Maak 7 - EBƆRƐ BE KAWƆL

Draebi be asheŋ

¹ Kachako Efarisiana na nɛ mbraŋinipoana na be beko nɛ b daŋ shi Jerusalɛm m ba na daŋ ba shɛr ŋ kulti Yesu.

² B daŋ wu fanɛ mbe bebɛsopo ko daa kɔ enɔyurpi nna a ji ajibi, kumo e la fanɛ b daa maŋ fɔr bumo be enɔana fanɛ kananɛ Efarisiana na daŋ ŋini na pɔɛŋ nsaa ji.

³ Ŋkpal manɛ so, Efarisiana nɛ Juwebi na daa bɛ bumo nanaana be kesheŋ ŋiniso so nna fanɛ b maa ji ama b baŋ fɔr bumo be enɔana nna fanɛ kananɛ bumo be edaŋkaresheŋ bee ŋini na.

⁴ Bumo alɛ baŋ shi kebɛ to m ba, b maa ji shɛŋ ama b fɔr bumo be amu daŋkare so nna pɔɛŋ. Bumo alɛ daŋ naa bɛ edaŋkare damtaana so nna fanɛ kananɛ baa fɔr nwiebi to nɛ mpuliya to nɛ danyaŋ be ntishaŋ to na.

⁵ Amoso, le nɛ Efarisiana na nɛ mbraŋinipoana na daŋ bishi Yesu: “Manɛ e ba nɛ fo bebɛsopo maa bɛ an nanaana be keŋini nɛ b yige n sa anyi na so nsaa wɔtɔ a ji nɛ enɔyurpi?”

⁶ Nɛ Yesu kaŋɛ bumo: “Kebirkɔnshiwuraana ere, anebi Aizaaya ka daŋ wu menyi be asheŋ ŋ kaŋɛ na baa la kashenteŋ nna. E yɛ: Ebɔrɛ kaŋɛ: ‘Basa ere be nnɔ nawule nɛ b kɔ a bunyaŋ ma, ama bumo be ŋgbene maŋ taga ma to.

⁷ Bumo be kebunyaŋ ma la bunyaŋ fuloŋ nna, ŋkpal manɛ so, nyiŋgbasa be mbra nɛ b ta ŋ ki Ebɔrɛ peya a ŋini.’ ”

⁸ Nɛ Yesu kaŋɛ: “Men yige Ebɔrɛ be mbra n nase nsaa bɛ nyiŋgbasa be edaŋkaresheŋ so.”

⁹ Nɛ e naŋ kaŋɛ: “Men kini Ebɔrɛ be mbra ŋgbalanto nsaa bɛ menyi be edaŋkaresheŋ so.

¹⁰ Ŋkpal manɛ so, anebi Mosis daŋ kaŋɛ fanɛ: ‘Bunyaŋ fo tuto nɛ fo nio,’ nɛ: ‘Ekama nɛ e malga ŋ gbiti mo nio nɛ mo tuto, b mɔ amodoŋwura.’

¹¹ Ama menyee ŋini fanɛ nɛ esa kɔ kusɔ ko nɛ e beeŋ tiŋ n ta n chɛ mo tuto ŋko mo nio to nseŋ kaŋɛ bumo fanɛ: ‘Korban be kusɔ nde,’ kumo e la fanɛ ‘Ebɔrɛ e wɔ,’

¹² e kɔ ekpa nɛ e beeŋ tiŋ ŋ kini keta kumo n chɛ mo tuto nɛ mo nio to.

¹³ Loŋ nɛ menyee wora a keni Ebɔrɛ be kamalga na jiga nsaa ŋini basa menyi gbagba be edaŋkaresheŋ na. Asheŋ damta ko gba kraa wɔtɔ a du fanɛ ade nɛ menyee wora amo.”

Asɔ nɛ a bee jija esa be asheŋ

¹⁴ Nɛ Yesu naŋ tre jimaŋ na m ba mo kutɔ m ba kaŋɛ bumo: “Menyi kikɛ e kaŋ kusoe n nu nfe nseŋ pin to.

¹⁵ Mannɛ kusɔ nɛ k bee shi kowu a luri nyiŋgbasa to e naa jija mo, ama kusɔ nɛ k bee jija esa e la kusɔ nɛ k bee shi mo to a lar.

¹⁶ Menyi nɛ men kɔ asoe, men nu.”

¹⁷ E ka yige jimaŋ na n yɔ epe nɛ mbe bebɛsopo bishi mo keŋasa na be asheŋ.

¹⁸ Nɛ Yesu bishi bumo: “Menyi alɛ gba maa pin asheŋ to a? Menyi maŋ nyi fanɛ kusɔ nɛ k bee shi kowu a luri esa to maaŋ tiŋ n jija mo a?

