Maak 6 - EBƆRƐ BE KAWƆL

B ka kini Yesu ashi Nazarɛt be asheŋ

¹ Yesu ka lar ndoŋ nɛ e bɛta n yɔ mo gbagba be kade to nɛ mbe bebɛsopo bɛ mo so.

² Kewushiachɛ ka fo nɛ e fara a ŋini basa abɔrɛsheŋ ashi nshɛrbu na to nɛ mbe keŋini na daŋ chinchiŋ basa damta nɛ b daa wɔ ndoŋ nseŋ nu kumo na ga nɛ b bishi abar: “Nnɛ nɛ kanyɛn ere nya ade kikɛ? Nnɛ nɛ e nya le be kanyiasheŋ ere? Nuso nɛ e bee wora a wora emamachisheŋ ere?

³ Mannɛ mo e la kapɛnta na a? Mɛɛri pibi nɛ Jeems nɛ Josɛf nɛ Judas nɛ Saimɔn bumo da nna a? Mannɛ anyi nɛ mo sipocheana e wɔ nfe na a?” Ndoŋ nna nɛ b kpal kumo so ŋ kini kesɔ mo.

⁴ Nɛ Yesu kaŋɛ bumo: “Anebi kikɛ bee nya bunyaŋ kaplɛkama she mo gbagba be kade to nɛ mo kurgepoana nɛ mbe laŋ to ebi kutɔ.”

⁵ E daa maŋ tiŋ n wora emamachisheŋ kama ndoŋ she e ka baŋ ta enɔ n deŋi belɔpo gbrɛ ko so nɛ b nya alenfia. K chinchiŋ mo ga ŋkpal basa na ka daa maa kɔ yirda so.

Yesu ka shuŋi bebɛsopo kuduanyɔ na be asheŋ

⁶ Nɛ Yesu kulti ndoŋ be ndewurbi na kikɛ to n ya kaa ŋini basa abɔrɛsheŋ.

⁷ Kachako nɛ e tre bebɛsopo kuduanyɔ na m ba shɛr n shuŋi bumo benyɔnyɔ nseŋ sa bumo eleŋ nɛ b baa tiŋ a ju mbuibi lubi basa to

⁸ nseŋ kaŋɛ bumo: “Men sa maŋ ta shɛŋ n ti menyi be amu so she kekpabi. Men sa maŋ ta ajibi ŋko bekulepo be kɔlgu ŋko n ta amansherbi n wɔtɔ menyi be ejifa to.

⁹ Men wɔtɔ asɛbta, ama men sa maŋ kaŋ buu kale nyɔsopo.”

¹⁰ Nɛ e naŋ kaŋɛ bumo: “Laŋ kama to nɛ men ya luri nɛ b sɔ menyi, men baa wɔ ndoŋ hale nɛ men ya lar kade na to.

¹¹ Kaplɛkama malɛ nɛ men fo nɛ b maŋ sɔ menyi ŋko ŋ kini kenu menyi be kubɔya na, men lar ŋ gbaŋgbaŋ menyi be aya to be shishɛr n lɛ bumo nɛ k baa la bumo be kekini menyi na be tɔɔnɛ.”

¹² Nɛ b lar n ya bɔ kubɔya na fanɛ ekama e lar mbe asheŋ lubi to.

¹³ Nɛ b ju mbuibi lubi damta ashi basa to n chulgi ŋku n wurge belɔpo damta so n chɛ bumo.

Jɔn kabɔrɛbɛrpo be luwu be asheŋ

¹⁴ Ewura Hɛrɔd daŋ nu asheŋ ere kikɛ ŋkpal Yesu be ketre ka sɔ kaplɛkama so. Nɛ beko kaŋɛ: “Jɔn kabɔrɛbɛrpo e naŋ tiŋi luwu to m ba na. Amoso nɛ e kɔ le be eleŋ mo to a wora asheŋ loŋ na.”

¹⁵ Nɛ beko malɛ kaŋɛ: “Elaija nna.” Nɛ beko kaŋɛ: “Anebi nna fanɛ dra na peyaana be eko.”

¹⁶ Hɛrɔd ka nu kumo nɛ e kaŋɛ: “Jɔn kabɔrɛbɛrpo nɛ n shin nɛ b ku mbe kumu na e naŋ tiŋi luwu to na.”

¹⁷ Mo, Hɛrɔd gbagba e daŋ shin nɛ b pɛ Jɔn ŋ kre nseŋ ti mo ebu. Hɛrɔd daŋ wora loŋ nna ŋkpal Hɛrodias, mo sipo Filip be eche nɛ e daŋ kil na so.

