Biblia Todo Logo
Bìoball air-loidhne

- Sanasan -

Job be kawɔl 22 - EBƆRƐ BE KAWƆL


Ɛlifaz be kamalga sasopo be asheŋ Ɛlifaz

1 Ndoŋ nna nɛ Job mo nekpa Ɛlifaz nɛ e shi Tɛman be kade to na naŋ kaŋɛ:

2 “Manɛ be tɔnɔ nɛ edimɛdi kɔ n sa Ebɔrɛ? Hale edimɛdi to be benyiashempo gba maŋ kɔ tɔnɔ n sa mo.

3 Nɛ fanɛ fo, Job, maŋ naŋ wora kulubi ŋ ku so gba, kumo be loŋ kraa maŋ kɔ tɔnɔ n sa Enyɛnpetale Ebɔrɛ na bre.

4 Mannɛ fo ka bee ŋana Ebɔrɛ nsaa shuŋ mo so nɛ e bee kpele fo kusoe a ŋini fo ekpa na.

5 Ayai! Mannɛ a loŋ so nna. Fo asheŋ lubi so nɛ e bee wora loŋ.

6 Fo shin nɛ fo niopibi ka fo kekɔ nɛ e ji fo, mbe asɔbuuso nɛ fo sɔ nɛ e maŋ naa kɔ shɛŋ a buu.

7 Fo alɛ kini kesa basa nɛ akoŋ nɛ achukoŋ kɔ ajibi nɛ nchu nɛ b ji nseŋ nuu.

8 Fo yuku nɛ eyilikpa nɛ fo ta n sɔ kasawule ere kikɛ m pugi so.

9 Fo kini kechɛ bekulpoche to, nseŋ kɔrfɛ amunibi n suge bumo be asɔ n ti so.

10 Amoso nɛ kufugboŋ ki fanɛ ajigbelɛ ŋ kulti fo n wɔtɔ

11 nɛ k wora fanɛ kaplɛkama ka biri to nɛ fo maa wu, nɛ nchu bɔlɔ ŋ kulti fo n wɔtɔ na.

12 Ebɔrɛ wɔ ebɔrɛso nɛ k wɔ awɔlto a chɔ achɛkpabi nɛ a wɔ esoso ga nna, nsaa wu kusɔ kama.

13 Fo tama fanɛ tentembiri plɔ beeŋ tiŋ n ta fo ŋ ŋana Ebɔrɛ so a?

14 Awɔlpa nɛ a biri to maaŋ tiŋ m buu mbe anishi so nɛ e sa maa wu, saŋɛ nɛ e bee nite a kulti awɔlto ndoŋ na.

15-16 Men yige adrasheŋ fuloŋ nɛ alubiworapoana daŋ yirda nɛ nchu daŋ bɔlɔ m ba sulɔ bumo n choŋ nɛ b maŋ nyi na be kebɛso.

17 Alubiworapo na daŋ kini Enyɛnpetale Ebɔrɛ na nna, a fɛ fanɛ e maŋ tiŋ n wora bumo shɛŋ.

18 Ama Ebɔrɛ malɛ daŋ shin nɛ bumo be nnaŋ to ebi dii kedama nna. Ma ere maa pin alubiworapoana ere be kusɔ nɛ baa fɛ bumo be nfɛra to.

19 Ebɔrɛ be basa be ŋgbene bee fuli basa nɛ b kini Ebɔrɛ be kasogberge so nna nɛ baa ji eyur kagbenefuliso a kaŋɛ le,

20 ‘An doŋana maŋ naa wɔtɔ, edɛ malɛ mur bumo be asɔ kikɛ.’

21 To, Job, shin nɛ fo nɛ Ebɔrɛ e naŋ nyalɛ abar so nɛ fo sa maŋ naa ta mo fanɛ fo doŋ. Nɛ fo wora loŋ, e beeŋ nɛfa fo.

22 Sɔ keŋini kama nɛ e bee sa fo na, nseŋ ta mbe mmalga n wɔtɔ fo kagbene to.

23 Nɛ fo baŋ bɛta m ba Ebɔrɛ kutɔ nseŋ lar alubi to, asheŋ beeŋ nite nɛnɛ n sa fo.

24 Amoso lara fo shuwa lela na kikɛ n lɛ eboŋ nɛ a wɔlto be ataŋɛ to nseŋ wu amo fanɛ eshishɛr nɛ a maŋ kɔ tɔnɔ.

25 Kumo be kaman nɛ Enyɛnpetale Ebɔrɛ na e ki fanɛ shuwa nɛ gbiti lela ga n sa fo.

26 Aloŋ nɛ feeŋ nya kagbenefuli ashi kebaabunyaŋ mo to.

27 Ebɔrɛ beeŋ nu fo kabɔrɛkule, nɛ fo alɛ e wora m bɔlɔ nnɔ naseso nɛ fo nase n sa mo na so.

28 E beeŋ wora kusɔ kama nɛ fo kule mo, nseŋ shin nɛ kefulto e ba fo ekpa so, nɛ fo baa wora mbe aparsheŋ.

29 Nɛ beko tɔr kebaawɔtɔ to gba, nɛ fo kule Ebɔrɛ n sa bumo e beeŋ nu fo kekule nseŋ maŋ bumo so.

30 Hale basa nɛ b wora n jija gba beeŋ nya ketampaŋ, ŋkpal fo ka bee wora Ebɔrɛ kasonu so.”

© 2015 GILLBT Ghana Institute of Linguistics, Literacy and Bible Translation

Wycliffe Bible Translators, Inc.
Lean sinn:



Sanasan