Nehemaya 13 - EBƆRƐ BE KAWƆL

Israɛlebi ka barga bumo be amu ashi befɔ to be asheŋ

¹ Kachɛ nɛ b kraŋ Mosis be mbra na awɔrso n sa ekama na nɛ kelar efuli fanɛ Ammɔnebi nɛ Mowabebi maŋ daga fanɛ b ti Ebɔrɛ be basa so.

² Ŋkpal manɛ so b daŋ kini kesa Israɛl be basa ajibi nɛ nchu nna nseŋ naŋ ber Balaam paa fanɛ e shoduu bumo jemanɛ nɛ Ebɔrɛ daŋ lara bumo n shi Ijipt be efuli so a yɔ Keenan be kasawule so nɛ b ya kɔ n sɔ kasawule na. Ama anyi be Ebɔrɛ na daŋ kilgi Balaam be shoduu na nna ŋ ki nɛfa n sa anyi.

³ B ka kraŋ Mosis be mbra na nɛ Israɛlebi na nu so, b daŋ fara a ju basa kama nɛ bumo nanaana daa la befɔ ashi bumo to na nna.

Nehemaya ka naŋ gama mbe basa abar so be asheŋ

⁴ Bɔrɛmatapo Eliashib daa la Tobaya mo kurgepo nna nɛ e daŋ shin nɛ e daa keni bɔrɛlambu na to be ebuana nɛ baa yili asɔ amo to na so.

⁵ E daŋ shin nna nɛ Tobaya daa wɔ ebuana na be kegboŋgboŋi nɛ baa yili asɔ be yiri yiri fanɛ esarga be aboyu nɛ duwu nɛ bɔrɛlambu na to be asɔ daŋɛso nɛ ashuŋsɔ nɛ ayu nɛ yabra nɛ ɔlif be ŋku be kudu kudusopo nɛ b bar m ba sa Livaiebi nɛ beshɛbompo na nɛ bɔrɛlambu na to be bekumpo na nɛ ŋkɛ nɛ b bar m ba sa bɔrɛmatapoana na kikɛ na to.

⁶ Ewurgboŋ Atazɛzɛs ka bee ji Babilɔn be efuli so be kuwura be kafɛ adesa nɛ anyɔ to nɛ le be kesheŋ ere daŋ wora. N daa maŋ wɔ Jerusalɛm to loŋ be jemanɛ na ŋkpal ŋ ka daŋ yɔ nɛ n ya bɔ ewura Atazɛzɛs kubɔya a laŋɛ kananɛ asheŋ nite ashi Juda be efuli so na so. Kumo be kaman nɛ ŋ kule ewurgboŋ na ekpa m bɛta n yɔ Jerusalɛm.

⁷ Ŋ ka bɛta n yɔ na pɔɛŋ nɛ m pin kusɔ lubi nɛ Eliashib wora ŋkpal e ka shin nɛ Tobaya wɔ bɔrɛlambu na be ebu na to so.

⁸ Kedaŋ nu ma agbo ga nna nɛ m bela Tobaya be asɔ kikɛ n lɛ kowu.

⁹ Kumo be kaman nɛ ŋ kaŋɛ fanɛ b fɔr ebu na daŋkare be ekpa so nɛ k ki cheembi n sa Enyɛnpe Ebɔrɛ na pɔɛŋ nseŋ bɛta bɔrɛlambu na be asɔ daŋɛso na kikɛ nɛ esarga be ayu na nɛ duwu na n ya wɔtɔ kumo to.

¹⁰ Ma alɛ naŋ nu fanɛ bɔrɛlambu na to be beshɛbompo nɛ Livaiebi na be galeŋga lar Jerusalɛm to nna m bɛta n yɔ bumo be adɔana to, ŋkpal manɛ so, basa na daa maŋ naa sa bumo ajibi nɛ a bee fo bumo.

¹¹ Ndoŋ nna nɛ n tre bejuŋkparpoana na nseŋ malga agbo so m bishi bumo: “Manɛ nna nɛ men kplaŋ bɔrɛlambu na so?” Kumo be kaman nɛ ŋ kaŋɛ bumo fanɛ b fara a shuŋ bumo be ashuŋ.

¹² Kede be kaman nɛ ekama ashi Juda be efuli so bar ayu nɛ yabra nɛ ɔlif be ŋku be kudu kudusopo m ba wɔtɔ bɔrɛlambu na be ebuana nɛ baa yili ajibi amo to na to.

¹³ B ka bar amo n loge nɛ n lara basa asa nɛ bumo be kebaawɔtɔ walɛ nɛ esa beeŋ tiŋ n yirda bumo nseŋ shin nɛ baa keni asɔ nɛ basa na bar na so nsaa chige amo to a sa basa. Basa nɛ n lara na e la Shelemaya nɛ e la bɔrɛmatapo na, nɛ Zadɔk nɛ e la mbra ŋinipo na, nɛ Pedaya nɛ e la Livai be esa na. Esa nɛ e daa chɛ bumo to e la Zakku pibinyɛn Hanan nɛ mo nananyɛn daa la Mataniya na.

¹⁴ Ma, Nehemaya bee kule Ebɔrɛ nna fanɛ e nyiŋi ma ŋkpal asɔ lela nɛ mee wora a sa bɔrɛlambu ere nɛ basa nɛ baa bunyaŋ mo kumo to na so.

¹⁵ Ma alɛ daŋ naŋ dara m pin kusɔ nɛ Juda be basa na bee wora Kewushiachɛ na. Mannɛ kebaachichi asɔrso nɛ baa tre greep na so a wora yabra nawule nɛ b daa wora ama b daa teŋi ayu, nsaa chuge egreep nɛ figi be asɔrso nɛ adɔjibi pɔtɛana kikɛ n ti so nna Kewushiachɛ na. Bumo alɛ daa naa ta ekurma a sulɔ amo nna a yɔ Jerusalɛm n ya ka fa. Amoso n daŋ kpele bumo kusoe nna fanɛ b sa maŋ naa fa ajibi Kewushiachɛ.

