Jɛremaya 51 - EBƆRƐ BE KAWƆL

Babilɔn ka beeŋ mur be asheŋ

¹ Enyɛnpe Ebɔrɛ na yɛ: “Meeŋ shin nɛ afu nɛ k bee jija asɔ e ba Babilɔn be efuli nɛ kumo be basa so.

² Meeŋ shuŋi befɔ nɛ b ba mur Babilɔn be efuli na fanɛ afu ka foŋ amimi n lɛ na. Kachɛ na kaŋ fo, baaŋ baa kɔ kaba kama so nna m mur kusɔ kama nseŋ yige kasawule na n nase fuloŋ.

³ Ma, Enyɛnpe Ebɔrɛ beeŋ kaŋɛ befɔ na be benapo fanɛ b sa maŋ sa Babilɔn be benapo na ekpa nɛ b gberge bumo be ata to ŋko n ta bumo be abɛlso be asɔ kuŋamuso. Bumo alɛ e sa maŋ yige Babilɔn be mbrantiɛfɔlbi na, b mur benapo na kikɛ!

⁴ Babilɔn be benapo na beeŋ nya edoro n wu n tɔr bumo be ndegboŋana be agbembi so.

⁵ Israɛl nɛ Juda be basa kikɛ wora alubi n da ma, Enyɛnpetale Ebɔrɛ na so, ama ma, Israɛl be Ebɔrɛ cheembi na, maŋ kini bumo n lɛ.

⁶ Men shile n lar Babilɔn be efuli so m mɔlga menyi be efute! Men sa maŋ shin nɛ b mɔ menyi ŋkpal Babilɔn be basa be alubi so. Bumo be kusɔ nɛ b wora na be kasogberge nɛ k daga bumo nɛ mee sa bumo a tal to na.

⁷ Babilɔn daa du fanɛ shuwa be kawiebi nɛ ma, Enyɛnpe Ebɔrɛ na be agbo daŋ bɔlɔ kumo nna, nɛ k shin nɛ durnya be efuli kikɛ so be basa nuu kawiebi na to m boo nseŋ daa wora asheŋ fanɛ b ka bee lɔ eboŋ na.

⁸ Ama Babilɔn gba beeŋ tɔr epul to m mur. Men shu n sa kumo be basa, nseŋ fin kudur n wɔtɔ bumo be achuu to, ashere baaŋ nya kechɛ.

⁹ Nɛ befɔ nɛ b wɔ ndoŋ na kaŋɛ abar le: ‘An wora ania fanɛ anyeeŋ chɛ Babilɔn be efuli na to, ama asheŋ teŋ n jija. Amoso men shin nɛ an bɛta epe. Ebɔrɛ be eleŋgboŋ na so nɛ e bɔla ŋ gberge Babilɔn kusoe nseŋ mur kumo cheche na.’ ”

¹⁰ Ndoŋ nna nɛ Israɛl be basa na malɛ kaŋɛ le: “Enyɛnpe Ebɔrɛ na sɔ anyi be kɔnɔ so ŋ ka Babilɔnebi na kukɔ a ŋini fanɛ an ji n lar ashi kusɔ nɛ Babilɔn wora anyi na to. Amoso men shin nɛ an ya kaŋɛ basa nɛ b wɔ Jerusalɛm to na kusɔ nɛ Enyɛnpe, anyi be Ebɔrɛ na wora.”

¹¹ Enyɛnpe Ebɔrɛ na yɛ: “Ma, Enyɛnpe Ebɔrɛ na bee sha kemur Babilɔn be efuli nna, ŋkpal bumo be benapo ka mur ma bɔrɛlambu so. Amoso menyi Midia be efuli so be bewuraana e bɛl menyi be atanyembi nseŋ ta menyi be abɛlso be asɔ kuŋamuso ŋ keta.

¹² Men maŋ tuta na so a ŋini fanɛ kena na fara nɛ benapo na e fara a bure kadegboŋ na be egbalana na. Men shin nɛ benapo na be beko e ba ti bumo nɛ baa kɔ na so nseŋ shin nɛ beko e yili a de kadegboŋ na so nɛ beko malɛ e ya ŋana m pugi a jo!” Kusɔ nɛ Enyɛnpe Ebɔrɛ na kre kewora Babilɔn be efuli so be basa na nɛ e wora na.

