Maak 11 - EBƆRƐ BE KAWƆL

Yesu ka luri Jerusalɛm bunyanso be asheŋ

¹ A ka ba ka gbrɛbi nɛ Yesu nɛ mbe bebɛsopo e luri Jerusalɛm be kade to nɛ b fo Bɛtfagi nɛ Bɛtani be nde to nɛ a wɔ Ɔlifs be kebee so ase na. Ndoŋ nna nɛ e ta le be kubɔya ere n shuŋi bebɛsopo na be benyɔ ŋ kaŋɛ bumo:

² “Men yɔ kadebi nɛ k ya kaa wɔ menyi be anishito ere to. Men baŋ ya kaa luri kumo to, menyeeŋ wu b ka chɛ kurmafɔlbi ko m muni.

³ Esa kikɛ maŋ naŋ dii kumo. Men saŋɛ kumo m bar kumo nfe. Nɛ esa kama nɛ e kaŋ bishi menyi le: ‘Manɛ e ba nɛ menyee wora loŋ?’ Men kaŋɛ mo le: ‘Enyɛnpe na e naa sha kumo nɛ e naŋ ya bɛta kumo m ba naniere.’ ”

⁴ Nɛ b yɔ n ya wu kurmafɔlbi na kowushina nɛ b chɛ kumo m muni kowu ko be kukuloŋ. B ka ya kaa saŋɛ kumo

⁵ nɛ basa nɛ b yili ndoŋ na bishi bumo: “Manɛ nɛ menyee wora loŋ? Menyee saŋɛ kurmafɔlbi na nna a?”

⁶ Nɛ b kaŋɛ basa na kananɛ Yesu kaŋɛ bumo na nɛ b sa bumo ekpa nɛ b saŋɛ kumo n yɔ.

⁷ Nɛ b ta kurmafɔlbi na m bar Yesu n ta bumo be asɔbuuso ko n deŋi kumo so nɛ Yesu dii n chena so.

⁸ Basa damta parga bumo be asɔbuuso ko to n nase ekpa to nɛ beko malɛ fɛta abii be ayabi ashi kupuŋ to n ta amo n nase ekpa na to.

⁹ Le nɛ basa nɛ b daŋ juŋkpar mo na nɛ bumo nɛ b daŋ bɛ mo so na kikɛ daa ponte a kaŋɛ: “Hosana, nɛfa e la esa nɛ e shi Enyɛnpe be ketre to a ba na peya.

¹⁰ Ebɔrɛ nɛfa an nana Deevid be kuwurgboŋ nɛ k bee ba na. Kemaŋkura e baa la Enyɛnpetale peya.”

¹¹ Yesu ka luri Jerusalɛm nɛ e yɔ bɔrɛlambu to n ya nite ŋ keni asɔ kikɛ, ama ŋkpal kaase ka fo so, mo nɛ mbe bebɛsopo kuduanyɔ na daŋ lar nna n yɔ Bɛtani.

Yesu ka so figidibi kɔnɔ be asheŋ

¹² Ŋklade b ka bɛta n shi Bɛtani a ba nɛ akoŋ pɛ Yesu.

¹³ Ndoŋ nna nɛ e wu figi be kedibi ka kɔ afantaŋ damta mbe anishito nɛ e yɔ kumo ase nɛ e ya keni ŋko e beeŋ nya asɔrso kumo so a. Ama e ka fo ndoŋ e maŋ nya shɛŋ, afantaŋ nawule nɛ e wu, ŋkpal manɛ so, efigi be kesɔr be jemanɛ daa maŋ naŋ fo.

¹⁴ Nɛ Yesu kaŋɛ figi be kedibi na: “Ekama maaŋ naŋ ji efigi fo so kikɛ.” Nɛ mbe bebɛsopo na nu kusɔ nɛ e kaŋɛ na.

Yesu ka ju yawujipoana ashi bɔrɛlambu na to be asheŋ

¹⁵ B ka fo Jerusalɛm nɛ Yesu luri bɔrɛlambu na to n ya fara a ju bekama nɛ b daa tɔ nɛ bumo nɛ b daa fa asɔ bɔrɛlambu na be kelɔnɛ so na kikɛ. E daŋ melgi bumo nɛ b daa chɛr amansherbi na be eteebɔl nɛ alifapoana be mbɛ nna m buu.

¹⁶ E daa maŋ shin nɛ ekama ta kusɔ kama m bɔla bɔrɛlambu na be kelɔnɛ so n lar.

