Jɛremaya 52 - EBƆRƐ BE KAWƆL

Jerusalɛm be ketɔr be asheŋ

¹ Zɛdikaya daa la nfɛ adunyɔ nɛ kako nna nseŋ ki Juda be efuli so be ewura. Nfɛ kudukako nɛ e daŋ ji kuwura na ashi Jerusalɛm to. Mo nio e daa la Jɛremaya nɛ e shi Libna be kade to na pibiche nɛ baa tre Hamutal na.

² Ewura Zɛdikaya gba daŋ wora kulubi n da Enyɛnpe Ebɔrɛ so nna fanɛ kananɛ ewura Jehowakim daŋ wora na.

³ Ewura Zɛdikaya daŋ lar Babilɔn be Ewura Nebukadneeza kaman nna nseŋ wora mo kusoe kpakpaso. Enyɛnpe Ebɔrɛ na daŋ nya agbo ga nna n wɔtɔ Juda nɛ Jerusalɛm be basa nseŋ kilgi kaman n sa bumo. Amoso nɛ e shin nɛ asheŋ lubi bee tu bumo na.

⁴ Zɛdikaya ka ji Juda be efuli so be kuwura be kafɛ kpanusopo to be kufɔl kudusopo to nɛ Babilɔn be ewura, Nebukadneeza nɛ mbe benapo kikɛ ba kɔ Jerusalɛm kena. B daŋ ba wora bumo be keeyi to nna m mata Jerusalɛm be kadegboŋ na nseŋ n dɔ ashigboŋ m mata egbal nɛ k kulti kumo, saŋɛ na so baaŋ dii amo so n luri kadegboŋ na to.

^5-6 Bedoŋ na daŋ kulti kadegboŋ na nna n wɔtɔ hale n ya fo ewura Zɛdikaya be kuwurji be kafɛ kudukakosopo to. Loŋ be kafɛ na to be kufɔl nasopo na be kachɛ kpanusopo na nɛ Jerusalɛm to be ajibi kikɛ loge.

⁷ Babilɔn be benapo daŋ bure egbal na n luri Jerusalɛm to. Ewura Zɛdikaya nɛ mbe esoji ka wu kusɔ nɛ k bee wora na nɛ b wora ania fanɛ baaŋ lar kadegboŋ na to kanyɛso n shile m mɔlga bumo be amu. Ewura be kudɔbi na to nɛ b daŋ bɔla n ya bɔla kabunabi nɛ k daa wɔ kadegboŋ na be egbal anyɔ na be nferinto na to n sɔ ekpa nɛ k bee yɔ Jɔɔdan be lɔr be ketaŋɛ na be kaba so na a shile a mɔlga bumo be amu.

⁸ Ama Babilɔn be benapo na daŋ ju bumo nna n ya pɛ ewura Zɛdikaya a mata keplasawule nɛ k mata kade nɛ baa tre Jɛriko na, nɛ mbe benapo kikɛ pesaŋ to nseŋ shile ŋ ka mo.

⁹ Kumo be kaman nɛ b keta ewura Zɛdikaya n yɔ ewura Nebukadneeza kutɔ ashi kadegboŋ nɛ baa tre Ribla nɛ k wɔ Hamaf be kebonfu to nɛ ewura Nebukadneeza ji mo demu nseŋ kaŋɛ fanɛ e wora n jija.

¹⁰ Ribla be kadegboŋ to ndoŋ nɛ ewura Nebukadneeza shin nɛ b mɔ ewura Zɛdikaya be mbinyɛnsobi nɛ Juda be efuli so be benimuana nɛ e yil a keni.

¹¹ Kumo be kaman nɛ ewura Nebukadneeza shin nɛ b chule Ewura Zɛdikaya be anishi nseŋ chɛ mo ŋgbɛlɛbi n ta mo n yɔ Babilɔn be efuli so n ya ti ebu hale n ya fo kachɛ nɛ e wu.

