Maak 15 - EBƆRƐ BE KAWƆL

B ka yɛra Yesu Gomena Pailat kutɔ be asheŋ

¹ Kare ka baŋ chɛ, nɛ bɔrɛmatapowuraana nɛ benimuana na nɛ mbraŋinipoana na nɛ Sanhedrinebi na kikɛ ya kre bumo be nia nseŋ ta ŋgbɛlɛbi ŋ kre Yesu n ta mo n lar n ya bɔɔ Gomena Pailat enɔ.

² Nɛ Pailat bishi mo: “Fo e la Juwebi be Ewura na a?” Nɛ Yesu shuli so ŋ kaŋɛ: “Loŋ gbagba nɛ fo yɛ na.”

³ Nɛ bɔrɛmatapowuraana na ji asheŋ damta n deŋi Yesu.

⁴ Nɛ Pailat naŋ lɔŋɛ m bishi mo: “Fo maŋ kɔ shɛŋ a kaŋɛ nna a? Keni asheŋ damta nɛ baa ji a deŋi fo loŋ.”

⁵ Ama Yesu daa maŋ kaŋɛ mo shɛŋ. Nɛ k chinchiŋ Pailat ga.

B ka kaŋɛ Yesu daga luwu be asheŋ

⁶ Kebansonchoŋ be kejigboŋ be jemanɛ kikɛ Pailat daa lara basa na be keparso be esa nna ashi kabuti to.

⁷ Jemanɛ na so basa ko nɛ b daŋ kɔ ewura be eleŋ m mɔ basa kelantokɔ to na daa wɔ kabuti to. Bumo to be eko nɛ b daa tre Barabas.

⁸ Jimaŋ na ka ba shɛr nɛ b fara a kule Pailat fanɛ e yaŋ wora kananɛ e chɛr a wora na, n lara esa ko ashi kabuti to.

⁹ Nɛ Pailat bishi bumo: “Juwebi be Ewura na nɛ menyee sha ŋ ka lara n sa menyi a?”

¹⁰ E daŋ bishi loŋ nna, ŋkpal manɛ so, e daa nyi bɔrɛmatapowuraana na ka daŋ ta Yesu m bɔɔ mo enɔ ŋkpal kayurbesa so.

¹¹ Ama bɔrɛmatapowuraana na we n wɔtɔ jimaŋ na nna fanɛ b kule Pailat nɛ e lara Barabas kabuti to n sa bumo ŋ ka Yesu.

¹² Nɛ Pailat naŋ bishi bumo: “To, nɛ nuso nɛ meeŋ wora emo nɛ menyee tre Juwebi be Ewura na?”

¹³ Nɛ b ponte m buu mo: “Gbir mo m mata kedibi largato so.”

¹⁴ Nɛ Pailat naŋ bishi bumo: “Manɛ nna? Manɛ be kulubi nɛ e wora?” Nɛ b lɔŋɛ m ponte awɔrso ga a chɔ sososo na ŋ kaŋɛ: “Gbir mo m mata kedibi largato so.”

¹⁵ Pailat daa maa sha keda jimaŋ na so, amoso, e daŋ lara Barabas nna n sa bumo nseŋ shin nɛ b kuya Yesu so nseŋ ta mo m bɔɔ basa na enɔ fanɛ b ya gbir mo m mata kedibi largato so.

Kananɛ benapo wora Yesu eyurto be asheŋ

¹⁶ Ndoŋ nna nɛ benapo na keta Yesu n luri lambu be epunto, kumo e la fanɛ gomena be lambu na n tre benapo na kikɛ m ba shɛr.

¹⁷ Nɛ b ta kusɔbuuso peper kunɔkunɔ m buu Yesu nseŋ ta ewidibi be ayabi n wora kuwurwuro m buu mo.

¹⁸ Ndoŋ nna nɛ b fara a chɔrɔ mo ŋ kaŋɛ: “Juwebi be Ewura, anyee chɔrɔ fo.”

¹⁹ Nɛ b ta kedibi ŋ ŋmɛa mbe kumu n tuu echɔl n fea mo nseŋ gbir mbe anishito m bunyaŋ mo.

²⁰ B ka wora mo eyurto n loge nɛ b lara kusɔbuuso peper kunɔkunɔ na nseŋ naŋ ta mo gbagba be asɔbuuso m buu mo nseŋ keta mo n yɔ nɛ b ya gbir mo m mata kedibi largato so.

B ka gbir Yesu m mata kedibi largato so be asheŋ

²¹ B ka bee yɔ nɛ b ya shɛr Sairini be kanyɛn ko nɛ baa tre Saimɔn to nɛ e shi adɔ to a luri kadegboŋ na to nɛ b tintiŋ mo nɛ e sulɔ Yesu be kedibi largato na. Kanyɛn na daa la Alɛkzaanda nɛ Rufes bumo tuto nna.

²² Nɛ b yɛr Yesu kakpa nɛ baa tre Gɔlgata na, kumo be kifito e la, Kumuwibi be Kakpa.

²³ Ndoŋ nɛ b ta kudur ko nɛ baa tre mir n wea yabra ko to n sa mo fanɛ e nuu nɛ e kini.

²⁴ Nɛ b gbir mo m mata kedibi largato na so nseŋ barga mbe asɔbuuso to n nase a to beri a fin kumo nɛ ekama beeŋ nya.