¹⁷ Nɛ e naŋ ŋini basa na ŋ kaŋɛ: “B sibɛ abɔrɛsibɛ na to fanɛ Ebɔrɛ kaŋɛ: ‘Baaŋ tre ma kowu basa kikɛ be kabɔrɛkule be kakpa.’ Ama menyi ere ta kumo ŋ ki beyu be eŋanakpa.”

¹⁸ Bɔrɛmatapowuraana nɛ mbraŋinipoana ka nu le be demu na nɛ b fara a fin ekpa nɛ baaŋ bɔla so m mɔ Yesu. B daa ŋana mo nna, ŋkpal manɛ so, mbe keŋini daa chinchiŋ jimaŋ na kikɛ nna.

¹⁹ Kaase ka fo nɛ Yesu nɛ mbe bebɛsopo na lar kadegboŋ na to.

Figidibi be kesheŋ ŋini be asheŋ

²⁰ Kumo be ŋklade be kachipurso b ka na ekpa na to, b wu figi be kedibi na nɛ k wu hale n ya luri kumo be nliŋi to.

²¹ Nɛ Pita nyiŋi kusɔ nɛ k wora na nseŋ kaŋɛ Yesu: “Keni Eŋinipo, figi be kedibi nɛ fo so kɔnɔ na wu.”

²² Nɛ Yesu kaŋɛ bumo: “Ma e kaŋɛ menyi kashenteŋto na fanɛ nɛ men baŋ yirda Ebɔrɛ,

²³ menyeeŋ tiŋ ŋ kaŋɛ kebee ere: ‘Pulgi n ta fo kumu n ya lɛ teku to.’ Nɛ men maa wora shikashika menyi be ŋgbene to nseŋ yirda fanɛ kusɔ nɛ menyi kaŋɛ na beeŋ wora a, k beeŋ wora n sa menyi.

²⁴ Amoso, mee kaŋɛ menyi nna fanɛ nɛ menyi kule Ebɔrɛ a bishi mo kusɔ kama, men yirda fanɛ men nya kumo nɛ men nya kumo.

²⁵ Nɛ men ya kaa yil a kule Ebɔrɛ, men baa kɔ nfɛra niŋiso a sa esa kama nɛ e wora n da menyi so na nsaa ta a paŋ mo nɛ men Tuto nɛ e wɔ ebɔrɛso na e ta menyi alɛ gba be alubi m paŋ menyi.

²⁶ Nɛ menyi maa ta asheŋ a paŋ basa, men Tuto nɛ e wɔ ebɔrɛso na gba maaŋ ta menyi be alubi m paŋ menyi.”

B ka bishi kakpa nɛ Yesu be eleŋ shi be asheŋ

²⁷ B ka ba fo Jerusalɛm nɛ Yesu ya kaa nite bɔrɛlambu na to nɛ bɔrɛmatapowuraana na nɛ mbraŋinipoana na nɛ benimuana na ba mo kutɔ m ba bishi mo:

²⁸ “Manɛ be eleŋ nɛ fo kɔ a wɔtɔ a wora asheŋ ere ŋko wanɛ e sa fo asheŋ nɛ fee wora ere be eleŋ?”

²⁹ Nɛ Yesu kaŋɛ bumo: “Meeŋ bishi menyi kesheŋ bishiso ko. Nɛ men baŋ kaŋɛ ma kumo be kifito, ma alɛ gba beeŋ kaŋɛ menyi kakpa nɛ eleŋ nɛ ŋ kɔ a wora asheŋ na shi.

³⁰ Men kaŋɛ ma, Jɔn be kabɔrɛbɛr na be asheŋ daŋ shi ebɔrɛso nna ŋko enyiŋgbasa kutɔ?”

³¹ Ndoŋ nna nɛ b fara a bishi abar kusɔ nɛ baaŋ kaŋɛ. B yɛ: “Nɛ an baŋ kaŋɛ fanɛ ebɔrɛso nɛ a shi, e beeŋ bishi anyi: ‘Nɛ manɛ e ba nɛ menyi maŋ yirda mo?’

³² Nɛ anyi alɛ naŋ kaŋɛ: ‘Enyiŋgbasa kutɔ nɛ a shi’ a?” B daa ŋana basa na nna, ŋkpal manɛ so, basa na kikɛ daŋ yirda fanɛ Jɔn daa la anebi nna kashenteŋto.

³³ Amoso, le nɛ b daŋ kaŋɛ Yesu: “Anyi maŋ nyi.” Ndoŋ nna nɛ Yesu malɛ kaŋɛ bumo: “To, ma alɛ gba maaŋ kaŋɛ menyi kakpa nɛ eleŋ nɛ ŋ kɔ a wɔtɔ a wora asheŋ na shi.”