Nehemaya 2 - EBƆRƐ BE KAWƆL

Nehemaya ka yɔ Jerusalɛm be asheŋ

¹ Juwebi be kufɔl nɛ baa tre Nisan na to nɛ ewurgboŋ Atazɛzɛs ka ji kuwura be kafɛ adunyɔ na to nɛ n ta yabra nɛ n ya sa mo. Mo alɛ daŋ maŋ naŋ wu ma anishiakpa ka chɛrga n duli esa nɛ mbe kagbenejija mo kikɛ.

² Ndoŋ nna nɛ e bishi ma: “Manɛ nna nɛ fo anishiakpa chɛrga fanɛ esa nɛ mbe kagbenejija mo loŋ? Fo alɛ maa lɔ. N tama fanɛ fo kagbene e maŋ fuli fo?.” Kedaŋ shin nɛ kufu pɛ ma ga.

³ Nɛ ŋ kaŋɛ mo le: “Yiramu, Ebɔrɛ e teŋi fo efute so! Ma kagbene maŋ fuli ma, ŋkpal manɛ so, kadegboŋ nɛ b puli n nanaana na bure a dese nɛ kumo be mbunagboŋana kikɛ ji edɛ.”

⁴ Ndoŋ nna nɛ wura na naŋ bishi ma: “Manɛ nɛ fee sha fanɛ n wora n sa fo?” Nɛ ŋ kule Ebɔrɛ ma kagbene to.

⁵ Kumo be kaman nɛ ŋ kaŋɛ ewura na le: “Yiramu, jande, nɛ k maaŋ tɔrɔ fo, sa ma ekpa nɛ n yɔ Juda be kasawule so n ya lɔŋɛ kadegboŋ nɛ b puli an nanaana kumo to na m pɔr.”

⁶ Ewura na nɛ mbe eche e daa tase, nɛ e bishi ma le: “Nchɛ afanɛ nɛ feeŋ ta n lɔŋɛ m pɔr kumo n loge nseŋ bɛta m ba?” Nɛ ŋ kaŋɛ mo jemanɛ nɛ meeŋ bɛta m ba. Nɛ kumo be loŋ par ewura na, nɛ e shuli nseŋ sa ma akpa.

⁷ Kumo be kaman nɛ ŋ kaŋɛ mo le: “Yiramu, jande, wora ania n sibɛ nwɔl n sa ma nɛ n ta n ya sa efuliana nɛ a wɔ Lɔr nɛ baa tre Yufreetes na be epeŋitɔrkpa be kaba so na be egomena nɛ b wɔ fo kaseto na, saŋɛ na so, meeŋ nya ekpa n yɔ Juda be efuli so nɛ shɛŋ maaŋ wora ma.

⁸ Ma alɛ daa beeŋ baa sha kawɔl nɛ meeŋ ta n ya sa kanyɛn nɛ baa tre Asaf nɛ e bee keni ewura be kupo so na, saŋɛ na so Asaf beeŋ sa ma ekpa nɛ ŋ ku ndibi be kupo na to n lɔŋɛ mbuna n wɔtɔ ebu lempo jeŋgreŋ nɛ a yil m mata bɔrɛlambu na nɛ kadegboŋ na gba to be egbalana na nɛ laŋ nɛ ŋ gbagba beeŋ ya kaa wɔtɔ to na. Ebɔrɛ ka daa wɔ ŋ kutɔ so, ewura na daŋ shuli nna n sa ma kusɔ kama nɛ n daŋ kule mo.

⁹ Ewura na daŋ lara benapo nimuso nɛ benapo nɛ baa dii egbaŋɛ nɛ b baa kuŋ ma nna; nɛ b tu ma m bɔla Yufreetes be Lɔrgboŋ na be epeŋitɔrkpa be kaba so n ta nwɔl nɛ ewurgboŋ na sibɛ na n ya sa egomenaana nɛ b wɔ ekpa na so na.

¹⁰ Ama kanyɛn nɛ baa tre Sanballat nɛ e shi kade nɛ baa tre Horɔn na nɛ Tobaya nɛ e la Ammɔn be efuli so be krachigboŋ ko na ka nu fanɛ m ba na, nɛ b nya agbo ga. Ŋkpal manɛ so, b maa sha fanɛ esa kikɛ e chɛ Israɛlebi to.”