¹² Ewura Nebukadneeza ka ji Babilɔn be efuli so be kuwura be kafɛ kudu akpanu to be kufɔl nusopo to be kachɛ kudusopo na nɛ Nebuzaradan nɛ e la ewura be asoetojipo nɛ benapo nɛ baa kuŋ mo na be enimu na ba Jerusalɛm to,

¹³ m ba chɔɔ bɔrɛlambu na nɛ ewurkpa na nɛ kadegboŋ na to be nwu kikɛ n lɛ. E daŋ chɔɔ kowu kama nɛ k kɔ ketre nna n lɛ.

¹⁴ Kumo be kaman nɛ Nebuzaradan be benapo na da egbalana nɛ e kulti kadegboŋ na n lɛ.

¹⁵ Nɛ Nebuzaradan keta betirpo nɛ basa nɛ b nyi enɔ to be ashuŋ na nɛ bumo nɛ b daŋ shuli m bɛ ewura Nebukadneeza nseŋ kraa wɔ Jerusalɛm to na kikɛ n yɔ Babilɔn be efuli so.

¹⁶ Ama e yige betirpo gbagba nɛ b maŋ kɔ kapetɛ kikɛ na nna ashi Juda be efuli so nɛ b baa shuŋ ndibi sɔrso nɛ adɔjibi be adɔana to.

^17-20 Nebuzaradan daŋ kaŋɛ mbe benapo nna fanɛ b yɔ bɔrɛlambu na to n ya ta asɔ nɛ b ta shuwa ŋko gbiti n lɔŋɛ na. Amo e la echeenshi nɛ asɔ chɔɔ edɛ nɛ ntishaŋ nɛ baa wɔtɔ nchu a ŋmanyaŋ asɔ so nɛ mba nɛ b kɔ a kɛ asɔ nɛ efitilatɔl nɛ duwu be echeenshibi nɛ ekurwa nɛ baa wɔtɔ yabra a lara sarga na. Babilɔn be benapo na daŋ ta danyaŋ be asɔ. Amo e la asɔ nɛ b kɔ a muu nsunɔ tushiso nɛ eshabɔl nɛ asɔ nɛ b kɔ a duŋ fitila na nɛ ntishaŋ nɛ baa wɔtɔ nchu a ŋmanyaŋ asɔ so nɛ eduwu be echeenshi nɛ b kɔ a shuŋ Ebɔrɛ ashi bɔrɛlambu na to na nna. Benapo nɛ baa kuŋ Babilɔn be ewura na be enimu na daŋ ta danyaŋ be asɔ ere gba nna n ti so. Amo e la eshabɔrɛ anyɔ nɛ a yil bɔrɛlambu na be anishito na nɛ katishaŋgboŋ nɛ baa tre Teku na nɛ egbolu kudu anyɔ nɛ katishaŋgboŋ na bɛ so na nɛ eturko nɛ ewura Sɔlɔmɔn daŋ shin nɛ b lɔŋɛ n yili bɔrɛlambu na to na. B daŋ maŋ tiŋ ŋ karga asɔ nɛ b ta na be egbɛ ŋkpal a kaa daa wɔgbɛ ga na so.

²¹ Danyaŋ be eshabɔrɛ anyɔ na be kekama be jeŋgreŋ daa sa fanɛ ayadra adunyɔ nɛ ashunu nɛ amo be ndanto ŋ kulti malɛ daa sa fanɛ ayadra kuduaburwa. Amo be kekama daa kɔ kelaŋ nna nsaa du gbuntelin.

²² Eshabɔrɛ na be kekama daa kɔ danyaŋ be buuso nɛ kumo be jeŋgreŋ sa fanɛ ayadra ashunu nɛ bargato nna. Kumo be kaman nɛ b wora danyaŋ be asɔ ko nɛ a du fanɛ ŋgbɛlɛbi m mɛa abar n deŋi ebuuso na be esoso, nseŋ wora asɔ kulkulsobi ko nɛ a du fanɛ asɔrso nɛ baa tre pomegranates na n deŋi eshabɔrɛ na be kekama be esoso n ji amo kebita.

