Maak 13 - EBƆRƐ BE KAWƆL

Yesu ka malga bɔrɛlambu be kebure be asheŋ

¹ Yesu ka bee lar bɔrɛlambu na to nɛ mbe bebɛsopo na be eko kaŋɛ mo: “Eŋinipo, keni mamachi be ajembu nɛ ebuana loŋ.”

² Nɛ Yesu bishi mo le: “Fo wu nwu gboŋ ere ŋko? Kejembu koŋwule kama gba maaŋ ba ka a bɛ kumo barkasa so. Baaŋ ba da amo kikɛ n lɛ.”

Etɔrɔ nɛ kekishi be kasogberge be asheŋ

³ Kamalga na be kaman nɛ Yesu lar ndoŋ n ya kaa tase Ɔlifs be kebee na so, bɔrɛlambu be kaba ndoŋ, nɛ Pita nɛ Jeems nɛ Jɔn nɛ Andru ba mo kutɔ m ba ŋana m bishi mo:

⁴ “Kaŋɛ anyi saŋɛ mo nɛ kesheŋ nɛ fo malga na beeŋ ba nɛ manɛ malɛ e naaŋ ŋini fanɛ loŋ be jemanɛ na fo.”

⁵ Nɛ Yesu fara a ŋini bumo: Men baa da so, nɛ esa kikɛ e sa maŋ fule menyi.

⁶ Ŋkpal manɛ so, basa damta beeŋ ba kaa kɔ ma ketre a na a kaŋɛ: ‘Ma e la mo!’ Nseŋ fule basa damta.

⁷ Nɛ men kaŋ ba kaa nu fanɛ basa bee kɔ abar ana nseŋ naa nu fanɛ basa beeŋ kɔ abar ana, men sa maŋ shin nɛ menyi be ŋgbene e baa ku menyi, ŋkpal manɛ so, a daga loŋ be asheŋ na ka wora, ama lalaloge be jemanɛ na maŋ naŋ fo pɔɛŋ.

⁸ Efuli ko beeŋ kɔ kuko kena nɛ kuwurgboŋ ko e kɔ kuwurgboŋ nyɔsopo malɛ kena. Abembeŋ beeŋ ba mboŋ damta nɛ akoŋ damta e tɔr. Le be asɔ du na fanɛ kakurge be ebesa juŋkparso.

⁹ Men baa de menyi be amu so, ŋkpal manɛ so, basa beeŋ pɛ menyi n yɔ demujikpa n ya kuya menyi so ashi nshɛrbuana to. Baaŋ shin nɛ men yili bewurbi nɛ bewurgboŋ be anishito ŋkpal ma so nɛ men ji ma asheŋ be shɛda n sa bumo.

¹⁰ K daga yiri kikɛ ka nu baru lela na pɔɛŋ nɛ jemanɛ ere be ekar e fo.

¹¹ Nɛ b baa yɛr menyi demujikpa nɛ b ya bɔɔ demujipo enɔ, men sa maŋ fara a fɔŋ kusɔ nɛ menyeeŋ ya kaŋɛ so. Ama kumo be jemanɛ na ya fo, men kaŋɛ kusɔ nɛ k ba menyi be nnɔ to, ŋkpal manɛ so, mmalga nɛ menyeeŋ nya na maaŋ baa la menyeya, a beeŋ baa shi Kiyoyu Cheeŋ na kutɔ nna.

¹² Basa beeŋ ta bumo niopibiana gbagba n sa nɛ b mɔ nɛ betuto e wora bumo be bibi loŋ, mbia beeŋ wu bumo nioana nɛ bumo tutoana kedoŋ n ta bumo n sa nɛ b mɔ.

¹³ Ekama beeŋ kishi menyi ŋkpal ma so. Ama esa kama nɛ e ji kanyiti n ya fo lalaloge na beeŋ nya kumɔlga.

Mbushu be alambure be asheŋ

¹⁴ Men baŋ ya wu edɔsopogboŋ nɛ e bee shin nɛ kemur bee ba na ka yil kakpa nɛ k maŋ daga na, fo nɛ fee kraŋ fo pin kesheŋ ere be kifito! Men baŋ ya wu loŋ be asheŋ, men shin nɛ bumo nɛ b wɔ Judiya be efuli so na e shile n yɔ abee ase.

¹⁵ Esa kama nɛ e wɔ mbe kuchoŋi so, e sa maŋ naŋ gbelge n yɔ mbe ebu to n ya ta kusɔ kama.

¹⁶ Nɛ ekama malɛ nɛ e wɔ ndɔ to, e sa maŋ naŋ bɛta n yɔ epe n ya ta mbe piŋi.

¹⁷ Yee, kumo be jemanɛ na, bedampoche nɛ beche nɛ b kɔ mbia nɛ b kraa wɔ enɔ to beeŋ wu asheŋ ga.

