Maak 8 - EBƆRƐ BE KAWƆL

Yesu ka sa basa ŋgboŋ ana ajibi be asheŋ

¹ K maŋ chɛr ko nɛ jimaŋ damta ko naŋ shɛr Yesu kutɔ. Saŋɛ na so nɛ shɛŋ maŋ naa wɔtɔ nɛ b ji nɛ Yesu tre mbe bebɛsopo na m ba mo kutɔ m ba kaŋɛ bumo:

² “Basa ere be asheŋ bee keta ma kuwɔr, ŋkpal manɛ so, bumo be nchɛ asa nde b ka wɔ ŋ kutɔ nfe ŋkaa maa nya shɛŋ a ji.

³ N shin nɛ b ta akoŋ n yɔ epe, baaŋ chɛl ekpa to, ŋkpal manɛ so, bumo be beko shi kufɔ nna.”

⁴ Nɛ mbe bebɛsopo na bishi mo: “Kiyi ere to nfe be nnɛ nɛ esa beeŋ nya ajibi nɛ a fo basa damta ere kikɛ nɛ b ji?”

⁵ Nɛ Yesu bishi bumo: “Ebodobodo afanɛ nɛ men kɔ?” Nɛ b kaŋɛ mo: “Ebodobodo ashunu.”

⁶ Nɛ e shin nɛ jimaŋ na chena kasawule. Nɛ e ta ebodobodo ashunu na nseŋ chɔrɔ Ebɔrɛ nseŋ fara a buri amo to a sa mbe bebɛsopo na fanɛ b baa sa jimaŋ na nɛ bebɛsopo na wora loŋ.

⁷ B daa kɔ ekɔrɔtɔbi ko gba. Nɛ Yesu ta amo nseŋ nɛfa amo ŋ kaŋɛ bebɛsopo na fanɛ b ta amo alɛ gba n sa basa na.

⁸ Nɛ ekama we m moɛ.

⁹ Basa na daa sa fanɛ basa ŋgboŋ ana. Kumo be kaman nɛ bebɛsopo na tise ejiŋka na m bɔlɔ nlantaŋɛ ashunu. Ndoŋ nna nɛ Yesu shin nɛ basa na yɔ epe,

¹⁰ nɛ mo nɛ mbe bebɛsopo na luri ekuloŋ to epul na to n yɔ Dalmanuta be kasawule so.

Efarisiana ka kule kemamachisheŋ be kewora be asheŋ

¹¹ Kachako Efarisiana na be beko ba m ba fara a ji Yesu emɔrɔ. B daa sha kewora mo ŋ keni nna nseŋ kule mo fanɛ e wora mamachi be kesheŋ ko nɛ k shi ebɔrɛso.

¹² Ndoŋ nna nɛ Yesu fute eleŋso nseŋ bishi: “Manɛ e ba nɛ mbreebi ere kaŋɛ n wora mamachi be kesheŋ ko ŋ ŋini fanɛ Ebɔrɛ wɔ ma kaman? Kashenteŋto mee kaŋɛ menyi nna fanɛ mbreebi ere maaŋ nya shɛŋ n wu.”

¹³ Kumo be kaman nɛ e yige bumo nseŋ bɛta n ya luri ekuloŋ na to n fara a dii kepagboŋ be kaba ndoŋ.

Efarisiana nɛ Hɛrɔd be yiisi be asheŋ

¹⁴ Bebɛsopo na daa maŋ nyiŋi m bar ebodobodo ko n ti so, kukoŋwule nawule nɛ b daa kɔ ekuloŋ na to.

¹⁵ Nɛ Yesu ji bumo asoe to ŋ kaŋɛ: “Men baa keni so nɛnɛ a de Efarisiana na nɛ Hɛrɔd be yiisi so.”

¹⁶ Ndoŋ nna nɛ b fara a malga kumo be asheŋ a sa abar: “An ka maŋ kɔ ebodobodo so nɛ e bee malga loŋ na.”

¹⁷ Yesu ka pin kusɔ nɛ b daa malga na nɛ e bishi bumo: “Manɛ e ba nɛ menyee malga a kaŋɛ men ka maŋ kɔ ebodobodo be asheŋ. Hale mbre men maŋ naŋ nu ŋko m pin to a? Le be amu kpakpaso nɛ men kraa kɔ a?

¹⁸ Men baa kɔ anishi ŋkaa maa wu a? Men baa kɔ asoe a maa nu a?

¹⁹ Men teŋ so saŋɛ nɛ n daŋ buri ebodobodo anu to n sa benyɛn ŋgboŋ anu na a? Ejiŋka nlantaŋɛ afanɛ nɛ men daŋ tise na?” Nɛ b kaŋɛ: “A daa wɔ nlantaŋɛ kuduanyɔ.”