²³ Asɔ kulkulso nɛ a du fanɛ asɔrso nɛ baa tre Pomegranates na be kalfa nɛ b wora nseŋ barga amo to dede asa asa n deŋi amo be kekama be kaba kama so ŋ kulti. Ama amo be adekpanu nɛ ashe nɛ yili kaseto n ya fo esoso na nawule nɛ esa beeŋ tiŋ n wu kenishiso.

B ka ta Juda be basa n yɔ Babilɔn be efuli so be asheŋ

²⁴ Ade be kaman nɛ Nebuzaradan naŋ pɛ Seraiya nɛ e la bɔrɛmatapo nimuso na nɛ Zefanaiya nɛ e bɛ Seraiya so nɛ bɔrɛlambu na to be benimu asa ko gba n ti so.

²⁵ Kumo be kaman nɛ e pɛ Juda be benapo be benimuana na be eko nɛ ewura Zɛdikaya be besoetojipo ashunu nɛ b kraa wɔ kadegboŋ na to na, nɛ enimu nɛ e bee nite efuli na so a tintiŋ basa a wɔtɔ kebɔŋwura to na, n ta benapo adeshe nɛ e daŋ pɛ kadegboŋ na to na ti so.

^26-27 Kumo be kaman nɛ Nebuzaradan keta bumo kikɛ n yɔ Ribla ashi Hamaf be kasawule so nɛ ewura Nebukadneeza shin nɛ b mɔ bumo. Juda be basa maŋ naa wɔ bumo gbagba be efuli so ŋkpal b ka keta bumo n yɔ kenyaya to ashi efuli wɔfɔ so so.

²⁸ Juda be basa nɛ ewura Nebukadneeza pɛ anya n yɔ Babilɔn be efuli so be kananɛ b sa nɛ b sibɛ n nase kebɛso kebɛso nde. Mbe kuwurji be kafɛ shunusopo to basa ŋgboŋ asa nɛ adunyɔ nɛ asa nɛ e pɛ ashi Jerusalɛm n yɔ Babilɔn.

²⁹ Mbe kafɛ kuduaburwasopo to malɛ basa alfa aburwa nɛ adesa nɛ anyɔ nɛ e pɛ n yɔ Babilɔn.

³⁰ Mbe kafɛ adunyɔ nɛ asa to malɛ benapo nɛ baa kuŋ mo na be enimu, Nebuzaradan daŋ pɛ basa alfa ashunu nɛ adena nɛ anu nna n yɔ Babilɔn. Amoso basa nɛ Ewura Nebukadneeza daŋ pɛ Juda be efuli so n yɔ Babilɔn be efuli so kikɛ koso basa ŋgboŋ ana nɛ alfa ashe nna.

³¹ Babilɔn be Ewura Nebukadneeza daŋ pɛ Juda be ewura Jehowachin nna n ya ti ebu nfɛ adesa nɛ ashunu ashi Babilɔn be efuli so. Kafɛ nɛ ewura Nebukadneeza wu nɛ mo pibinyɛn, Ivɔl Mɛrodak, nɛ e sɔ mo so n ji Babilɔn be kuwura na wu ewura Jehowachin kuwɔr n shin nɛ b lara mo kabuti to.

³² E daŋ shu Juda be ewura Jehowachin so nna nseŋ sa mo kemaŋkura a chɔ bewura kama nɛ b pɛ m ba Babilɔn be efuli so na kikɛ.

³³ E daŋ sa ewura Jehowachin ekpa nna nɛ e maŋ naa buu kabuti to be asɔbuuso nsaa buu amo nɛ e bee sha. Mo alɛ nɛ Babilɔn be ewura daa chena mbe ejikpa nna a ji karechɛ kikɛ.

³⁴ Ewura Jehowachin ka daa wɔ Babilɔn be efuli so na, Babilɔn be ewura daa sa mo amansherbi jiso karechɛ kikɛ nna, hale n ya fo kachɛ nɛ e wu.