¹³ Efuli na so kɔ elɔr nɛ asɔ lela damta, ama kumo be saŋɛ fo nɛ kumo be kebaawɔtɔ a ku so.

¹⁴ Enyɛnpetale Ebɔrɛ na daŋ ta mbe ŋkpa nna m bɔ ntaŋ fanɛ e beeŋ bar bedoŋ be benapo damta fanɛ elotɔr nɛ b ba kɔ Babilɔn be efuli so be basa kena m pɔɔ bumo so. Kumo be kaman nɛ b boŋ kekɔmpɔɔso be nshɛ.

Keboŋ kashɛ ŋ kpaŋ Ebɔrɛ be asheŋ

¹⁵ Enyɛnpe Ebɔrɛ na e bɔla mbe eleŋgboŋ so n to durnya; mbe kanyiasheŋ so nɛ e bɔla n to esoso nɛ kasawule.

¹⁶ Mo e naa malga nɛ awɔlto be nchuana bee baga to a gbri, mo alɛ e naa shin nɛ awɔlpa bee deŋi durnya be kaplɛkama. Mo e naa shin nɛ bɔrɛ bee ba nsaa nyɛkpɛ nɛ afu bee shi kakpa nɛ e yili kumo na a ba.

¹⁷ Basa nɛ baa lɔŋɛ agbir maŋ kɔ nfɛra pasaa! Ebɔyɛpo nɛ baa ta shuwa ŋko gbiti a lɔŋɛ agbirana na bee ji anishinyɔr nna ŋkpal bumo be agbirana fɛpo na ka maŋ kɔ ŋkpa so.

¹⁸ Agbirana na maŋ kɔ tɔnɔ; a daga fanɛ basa e wora amo eyurto nna nseŋ kini amo n lɛ. Amo be kachɛ kaŋ fo, Enyɛnpe Ebɔrɛ na beeŋ mur amo kikɛ.

¹⁹ Ama Ebɔrɛ nɛ an nananyɛn Jeekɔb daŋ shuŋ na bre maŋ du fanɛ agbirana na. Mo e to kusɔ kama nseŋ lara Israɛl be basa fanɛ b baa la mo gbagba be basa. Mbe ketre e la Enyɛnpetale Ebɔrɛ na.

Enyɛnpe Ebɔrɛ be guluŋgu be asheŋ

²⁰ Enyɛnpe Ebɔrɛ na yɛ: “Babilɔn, fo e la ma kena to be guluŋgu. Fo nɛ mee ta a biri efuliana a pechɛto, nsaa ta fo a mur kuwurgboŋana.

²¹ Fo koŋwule na nɛ mee ta a beri egbaŋɛ nɛ amo be bediipo a mɔ; nsaa pechɛ egbaŋɛturko nɛ amo be befarpo to.

²² Fo nɛ mee ta a mɔ benyɛn nɛ beche, nɛ basakpar nɛ mbifɔlbi nɛ mbinyɛnsobi nɛ mbichesobi kikɛ.

²³ Fo nɛ mee ta a mɔ mbolpɔkpapoana nɛ bumo be mbolpɔ, nɛ bedɔpo nɛ bumo be ana dɔso, nɛ bewurjipoana nɛ bumo be benimuana kikɛ.”

Babilɔn be efuli be kasogberge be asheŋ

²⁴ Ade kikɛ be kaman nɛ Enyɛnpe Ebɔrɛ naŋ kaŋɛ le: “Ma basa, menyi gbagba e naaŋ wu kananɛ meeŋ ka Babilɔn be efuli nɛ kumo be basa kukɔ ŋkpal kulubi nɛ b wora Jerusalɛm so.

²⁵ Babilɔn, fo du fanɛ kebee nna a kɔ eleŋ ga a mur durnya kikɛ, ama ma, Enyɛnpe Ebɔrɛ na ki fo doŋ nna na. Meeŋ to m pɛ fo to ŋ gberge fo n lɛ kasawule nɛ fo bure to ŋ ki fanɛ ebirkesi ka bure to n deŋi abar so na.

²⁶ Esa maaŋ naaŋ tiŋ n ta fo ajembu nɛ a bure to a dese na be kekama m pɔr kikɛ. Feeŋ ki keshishɛrsawule a dese fuloŋ mbaanaayɔ. Ma, Enyɛnpe Ebɔrɛ e kaŋɛ na.

