Nehemaya 3 - EBƆRƐ BE KAWƆL

Jerusalɛm be egbalana be kelɔŋɛ m pɔr be asheŋ

¹ Kananɛ b lɔŋɛ m pɔr Jerusalɛm be egbalana na nde. Bɔrɛmatapo nimuso Eliyashib nɛ mo braana bɔrɛmatapoana na e lɔŋɛ kakpa nɛ baa tre Mbolpɔ be Kabuna ekpa na m pɔr nseŋ wɔtɔ kumo akuloŋ. Kumo be kaman nɛ b yili ndoŋ n ta egbal na be mba nɛ baa tre Ebu jeŋgreŋ Kalfa nɛ Hanamɛl be Ebu jeŋgreŋ na kikɛ m bɔɔ Ebɔrɛ enɔ.

² Jɛriko be kadegboŋ na be basa malɛ e shi ndoŋ m ba lɔŋɛ m pɔr egbal na be kaba nɛ k bɛ so na. Zakuur nɛ e la Imri pibinyɛn e pɔr kaba nɛ kumo alɛ naŋ bɛ so na.

³ Hassina be kaman to ebi e lɔŋɛ m pɔr kaba nɛ baa tre Kɔrɔtɔ be kabuna ekpa na. B daŋ ta mbunagboŋ na be ndibi nna n wɔtɔ nseŋ gbir akuloŋ na n wɔtɔ. Kumo be kaman nɛ b gbir abɛlso m mata akuloŋ na so nsaa ta ndibi gbɛgbɛso a kɔl amo to a ber so.

⁴ Yuraya pibinyɛn, Mɛremɔf nɛ mo nananyɛn la Hakɔz na, e lɔŋɛ m pɔr egbal na be kaba nɛ k bɛ so na. Bɛrekaya pibinyɛn, Mɛshulam nɛ mo nananyɛn daa la Mɛshezabel na malɛ e lɔŋɛ m pɔr egbal na be kaba nɛ k bɛ so na nɛ Baana pibinyɛn Zadɔk malɛ lɔŋɛ m pɔr kaba nɛ k wɔ kumo alɛ be kekel to na.

⁵ Tekua be kade to ebi e daŋ daga fanɛ b lɔŋɛ m pɔr kaba nɛ k bɛ so na, ama bumo be bejuŋkparpoana na bre kini fanɛ b maaŋ shuŋ kushuŋ kpakpaso nɛ benimu nɛ baa keni beshumpo na so na sa bumo na.

⁶ Pasea pibinyɛn Jowada nɛ Besodaya pibinyɛn Meshulam e lɔŋɛ m pɔr kabunagboŋ nɛ baa tre Jeshana be kabuna na. B daŋ ta mbuna be ndibi na nɛ amo be akuloŋ ana nna n wɔtɔ amo be kakpa nseŋ naŋ ta abersobi na malɛ gba n wɔtɔ akuloŋ ana na to nseŋ ta ndibi gbɛgbɛso ŋ kɔl amo to m ber so.

⁷ Melataya nɛ e shi Gibiɔn be kade to nɛ Jadon nɛ e shi Mɛronɔt be kade to na, n ta basa nɛ b shi Gibiɔn nɛ Mizpa be ndeana to na e lɔŋɛ m pɔr egbal na be kaba nɛ k bɛ so na. B daŋ pɔr hale n fo Yufreetes be epeŋitɔrkpa be kebonfu na be gomena be kowu ekpa nna.

⁸ Haahaya pibinyɛn Uziɛl nɛ e la shuwa be bɔyɛpo na e lɔŋɛ m pɔr egbal na be kaba nɛ k bɛ so na. Hananaya nɛ e bee lɔŋɛ etulale na malɛ e lɔŋɛ m pɔr kaba nɛ k wɔ a yɔ egbal kpaŋgalaŋ na akpa.

⁹ Hur pibinyɛn Refaya nɛ e daa keni Jerusalɛm be kebonfu be bargato na so na malɛ e lɔŋɛ m pɔr egbal na be kaba nɛ k bɛ so na.

¹⁰ Egbal na be kaba nɛ k bɛ so na daŋ mata Harumat pibinyɛn Jadaya be laŋ nna nɛ e lɔŋɛ m pɔr ndoŋ be egbal na. Hashabnaya pibinyɛn Hatush malɛ e lɔŋɛ m pɔr kaba nɛ k bɛ so na.

