Nehemaya 4 - EBƆRƐ BE KAWƆL

Kananɛ Nehemaya pɔɔ bedoŋ so be asheŋ

¹ Sanballat, nɛ e la Samɛria be efuli so be gomena na, ka nu fanɛ anyi Juwebi na fara a pɔr Jerusalɛm be egbalana na, nɛ e nya agbo nseŋ fara a wora anyi be basa eyurto.

² Le nɛ e kaŋɛ mo braana nɛ Samɛria be benapo be anishito: “Manɛ nɛ Juwebi, basa pɔso be katuŋ ere bee fɛ fanɛ baa wora ere? Baa sha keta kachɛ koŋwule nna n lɔŋɛ egbal na m pɔr nseŋ lara esarga loŋ be kachɛ koŋwule na gbagba a? Baa fɛ fanɛ baaŋ tiŋ n ta ajembu nɛ a chɔɔ m biti abar so ere n lɔŋɛ kusɔ ko a?”

³ Jemanɛ na so nɛ Tobaya nɛ e shi Ammɔn be efuli so na yil mo kutɔ, nseŋ kaŋɛ le: “Nuso bre be egbal nɛ baa sha kepɔr ere? Jiŋkaamu gba beeŋ tiŋ ŋ ŋin kumo n lɛ!”

⁴ Ama n daŋ kule Ebɔrɛ nna ŋ kaŋɛ: “O Ebɔrɛ, basa ere kishi anyi nna nsaa sha fanɛ asheŋ lubi e tu anyi. Jande nu anyi be kekule nseŋ shin nɛ bumo be katege na e laŋɛ bumo be amu so! Shin nɛ b baa la basa nɛ bumo doŋana beeŋ pɛ bumo kena to ŋ gberge bumo n yɔ kabuti to.

⁵ Sa maŋ kaŋ ta bumo be alubi nɛ kekeni jiga nɛ b keni bepɔrpo na m paŋ bumo kikɛ.”

⁶ Beshumpo na daŋ shuŋ ga nɛ an naŋ pɔr Jerusalɛm be egbal na n fo nferinto.

⁷ Sanballat nɛ Tobaya nɛ Nlɔrbu na nɛ Ammɔnebi na nɛ basa nɛ b shi kadegboŋ nɛ baa tre Ashdɔd na daŋ wu fanɛ egbal na daa dii nna a shin nɛ k shɛrto. Amoso b daŋ nya agbo nna,

⁸ nseŋ daŋ kre fanɛ baaŋ bar kebagato nseŋ kɔ Jerusalɛmebi na.

⁹ Ama an kule anyi be Ebɔrɛ nseŋ lara benapo nɛ b baa keni so nsaa kuŋ egbal na kapa nɛ kanyɛ kikɛ.

¹⁰ Loŋ be jemanɛ na nɛ Juda be basa na daa kɔ bumo be kashɛ ko a boŋ nɛ k bee keta kebɔltofinfin. B yɛ: “An gben a chul to ŋkpal an ka sulɔ esulɔ gbɛgbɛso so. Ajembu burtoso na shi ga n sa anyi nɛ an sulɔ n ya lɛ. Nuso nɛ anyeeŋ wora n tiŋ m pɔr egbal na n loge kabre?”

¹¹ An doŋana malɛ daŋ naa kaŋɛ le nna: “Pɔɛŋ nɛ Jerusalɛm be basa ere e pin kusɔ nɛ k bee wora na, nɛ an ŋana n ya mɔ bumo kikɛ nɛ bumo be kushuŋ na e ba ekar.”

¹² Ama ale kudu kikɛ nɛ Jerusalɛm be basa nɛ b daŋ wea anyi doŋana to n chena na kpele anyi kusoe a laŋɛ kusɔ nɛ an doŋana na bee kre kewora anyi be kaplɛa so.

¹³ Amoso nɛ n ta etokobi nɛ ekpa nɛ ata nɛ atanyembi n sa ma basa nseŋ gama bumo kakurge be ntuŋso a mata egbal na be kaba nɛ k maŋ naŋ pɔr n loge na nɛ b baa kuŋ.

¹⁴ Kumo be kaman nɛ n wu fanɛ basa na be ŋgbene jija bumo, nɛ ŋ kaŋɛ bumo nɛ bumo be bejuŋkparpo nɛ ekrachi na le: “Men sa maa ŋana anyi doŋana ere. Men baa nyiŋi kananɛ Enyɛnpe na be eleŋ shi ga nɛ kananɛ mbe asheŋ bee keta kufu. Amoso men leŋ menyi be amu to nseŋ kɔ kenishipereso n sa menyi be basa nɛ mbia nɛ beche nɛ elantoebi!”

¹⁵ An doŋana daŋ mige to m pin fanɛ an nyi ŋkre lubi nɛ baa kre a laŋɛ anyi be kaplɛa so na kikɛ. Ebɔrɛ malɛ daŋ jija bumo be ŋkre na nna. Amoso anyi kikɛ naŋ bɛta n yɔ egbal na be kelɔŋɛ m pɔr to nna.

¹⁶ Yili loŋ be jemanɛ na mbrantiɛbia na be bargato bee shuŋ nna nɛ bargato malɛ e buu anyɛn kale gbɛgbɛso nseŋ keta ekpa nɛ abɛlso be asɔ kuŋ eyur so nɛ ata nɛ atanyembi a yil a kuŋ. Anyi be benapo be benimuana na malɛ daa yili bepɔrpo na be kaman nna.

¹⁷ Basa nɛ b daa sulɔ kapɔr be asɔ na be ekama daŋ keta kekɔsɔ enɔ koŋwule to nna nseŋ ta enɔ koŋwule malɛ m pɛ asɔ na to.

¹⁸ Bepɔrpo na malɛ ta etokobi nna n wɔtɔ efar to n chɛ bumo be nshɛr to. Esa nɛ e beeŋ foŋ kabel n juge anyi na bre daa wɔ ma kutɔ nna.

¹⁹ Kumo be kaman nɛ ŋ kaŋɛ basa na nɛ bumo be ekrachi nɛ bejuŋkparpoana na le: “Ŋkpal anyi be kushuŋ na ka barga to a wɔ mboŋ damta so, an barga abar nna ga.

²⁰ Men baŋ nu kabel na be kushu, men wora manaŋ m ba shɛr ŋ kulti ma. Anyi be Ebɔrɛ na beeŋ chɛ anyi to ŋ kɔ.”

²¹ Amoso anyi bee wule a koso kachipurdidi nna a shuŋ egbal na be kushuŋ hale nɛ kanyɛ e ya biri. Basa na be bargato bee shuŋ nna nɛ bargato malɛ e keta bumo be ekpa a yil a kuŋ.

²² Loŋ be jemanɛ nɛ ŋ kaŋɛ basa nɛ baa keni beshumpo na so na nɛ bumo be beshumpo kikɛ fanɛ baa b wɔ Jerusalɛm be kadegboŋ na to kanyɛso kikɛ nsaa keni so a kuŋ kade na. Amoso b daa shuŋ kapaso nna nsaa keni kade na so a kuŋ kumo kanyɛso malɛ.

²³ Ma nɛ m braana nɛ beshumpo na nɛ bekumpo na kikɛ maa lara anyi be asɔbuuso kanyɛso nsaa dese. Anyi alɛ kikɛ maa shin nɛ anyi be akɔsɔ bee barga anyi kikɛ.