²⁷ Men maŋ tuta na so ashi kasawule na so nseŋ foŋ kabel na, saŋɛ na so efuliana na be basa beeŋ nu nseŋ bela ase m ba kɔ Babilɔn kena! Men kela n tre efuliana nɛ baa tre Ararat nɛ Minni nɛ Ashkenaz be benapo nɛ b ba kɔ Babilɔn be basa kena. Men lara enapo nimuso nɛ e juŋkpar benapo na ŋ kɔ. Menyi alɛ e bar egbaŋɛ damta nɛ b baa du fanɛ elotɔr ka mel abar so na.

²⁸ Men kaŋɛ Midia be efuli so be bewura nɛ bumo be benimuana nɛ efuliana nɛ baa keniso na kikɛ be benapo nɛ b wora shiriya m ba kɔ Babilɔn kena.

²⁹ Durnya bee kii to nsaa gbuŋgbuŋ to nna ŋkpal Enyɛnpe Ebɔrɛ na ka kre keshin nɛ Babilɔn be efuli na e ki keshishɛrsawule a dese fuloŋ nɛ esa maaŋ naa wɔ kumo so so.

³⁰ Babilɔn be benapo na be eleŋ nɛ kenyɛn lar bumo to nɛ b ki fanɛ beche. Bumo kikɛ yige kena be kekɔ nna nseŋ shir a wɔ bumo be mboŋ lempoana. Bedoŋ bure kadegboŋ na be mbunagboŋ na n luri to a chɔɔ Babilɔnebi na be nwu.

³¹ Mbɔ malɛ baa yɔ kukoko to nna n ya kaa bɔ Babilɔn be ewura kubɔya fanɛ bedoŋ teŋ ŋ kɔ n suge bumo be kadegboŋ na kikɛ kuraa.

³² Bedoŋ teŋ ŋ kɔ n suge kakpa nɛ baa bɔla a dii lɔr be kaba ndoŋ na nseŋ nya edɛ n wɔtɔ mboŋ lempoana na to. Kufu tɔr Babilɔn be benapo na so nna.

³³ K maaŋ chɛr nɛ bedoŋ na e pɔɔ bumo so nseŋ chichi bumo so m mata kasawule fanɛ kananɛ baa beri ayu kugooro so na. Ma, Enyɛnpetale, Israɛl be Ebɔrɛ na e kaŋɛ na.”

³⁴ Ndoŋ nna nɛ Jerusalɛm be basa kaŋɛ le: “Babilɔn be ewura Nebukadneeza shin nɛ kufugboŋ tɔr anyi so. E suge anyi be kadegboŋ na to be asɔ lela kikɛ ŋ ki mo peya fanɛ kuwɔ ka min kusɔ na. Asɔ nɛ e bee sha nɛ e suge n ta, nseŋ ta amo nɛ a ka na n lɛ.

³⁵ Babilɔn be efuli so be basa piira anyi be beko nseŋ mɔ beko malɛ. Naniere, Enyɛnpe Ebɔrɛ, shin nɛ b ka kumo be kukɔ!”

Enyɛnpe Ebɔrɛ na ka beeŋ chɛ Israɛl to be asheŋ

³⁶ Nɛ Enyɛnpe Ebɔrɛ na kaŋɛ le: “N yil menyi be kaman nna, nɛ n sɔ menyi be kɔnɔ so ŋ ka Babilɔn be basa kukɔ. Meeŋ shin nɛ bumo be elɔr nɛ mbombi kikɛ e wɔl to nɛ b sa maŋ naa nya nchu.

³⁷ Babilɔn be efuli na beeŋ bure a dese, nseŋ ki kupuŋ to be asɔbɔya fanɛ ejiŋkaamu be kakpa. Basa beeŋ baa mushe kumo. Ama bumo alɛ beeŋ baa ŋana kebɔla alambure na to n choŋ.

³⁸ Babilɔnebi na kikɛ bee munto nna fanɛ ebuluŋ fɔlbi.

³⁹ Akoŋ ka kɔ bumo ere bre, meeŋ wora kejigboŋ n sa bumo. Baaŋ ji bumo be amu nseŋ boo; kumo be kaman nɛ b dese n di, nsaa maaŋ naŋ koso kikɛ!

