Maak 5 - EBƆRƐ BE KAWƆL

Yesu ka chɛ mbuibilubiwura ko be asheŋ

¹ Nɛ b ba Galili be kepagboŋ na be kaba ndoŋ, Gɛrasaebi be efuli so.

² Yesu ka baŋ lar ekuloŋ na to nɛ kanyɛn ko lar abeelaŋ nɛ baa puli bubuni akpa m ba shɛr mo to.

³ Amo be kanyɛn daa kɔ kiyoyu lubi nna nsaa wɔ nchaŋana na akpa.

⁴ Esa kama daa maŋ naa nyi kusɔ nɛ baaŋ wora mo. B daŋ ta ŋgbɛlɛbi nna ŋ kre mbe enɔana nɛ aya, ama saŋkama e daa tuge amo to nna a bɔɔlɔ mbe aya so be ŋgbɛlɛbi na kikɛ. Mbe eleŋ na so esa kama daa maa tiŋ a pɔɔ mo so.

⁵ E daa nite a kilgi to nchaŋana na nɛ abeebi na so nna a boŋ to a ta ajembu a ku mbe kumu kapa nɛ kanyɛ.

⁶ E ka daŋ yili kufɔ n wu Yesu nɛ e shile m ba gbir mbe anishito m boŋ to eleŋso a kaŋɛ:

⁷ “Yesu, Ebɔrɛ Enyɛnpetale Pibinyɛn, manɛ nɛ fee fin ma to? Ebɔrɛ so, mee kule fo nna, sa maŋ tɔrɔ ma.”

⁸ E daŋ kaŋɛ loŋ nna ŋkpal Yesu ka daŋ kaŋɛ fanɛ kiyoyu lubi na e lar mo to so.

⁹ Nɛ Yesu bishi mo: “Fo ketre?” Nɛ e kaŋɛ: “Ma ketre e la jimaŋ, ŋkpal manɛ so, an shibi nna.”

¹⁰ Nɛ e kule Yesu ga fanɛ e sa maŋ kaŋ ju ayoyu lubi na efuli na so.

¹¹ Jemanɛ na so nɛ epreku damta ko daŋ taga to ndoŋ a ji kebeebi ko ase.

¹² Nɛ ayoyu lubi na kule Yesu ŋ kaŋɛ:

¹³ “Shin nɛ an ya luri epreku ere to.” Nɛ e sa bumo ekpa. Nɛ ayoyu lubi na lar kanyɛn na to n ya luri epreku na to. Epreku na kikɛ daŋ fo ŋgboŋ anyɔ n shile m bɔla kebeebi na be kaseto n ya luri kepagboŋ na to m mur.

¹⁴ Eprekukpapoana na ka wu loŋ nɛ b shile n ya bɔ kumo be kubɔya n sa kade na to ebi nɛ bumo nɛ b wɔ ndɔana kikɛ to. Nɛ basa lar n ya keni kusɔ nɛ k wora na.

¹⁵ B ka ba Yesu kutɔ m ba wu mbuibilubiwura na, kanyɛn nɛ e daa kɔ jimaŋ mo to na, ka kɔ mbe nfɛra lela m buu asɔ a tase nɛ kufu pɛ bumo ga.

¹⁶ Bumo nɛ b daa wɔtɔ n wu kusɔ nɛ k wora na kaŋɛ kusɔ nɛ k wora mbuibilubiwura na nɛ epreku na.

¹⁷ Nɛ b fara a kule Yesu fanɛ e lar bumo be efuli so.

¹⁸ Yesu ka bee luri ekuloŋ to nɛ kanyɛn nɛ mbuibi lubi daa wɔ mo to na kule mo ŋ kaŋɛ: “Shin nɛ n tu fo a yɔ.”

¹⁹ Ama Yesu daa maŋ shuli nseŋ kaŋɛ mo: “Bɛta n yɔ epe fo basa kutɔ n ya kaŋɛ bumo kusɔgboŋ nɛ Enyɛnpe wora n sa fo nɛ kananɛ e wu fo kuwɔr be asheŋ.”

²⁰ Nɛ kanyɛn na bɛta n yɔ nde kudu na kikɛ to n ya kaa kaŋɛ kusɔgboŋ nɛ Yesu wora n sa mo na be asheŋ nɛ k chinchiŋ ekama nɛ e nu mbe kubɔya na ga.

