Jɛremaya 9 - EBƆRƐ BE KAWƆL

¹ N daa yɛlga fanɛ ma kumu beeŋ baa la ketirbu nɛ ma anishi malɛ e baa la kubuye a bul anishichubi, saŋɛ na so meeŋ baa shu kapa nɛ kanyɛ a sa ma basa nɛ b mɔ na.

² N daa yɛlga kenya kakpa ashi keshishɛrsawule so, nɛ n lar ma basa to n ya chena ndoŋ. Ŋkpal manɛ so, bumo kikɛ maŋ kɔ kashenteŋji n sa Ebɔrɛ, bumo alɛ kikɛ la bedebɔrpo nawule nna.

³ Jemanɛ kikɛ b wora shiriya nɛ b baa ku efɛ nna. Kapuni e naa ji kuwura kasawule na so, mannɛ kashenteŋ. Ndoŋ nna nɛ Enyɛnpe Ebɔrɛ na kaŋɛ le: “Ma basa baŋ lar kulubi ko to baa luri kenyɔsopo to nna, bumo alɛ maŋ nyi fanɛ ma e la bumo be Ebɔrɛ na.”

⁴ A daga fanɛ ekama e baa de mo teriana be asheŋ woraso so, nsaa maŋ yirda mo kurgepoana be asheŋ woraso gba. Ŋkpal manɛ so, bekurgepoana na be ekama maa ji kashenteŋ fanɛ men nananyɛn Jeekɔb; ekama malɛ wɔtɔ nna a ku efɛ a jija mo teriana be atre.

⁵ Baa gben bumo be amu nna a fin ekpa popɔr nɛ baŋ bɔla so m puni bumo teriana nna.

⁶ Ekama baa wɔtɔ nna a puni mo barkasa a ji nna. Ekama malɛ maa shuli so fanɛ ma e la Ebɔrɛ.

⁷ Ŋkpal loŋ so nɛ Enyɛnpetale Ebɔrɛ na kaŋɛ le; “Ma basa teŋ wora alubi n da ma so. Manɛ nɛ meeŋ wora bumo nɛ mannɛ kelɔŋɛ bumo so fanɛ kananɛ baa lɔŋɛ kebɛlso so na?

⁸ Bumo be adonduloŋ du fanɛ atanyembi nɛ e kɔ kɔrtɔ nɛ k bee mɔ nna. Jemanɛ kikɛ baa ku efɛ nna. Ekama bee malga kelɔpo so nna a sa mbe echenashapo, ama kejigbelɛ nɛ e bee sho a nase nɛ e tɔr to na.

⁹ Kumo be kaman nɛ Enyɛnpetale Ebɔrɛ na bishi le: A maŋ daga fanɛ ŋ gberge bumo kusoe, ŋko m bishi efuli nɛ k du le ere kuwule a?”

¹⁰ Ndoŋ nna nɛ ŋ kaŋɛ le: “Meeŋ shu ŋkpal abee na nɛ asɔbɔya be ejikpa na so. Ŋkpal manɛ so, e wɔl nseŋ ki fanɛ keshishɛrsawule nna, nɛ esa kikɛ maŋ naa bɔla amo so a choŋ. Esa maaŋ naaŋ n nu kusɔbɔya be kushu ndoŋ, mbuibi nɛ kupuŋ to be asɔbɔya kikɛ shile amo so nna.”

¹¹ Kumo be kaman nɛ Enyɛnpe Ebɔrɛ na kaŋɛ le: “Meeŋ shin nɛ Jerusalɛm e ki kelambure a dese, a la kakpa nɛ ejiŋkaamu beeŋ baa wɔ; nɛ Juda be efuli so be ndegboŋ e ki keshishɛrsawule, a la kakpa nɛ esa kama maaŋ naa wɔ.”

¹² Kumo be kaman nɛ m bishi le: “Enyɛnpe Ebɔrɛ, manɛ nna nɛ kasawule na wɔl ŋ ki fanɛ keshishɛrsawule a dese nɛ esa kikɛ maŋ naa bɔla kumo so a choŋ? Wanɛ e nyi asheŋ nɛ e tiŋ m pin kumo to? Wanɛ nɛ fo bugi kumo to n sa nɛ mo alɛ e kaŋɛ beko kumo be asheŋ?”

¹³ Nɛ Enyɛnpe Ebɔrɛ na kaŋɛ le: “N daŋ mur kasawule na nna ŋkpal ma basa ka kini ma keŋini nɛ n ta n sa bumo na so nna. B daŋ maŋ wora ma kasonu ŋko n wora kusɔ nɛ kaŋɛ ŋ bumo fanɛ b wora na.

