Jɛremaya 50 - EBƆRƐ BE KAWƆL

Kubɔya nɛ k wɔtɔ a laŋɛ Babilɔn be kaplɛa so be asheŋ

¹ Kubɔya nɛ Enyɛnpe Ebɔrɛ na sa ma a laŋɛ Babilɔn be kadegboŋ nɛ kumo be basa be kaplɛa so nde:

² “Bɔ baru na nseŋ ber kumo be kubomboŋ n sa efuliana na! M maŋ tuta na so nseŋ ber baru na be kubomboŋ! Sa maŋ ta kumo fanɛ ashiri be kesheŋ! Babilɔn be efuli na beeŋ kɔ n tɔr! Bumo be kegbir nɛ baa tre Maaduk na e bure to; nɛ anishinyɔr a ji bumo be agbirana kikɛ.

³ Efuli ko beeŋ shi kelargato be esoso m ba kɔ Babilɔn be efuli na kena n shin nɛ k ki keshishɛrsawule a dese. Edimɛdi nɛ asɔbɔya kikɛ beeŋ shile nɛ esa kama maaŋ naa wɔ ndoŋ.”

Israɛl be basa ka beeŋ naŋ bɛta n yɔ bumo be kasawule so be asheŋ

⁴ Nɛ Enyɛnpe Ebɔrɛ na kaŋɛ: “Jemanɛ na kaŋ fo, Israɛl nɛ Juda be basa kikɛ beeŋ cha abar n shu anishichubi. Kumo be kaman nɛ b bɛta m ba bumo be kasawule so m ba bunyaŋ ma.

⁵ Baaŋ bishi n fin Jerusalɛm be ekpa nseŋ bɔla kumo so m bɛta m ba nɛ ma nɛ bumo e wora kɔnɔkoŋwule be ŋkre nɛ k beeŋ baa wɔtɔ mbaanaayɔ. Bumo alɛ maaŋ naŋ wora n da kumo so ŋko n teŋ kumo so kikɛ.

⁶ Ma basa du fanɛ mbolpɔ nɛ bumo be bekpapoana shin nɛ b foe abee so nna. B daa nite cham cham kebee ko so nna n ya kaa lar kuko so nseŋ daŋ teŋ kakpa nɛ bumo pe wɔ so.

⁷ Bekama nɛ b daŋ wu bumo daa kɔ bumo kena nna. Le nɛ bumo doŋana bee kaŋɛ: ‘B wora alubi nna n da Enyɛnpe Ebɔrɛ nɛ e sa bumo nananyɛnana tama na so. Amoso kusɔ nɛ an wora na maŋ lubi. Bumo nananyɛnana daŋ yirda Enyɛnpe Ebɔrɛ nna, nɛ a daŋ daga fanɛ bumo alɛ gba ka ji kashenteŋ n sa mo.’

⁸ Israɛl be basa, men shile n lar Babilɔn be efuli so. Men sa maŋ naŋ jo esa kama!

⁹ N ya we n wɔtɔ efuli lempoana ko ashi kelargato be esoso be kaba so nna fanɛ b ba kɔ Babilɔn be efuli na kena. Baaŋ ber abar so nna m ba kɔ m pɔɔ kumo so. B la basa nɛ b nyi kekpaŋ to nɛnɛ nna nsaa to ata ga. B maa to a paŋ kikɛ.

¹⁰ Baaŋ ba fuu Babilɔn be asɔ kama nɛ baa sha na n yɔ. Ma, Enyɛnpe Ebɔrɛ e kaŋɛ na.”

Babilɔn ka tɔr be asheŋ

¹¹ Ade be kaman nɛ Enyɛnpe Ebɔrɛ na naŋ kaŋɛ le: “Babilɔn be basa, men daŋ suge ma basa be asɔ nna nɛ k par menyi ga nɛ menyee wora awɔr fanɛ mbrantiɛfɔlbi nɛ baa beri ayu ŋko gbaŋɛ ka bee shu na.

¹² Menyi alɛ gba be kadegboŋ nɛ baa tre Babilɔnia na to be basa beeŋ ŋaba nseŋ ji anishinyɔr. Babilɔn be efuli na malɛ gbagba beeŋ ki efuliana kikɛ to be kumo nɛ k maaŋ baa kɔ ketre. K beeŋ ki keshishɛrsawule nɛ nchu maaŋ baa wɔ kumo so.

