Jɛremaya 6 - EBƆRƐ BE KAWƆL

Bedoŋ ka kulti Jerusalɛm n wɔtɔ be asheŋ

¹ Bɛnjamin be yiri to be basa, men shile m mɔlga menyi be amu. Men ŋana n lar Jerusalɛm be kadegboŋ na to. Men shin nɛ b foŋ kabel ashi kade nɛ baa tre Tekua na to nseŋ puga tɔɔnɛ be edɛ ashi kakpa nɛ baa tre Bɛf Hakkerɛm na nɛ e baa sa basa kubɔya. Ŋkpal manɛ so, jɛrbi gboŋgboŋi nɛ kemur beeŋ shi kelargato be esoso m ba menyi so.

² Jerusalɛm be kadegboŋ na walɛ kebita ga, ama kumo alɛ beeŋ mur.

³ Bewura beeŋ ba yuu bumo be ewajɛbu n chena ŋ kulti kumo be kaplɛkama nɛ baa sha.

⁴ Kumo be kaman nɛ b kaŋɛ bumo benapo na le: “An kaŋ fo Jerusalɛm to kachipurso, kapiidi nɛ anyeeŋ kɔ kumo kena. Ama nɛ an ka maŋ wule n fo bre,

⁵ kanyɛso nɛ anyeeŋ kɔ kumo nseŋ bure kumo be kumɔlga be kakpa lempoana na!”

⁶ Kede be kaman, nɛ Enyɛnpetale Ebɔrɛ na e kaŋɛ bewura na fanɛ b ku ndibi n yuu ajaŋ m mata egbal nɛ k kulti Jerusalɛm na nɛ benapo na e dii so n luri kadegboŋ na to. Ŋkpal manɛ so, e yɛ: “Meeŋ gberge basa nɛ b wɔ kadegboŋ ere to kusoe ŋkpal b ka bee kɔrfɛ bumo braana na so.

⁷ Kananɛ ketirbu bee bul nchu na, aloŋ nɛ kulubi bee bul ashi Jerusalɛm to. Mee nu basa ka ta akɔsɔ a kɔ abar nseŋ naŋ nu kemur be asheŋ. N wu basa nɛ b doro na ka dese kaplɛkama ashi kadegboŋ na to.

⁸ Jerusalɛm to be basa, men shin nɛ etɔrɔ ere e baa la kasokpele n sa menyi. Nɛ mannɛ aloŋ, meeŋ kplaŋ menyi so nseŋ shin nɛ menyi be kadegboŋ na e ki fanɛ keshishɛrsawule nɛ ekama maŋ wɔ kumo so.”

Israɛl ka kini Ebɔrɛ nseŋ pal kaman n sa mo be asheŋ

⁹ Kede malɛ be kaman nɛ Enyɛnpetale Ebɔrɛ na naŋ kaŋɛ ma le: “Baaŋ fige Israɛl be efuli so fanɛ b ka chuge kedibi sɔrso be asɔrso kikɛ ŋ ka kumo loŋ n yili na. Amoso, jemanɛ ka kraa wɔtɔ n sa menyi ere, men wora ania fanɛ menyeeŋ mɔlga ekama nɛ menyeeŋ tiŋ.”

¹⁰ Ndoŋ nna nɛ ŋ kaŋɛ le: “Ekama nɛ ŋ kpele mo kusoe gba maaŋ nu n sa ma. Bumo be asoe ka du kpakpa ga so, baa mushe kubɔya kama nɛ fo ta n sa fanɛ n sa bumo na nna nsaa kini kenu n sa kumo.

¹¹ Enyɛnpe Ebɔrɛ, kananɛ fo nya agbo n wɔtɔ Juda be basa na nɛ ma alɛ gba nya agbo ma kagbene to n wɔtɔ bumo. K bee chɔɔ ma kagbene to nɛ m maaŋ naŋ tiŋ ŋ keta kumo gba.” Ndoŋ nna nɛ Enyɛnpe Ebɔrɛ kaŋɛ ma le: “Shin nɛ ma agbo e ba mbia nɛ b wɔ agbembi so nɛ mbifɔlbi nɛ baa shɛr abar so na so. Bedoŋ beeŋ pɛ bekul nɛ bumo be beche kikɛ nɛ basa nɛ b bel ga na n yɔ efuli pɔtɛana so.

¹² Meeŋ gberge Juda be basa kusoe nseŋ ta bumo be nwu nɛ adɔsawule nɛ bumo be beche n sa basa pɔtɛ.

¹³ Bumo to be bumo nɛ b kɔ eyilikpa nɛ bumo nɛ b maŋ kɔ eyilikpa kikɛ bee bɔla ekpa lubi so nna a fin amansherbi. Anebiana nɛ bɔrɛmatapoana gba bee puni basa nna nɛ esa maaŋ naŋ tiŋ n yirda bumo.

¹⁴ Baa wora asheŋ nna fanɛ ma basa be asheŋ lubi na ka maŋ la shɛŋ. B yɛ, ‘Kusɔ kama bee nite nɛnɛ nna.’ Saŋɛ so nɛ asheŋ malɛ maa nite nɛnɛ.

