Maak 3 - EBƆRƐ BE KAWƆL

Kanyɛn nɛ mbe enɔ wu na be asheŋ

¹ Ndoŋ nna nɛ Yesu naŋ bɛta n yɔ nshɛrbu na to nɛ kanyɛn ko malɛ kɔ enɔ wuso a wɔ ndoŋ.

² Basa ko malɛ gba daa wɔ ndoŋ a fin ekpa nɛ b wu Yesu kulubi, amoso b daa tɛ mo nna a keni fanɛ e beeŋ chɛ kanyɛn na kewushiachɛ na a.

³ Nɛ Yesu kaŋɛ enɔwusowura na: “Koso m ba anishito nfe.”

⁴ Kumo be kaman nɛ e bishi basa na: “Manɛ nɛ anyi be mbra na bee kaŋɛ anyi fanɛ an baa wora kewushiachɛ, kewora kelela ŋko kewora kulubi, kumɔlga esa be ŋkpa ŋko keshin nɛ e mur?” Ama b maŋ tiŋ ŋ kaŋɛ shɛŋ.

⁵ Kumo be kaman nɛ Yesu keni bumo agbo nɛ kagbenejijaso ŋkpal b ka kɔ amu kpakpaso so nseŋ kaŋɛ kanyɛn na: “Teŋi fo enɔ to.” E ka teŋi kumo to nɛ mbe enɔ na nya eleŋ.

⁶ Epul na to nɛ Efarisiana na lar nshɛr na to, nɛ bumo nɛ Hɛrɔdebi ya shɛr n to jina kananɛ baaŋ wora m mɔ Yesu.

Kananɛ Yesu chɛ basa ashi kepagboŋ ko ase be asheŋ

⁷ Yesu nɛ mbe bebɛsopo na lar n yɔ Galili be kepagboŋ ase nɛ jimaŋ damta ko buu mo so. B shi Galili,

⁸ Judiya, Jerusalɛm nɛ Idumiya be efuli so nɛ Jɔɔdan be kaba so ndoŋ nɛ Tayɛ nɛ Saidɔn be kefɛato nna. Jimaŋ damta ere ba Yesu kutɔ ŋkpal asɔ nɛ b nu e ka bee wora so.

⁹ Jimaŋ na be keshi so Yesu daŋ kaŋɛ mbe bebɛsopo na fanɛ b lɔŋɛ ekuloŋ n yili mo nɛ e luri to nɛ basa na e sa maŋ kaŋ tir mo to ga.

¹⁰ Ŋkpal e ka daŋ chɛ basa damta so, belɔpo na kikɛ daa ŋin abar a fin kebeta mo nna.

¹¹ Saŋkama nɛ ayoyu lubi nɛ b wɔ basa to na baŋ wu Yesu, b daa shin nɛ basa na bee lar nna a tɔr mbe anishito a boŋ to a kaŋɛ: “Fo e la Ebɔrɛ Pibinyɛn na.”

¹² Nɛ Yesu kpele ayoyu lubi na kusoe ga fanɛ b sa maa kaŋɛ basa esa nɛ e la mo.

Kananɛ Yesu lara mbe bebɛsopo kuduanyɔ na be asheŋ

¹³ Nɛ Yesu dii kebeebi ko so n tre basa nɛ e daa sha nɛ b ba mo kutɔ.

¹⁴ Nɛ e lara basa kuduanyɔ fanɛ mo nɛ bumo e baa wɔtɔ nseŋ nase bumo ketre beshuŋipo. E lara bumo nna nɛ b ya kaa bɔ Ebɔrɛ be kubɔya

¹⁵ nseŋ sa bumo eleŋ nɛ b baa tiŋ a ju mbuibi lubi basa to. Basa kuduanyɔ nɛ e lara na be atre nde:

¹⁶ Saimɔn, emo nɛ Yesu nase Pita na

¹⁷ nɛ Jeems nɛ mo sipo Jɔn, Zɛbedi be mbia, ketre nɛ Yesu daŋ tre bumo e la Bowanɛɛjes, kumo be kifito e la Basa Brembreŋ,

¹⁸ nɛ Andru nɛ Filip nɛ Baatɔlomiu nɛ Matiu nɛ Tɔmas nɛ Jeems, Alfias pibi nɛ Tadias nɛ Saimɔn, emo nɛ b daa tre Zɛlɔt na

¹⁹ nɛ Judas Iskareɔt, emo nɛ e daŋ ba ki edebɔrpo na.