¹⁹ Ŋkpal manɛ so, k maa luri mbe kagbene to, mbe epun nawule to nɛ k bee luri a lar mbe eyur to.” Yesu daŋ malga le be demu nna a ŋini fanɛ kejibi kikɛ walɛ keji.

²⁰ Nɛ e naŋ kaŋɛ: “Kusɔ nɛ k bee jija esa e la kusɔ nɛ k bee shi mo to a lar,

²¹ ŋkpal manɛ so, esa be kagbene to nɛ nfɛra lubi nɛ a bee shin nɛ e bee luri kusɔ jigaya be kanyɛnsha nɛ kachesha to bee shi a lar.

²² Ndoŋ nɛ kayu nɛ kamɔ nɛ kubojuaji nɛ kayɛlga nɛ dalubisheŋ nɛ kafule nɛ kusɔjigaya nɛ kayurbesa, nɛ basa be atre be kejija nɛ kamoowu nɛ kawuli kikɛ bee shi.

²³ Le be alubi ere kikɛ e naa shi esa to a lar a jija mo.”

Kache ko be yirda be asheŋ

²⁴ Nɛ Yesu lar ndoŋ n yɔ efuli nɛ k mata Tayɛ nɛ Saidɔn be ndegboŋana na to. E ya luri laŋ ko to a maa sha ekama e pin fanɛ e wɔ ndoŋ, ama e maŋ tiŋ ŋ ŋana mbe kumu.

²⁵ Amoso, kache ko nɛ mo pibiche daa kɔ kiyoyu lubi mo to na nu Yesu be asheŋ m ba mo kutɔ epul na to m ba gbir mbe anishito.

²⁶ Kache na daa la efuli ko so be esa nna, b kurge mo Fenisha ashi Siriya nna. Ndoŋ nna nɛ e kule Yesu fanɛ e ju kiyoyu lubi na ashi mo pibiche na to.

²⁷ Nɛ Yesu kaŋɛ mo: “Men shin nɛ an bela mbia pɔɛŋ. A maŋ daga b ka ta mbia be ajibi n lɛ njɔnɔ.”

²⁸ Nɛ e shuli ŋ kaŋɛ: “Kashenteŋ nna Enyɛnpe, ama njɔnɔ gba bee kaa dese ejikpa a tise mbia be ejiŋka a ji.”

²⁹ Nɛ Yesu kaŋɛ mo: “Ŋkpal kesheŋ nɛ fo malga ere so, baa yɔ epe. Kiyoyu lubi na lar fo pibiche na to.”

³⁰ E ka bɛta n yɔ epe nɛ kebia na dese gedo so nɛ kiyoyu lubi na lar mo to kashenteŋto.

Yesu ka chɛ neemunyɛn ko be asheŋ

³¹ Nɛ Yesu naŋ lar Tayɛ be efuli so m bɔla Saidɔn n yɔ Galili be kepagboŋ na ase m bɔla nde kudu na be efuli be ekpa so.

³² Ndoŋ nna nɛ basa ko bar mo neemunyɛn ko nɛ kamalga daa nu mo m ba kule Yesu fanɛ e ta mbe enɔ n deŋi mo so.

³³ Ndoŋ nna nɛ Yesu ta mo n lar jimaŋ na to n yɔ ekarso n ya ta mbe ashilbi n wɔtɔ kanyɛn na be asoe to nseŋ tuu echɔl n wɔtɔ enɔ to nseŋ beta kanyɛn na be kudonduloŋ.

³⁴ Kumo be kaman nɛ Yesu keni esoso n shu to ŋ kaŋɛ kanyɛn na be asoe: “Ɛfata!” Kumo e la fanɛ “Men bugi to!”

³⁵ Epul na to nɛ kanyɛn na be asoe bugi nɛ mbe kudonduloŋ yɔɔ mo to nɛ e fara a malga nɛnɛ.

³⁶ Nɛ Yesu fiɛ bumo kikɛ so fanɛ b sa maŋ kaŋ malga kumo be asheŋ ŋ ŋini esa kikɛ, ama kanaŋkamaso nɛ e fiɛ bumo so, loŋ nɛ bumo alɛ gba malga kumo be asheŋ.

³⁷ K daŋ chinchiŋ bekama nɛ b nu kumo be asheŋ ga nɛ b kooba ŋ kaŋɛ: “Kananɛ e nyi asheŋ be kewora loŋ! Hale e bee tiŋ a shin nɛ ekpawu bee nu nɛ eneemu malɛ bee malga.”