¹⁸ Le nɛ Jɔn kabɔrɛbɛrpo daa kaŋɛ Hɛrɔd: “K maŋ daga fo ka ta fo sipo Filip be eche.”

¹⁹ Amoso, Hɛrodias daŋ kurge mo yurkishi nna a fin mo nɛ e mɔ, ama e daa maŋ tiŋ ŋkpal Hɛrɔd ka daa ŋana Jɔn na so.

²⁰ Hɛrɔd daa nyi Jɔn ka daa la esa lela nɛ esa cheembi, amoso, e daa de mo so nna nɛnɛ. E daa sha kebaanu mbe mmalga, ama saŋkama nɛ e nu amo, a bee jija mbe kagbene to nna.

²¹ Ama kachako Hɛrodias nya kusɔ nɛ e daa sha na. Kumo be kamɔnchɛ daa la Hɛrɔd be kakurgeachɛ nna nɛ e wora kejigboŋ n sa abane be benimu nɛ benapo be benimu nɛ Galili be bebunyampoana.

²² Nɛ Hɛrodias pibiche lar m ba cha nɛ k par Hɛrɔd nɛ mbe befɔ ga. Nɛ Ewura na kaŋɛ kebichebi na: “Kule ma kusɔ kama nɛ fee sha nɛ n sa fo.”

²³ Kumo be kaman nɛ e bɔ ntaŋ ŋ kaŋɛ mo: “Meeŋ sa fo kusɔ kama nɛ fo kule ma hale nɛ k la efuli ere be bargato gba.”

²⁴ Nɛ kebichebi na lar n ya bishi mo nio: “Manɛ nɛ meeŋ kule?” Nɛ mo nio kaŋɛ: “Jɔn kabɔrɛbɛrpo be kumu.”

²⁵ Nɛ kebichebi na jɔ to m bɛta epul na to n yɔ Ewura na kutɔ n ya kaŋɛ: “Mee sha fo ka bar ma epul ere to Jɔn kabɔrɛbɛrpo be kumu kelɛfa so.”

²⁶ Ndoŋ nna nɛ Ewura na be kagbene jija mo ga, ama e daa maa sha nɛ e kini ŋkpal ntaŋana nɛ e bɔ mbe befɔ be anishito na so.

²⁷ Epul na to nɛ e shuŋi mbɔŋwura fanɛ e ya bar Jɔn be kumu.

²⁸ Nɛ mbɔŋwura na yɔ kabutikpa n ya ku Jɔn be kumu n ta kumo n deŋi kelɛfa so m ba sa kebichebi na nɛ e ta kumo n sa mo nio.

²⁹ Jɔn be bebɛsopo ka nu demu na nɛ b ya ta mo n ya nase kejembulaŋ to nchaŋ to.

Yesu ka sa basa ŋgboŋ anu ajibi be asheŋ

³⁰ Beshuŋipo na ka bɛta m ba Yesu kutɔ nɛ b ba kaŋɛ mo asɔ nɛ b wora nɛ asheŋ nɛ b ŋini kikɛ.

³¹ Saŋɛ na malɛ so basa damta daŋ baa ba bumo kutɔ nna a yɔ, amoso, Yesu nɛ mbe bebɛsopo daa maŋ nya kachena gba nɛ b ji ajibi. Ŋkpal loŋ so le nɛ e daŋ kaŋɛ bebɛsopo na: “Men shin nɛ an fin kakpa nɛ basa maŋ wɔtɔ nɛ men nya n wushi gbrɛbi.”

³² Ndoŋ nna nɛ bumo nawule luri ekuloŋ to n yɔ kakpa nɛ basa maŋ wɔtɔ.

³³ Ama basa damta wu b ka bee yɔ m pin epul na to basa nɛ b la bumo, nɛ b lar nde na kikɛ to n shile aya fuful n daŋ Yesu nɛ mbe bebɛsopo keyɔ ndoŋ.

³⁴ Yesu ka lar ekuloŋ na to nɛ e wu jimaŋ damta na nɛ bumo be asheŋ pɛ mo kuwɔr, ŋkpal manɛ so, b daa du fanɛ mbolpɔ nɛ b maŋ kɔ ekpapo nna. Nɛ e fara a ŋini bumo asɔ damta.

³⁵ Kaboŋ ka bee jija to na nɛ mbe bebɛsopo ba mo kutɔ m ba kaŋɛ mo: “Kaboŋ bee jija to nna na. Kakpa ere malɛ maŋ la basa to.