Jairus pibiche nɛ kache nɛ e beta Yesu be asheŋ

²¹ Yesu ka naŋ bɛta n ta ekuloŋ n yɔ kepagboŋ na be kaba ndoŋ nɛ jimaŋ damta naŋ chala m buu mo kepa na ase.

²² Ndoŋ nna nɛ kade na to be nshɛrbu to be enimu ko nɛ baa tre Jairus na ba wu Yesu nseŋ gbir mbe anishito

²³ ŋ kule mo ga ŋ kaŋɛ: “M pibichesobi e naa lɔ ga a shin nɛ e wu. Amoso, wora ania m ba ta fo enɔ n deŋi mo so nɛ e nya alenfia nsaa maŋ wu.”

²⁴ Nɛ mo nɛ Yesu fara a yɔ. Nɛ jimaŋ damta ko bɛ mo so, hale a tir mo to.

²⁵ Kache ko malɛ daa wɔtɔ a shil ŋklaŋ nfɛ kuduanyɔ

²⁶ n tɔrɔ mbe kumu adurwuraana damta be enɔ to n jija mbe amansherbi kikɛ a fin kechɛ mbe kumu, ama saŋkama kulɔ na daa ti so nna.

²⁷ Ŋkpal e ka daŋ nu Yesu be asheŋ so nɛ e daŋ luri jimaŋ na to m ba Yesu be kaman

²⁸ ŋ kaŋɛ mbe kumu: “Nɛ m baŋ beta mbe asɔbuuso ere gba, meeŋ nya alenfia.”

²⁹ E ka beta mbe asɔbuuso na, epul na to nɛ ŋklaŋ na ku. Nɛ mo gbagba pin mbe eyur to fanɛ e nya alenfia.

³⁰ Epul na to nɛ Yesu pin eleŋ ka lar mo to nɛ e kilgi jimaŋ na to m bishi: “Esa mo e beta ma asɔbuuso?”

³¹ Nɛ mbe bebɛsopo kaŋɛ: “Fo gbagba nyi kananɛ basa shi a buu fo so nseŋ naa bishi fanɛ esa mo e beta fo a?”

³² Ama Yesu maŋ tuge bumo ŋ kraa keni a fin esa nɛ e beta mbe asɔbuuso na.

³³ Kache na ka pin fanɛ e nya alenfia nɛ e lar a chicha kufuso m ba gbir Yesu be anishito ŋ kaŋɛ mo kusɔ nɛ k wora na kikɛ.

³⁴ Nɛ Yesu kaŋɛ mo: “M pibiche, fo yirda e chɛ fo. Baa yɔ nɛ kagbenewushi. Fo nya alenfia.”

³⁵ Yesu daŋ kraa malga nna nɛ mbɔ shi nshɛrbu to be enimu pe m ba kaŋɛ Jairus: “Fo pibiche na wu. Amoso, sa maŋ naŋ tɔrɔ eŋinipo na.”

³⁶ Ama Yesu maŋ tuge bumo nseŋ kaŋɛ nshɛrbu to be enimu na: “Sa maa lɔ kufu, fo ere e yirda de.”

³⁷ E maŋ shin nɛ ekama bɛ mo so she Pita nɛ Jeems nɛ mo sipo Jɔn.

³⁸ B ka fo nshɛrbu to be enimu na pe nɛ Yesu wu laŋ na to be kebagato n nu b ka bee shu kebia na be keeli a boŋ to.

³⁹ E ka luri laŋ na to nɛ e bishi bumo: “Manɛ be awɔr nde? Manɛ nna nɛ menyee shu? Kebia na maŋ wu nna, e bee di nna.”

⁴⁰ Nɛ basa na fara a mushe mo. Nɛ e shin nɛ bumo kikɛ lar laŋ na to ŋ ka kebia na mo tuto nɛ mo nio nɛ mbe bebɛsopo asa na n ya luri ebu nɛ kebia na daa dese to na to.

⁴¹ Ndoŋ nna nɛ e pɛ mbe enɔ to ŋ kaŋɛ mo: “Talita kum.” Kumo e la fanɛ “Kebichebi, ma e kaŋɛ fo: Niŋi to.”

⁴² Epul na to nɛ e koso n fara a nite a kilgi to. E daa la nfɛ kuduanyɔ nna. Kusɔ nɛ k wora na daŋ chinchiŋ bumo ga.

⁴³ Ama Yesu daŋ fiɛ bumo so ga fanɛ b sa maŋ kaŋ kaŋɛ esa kama nseŋ kaŋɛ: “Men sa mo kusɔ ko nɛ e ji.”