtɛana so m baa kaa chɔrɔ ma na be kaman, Jerusalɛm to be basa kalfa nɛ adunu nɛ bumo be bejuŋkparpo nɛ n daa sa ajibi.

¹⁸ Karechɛ kama mee sa kena koŋwule nɛ mbolpɔ lela ashe nɛ ŋkoshi damta nɛ ajibi nna, nsaa chige asɔnuuso popɔr nchɛ kudu kikɛ. Ama ade kikɛ be kaman n nyi asheŋ kpakpaso nɛ a beeŋ ba basa na so, amoso n daa maa sɔ gomena be kakɔka.

¹⁹ O Ebɔrɛ, mee kule fo nna nɛ fo nyiŋi kusɔ nɛ n wora n sa basa ere nseŋ nɛfa ma.