Maak 16 - EBƆRƐ BE KAWƆL

Yesu be ketiŋi luwu to be asheŋ

¹ Kewushiachɛ na be jemanɛ ka baŋ choŋ nɛ Mɛɛri Magdalin nɛ Jeems mo nio Mɛɛri nɛ Salomi tɔ etulale nɛ b ya gbiti Yesu.

² Bɔkwe na be kachɛ juŋkparso e daa la. Chipurdidi, saŋɛ nɛ epeŋi bee pete na nɛ b daŋ yɔ nchaŋ na ase.

³ B ka wɔ ekpa na to a yɔ nɛ b bishi abar: “Esa mo e naaŋ ya gbelti kejembu na ashi nchaŋ na be kɔnɔ so n sa anyi?”

⁴ Ndoŋ nna nɛ b keni n wu fanɛ b teŋ gbelti kejembu na ashi ndoŋ. Kejembu gboŋgboŋi ko e daa la.

⁵ Ndoŋ nna nɛ b luri nchaŋ na to n ya wu kabrantiɛbia ko nɛ e tase jisoso m buu piŋi fuful, nɛ k chinchiŋ bumo.

⁶ Nɛ e kaŋɛ bumo: “Men sa maŋ shin nɛ k chinchiŋ menyi. Nazarɛt be Yesu nɛ b daŋ gbir kedibi largato so na nɛ menyee fin, ama e maŋ wɔ nfe, e tiŋi luwu na to. Men keni kakpa nɛ b daŋ nase mo.

⁷ To, men bɛta n ya kaŋɛ mbe bebɛsopo nɛ Pita gba fanɛ e juŋkpar menyi n choŋ Galili. Menyeeŋ ya wu mo ndoŋ fanɛ kananɛ e kaŋɛ menyi na.”

⁸ Nɛ beche na shile n lar nchaŋ na to manaŋ, ŋkpal manɛ so, kufu nɛ keyeŋiyeŋi daŋ pɛ bumo, amoso, b daa maŋ kaŋɛ esa kama shɛŋ ŋkpal kufu na so. [

Yesu ka lar Mɛɛri Magdalin so be asheŋ

⁹ Yesu ka tiŋi luwu to bɔkwe be kachɛ juŋkparso, nɛ e fara n lar Mɛɛri Magdalin so, emo nɛ e daŋ ju mbuibi lubi ashunu mo to na.

¹⁰ Nɛ e yɔ n ya kaŋɛ bumo nɛ bumo nɛ Yesu daa wɔtɔ na. Saŋɛ na so nɛ b tase a shu ŋkpal bumo be ŋgbene ka daŋ jija bumo na so.

¹¹ Ama b ka nu e ka yɛ Yesu tiŋi luwu to hale nɛ e wu mo gba, b maŋ yirda kumo.

Yesu ka lar bebɛsopo anyɔ ko so be asheŋ

¹² Kumo be kaman nɛ Yesu chɛrga n lar bumo to be benyɔ ko so nɛ b wɔ ekpa to a yɔ kade karso ko.

¹³ Nɛ b bɛta m ba kaŋɛ bumo nɛ b ka na, ama b kini keyirda bumo.

Yesu ka lar bebɛsopo kudukako na so be asheŋ

¹⁴ Kumo be lalaloge nɛ Yesu ba lar bebɛsopo kudukako na so nɛ b tase a ji nɛ e malga bumo ŋkpal b ka maŋ kɔ yirda so n naŋ kpal b ka ta kumuleŋ ŋ kini keyirda bumo nɛ b wu mo saŋɛ nɛ e tiŋi luwu to na so.

¹⁵ Nɛ e kaŋɛ bumo: “Men yɔ efuli kikɛ so n ya bɔ kubɔya na n sa kepɔrso kikɛ.

¹⁶ Ekama nɛ e yirda, nɛ b bɛr mo kabɔrɛbɛr, e beeŋ nya kumɔlga, ama ekama nɛ e maŋ yirda, e beeŋ nya kasogberge.

¹⁷ Beyirdapo beeŋ nya le be eleŋ: Baaŋ ta ma ketre n ju mbuibi lubi ashi basa to.

¹⁸ Baaŋ gbar ŋgbar nɛ b maa nu nɛ b pɛ awɔ ŋko n ji kɔrtɔ, a maaŋ wora bumo shɛŋ. Baaŋ ta bumo be enɔana n deŋi n deŋi belɔpoana so nɛ b nya alenfia.”

Yesu ka yɔ ebɔrɛso be asheŋ

¹⁹ Enyɛnpe Yesu ka malga bumo kutɔ n loge nɛ e yɔ ebɔrɛso n ya chena Ebɔrɛ be jisoso, ebunyampo be kakpa.

²⁰ Bebɛsopo na ya bɔ bumo be kubɔya kaplɛkama nɛ bumo nɛ Enyɛnpe shuŋ nɛ Enyɛnpe ta etɔɔnɛsheŋ ŋ ŋini fanɛ bumo be kubɔya na la kashenteŋ nna. Amɛn.]