Yesu nɛ Biyɛlzibel be asheŋ

²⁰ Nɛ Yesu yɔ epe. Nɛ jimaŋ damta naŋ chala hale nɛ Yesu nɛ mbe bebɛsopo maŋ nya kachena nɛ b ji.

²¹ Mbe basa ka nu kumo be asheŋ nɛ b lar nɛ b ba keta mo n lar ndoŋ, ŋkpal manɛ so, b nu basa ka bee kaŋɛ fanɛ: “Mbe kumu kilgi nna.”

²² Mbraŋinipoana be beko nɛ b daŋ shi Jerusalɛm na daŋ ba kaŋɛ fanɛ: “E kɔ mbuibi lubi be ewura Biyɛlzibel mo to nna. Mo e naa sa mo eleŋ nɛ e kɔ a ju mbuibi lubi na.”

²³ Nɛ Yesu tre basa na m bɔ bumo aŋasa: “Nuso nɛ Setani bee wora a ju Setani?

²⁴ Ewura kama nɛ mbe basa barga to a kɔ abar kena, kuwura na maaŋ chɛr ŋkeŋ tɔr.

²⁵ Nɛ kakurge koŋwule to ebi barga to a kɔ abar kena, kakurge na beeŋ jija.

²⁶ Amoso, nɛ Setani koso m barga mbe kumu to a kɔ mo gbagba be kumu kena, e maaŋ chɛr ŋkeŋ tɔr.

²⁷ Esa kama maaŋ tiŋ n tintiŋ n luri elempo be laŋ to n ta mbe asɔ n yɔ ama e kre elempo na nna pɔɛŋ, nseŋ tiŋ n yuri mbe kowu na to be asɔ n yɔ.

²⁸ Ma e kaŋɛ menyi kashenteŋto na fanɛ nyiŋgbasa be asheŋ lubi kikɛ nɛ mbe mmalga kama nɛ a bee gbiti Ebɔrɛ beeŋ tiŋ n nya keyigempaŋ.

²⁹ Ama ekama nɛ e malga ŋ gbiti Kiyoyu Cheeŋ na, mbe alubi na maŋ kɔ keyigempaŋ kikɛ, ŋkpal manɛ so, e wora kulubi mbaanaayɔ.”

³⁰ Yesu daŋ kaŋɛ loŋ nna ŋkpal beko ka daŋ kaŋɛ fanɛ e kɔ kiyoyu lubi na so.

Yesu mo nio nɛ mo siponyɛnsoana be asheŋ

³¹ Kachako Yesu mo nio nɛ mo siponyɛnsoana daŋ ba Yesu kutɔ m ba yili kowushina n shuŋi fanɛ b tre mo.

³² Nɛ jimaŋ nɛ b chena ŋ kulti Yesu na to be beko kaŋɛ mo: “Keni, fo nio nɛ fo siponyɛnsoana yil kowushina a fin fo.”

³³ Nɛ Yesu bishi: “Basa mo e la n nio nɛ n siponyɛnsoana?”

³⁴ Nɛ e kilgi ŋ keni basa nɛ b chena ŋ kulti mo na nseŋ kaŋɛ: “N nio nɛ n sipoana nde.

³⁵ Ŋkpal manɛ so, ekama nɛ e bee wora Ebɔrɛ be aparsheŋ e la n sipo nɛ n sipoche nɛ n nio.”