¹⁶ Basa nɛ b daŋ shi kadegboŋ nɛ baa tre Tayɛ nɛ b daa wɔ Jerusalɛm to na daa bar ekɔrɔtɔ nɛ asɔ pɔtɛana ko nna m ba ka fa ndoŋ Kewushiachɛ na.

¹⁷ Ndoŋ nna nɛ n nya agbo n fɛa Juda be bejuŋkparpoana so ŋ kaŋɛ: “Kulubi nɛ menyee wora ere, Kewushiachɛ na nɛ menyee keni jiga na!

¹⁸ Ebɔrɛ daa maŋ gberge anyi nɛ Jerusalɛm be kadegboŋ be basa ere kusoe nna ŋkpal an nanaana ka daŋ wora asheŋ nɛ anyee wora ere so a? To menyee sha keŋaba Kewushiachɛ na nɛ Ebɔrɛ be agbo e koso, ŋko?”

¹⁹ N daŋ yili kumo nna fanɛ pɔɛŋ nɛ Kewushiachɛ na e fara kaaseso na, b ti Jerusalɛm be mbuna na kikɛ nsaa maŋ bugi amo hale nɛ Kewushiachɛ na e ji n choŋ pɔɛŋ. Kumo be kaman nɛ n ta mbuna na be kekeni so be kushuŋ m bɔɔ ŋ gbagba be benyɛn nɛ n lara fanɛ b sa maŋ shin nɛ sheŋ e luri kadegboŋ na to Kewushiachɛ na enɔ.

²⁰ Beeŋ wora fanɛ kela koŋwule ŋko ale anyɔ nɛ eyawujipo ko nɛ bumo be asɔ faso dese Jerusalɛm be kadegboŋ na be kowushina ŋklade.

²¹ Ama n daŋ fɛa bumo so nna ŋ kaŋɛ le: “Nɛ men naŋ wora loŋ, meeŋ shin nɛ b pɛ menyi n ti ebu. Yili loŋ be kachɛ na a yɔ, b maŋ naŋ ba Jerusalɛm to Kewushiachɛ kikɛ.

²² Kumo be kaman nɛ ŋ kaŋɛ Livaiebi na fanɛ b baa wora bumo be amu cheembi nsaa kuŋ Jerusalɛm be kadegboŋ na be mbuna na Kewushiachɛ kikɛ, saŋɛ na so basa beeŋ ta kumo ŋ ki kachɛ cheembi nsaa sa kumo bunyaŋ. Ebɔrɛ la ewɔrwupo nna, mee kule mo fanɛ e wu ma kuwɔr nseŋ nɛfa ma ŋkpal kusɔ nɛ mee wora ere so.

²³ Ma alɛ daŋ naŋ wu fanɛ Juwebi na be benyɛn ko daŋ ta beche ashi Ashdɔd be kadegboŋ to nɛ Ammɔn nɛ Mowab be efuliana so nna.

²⁴ Bumo be mbia be bargato daa maa tiŋ a malga Hibruw be ŋgbar. Ashdɔd be ŋgbar nɛ ŋgbar pɔtɛana ko nɛ b daa gbar.

²⁵ Amoso n daŋ shoduu loŋ be benyɛn agbo so nna nseŋ naŋ shin nɛ b bri beko nseŋ gberge bumo be emin gba n tia. Kumo be kaman nɛ n shin nɛ b nase kɔnɔ ŋ kaŋɛ: ‘An bɔ ntaŋ a nase kɔnɔ Ebɔrɛ be ketre to fanɛ anyi maaŋ shin nɛ anyi be mbinyɛnso ŋko mbicheso e ta ŋko ŋ kil befɔ.’

²⁶ Ebɔrɛ daŋ sha Israɛl be ewura Sɔlɔmɔn ga nseŋ daŋ shin nɛ durnya to kikɛ be ewura kikɛ maŋ fo mo so, ama beche pɔtɛ nɛ e ta na daŋ shin nɛ e shuŋ agbir nseŋ tɔr kulubi to nna.

²⁷ Amoso anyeeŋ nu n sa fo nsaa maaŋ kil befɔ n lar anyi be Ebɔrɛ kaman n wora kulubi ŋ gbiti mo.”

²⁸ Joida nɛ mo tuto la bɔrɛmatapo nimuso Eliashib na pibinyɛn ko daŋ ta Sanballat nɛ e shi Bɛf Hɔrɔn na pibiche nna nɛ n ju mo pibinyɛn na n lar Jerusalɛm to.

²⁹ Mee kule Ebɔrɛ nna fanɛ e gberge bumo kusoe ŋkpal b ka wora n da bumo be kabɔrɛmata be atande so nseŋ ŋaba Livai be yiri na so.

³⁰ Kumo be kaman nɛ n wora ania fanɛ befɔ maaŋ naŋ nya ekpa a leŋ basa na to a wɔtɔ asheŋ lubi to nseŋ naŋ sa bɔrɛmatapoana na nɛ Livaiebi na ashuŋ nɛ baaŋ baa shuŋ jemanɛ kikɛ.

³¹ Ma alɛ daŋ naŋ yili kumo nna fanɛ basa na beeŋ baa bar ndibi puga edɛ bɔrɛsure na ase karechɛ kikɛ nseŋ naa bar bumo be adɔjibi nɛ baaŋ teŋi sososo na bɔrɛlambu na to. Mee kule Ebɔrɛ nna fanɛ e nɛfa ma ŋkpal asɔ lela nɛ mee wora ere so.