¹⁸ Men baa kule Ebɔrɛ nɛ loŋ be asheŋ na e sa maŋ ba wora awo to.

¹⁹ Ŋkpal manɛ so, nchɛ na be tɔrɔ beeŋ ba kaa chɔ tɔrɔ kama nɛ k ba basa so yili durnya be sososo, Ebɔrɛ be kasɔto be jemanɛ na kikɛ, m ba fo mbre. Tɔrɔ kama malɛ maaŋ naŋ ba m ba fo kumo so kikɛ.

²⁰ Nɛ Enyɛnpe daa maŋ ku nchɛ na so, esa kama daa maaŋ nya kumɔlga. Ama ŋkpal mbe basa laraso nɛ e lara so, e ku nchɛ na so.

²¹ Amo be jemanɛ na nɛ esa baŋ kaŋɛ menyi le: ‘Men keni, Kristo na nde!’ ŋko ‘Men keni, mo e wɔ ndoŋ ere na!’ Men sa maŋ kaŋ yirda kumo.

²² Ŋkpal manɛ so, befɛpo nɛ baa tre bumo be amu Kristo na nɛ anebi fɛpoana beeŋ lar n wora eleŋ be etɔɔnɛsheŋ nɛ emamachisheŋ damta n fule Ebɔrɛ be basa laraso nɛ baaŋ tiŋ nna na.

²³ To, n wule ŋ kaŋɛ menyi asheŋ na kikɛ n yili nna na, men baa da so.

Nyiŋgbasa Pibinyɛn be keba be asheŋ

²⁴ Jemanɛ na so, etɔrɔ ere be kaman epeŋi beeŋ biri to nɛ kufɔl e fuli to ŋ gben.

²⁵ Achɛkpabi beeŋ shi awɔlpa so n tɔr, nɛ esoso be eleŋana kikɛ e wea abar to.

²⁶ Saŋɛ na so baaŋ wu ma, Nyiŋgbasa Pibinyɛn ka shi awɔlpa so nɛ eleŋgboŋ nɛ kemaŋkura a ba.

²⁷ Meeŋ shuŋi ma emalaika durnya ere to be abonfu ana na to nɛ b ya yili durnya ere to nɛ esoso be kebonfu ko to n chala ma basa laraso n ya fo durnya ere nɛ ebɔrɛso be ekar m ba ma kutɔ.

Kakuluwu be kedibi be kesheŋ ŋini be asheŋ

²⁸ Men shin nɛ kakuluwudibi na e ŋini menyi kesheŋ. Kumo be ayabi gbagba baŋ ya ki kefitiri bumbuŋ a du bɛlɛbɛlɛbi n fara a purge na, kumo be jemanɛ na nɛ menyee pin kebleŋ be saŋɛ ka taga to.

²⁹ To, loŋ koŋwule na nna fanɛ men baŋ ya wu asheŋ ere kikɛ ka ya kaa wora, men baa nyi fanɛ ma kenamba na be jemanɛ na taga to a sha kefo.

³⁰ Kashenteŋto nɛ mee kaŋɛ menyi na fanɛ asheŋ ere kikɛ beeŋ wora pɔɛŋ nɛ mbreebi nɛ b wɔ ŋkpa to ere kikɛ e wu.

³¹ Ebɔrɛso nɛ kasawule kikɛ beeŋ ba mur, ama ma mmalga maa ba nɛ a ba mur kikɛ.

Ekama ka maŋ nyi kachɛ na ŋko jemanɛ na be asheŋ

³² “Esa kikɛ maŋ nyi kachɛ ŋko saŋɛ nɛ meeŋ naŋ ba na. Hale ebɔrɛso be emalaika na gba ŋko ma, Ebɔrɛ Pibinyɛn na gba maŋ nyi. Etuto na nawule e nyi.

³³ Men nu nɛnɛ nsaa de so, ŋkpal manɛ so, menyi maŋ nyi jemanɛ nɛ saŋɛ na beeŋ fo.

³⁴ K beeŋ ba du fanɛ enyɛn nɛ e koso n yɔ enite to nna nseŋ ta mbe kowu m bɔɔ mbe nyɛrbi enɔ, ekama nɛ mbe kushuŋ nseŋ kaŋɛ esa nɛ e bee keni kabuna so na fanɛ e baa da so.

³⁵ Amoso, men baa da so, ŋkpal manɛ so, menyi maŋ nyi saŋɛ nɛ kowu na wura bee ba. K beeŋ tiŋ a la kaaseso ŋko kiidiso ŋko karechɛso ŋko chipurso.

³⁶ Saŋkama nɛ e ba purgi menyi, a maŋ daga e ka tu menyi nɛ menyee di.

³⁷ Kusɔ nɛ mee kaŋɛ menyi nɛ mee kaŋɛ ekama: Men baa da so.”