¹⁴ Ama b wora bumo be ŋgbene kpakpa nna nseŋ daŋ shuŋ agbirana nɛ baa tre Baal na fanɛ kananɛ bumo nanaana ŋini bumo na.

¹⁵ Amoso nɛ ma, Enyɛnpetale Israɛl be Ebɔrɛ na nase kɔnɔ fanɛ meeŋ sa ma basa ajibi kekera nɛ b ji nseŋ sa bumo nchu nɛ kɔrtɔ wɔ amo to nɛ b nuu.

¹⁶ Ma alɛ beeŋ shin nɛ b pesaŋ to n yɔ efuli pɔtɛana nɛ bumo ŋko bumo nananyɛnana maŋ naŋ nu amo be asheŋ ŋ ku so. Meeŋ naŋ shin nɛ benapo e ba kɔ bumo m mur bumo cheche.”

Jerusalɛm to ebi ka shu n fin kechɛto be asheŋ

¹⁷ Ade be kaman nɛ Enyɛnpetale Ebɔrɛ na kaŋɛ le: “Fɛ kusɔ nɛ k bee wora ere be asheŋ! Shuŋi n tre beche nɛ baa tiŋ a shu nli a karga nsaa tiŋ a boŋ awɔba ga na nɛ b ba.”

¹⁸ Kumo be kaman nɛ basa na kaŋɛ le: “Kaŋɛ beche na nɛ b nya manaŋ m boŋ awɔba n sa anyi; saŋɛ na so anyeeŋ shu m bure anishi.”

¹⁹ Naniere, le nɛ anyi nɛ an wɔ Zayɔn na bee shu a kaŋɛ: “An mur nna na! An ji nyɔmɔ pasaa! Anyi be nwu kikɛ mur, nɛ a daga fanɛ an lar anyi gbagba be kasawule so.”

²⁰ Ndoŋ nna nɛ ŋ kaŋɛ le: “Beche, men nu kusɔ nɛ Enyɛnpe Ebɔrɛ bee kaŋɛ, nseŋ laŋɛ menyi be lakal m ba mbe mmalga na so. Men ŋini menyi be bibiche kananɛ baa shu nli a karga, nɛ men teriana kananɛ baa boŋ awɔba.

²¹ Luwu bɔla anyi be etokuro to n luri mboŋ lempoana nɛ amo to be keluri du kpakpa na to. K mɔ anyi be mbia n lɛ agbembi so nseŋ mɔ anyi be mbifɔlbi n lɛ alɔnɛ so.

²² Enyɛnpe Ebɔrɛ na teŋ kaŋɛ anyi fanɛ bubuni beeŋ dese kasawule na be kaplɛkama fanɛ b ka ŋele ayu n nase a jo keteŋi, ŋko fanɛ epi ka dese n sɔ kaplɛkama na.”

²³ Kumo be kaman nɛ Enyɛnpe Ebɔrɛ na naŋ kaŋɛ le: “Benyiashempo e sa maa puchi bumo be kanyiasheŋ so, ŋko belempo e sa maa puchi bumo be eleŋ so, ŋko damawuraana e sa maa puchi bumo be kedama so.

²⁴ Bekama nɛ baa sha kepuchi, b baa puchi ŋkpal b ka bee shuŋ ma, Enyɛnpe Ebɔrɛ na so. Ŋkpal manɛ so, ma kasha maa chɛrga, kusɔ nɛ k bɔla ekpa nseŋ niŋi nɛ mee wora. Asɔ nɛ e bee par ma nna na. Ma, Enyɛnpe Ebɔrɛ e kaŋɛ na.”

^25-26 Ade be kaman nɛ Enyɛnpe Ebɔrɛ na naŋ kaŋɛ le: “Jemanɛ ko bee ba nɛ ŋ gberge basa nɛ b shi Ijipt nɛ Juda nɛ Edɔm nɛ Ammɔn nɛ Mowab be efuliana so nɛ eyiriana nɛ e wɔ keshishɛrsawule so na kusoe. Basa nɛ b wɔ efuli pɔtɛana ere kikɛ so ku atutu nna, ama bumo alɛ maa bɛ kɔnɔkoŋwule be ŋkre nɛ k bee ŋini katutuku be kefito na. Bumo nɛ Israɛl be basa be ekama maa bɛ ma kɔnɔkoŋwule be ŋkre na so. Eyurto be kaplɛa so, b ku atutu, ama bumo alɛ be ŋgbene maŋ chɛrga.”