Nehemaya 1 - EBƆRƐ BE KAWƆL

¹ Ma e la Nehemaya Hakalia pibinyɛn. Asheŋ nɛ n wora nɛ amo nɛ m malga nɛ n sibɛ n wɔtɔ kawɔl ere to na. Ewurgboŋ Atazɛzɛs ka ji kuwura Pɛshiya be efuli so be kafɛ adunyɔ to nɛ ma, Nehemaya daa wɔ kadegboŋ lempo nɛ baa tre Susa nɛ k la efuli na be kadegboŋ na to nna. Juwebi be kufɔl nɛ baa tre Kislɛv na to e daa la.

² N sipoana to be eko nɛ baa tre Hanani na daŋ keta benyɛn be katuŋ ko nna n shi Juda be efuli so m ba ndoŋ. Nɛ m bishi bumo Jerusalɛm be kade to nɛ ŋ kurgepoana Juwebi nɛ b shi Babilɔn nfe m bɛta n yɔ na be asheŋ.

³ Nɛ b kaŋɛ ma fanɛ basa nɛ b bɛta n yɔ Jerusalɛm na wɔ tɔrɔ nɛ awurfoŋ to nna. B yɛ Jerusalɛm be egbal na bure n tɔr nɛ kumo be mbunagboŋana na malɛ gba ji edɛ.

⁴ Ŋ ka nu loŋ nɛ n chena n shu nchɛ damta ŋkpal kumo so nseŋ kishi ŋ kule Ebɔrɛ ŋ kaŋɛ le:

⁵ “O Enyɛnpe Ebɔrɛ nɛ fo wɔ ebɔrɛso, fo e kɔ eleŋ ga nɛ fo bunyaŋ shi m baŋ so. Fo alɛ e naa wora a bɛ fo nnɔ naseso so a sa bekama nɛ baa sha fo nsaa wora fo mmalga kasonu.

⁶ Enyɛnpe Ebɔrɛ, keni ma so nseŋ nu ma kekule ŋkpal kananɛ mee kule fo kapa nɛ kanyɛ ere a sa fo nyɛrbi Israɛlebi na so. N shuli fanɛ anyi Israɛlebi nɛ an nanaana kikɛ wora alubi ŋ gbiti fo.

⁷ Anyi alɛ maŋ naŋ wora fo mbra nɛ fo ta n sa an nananyɛn Mosis fanɛ e ta n sa anyi na gba kasonu.

⁸ Jande nyiŋi kusɔ nɛ fo kaŋɛ fo kayɛrbi Mosis na, fanɛ nɛ anyi Israɛlebi maŋ ji kashenteŋ n sa fo, kumo ere feeŋ pesaŋ anyi to n yɔ efuli pɔtɛana ko so.

⁹ Ama nɛ fanɛ an bɛta m ba fo kutɔ nseŋ wora kusɔ nɛ fo nase n sa anyi na bre, hale nɛ an pesaŋ to n sɔ durnya ere be efuli kikɛ so gba, feeŋ naŋ bɛta anyi m ba kakpa nɛ fo daŋ yili kumo fanɛ an baa shuŋ fo na.

¹⁰ Enyɛnpe Ebɔrɛ, fo nyɛrbi nɛ fo gbagba be basa nna na. Ŋkpal manɛ so, fo gbagba be eleŋgboŋ nɛ fo ta m mɔlga bumo nɛ b baa la fo basa.

¹¹ O Enyɛnpe Ebɔrɛ, nu ma nɛ fo nyɛrbi nɛ b kɔ kasha n sa fo nsaa ŋana fo ketre na be kabɔrɛkule. Chɛ ma to nɛ n nya kusɔ nɛ mee tama kabre ere nseŋ shin nɛ ewura malɛ gba e wu ma kuwɔr.” Loŋ be jemanɛ nɛ ma e daa duga ewurgboŋ Atazɛzɛs be yabra a sa mo nɛ e bee nuu.