¹³ Ma agbo beeŋ mur Babilɔn nɛ esa kama maaŋ naa wɔ kumo so. Kufu beeŋ pɛ esa kama nɛ e beeŋ bɔla ndoŋ a choŋ n wu kusɔ nɛ k wora na, nɛ e baa chicha.

¹⁴ Menyi basa nɛ men kɔ ata a kɔ na, e ba bɛ abar so ŋ kulti Babilɔn n wɔtɔ. Men to menyi be atanyembi kikɛ n wɔtɔ Babilɔn to, ŋkpal manɛ so, k wora kulubi n da ma, Enyɛnpe Ebɔrɛ na so nna.

¹⁵ Men kɔ bumo kaba kama so. Naniere Babilɔn shuli kapɔshi. Edoŋ na bure kumo be egbalana nɛ ebu jeŋgreŋana na n lɛ nɛ mee wora bumo kusɔ nɛ b ta n wora ndegboŋana ko na a bishi bumo kɔnɔ.

¹⁶ Men sa maŋ naŋ shin nɛ b naŋ duu keduuso kikɛ n teŋi efuli na so. Befɔ kama nɛ b chena ndoŋ na beeŋ baa ŋana benapo nɛ baa kɔ na nseŋ kpal loŋ so m bɛta n yɔ epe.”

¹⁷ Kumo be kaman nɛ Enyɛnpe Ebɔrɛ na kaŋɛ le: “Israɛl be basa na du fanɛ mbolpɔ nɛ ebuluŋ ju bumo nɛ b pesaŋ bumo to nna. Asiriya be Ewurgboŋ e juŋkpar m ba kɔ bumo kena, kumo be kaman nɛ Babilɔn be ewura Nebukadneeza malɛ ba we bumo be awibi m bure to.

¹⁸ Ŋkpal le so, ma, Enyɛnpetale, Israɛl be Ebɔrɛ na beeŋ gberge ewura Nebukadneeza nɛ mbe efuli so ebi kusoe fanɛ kananɛ ŋ gberge Asiriya be ewurgboŋ kusoe na.

¹⁹ Ama meeŋ naŋ bɛta Israɛl be basa na m ba bumo be kasawule so. Baaŋ dɔ adɔjibi kama nɛ baa sha ashi Kaamɛl be kebee nɛ k mata Mɛditerenia be Teku na nɛ Bashan be kebonfu nɛ k wɔ Jɔɔdan be lɔr na be epeŋilarkpa be kaba so na nɛ Efrayim nɛ Giliad be apreŋsawule so n ji kanaŋkama nɛ baa sha.

²⁰ Loŋ be jemanɛ na kaŋ fo, kulubi kikɛ maaŋ naa wɔ Israɛl be efuli so, nɛ kumu kpakpaso kikɛ malɛ maaŋ naa wɔ Juda be efuli so. Ŋkpal manɛ so, meeŋ ta basa nɛ n yige bumo nɛ b ji efute na be alubi m paŋ bumo. Ma, Enyɛnpe Ebɔrɛ e kaŋɛ na.”

Ebɔrɛ ka ji Babilɔn demu be asheŋ

²¹ Nɛ Enyɛnpe Ebɔrɛ na kaŋɛ Babilɔn mo doŋana le: “Men ya kɔ nde nɛ baa tre Merateem nɛ Pɛkɔd na be basa kena nseŋ mɔ bumo m mur. Men wora kusɔ kama nɛ ŋ kaŋɛ menyi kenishipereso na. Ma, Enyɛnpe Ebɔrɛ e kaŋɛ na.

²² Kena nɛ kemur gboŋgboŋi be awɔr bee cha kasawule na so nna.

²³ Babilɔn daa du fanɛ hama nna nseŋ daŋ bɛa durnya kikɛ to kpachɛrkpachɛrbi, ama loŋ be hama na gba e bɛa to kpachɛrkpachɛrbi na! Kusɔ nɛ k wora na daŋ chinchiŋ efuliana na be basa n shin nɛ bumo be nnɔ bumo.

²⁴ Babilɔn be efuli so be basa na daŋ to ma emaŋ nna a kɔ ma. Naniere kejigbelɛ nɛ n fe menyi na pɛ menyi nɛ menyi maŋ nyi gba.

²⁵ N teŋ bugi n lara akɔsɔ nɛ mee nya agbo a ta ashuŋ na ashi kakpa nɛ mee yili amo na. Ŋkpal manɛ so, ma Enyɛnpetale Ebɔrɛ na kɔ kushuŋ ko nɛ n shuŋ ashi Babilɔn be efuli so.