²⁵ Kachipurso kerfi akpanu nɛ b daŋ gbir mo m mata kedibi largato na so.

²⁶ Shɛda be kasibɛ nɛ b daŋ sibɛ ŋ gbir m mata mbe kumu ase e daa la: “JUWEBI BE EWURA NA NDE.”

²⁷ B daŋ gbir beyu anyɔ ko gba m mata ndibi largatoana so n ti mo so, ekoŋwule daa wɔ mbe jisoso nɛ ekoŋwule malɛ daa wɔ mbe bena so.

²⁸ Kumo be loŋ e daŋ shin nɛ abɔrɛsibɛ na bɔla ekpa fanɛ, b ta mo n ti alubiworapoana so.

²⁹ Basa nɛ b daa choŋ gba daa maŋ bumo be amu so nna a tege Yesu a kaŋɛ: “Aha, fo yɛ feeŋ bure bɔrɛlambu na nseŋ pɔr kumo nchɛ asa be kefɛato.

³⁰ To, gbelge kedibi largato na so m mɔlga fo kumu ai!”

³¹ Loŋ koŋwule na nɛ bɔrɛmatapowuraana na nɛ mbraŋinipoana na daŋ wora mo eyurto ŋ kaŋɛ abar: “E mɔlga basa pɔtɛ, ama e maaŋ tiŋ m mɔlga mo gbagba be kumu.

³² Men shin nɛ an keni Kristo, Israɛlebi be Ewura na ŋko e beeŋ tiŋ ŋ gbelge ashi kedibi largato na so m ba nɛ an yirda mo a.” Nɛ bumo nɛ b gbir m mata ndibi largatoana so n ti mo so na gba daŋ tege mo.

Yesu be luwu be asheŋ

³³ Ta a ba kapaso, nɛ tentembiri ba buu efuli na kikɛ so m biri to loŋ hale n ya fo kaaseso kerfi asa.

³⁴ Kerfi asa be jemanɛ na nɛ Yesu boŋ to awɔrso m bishi Ebɔrɛ le: “Elɔi, Elɔi, lama sabaktani?” Kumo be kifito e la fanɛ “Ma Ebɔrɛ, ma Ebɔrɛ, manɛ e ba nɛ fo yige ma?”

³⁵ Basa nɛ b daa yil ndoŋ na be beko ka nu loŋ nɛ b yɛ: “Men nu, Elaija nɛ e bee tre na.”

³⁶ Nɛ basa na be eko shile n ya ta kiche m pɔlɔ yabra nyannyanso ko to nseŋ ta kedibi m maŋ kumo so n yɔ Yesu be kɔnɔ ase ŋ kaŋɛ: “Men jo nɛ an keni ŋko Elaija beeŋ ta mo ŋ gbelge kedibi largato ere so a.”

³⁷ Ndoŋ nna nɛ Yesu boŋ to awɔrso nseŋ fute mbe lalaloge be efute.

³⁸ Nɛ bɔrɛlambu na to be patisa na yili kumo be esoso n chaŋɛ to m ba kaseto.

³⁹ Benapo be enimu ko nɛ e daa yil Yesu be anishito na ka wu kananɛ Yesu fute mbe lalaloge be efute na nɛ e kaŋɛ: “Kashenteŋto kanyɛn ere daa la Ebɔrɛ Pibinyɛn nna.”

⁴⁰ Beche ko gba daa yil ekarso a keni. Bumo to be beko e daa la Mɛɛri Magdalin nɛ Mɛɛri, Jeems kekarkarso nɛ Josɛf bumo nio nɛ Salomi.

⁴¹ B daŋ bɛ Yesu so nna hale ashi Galili a chɛ mo to. Beche damta nɛ b daŋ bɛ mo so m ba Jerusalɛm na gba daa wɔtɔ.

Yesu be kepuli be asheŋ

⁴² Kaase ka fo, nɛ Arimatiya be Josɛf ba. E daa la Juwebi be nshɛrwuraana na to be ebunyampo nna nɛ mo alɛ daa jo Ebɔrɛ be kuwura na be keba.

⁴³ Ŋkpal k ka daa la kachɛ nɛ k juŋkpar kewushiachɛ na, kebelase be kachɛ na so nɛ Josɛf ji kenyɛn n ya luri Pailat kutɔ n ya kule mo Yesu be kebuni.

⁴⁴ Pailat ka nu fanɛ Yesu teŋ wu na nɛ k chinchiŋ mo ga. Nɛ e tre benapo be enimu na m bishi fanɛ Yesu ka wu k chɛr a?

⁴⁵ Pailat ka nu enimu na be kubɔya fanɛ Yesu teŋ wu na nɛ e sa Josɛf ekpa fanɛ e ya ta ebuni na.

⁴⁶ Nɛ Josɛf tɔ kesaŋɛ lela nseŋ lara ebuni na kedibi largato na so n ta kesaŋɛ na m mea mo nseŋ ta mo n nase kejembulaŋ kurso ko be nchaŋ to. Ndoŋ nna nɛ e gbelti kejembu gboŋgboŋi ko m ba ti nchaŋ na be kɔnɔ so.

⁴⁷ Mɛɛri Magdalin nɛ Josɛf mo nio Mɛɛri daŋ pɛshɛ n wu kakpa nɛ b nase Yesu na.