Jɛremaya 7 - EBƆRƐ BE KAWƆL

Jɛremaya ka malga abɔrɛsheŋ bɔrɛlambu to be asheŋ

^1-3 Nɛ Enyɛnpe Ebɔrɛ na kaŋɛ ma fanɛ n ya yili bɔrɛlambu na be kabuna ase nsaa kaŋɛ basa le: “Enyɛnpetale, Israɛl be Ebɔrɛ na yɛ, men chɛrga menyi be kebaawɔtɔ nɛ asheŋ woraso nsaa wora asɔ nɛ e daga, nɛ n shin nɛ men baa kraa wɔ menyi gbagba be efuli ere so nfe.

⁴ Men sa maa fule menyi be amu a kaŋɛ fanɛ Sheŋ maaŋ tiŋ n wora anyi, ŋkpal Enyɛnpe Ebɔrɛ na be bɔrɛlambu ka wɔ Jerusalɛm nfe so! Men sa maa fɛ fanɛ bɔrɛlambu ere beeŋ tiŋ m mɔlga menyi.

⁵ Nɛ menyeeŋ chɛrga menyi be kebaawɔtɔ nɛ kesheŋ wora, kumo ere ma alɛ maaŋ shin nɛ shɛŋ e wora menyi. Men baa ji kashenteŋ a sa abar nsaa maa kpɛa to.

⁶ Men yige kebaapuni befɔ nɛ amunibi nɛ bekulpoche nɛ bekulponyɛn nseŋ naŋ yige kebaamɔ basa nɛ b maŋ wora shɛŋ ashi kasawule na so. Menyi alɛ e yige kagbirshuŋ, ŋkpal manɛ so, k beeŋ mur menyi.

⁷ Nɛ men chɛrga menyi be kebaawɔtɔ nɛ kesheŋ wora, ma alɛ beeŋ shin nɛ men chena kasawule nɛ n ta n sa men nananyɛnana na so mbaanaayɔ.

⁸ Ama men kini nseŋ ta menyi be yirda n wɔtɔ kafule be mmalga nɛ e maŋ kɔ tɔnɔ to.

⁹ Men wɔtɔ nna a yuri, nsaa mɔ basa, nseŋ naa ji kubojua. Menyi alɛ naa ku efɛ nna a bɔ ntaŋ nseŋ naa lara esarga a sa kegbir nɛ baa tre Baal, a shuŋ agbirana nɛ men maŋ nyi ŋ ku so.

¹⁰ Menyi alɛ naa wora asheŋ nɛ ŋ kishi nna nsaa ba m ba kaa yili ma anishi to ashi ma bɔrɛlambu to a kaŋɛ le, ‘Sheŋ maaŋ wora anyi!’

¹¹ Menyee tama fanɛ ma bɔrɛlambu la beyu be eŋanakpa nna a? Mee wu kusɔ nɛ menyee wora na kikɛ.

¹² Men yɔ kade nɛ baa tre Shilo nɛ n juŋkpar n lara fanɛ b baa shuŋ ma ndoŋ na n ya keni nɛ n kusɔ n wora ndoŋ. Ŋkpal ma basa Israɛlebi na ka wora alubi so, n daŋ mur kumo nna.

¹³ Menyi alɛ gba bee wora alubi nna na nɛ mee malga a sa menyi kapa nɛ kanyɛ, ama men maa nu a sa ma. M baŋ tre menyi gba menyi maa shuli ma so.

¹⁴ Ŋkpal loŋ so, kusɔ n wora ashi Shilo na nɛ meeŋ wora ashi bɔrɛlambu nɛ n ta n sa menyi nɛ men nananyɛnana nɛ men ta menyi be yirda n deŋi so ere gba to.

¹⁵ Meeŋ ju menyi n lar ma anishi to fanɛ kananɛ n daŋ ju men kurgepoana, Israɛl be nnaŋ kudu nɛ b daa wɔ kelargato be esoso be kaba so na. Ma Enyɛnpe Ebɔrɛ na e kaŋɛ.”

Basa na be kusoe kpakpaso be asheŋ

¹⁶ Ade be kaman, nɛ Enyɛnpe Ebɔrɛ na naŋ kaŋɛ le: “Jɛremaya, sa maŋ yili bumo be katelamu to n shu ŋko ŋ kule Ebɔrɛ n sa bumo. Fo alɛ e sa maŋ wushi ma kagbene, ŋkpal manɛ so, m maaŋ nu fo kekule na.

¹⁷ Fo maŋ wu kusɔ nɛ baa wora ashi Juda be efuli so be ndegboŋana to nɛ Jerusalɛm to be agbembi so nna a?

¹⁸ Mbia bee kil ndibi nna nɛ benyɛn bee puga edɛ nɛ beche malɛ bee ta nyifu a to mansaŋ nɛ ekpakulo a sa kegbirche nɛ baa tre Ebɔrɛso be Ewurche na. Bumo alɛ naa ta nsa nna a to nchu a sa agbirana a shin nɛ ma kagbene bee kaa.