¹¹ Ndoŋ nna nɛ Harim pibinyɛn Malkija nɛ Pahaf Mowab pibinyɛn Hashuub malɛ lɔŋɛ m pɔr mba anyɔ nɛ a bɛ so na nɛ bodobodo be ebu Jeŋgreŋ na gba n ti so.

¹² Halohɛsh pibinyɛn Shalum, nɛ e daa keni Jerusalɛm be Kebonfu nyɔsopo na so na nɛ mbe mbichesobiana e lɔŋɛ m pɔr egbal na be kaba nɛ k bɛ so na.

¹³ Hanuun nɛ basa nɛ b wɔ Zanua be kade to e lɔŋɛ m pɔr Ketaŋɛ be kabuna na akpa. B daŋ wɔtɔ akuloŋ mbunagboŋ na to nna nseŋ ta abersobi n wɔtɔ amo to nseŋ ta ndibi gbɛgbɛso ŋ kɔl amo to m ber so. B daŋ lɔŋɛ egbal na m pɔr n fo fanɛ ayadra alfa ana nɛ adena nna hale n ya fo Epi be kabuna na ase.

¹⁴ Rekkab pibinyɛn Malchija nɛ e daa keni Bɛf Hakkerɛm be kebonfu so na e daŋ lɔŋɛ m pɔr Epi be Kabuna ekpa na be egbal. E daŋ ta mbuna na be akuloŋ ana kikɛ nna n wɔtɔ mbuna na to nseŋ ta abɛlso be abersobi malɛ gba m mata amo so nseŋ ta ndibi gbɛgbɛso ŋ kɔl amo to m ber so.

¹⁵ Kolhoze pibinyɛn Shalum, nɛ e daa keni Mizpa be kebonfu so na e daŋ lɔŋɛ m pɔr Kuchubu be Kabuna ekpa na. E daŋ ta kusɔ nna n ti mbuna na. Kumo be kaman nɛ e wɔtɔ akuloŋ nɛ amo be abɛlso be abersobi nseŋ ta ndibi gbɛgbɛso m ber amo so. Mo koŋwule na e daŋ lɔŋɛ m pɔr egbal nɛ k wɔ kakpa nɛ baa tre Shɛla be Kepa na. K daŋ mata ewura be kambɔl na nna nseŋ ta hale n ya fo atemprembi nɛ e dii a yɔ ewura Deevid be kadegboŋ na to na.

¹⁶ Azbuk pibinyɛn Nehemaya nɛ e daa keni Bet Zur be kebonfu na be bargato so na malɛ e lɔŋɛ m pɔr egbal nɛ k bɛ so na, hale n ya fo kakpa nɛ baa puli bewura nɛ baa tre ndoŋ ewura Deevid be nchaŋ ase nɛ kepa nɛ b kur na nɛ benapo be echenakpa na ase.

Livaiebi nɛ b shuŋ egbal na be kushuŋ na be asheŋ

¹⁷ Livaiebi nɛ b lɔŋɛ m pɔr egbal na n chɔga so na e daa la Bani pibinyɛn Rehum nɛ Hashabia nɛ e daa keni Keyila be kebonfu be bargato so na. Mo ere daŋ yili mbe kebonfu be katelamu to n shuŋ kushuŋ na nna.

¹⁸ Henadad pibinyɛn Bavai nɛ e daa keni Keyila be kebonfu be bargato nɛ k ka na so na malɛ e lɔŋɛ m pɔr egbal na be kaba nɛ k bɛ so na.

¹⁹ Joshuwa pibinyɛn Eza nɛ e daa keni Mizpa be kade so na e daŋ lɔŋɛ m pɔr kaba nɛ k wɔ kakpa nɛ b daa yili benapo be akɔsɔ na be anishito hale n ya fo kakpa nɛ b gbɛ egbal na.

²⁰ Zabai pibinyɛn Baruk malɛ e pere kenishi n lɔŋɛ m pɔr egbal na be kaba nɛ k ka n ya fo bɔrɛmatapo nimuso Eliyashib be kowu ase na.

²¹ Yuraya pibinyɛn Mɛremɔf nɛ mo nananyɛn daa la Hakkoz na e lɔŋɛ m pɔr egbal na be kaba nɛ k niŋi teteri n ya fo Eliyashib be kowu be ekar na.

Bɔrɛmatapoana nɛ b chɛ to m pɔr egbal na be asheŋ

²² Bɔrɛmatapoana nɛ b chɛ to n lɔŋɛ m pɔr egbal na e daa la: Bɔrɛmatapoana nɛ b shi Kebonfu nɛ k kulti Jerusalɛm na e lɔŋɛ m pɔr egbal na be kaba nɛ k bɛ so na.