⁴⁰ Meeŋ gberge bumo n yɔ luwu to, fanɛ kananɛ baa gberge mbolpɔ ŋko mbolpɔfɔlbi nɛ mboe n ya kaa mɔ na.

⁴¹ Efuli pɔtɛana be basa bee kpaŋ Babilɔn naniere nna, ama bedoŋ kaŋ pɛ kumo be basa anya, kufu gboŋgboŋi beeŋ naŋ tɔr efuli pɔtɛana ere be basa so nɛ b baa chicha.

⁴² Babilɔn mo doŋana beeŋ koso fanɛ ketili ka koso teku so na, m ba buu kadegboŋ na so.

⁴³ Kemur nɛ k bee keta kufu beeŋ ba ndeana nɛ e taga to kadegboŋ na so. Kasawule na beeŋ ki keshishɛrsawule fuloŋ, kakpa nɛ esa kama maaŋ tiŋ n chena ŋko m bɔla kumo so n choŋ gba.

⁴⁴ Meeŋ gberge Babilɔn be kegbir nɛ baa tre Maaduk na kusoe, nseŋ shin nɛ k laŋɛ asɔ nɛ k yuri na n sa amowuraana. Kumo be kaman efuli pɔtɛana be basa maaŋ naŋ bar ŋkɛ m ba bunyaŋ kumo. Nɛ Babilɔn be egbalana e bure n tɔr.”

⁴⁵ Nɛ Enyɛnpe Ebɔrɛ na kaŋɛ le: “Ma basa, Israɛlebi, men lar Babilɔn to; men shile m mɔlga menyi be amu pɔɛŋ nɛ ma agbo e gbelge kadegboŋ na so!

⁴⁶ Kafɛ kikɛ menyee nu b yɛ b yɛ, fanɛ kebagato bee ba kasawule na so, ŋko ewurjipo ko beeŋ kɔ ewurjipo nyɔsopo kena. Ama men sa maa lɔ kufu ŋko a pɔ aba, ŋkpal b yɛ b yɛ ere so.

⁴⁷ Ŋkpal manɛ so, jemanɛ ko bee ba, nɛ ŋ gberge Babilɔn be agbirana kusoe. Esa kama nɛ e wɔ efuli na so beeŋ wu, nɛ efuli na be basa kikɛ e ji anishinyɔr.

⁴⁸ Saŋɛ na so nɛ kusɔ kama nɛ k wɔ ebɔrɛso nɛ kasawule so kikɛ beeŋ wora awɔr kagbenefuliso, ŋkpal bedoŋ ka beeŋ shi kelargato be esoso be kaba so m ba kɔ Babilɔn m mur kumo so.

⁴⁹ Babilɔn gba daga fanɛ k bure, ŋkpal kumo be basa ka mɔ ma basa Israɛlebi nɛ durnya to be efuli damtaana be basa so.

⁵⁰ Nɛ Enyɛnpe Ebɔrɛ na kaŋɛ mbe basa nɛ b wɔ Babilɔn be efuli so na le, Ma basa, jemanɛ nɛ Jerusalɛm daŋ bure na, men daŋ nya n shile m mɔlga menyi be amu nna. Naniere kakpa nɛ men chena ere nɛ epe wɔ kufɔ, ama men yirda ma nseŋ fɛ Jerusalɛm be asheŋ. Men lar Babilɔn be efuli so! Men sa maŋ naŋ chena ndoŋ!

⁵¹ Anishinyɔr nɛ nyɔmɔ kɔ menyi nna ŋkpal befɔ ka luri ma bɔrɛlambu be mboŋ cheembi to so ashi Jerusalɛm.

⁵² K maaŋ chɛr nɛ n ta kena ŋ gberge Babilɔn be efuli so be agbirana kusoe, nɛ kumo be basa e doro n dese kaplɛkama a tekeŋ.

⁵³ Hale Babilɔn be egbalana dii n ya kaa chute awɔlpa nɛ kumo be mboŋ lempoana naŋ wora eleŋ n ti so gba, benapo nɛ meeŋ shuŋi na kraa beeŋ mur kadegboŋ na. Ma, Enyɛnpe Ebɔrɛ e kaŋɛ na.”