Nehemaya ka ya keni ŋ keni Jerusalɛm be egbalana na be asheŋ

¹¹ An ka fo Jerusalɛm na be nchɛ asa be kaman,

¹² nɛ ma nɛ basa gbrɛbi ko koso kanyɛso a yɔ. Jemanɛ na so nɛ ma alɛ daŋ maŋ naŋ kaŋɛ esa kikɛ kusɔ nɛ Ebɔrɛ ta n deŋi ma kagbene so fanɛ n wora n sa Jerusalɛmebi. Kurma nɛ n daŋ dii na nawule e daa la kusɔbɔya nɛ an keta n yɔ.

¹³ Kabuna nɛ k wɔ epeŋitɔrkpa nɛ baa tre kumo Ketaŋɛ be kabunagboŋ na to nɛ m bɔla to n lar n sɔ kelargato be kaseto be kaba so n ya bɔla kechubu nɛ baa tre Dragɔn na ase n ya fo kabunagboŋ nɛ baa tre Epi be kabuna na ase. Jemanɛ nɛ n dii kurma a choŋ na nɛ mee dara egbalana nɛ e bure n tɔr nɛ mbunagboŋana nɛ e daŋ chɔɔ na kikɛ.

¹⁴ Ŋ ka fo Kadegboŋ na be epeŋilarkpa na nɛ ŋ kilgi n yɔ kechubu be kabunagboŋ na ase nɛ ewura be Kepa na ase. Ama ekpa na daa maŋ naaŋ kpalga to a shi n sa kurma nɛ n daa dii na.

¹⁵ Amoso nɛ ŋ kilgi n sɔ ketaŋɛ nɛ baa tre Kidrɔn na be kaba so n ya bɔla ndoŋ a choŋ nsaa maŋ kumu so a keni kadegboŋ na be egbal na. Kumo be kaman nɛ m bɛta m bɔla Ketaŋɛ be kabunagboŋ na to n luri kadegboŋ na to pɔɛŋ nɛ kakpa bugi to.

¹⁶ Kadegboŋ na to be ekrachigboŋana na be ekama daa maŋ nyi kakpa nɛ n yɔ ŋko kusɔ nɛ mee wora. Le be jemanɛ ere kikɛ nɛ m maŋ naŋ kaŋɛ m braana Juwebi na shɛŋ, hale Bɔrɛmatapoana nɛ bejuŋkparpoana na nɛ ekrachigboŋana na nɛ Juwebi nɛ bumo alɛ gba bee chɛ to a shuŋ kushuŋ na kikɛ maŋ nu shɛŋ ŋ kutɔ.

¹⁷ Ama ŋ ka bɛta n yɔ na nɛ n ya kaŋɛ bumo le: “Menyi alɛ gba wu tɔrɔ nɛ an wɔ kumo to ŋkpal Jerusalɛm ka bure a dese nɛ kumo be mbunagboŋana kikɛ chɔɔ n tɔr nna na! Men wora ania n shin nɛ an pɔr kadegboŋ ere be egbalana nɛ a tɔr ere, saŋɛ na so anyi maaŋ naŋ ji anishinyɔr.”

¹⁸ Ma alɛ daŋ naŋ kaŋɛ bumo kananɛ Ebɔrɛ wɔ ma kutɔ nseŋ chɛ ma to nɛ kusɔ nɛ ewurgboŋ na gba kaŋɛ ma. Ndoŋ nna nɛ b kaŋɛ: “Men shin nɛ an fara kapɔr na naniere!” Ndoŋ nna nɛ b bela ase nɛ b fara kushuŋ na.

¹⁹ Sanballat nɛ Tobaya nɛ kalɔrbunyɛn ko nɛ baa tre mo Gɛshem ka nu kusɔ nɛ an kre kewora na be asheŋ nɛ b mushe anyi ga nseŋ kaŋɛ: “Manɛ nɛ menyee fɛ fanɛ menyee wora ere? Menyee sha kelɔŋɛ kadegboŋ na be egbalana nna m pɔr nseŋ lar ewura kaman ŋ kɔ mo kena, ŋko?”

²⁰ Nɛ n shuli ŋ kaŋɛ le: “Ebɔrɛ nɛ e wɔ ebɔrɛso na beeŋ chɛ anyi to nɛ an pɔɔ so, ŋkpal manɛ so, an la mbe nyɛrbi nna. Mo e naŋ shin nɛ an tiŋ n shuŋ kushuŋ na n loge nɛ shɛŋ maŋ wora. Amoso anyeeŋ fara Jerusalɛm be egbalana na be kepɔr. Ama menyi ere maŋ kɔ ekpa nɛ men nya kapetɛsɔ kikɛ ashi Jerusalɛm be kadegboŋ na to, ŋkpal manɛ so, menyi maŋ ti kumo be edaŋkaresheŋ so.”