²⁰ Nɛ Yesu naŋ bishi bumo: “Nɛ ŋ ka daŋ buri ebodobodo ashunu to n sa benyɛn ŋgboŋ ana na, ejiŋka nlantaŋɛ afanɛ nɛ men daŋ tise na?” Nɛ b kaŋɛ: “A daa wɔ nlantaŋɛ ashunu.”

²¹ Nɛ e bishi bumo: “Nɛ men kraa maŋ naŋ pin to a?”

Yesu ka chɛ tanpo ashi Bɛtsaida be asheŋ

²² B ka ba Bɛtsaida nɛ basa ko bar mo tanponyɛn ko m ba kule mo fanɛ e beta mo m bugi mbe anishi. Nɛ Yesu pɛ tanponyɛn na be enɔ to

²³ nseŋ keta mo n lar kadebi na to n ya tuu echɔl n wora amo n wɔtɔ kanyɛn na be anishito nseŋ ta mbe enɔ n deŋi mo so nseŋ bishi mo: “Fee wu a?”

²⁴ Nɛ tanponyɛn na maŋ kumu so ŋ kaŋɛ: “Mee wu basa ka du fanɛ ndibi a na a kulti.”

²⁵ Nɛ Yesu naŋ ta mbe enɔana n deŋi kanyɛn na be anishi so. Kede ere to nɛ kanyɛn na keni nɛnɛ nɛ mbe anishi bugi nɛ e fara a wu kusɔ kama nɛnɛ.

²⁶ Nɛ Yesu sa mo ekpa fanɛ e yɔ epe nseŋ fiɛ mo so fanɛ e sa maŋ naŋ bɛta n yɔ kadebi na to.

Pita ka kaŋɛ esa nɛ Yesu la be asheŋ

²⁷ Nɛ Yesu nɛ mbe bebɛsopo yɔ Sizariya Filipai be ndewurbiana to. B ka bee yɔ nɛ e bishi bumo: “Esa mo nɛ basa bee tre ma?”

²⁸ Nɛ b kaŋɛ: “Beko bee tre fo Jɔn kabɔrɛbɛrpo nna. Beko malɛ bee kaŋɛ fanɛ Elaija e la fo. Nɛ beko malɛ bee kaŋɛ fanɛ anebi ko e la fo.”

²⁹ Nɛ Yesu bishi bumo: “Nɛ menyi alɛ ai? Esa mo nɛ menyee tre ma?” Nɛ Pita kaŋɛ: “Fo e la Kristo na.”

³⁰ Ndoŋ nna nɛ Yesu fiɛ bumo so fanɛ b sa maŋ kaŋ kaŋɛ esa kama mbe asheŋ.

Yesu ka malga mbe awurfoŋ nɛ mbe luwu be asheŋ

³¹ Nɛ Yesu naŋ fara a ŋini mbe bebɛsopo na a kaŋɛ: “A daga fanɛ ma, Nyiŋgbasa Pibinyɛn e ji awurfoŋ ga nɛ benimu nɛ bɔrɛmatapowuraana nɛ mbraŋinipoana e kini ma nseŋ mɔ ma nɛ n tiŋi luwu na to kumo be kachɛ sasopo.”

³² E bugi le be demu to nɛnɛ ŋ kaŋɛ bumo. Nɛ Pita keta mo n lar ekarso n ya fara nɛ e fiɛ mo so.

³³ Ama Yesu kilgi ŋ keni mbe bebɛsopo nseŋ fiɛ Pita so ŋ kaŋɛ: “Shile ashi ma so Setani. Fo nfɛra ere la nyiŋgbasa be nfɛra nna, a maŋ la Ebɔrɛ peya.”

³⁴ Nɛ Yesu tre jimaŋ na nɛ mbe bebɛsopo m ba shɛr ŋ kaŋɛ bumo: “Ekama nɛ e bee sha kebɛ ma so, a daga e ka teŋ mbe kumu so nseŋ sulɔ mbe kedibi largato m bɛ ma so.

³⁵ Ŋkpal manɛ so, esa kama nɛ e bee sha mbe ŋkpa ga, beeŋ paŋ kumo, ama ekama nɛ e paŋ mbe ŋkpa ŋkpal ma so nɛ baru lela na so, beeŋ nya kumo.

³⁶ Nɛ fanɛ durnya kikɛ ki esa peya nɛ e paŋ mbe ŋkpa na, manɛ be tɔnɔ nɛ e nya?

³⁷ Ŋko manɛ nɛ esa beeŋ tiŋ n ta n chɛr mbe ŋkpa?

³⁸ Esa kama nɛ e kpal anishinyɔr so a maaŋ tiŋ ŋ kaŋɛ kabre be bɔrɛkinipoana ere nɛ alubiworapoana ere ma nɛ ma mmalga be asheŋ, e baa nyi fanɛ saŋɛ nɛ ma, Nyiŋgbasa Pibinyɛn beeŋ keta n Tuto be kemaŋkura nɛ emalaika cheembi na m ba na, anishinyɔr beeŋ pɛ ma alɛ gba ŋkpal amodoŋwura so.”