³⁶ Amoso, to bumo aya nɛ b yɔ ndɔana nɛ ndewurbi nɛ a taga to nfe ere to n ya tɔ kusɔ ko n ji.”

³⁷ Nɛ Yesu kaŋɛ bumo: “Menyi gbagba e sa bumo kusɔ ko nɛ b ji.” Nɛ b bishi mo: “Fee sha an ka ya tɔ pɔŋ alfanyɔso be bodobodo nna m ba sa bumo nɛ b ji a?”

³⁸ Nɛ Yesu bishi bumo: “Ebodobodo afanɛ nɛ men kɔ? Men ya keni.” B ka yɔ n ya keni nɛ b ba kaŋɛ mo: “Ebodobodo anu nɛ ekɔrɔtɔ anyɔ nɛ an kɔ.”

³⁹ Nɛ Yesu kaŋɛ bumo fanɛ b shin nɛ basa na e barga to ntuŋ ntuŋ so n chena afitiri bumbuŋ na so.

⁴⁰ Nɛ basa na chena m bɛ abar so, beko ntuŋ kalfa kalfa, beko malɛ ntuŋ adununu.

⁴¹ Nɛ Yesu ta ebodobodo anu nɛ ekɔrɔtɔ anyɔ na nseŋ keni esoso n nɛfa amo nseŋ fara a buri ebodobodo na to a sa bebɛsopo na fanɛ b baa sa basa na. Kumo be kaman nɛ e chige ekɔrɔtɔ na gba to n sa bumo kikɛ.

⁴² Nɛ ekama we m moɛ.

⁴³ Nɛ bebɛsopo na tise ebodobodo nɛ ekɔrɔtɔ jiŋka na m bɔlɔ nlantaŋɛ kuduanyɔ.

⁴⁴ Basa nɛ b we ebodobodo na daa sa fanɛ benyɛn ŋgboŋ anu.

Yesu ka nite nchu so be asheŋ

⁴⁵ Epul na to nɛ Yesu shin nɛ mbe bebɛsopo luri ekuloŋ to n juŋkpar mo n yɔ Bɛtsaida, kepagboŋ na be kaba ndoŋ nɛ mo alɛ shin nɛ jimaŋ na yɔ epe.

⁴⁶ E ka kela bumo n loge nɛ e yɔ kebeebi ko so nɛ e ya kule Ebɔrɛ.

⁴⁷ Kanyɛ ka ya biri nɛ ekuloŋ na wɔ kepagboŋ na be nferinto nɛ Yesu malɛ wɔ kedeŋi so.

⁴⁸ E wu fanɛ ekuloŋ na be kefar ka bee nu mbe bebɛsopo, ŋkpal manɛ so, afu daa kpata kumo nna. Amoso, koshinyɛn juŋkparso e nite nchu na so m ba bumo kutɔ.

⁴⁹ E daa sha kebaa baŋ bumo so nna n choŋ, ama b wu mo e ka na nchu na so, nɛ b fɛɛ n fɛɛto: “Kebuniyoyu!”

⁵⁰ Ŋkpal manɛ so, bumo kikɛ daŋ wu mo nna nɛ kufu pɛ bumo ga. Epul na to nɛ Yesu malga bumo kutɔ ŋ kaŋɛ: “Men keta kagbene, ma nna. Men sa maa lɔ kufu.”

⁵¹ Nɛ e luri ekuloŋ na to n tu bumo nɛ afu na yɔɔ. Nɛ k chinchiŋ bebɛsopo na ga,

⁵² ŋkpal manɛ so, b daa maŋ pin ebodobodo be mamachi be kesheŋ nɛ e wora na to, ŋkpal b ka daa kɔ amu kpakpaso na so.

Yesu ka chɛ Gɛnɛsarɛt be belɔpo be asheŋ

⁵³ B ka dii kepagboŋ na m ba kedeŋi so ashi Gɛnɛsarɛt, nɛ b ba chɛ ekuloŋ na m muni.

⁵⁴ B ka baŋ lar ekuloŋ na to nɛ basa pin Yesu epul na to.

⁵⁵ Kaplɛkama nɛ b nu Yesu ka wɔ efuli na so, b daa ta belɔpo nna a deŋi akpata so a bar mo.

⁵⁶ Kaplɛkama malɛ nɛ Yesu daŋ yɔ, ndewurbi to ŋko ndegboŋ to ŋko ndɔana to, basa daa ta bumo be belɔpo nna a lar kowu a kule mo fanɛ e baŋ wora ania n shin nɛ belɔpo na e nya mbe kusɔbuuso be kɔnɔ so gba m beta. Bekama malɛ kikɛ nɛ b beta kumo nya alenfia.