Babilɔn ka beeŋ mur be asheŋ

⁵⁴ Enyɛnpe Ebɔrɛ na yɛ: Men nu kushu nɛ k shi Babilɔn be kadegboŋ to a ba ere! K la kemur gboŋgboŋi nɛ k ba Babilɔn be kasawule be kaplɛkama so be basa be kushu nna.

⁵⁵ Mee mur Babilɔnebi nna nɛ b lo bumo be awɔr nɛ baa cha na. Bedoŋ be benapo beeŋ ba buu bumo so fanɛ kananɛ nchu bee ku ketili teku so a buu kuguruŋgu so na. Benapo na be awɔr beeŋ dii a chɔ Babilɔn be basa peya.

⁵⁶ Bedoŋ na beeŋ ba kɔ Babilɔn be basa m mur bumo. Bedoŋ na beeŋ pɛ Babilɔnebi be benapo anya, nseŋ buri m buri bumo be akɔsɔ kikɛ to. Ŋkpal manɛ so, n la Ebɔrɛ nɛ mee gberge efuliana kusoe nna ŋkpal alubi nɛ b wora so.

⁵⁷ Ma, Enyɛnpetale Ebɔrɛ nɛ n la Ewura kashenteŋto na, bee nase kɔnɔ fanɛ meeŋ shin nɛ Babilɔn be benimuana nɛ benyiashempo nɛ bejuŋkparpo nɛ benapo kikɛ e boo, nseŋ dese n di a maaŋ naaŋ tiŋ ŋ koso kikɛ.

⁵⁸ Babilɔn be kadegboŋ na be egbal danto na beeŋ bure n tɔr kasawule, nɛ kumo be mbunagboŋana na e ji edɛ. Kusɔ kama nɛ efuli na so be basa shuŋ ŋ gben n nya kikɛ beeŋ ji edɛ m mur. Ma, Enyɛnpe Ebɔrɛ e kaŋɛ na.

Jɛremaya ka sibɛ kubɔya n shoŋi Babilɔn be asheŋ

⁵⁹ Ewura Zedekaya ka ji Juda be efuli so be kuwura be kafɛ nasopo to nɛ e yɔ Babilɔn be efuli so. Seraiya nɛ e la Neriya pibinyɛn nɛ Maaseia mo nanabi na daŋ shuŋi mo nna n yɔ. Seraiya ere daa la ewura Zedekaya be enimu nɛ e bee fin edesekpa nna a sa mo ashi mbe enite to.

⁶⁰ Pɔɛŋ nɛ b lar n yɔ Babilɔn be efuli so na, n daŋ sibɛ ejɛrbi nɛ asheŋ nɛ a beeŋ ba Babilɔn be efuli so be basa so na kikɛ nna n wɔtɔ kawɔl to.

⁶¹ Kumo be kaman nɛ n ta kawɔl na n sa Seraiya nseŋ kaŋɛ mo le: “Men kaŋ fo Babilɔn be efuli so, fo wora ania ŋ kraŋ kusɔ kama nɛ k wɔ kawɔl ere to awɔrso n sa basa na.

⁶² Kumo be kaman nɛ fo kule Ebɔrɛ ŋ kaŋɛ: ‘O Enyɛnpe Ebɔrɛ, fo e nase kɔnɔ fanɛ feeŋ mur efuli ere nseŋ shin nɛ k ki keshishɛrsawule nɛ edimɛdi ŋko asɔbɔya maaŋ naa wɔ kumo so kikɛ.’

⁶³ Seraiya, nɛ fo kaŋ kule Ebɔrɛ n loge, fo kre kawɔl na m mata kejembugboŋ so nseŋ ta kumo n lɛ Lɔrgboŋ nɛ baa tre Yufreetes na to. Kumo be kaman nɛ fo kaŋɛ le:

⁶⁴ ‘Kananɛ kejembugboŋ ere nɛ kawɔl ere muni nchu ere to ere nɛ Babilɔn be efuli gba beeŋ muni nsaa maaŋ naŋ tiŋ n lar jemanɛ nɛ Enyɛnpe Ebɔrɛ na beeŋ mur kumo na. Esa kama nɛ e wɔ kadegboŋ na to beeŋ wu nɛ efuli na maaŋ naŋ nya eleŋ ŋ koso kikɛ.’ ” Anebi Jɛremaya be kɔnɔ be ekar nna na.