²³ Nɛ Bɛnjamin nɛ Hashuub malɛ lɔŋɛ m pɔr egbal na be mba nɛ a bɛ so nsaa wɔ bumo elaŋ be anishito na. Maasaya pibinyɛn Azariya nɛ mo nananyɛn daa la Ananaya na malɛ e lɔŋɛ m pɔr egbal na be mba nɛ a bɛ so nsaa wɔ bumo be elaŋ be anishito na.

²⁴ Nɛ Henadad pibinyɛn Biniyu malɛ lɔŋɛ m pɔr egbal na be kaba nɛ k bɛ so nsaa wɔ yili Azariya be laŋ ase hale n ya fo kakpa nɛ b gbɛ egbal na.

²⁵ Uzaya pibinyɛn Palal e lɔŋɛ m pɔr egbal nɛ b gbɛ na n ya fo ewurkpa be ebu jeŋgreŋ nɛ k mata bekumpo be kelɔnɛ ase na. Parosh pibinyɛn Pɛdaya malɛ e lɔŋɛ m pɔr kaba nɛ k bɛ so na.

²⁶ E daŋ pɔr nna m ba fo kakpa nɛ k mata Nchu be kabuna nɛ k wɔ a laŋɛ epeŋilarkpa be kaba so nɛ ebu jeŋgreŋ nɛ k mata bɔrɛlambu na ase na nna. K mata kadegboŋ na be kaba nɛ baa tre Ofɛl nɛ bɔrɛlambu na be beshumpo na daa wɔ ndoŋ na nna.

Bepɔrpoana na be beko be baru be asheŋ

²⁷ Kade nɛ baa tre Tekua na be benyɛn malɛ e daŋ lɔŋɛ m pɔr egbal na be kaba nɛ k bɛ so na. Kaba nyɔsopo nɛ b daŋ pɔr nna na. B daŋ yili kakpa nɛ k wɔ ebu jeŋgreŋ gboŋ nɛ k bee kuŋ bɔrɛlambu na be anishito hale n ya fo egbal nɛ k mata Ofɛl na nna.

²⁸ Bɔrɛmatapoana ko malɛ e lɔŋɛ m pɔr egbal na be kaba nɛ k bɛ so na. B daŋ fara kakpa nɛ baa tre Egbaŋɛ be Kabuna nɛ k wɔ a laŋɛ kelargato be esoso be kaba so na nna. Bumo be ekama malɛ daŋ lɔŋɛ m pɔr egbal na be kaba nɛ k bɛ so nsaa wɔ mo gbagba be laŋ to be anishito nna.

²⁹ Imma pibinyɛn Zadɔk malɛ gba e lɔŋɛ m pɔr egbal nɛ k bɛ so a wɔ mbe laŋ be anishito na. Nɛ Shekanaya pibinyɛn Shemaya nɛ e daa keni Epeŋilarkpa be kabuna so na malɛ lɔŋɛ m pɔr kaba nɛ k naŋ bɛ so na.

³⁰ Shɛlemaya pibinyɛn Hananaya nɛ Hanun nɛ e la Zalaf pibi shesopo na malɛ e lɔŋɛ m pɔr egbal na be kaba nɛ k bɛ kumo so na. Kumo a ti so bumo be kakpa nyɔsopo nɛ b pɔr. Bɛrekaya pibinyɛn Mɛshulam e lɔŋɛ m pɔr kaba nɛ k bɛ kumo so so nsaa wɔ mo gbagba be laŋ be anishito na.

³¹ Malkija nɛ e la shuwa be bɔyɛpo na e lɔŋɛ m pɔr kaba nɛ kumo alɛ bɛ kumo so na hale n ya fo laŋ nɛ bɔrɛlambu na be beshumpo nɛ eyawujipoana daa wɔtɔ to na ase. Kakpa ere daa wɔ kabuna nɛ baa tre Gama abar be Kabuna nɛ k mata ebu nɛ k wɔ egbal na so ashi kelargato be esoso be epeŋilarkpa be kebonfu na be anishito nna.

³² Shuwa be ebɔyɛpo nɛ eyawujipoana na malɛ e lɔŋɛ m pɔr egbal na be kakpa lalaloge. Kumo alɛ yili ebu nɛ k wɔ kebonfu to be ebu na nna hale n ya fo kaboŋ nɛ baa tre Mbolpɔ be Kabuna na ase nna.