¹⁹ Baa wɔtɔ ma agbo nna, ama bumo gbagba be amu nɛ baa tɔrɔ nsaa ŋaba na.

²⁰ Amoso, ma Enyɛnpetale Ebɔrɛ na beeŋ shin nɛ ma kanya agbo e ba ma bɔrɛlambu so. K beeŋ gbelge basa nɛ asɔbɔya nɛ ndibi nɛ asɔduuso kikɛ so. Ma agbo beeŋ baa du fanɛ edɛ nɛ esa kikɛ maaŋ tiŋ n duŋ na nna.”

²¹ Ade kikɛ be kaman, nɛ Enyɛnpetale, Israɛl be Ebɔrɛ na naŋ kaŋɛ Juda be basa na le: “Ma shɛŋ maŋ naa wɔ menyi be esarga to. Amoso men sa maŋ naa gben menyi be amu a bar amo m ba kaa sa ma. Ama nɛ men kaŋ bar amo malɛ, menyeeŋ tiŋ n daŋɛ eblaŋ na n we.

²² Ŋ ka daŋ lara men nananyɛnana ashi Ijipt be efuli so na, n daa maŋ kaŋɛ bumo fanɛ b baa lara esarga be yiri kikɛ a sa ma.

²³ N daŋ kaŋɛ bumo nna fanɛ b baa wora ma kasonu, saŋɛ na so meeŋ baa la bumo be Ebɔrɛ nɛ bumo alɛ e baa la ma basa. N daŋ kaŋɛ bumo nna fanɛ b baa wɔ kebaawɔtɔ nɛ n yili n sa bumo na to, saŋɛ na so asheŋ beeŋ baa nite nɛnɛ a sa bumo.

²⁴ Ama b daa maŋ nu n sa ma. Kusɔ nɛ bumo be ŋgbene kpakpaso kaŋɛ bumo nɛ b daa wora, nɛ kumo be loŋ shin nɛ bumo be kebaawɔtɔ jija n ti so.

²⁵ Yili jemanɛ nɛ men nananyɛnana lar Ijipt be efuli so m ba fo kabre, ŋ kraa shuŋi anebiana nɛ b la ma mbɔ men kutɔ nna.

²⁶ Amo nɛ amo kikɛ men to be esa kikɛ m maa nu a sa ma. Menyi be ŋgbene bee wora kpakpa nna a ti so nɛ menyee kini ma nsaa lar ma kaman gba a chɔ men nananyɛnana na.

²⁷ Ŋkpal loŋ so, Jɛremaya, fo kaŋɛ ma basa mmalga ere kikɛ gba, b maaŋ nu n sa fo. Fo tre bumo gba, b maaŋ shuli so.

²⁸ Amoso kaŋɛ bumo le: ‘Men la efuli nɛ k maa wora Enyɛnpe, kumo be Ebɔrɛ kasonu nsaa maŋ naa sɔ mbe keŋini nna. Kashenteŋji mur nɛ esa kikɛ maŋ naa ji kumo be asheŋ gba kuraa.’

Asheŋ lubi nɛ a bee wora Hinnɔm be Ketaŋɛ to be asheŋ

²⁹ Jerusalɛm be basa, men she men be amu so be emin, fanɛ basa nɛ baa shu nli na. Men baa boŋ nli to be nshɛ ashi abee be awɔlto; ŋkpal manɛ so, ma Enyɛnpe Ebɔrɛ na nya agbo nna nseŋ kini menyi nɛ men la ma basa na n lɛ.

³⁰ Juda be basa wora kulubi ko. B ta agbirana nɛ ŋ kishi amo be asheŋ m ba ma bɔrɛlambu to nɛ k wora eyurpi daŋkare be ekpa so.

³¹ Bumo alɛ naŋ pɔr kegbirsure nɛ baa tre Tofɛf na ashi Hinnɔm be ketaŋɛ to, saŋɛ na so baaŋ baa chɔɔ bumo be mbia edɛ to a lara esarga kumo so. N daŋ maŋ yili loŋ n sa bumo fanɛ b baa wora. M maŋ naŋ fɛ kumo be asheŋ gba kuraa.

³² Ŋkpal loŋ so, kachako bee ba nɛ b maaŋ naa tre kakpa na Tofɛf ŋko Hinnɔm be ketaŋɛ, ama baaŋ baa tre kumo Kamɔ be ketaŋɛ. Ndoŋ nɛ baŋ baa puli basa, ŋkpal kakpa ka maaŋ naa wɔtɔ nɛ b puli bubuni so.

³³ Edimɛdi be kebuni beeŋ ki ajibi n sa mbuibi nɛ kupuŋ to be asɔbɔya lubi, nɛ esa kikɛ maaŋ baa wɔtɔ nɛ e baa ju amo.

³⁴ Kasawule na beeŋ ki keshishɛrsawule. Meeŋ shin nɛ kagbenefuliso awɔr nɛ basa beeŋ baa wora na nɛ kejafɔ to be kayurji kikɛ e fo ekar ashi Juda be efuli so nɛ Jerusalɛm be agbembi so.”