¹⁵ Ekishisheŋ nɛ baa wora na maa keta bumo nyɔmɔ. Kashenteŋto, anishinyɔr maŋ kɔ bumo gba; bumo alɛ be anishiakpa maa chɛrga a ŋini fanɛ kusɔ nɛ baa wora na be asheŋ tir bumo. Ŋkpal loŋ so, jemanɛ nɛ meeŋ gberge bumo kusoe na kaŋ fo, bumo alɛ gba beeŋ tɔr n wu fanɛ kananɛ beko daŋ tɔr n wu na. Bumo be ekar e naaŋ baa la na.”

Israɛl ka kini Ebɔrɛ be ekpa be asheŋ

¹⁶ Ade kikɛ be kaman nɛ Enyɛnpe Ebɔrɛ naŋ kaŋɛ mbe basa le: “Men yili ŋkpancheri n to anishi ŋ keni, nseŋ bishi m pin ekpa dra nɛ men nananyɛnana daa bɔla so a wora asheŋ na nsaa bɔla kumo so wora asheŋ, saŋɛ na so nɛ men baa wɔ kayurwushi be kebaawɔtɔ to.” Ama le nɛ men daŋ kaŋɛ: “Ayai, anyi maaŋ wora loŋ!”

¹⁷ Ndoŋ nna nɛ Enyɛnpe Ebɔrɛ na shuŋi anebiana fanɛ b ba kpele menyi kusoe a laŋɛ kenishipere nɛ k bee ba na be kaplɛa so, ama men kini kenu n sa kasokpele na.

¹⁸ Amoso nɛ Enyɛnpe Ebɔrɛ kaŋɛ le na: “Menyi basa nɛ men wɔ efuli pɔtɛana nɛ e wɔ durnya to na e nu nfe nseŋ pin kusɔ nɛ k beeŋ tu ma basa.

¹⁹ Bumo be ashiri to be ŋkre na so, meeŋ shin nɛ jɛrbi gboŋgboŋi e ba bumo so, nɛ k baa la kasogberge n sa bumo ŋkpal b ka kini ma keŋini nsaa maŋ wora ma mmalga kasonu so.

²⁰ Ma shɛŋ maŋ wɔ eduwu nɛ baa ta a shi Shɛba be efuli so, ŋko asɔ nɛ e bee shin nɛ ajibi bee wora ebel nɛ baa ta a shi efuli wɔfɔ a bar ma na to. Bumo be esarga nɛ baa lara a sa ma na maa par ma, amoso m maaŋ sɔ amo.

²¹ Ŋkpal loŋ so, ma Enyɛnpe Ebɔrɛ na beeŋ shin nɛ basa ere e fiti n tɔr. Betuto nɛ benio nɛ bumo be bibi nɛ beteriana nɛ bechenashapoana kikɛ beeŋ wu ashi asheŋ nɛ e beeŋ ba bumo so na to.”

Benapo nɛ baaŋ shi kelargato be esoso m ba na be asheŋ

²² Ade kikɛ be kaman, nɛ Enyɛnpe Ebɔrɛ na naŋ kaŋɛ le: “Men keni benapo ko bee shi kufɔ kufɔ ashi kelargato be esoso be efuli lempo ko so m bela ase a ba nɛ b ba kɔ kena.

²³ B kɔ bumo be ata nɛ etokobi nna a ba. Bumo alɛ maŋ kɔ kushuso ŋko e wu kuwɔr. Egbaŋɛ nɛ baa dii na be aya bee gbri kasawule so nna fanɛ ketili ka bee kaa teku so na. B wora shiriya nna a ba nɛ b ba kɔ Jerusalɛmebi kena.”

²⁴ Ndoŋ nna nɛ Jerusalɛm be basa na kaŋɛ le: “An nu bumo be asheŋ nɛ kufugboŋ tɔr anyi so nɛ anyi be eyur wu anyi. K shin nɛ kagbenejija tɔr anyi so nɛ anyee we anyii to fanɛ eche nɛ kakurge ta mo na.

²⁵ Anyee ŋana keyɔ ndɔana to ŋko n lar ndeana to gba nna n yɔ mboŋ ko, ŋkpal manɛ so, an doŋana kɔ akɔsɔ to nna a ba nɛ b ba kɔ anyi kena nɛ kufugboŋ sɔ efuli na be kaplɛkama.”

²⁶ Kumo be kaman, nɛ Enyɛnpe Ebɔrɛ naŋ kaŋɛ mbe basa le: “Men ta nli be asɔbuuso m buu nseŋ dese nsunɔ to a melti. Men baa shu kenishipereso fanɛ kananɛ menyee shu ebi koŋwule be luwu be keeli na. Ŋkpal manɛ so, basa nɛ baaŋ ba mur menyi na maaŋ chɛr nseŋ ba kɔ menyi kena.

²⁷ Jɛremaya, wora ma basa ŋ keni m pin basa nɛ b la bumo fanɛ kananɛ baa wora kebɛlso a keni a pin kumo to na.

²⁸ Bumo kikɛ la ŋgbene kpakpaso wuraana nɛ b maa shuli fanɛ esa e baa wɔ bumo nna. Bumo be ŋgbene du kpakpa nna fanɛ danyaŋ ŋko kenyembi. Eda lubi nɛ bumo kikɛ kɔ a wɔtɔ a ku efɛ a kulti.

^29-30 Esa beeŋ tiŋ n ta gbiti n wɔtɔ edɛ to ŋ ŋalga kumo to n lara kumo to be eyurpi, ama ma basa ere be kenyalɛso du kpakpa ga, ŋkpal bumo be amukpakpaso so. Amoso nɛ ma, Enyɛnpe Ebɔrɛ na kini bumo n lɛ na.”