²⁶ Babilɔn mo doŋana, men shi kufɔ kufɔ m ba kɔ mo kena m bure mboŋ nɛ baa yili bumo be ayu be yiri yiri na. Kumo be kaman nɛ men chala asɔ nɛ men suge na abar so fanɛ ayu ka biti abar so na. Men mur efuli na kikɛ nsaa maŋ yige shɛŋ n sa bumo.

²⁷ Men mɔ bumo be benapo kikɛ. Babilɔn be basa wu asheŋ pasaa! Ŋkpal manɛ so, bumo be kasogberge be jemanɛ fo!”

²⁸ Basa nɛ b nya n shile Babilɔn be kena na to na ba Jerusalɛm to m baa kaa kaŋɛ kusɔ nɛ Enyɛnpe Ebɔrɛ na wora ŋ ka Babilɔnebi kukɔ ŋkpal kusɔ nɛ b daŋ wora mbe bɔrɛlambu ashi Jerusalɛm so.

²⁹ “Kaŋɛ bedoŋ nɛ baa ta ata a kɔ kena na fanɛ b kɔ Babilɔn kena. B ba kulti Babilɔn be kadegboŋ na n wɔtɔ nsaa maŋ shin nɛ esa kikɛ e nya n shile kena na to. Men ka bumo kukɔ ŋkpal kusɔ nɛ b wora na so, nseŋ wora bumo kusɔ nɛ b ta n wora beko na. Ŋkpal manɛ so, kamoowuso nɛ b daŋ wora asheŋ ŋ gbiti ma, Israɛl be Ebɔrɛ cheembi na.

³⁰ Amoso bumo be mbrantiɛfɔlbi beeŋ wu n dese kadegboŋ na be agbembi so nɛ bumo be benapo kikɛ e mur loŋ be kachɛ na. Ma, Enyɛnpe Ebɔrɛ e kaŋɛ na.”

³¹ “Kamoowu e baŋ bɔlɔ Babilɔn be efuli so be basa to, amoso, ma, Enyɛnpetale Ebɔrɛ na maaŋ yige bumo kikɛ. Jemanɛ fo nɛ b nya bumo be kasogberge.

³² Menyi be efuli nɛ kamoowu bɔlɔ kumo to na beeŋ fiti n tɔr nɛ esa kikɛ maaŋ chɛ to n niŋi kumo to n yili. Meeŋ shin nɛ menyi be ndegboŋana e ji edɛ nɛ asɔ kama nɛ a kulti menyi na kikɛ e mur.”

³³ Kede be kaman nɛ Enyɛnpe Ebɔrɛ na naŋ kaŋɛ le: “Israɛl nɛ Juda be basa kikɛ ji awurfoŋ nna ga. Bekama nɛ b daŋ pɔɔ bumo so nseŋ pɛ bumo tintiŋso na bee kuŋ bumo nna a maa sha kesa bumo ekpa nɛ b bɛta n yɔ bumo gbagba be efuli so.

³⁴ Ama esa nɛ e beeŋ sɔ bumo n yige na kɔ eleŋ. Mbe ketre e la Enyɛnpetale Ebɔrɛ na. Mo gbagba e naaŋ sɔ bumo be kɔnɔ so n shin nɛ kayurwushi e ba bumo be kasawule so nseŋ bar etɔrɔ Babilɔn be basa so.”

³⁵ Le nɛ Enyɛnpe Ebɔrɛ na kaŋɛ: “Luwu beeŋ ba Babilɔn be efuli so! K beeŋ ba kumo be basa kikɛ so nna, bewurjipoana nɛ benyiashempo kikɛ.

³⁶ Luwu beeŋ ba bumo be anebiana nɛ b la bewulpo nsaa ku efɛ na so! Luwu beeŋ ba bumo be benapo so, nɛ kufugboŋ e tɔr bumo so!

³⁷ Bedoŋ beeŋ mur menyi be egbaŋɛ nɛ amo be eturko, nɛ benapo nɛ men ya haya m ba na kikɛ! Menyi be benapo na beeŋ pɔ fanɛ beche, nɛ bedoŋ e mur menyi be asɔ lela kikɛ, nseŋ muu amo nɛ baa sha n yɔ.

³⁸ Ewule beeŋ tɔr menyi be kasawule so, nɛ elɔr nɛ mbombiana kikɛ e wɔl to. Ade kikɛ beeŋ wora, ŋkpal manɛ so, agbirana e bɔlɔ menyi be kasawule so n shin nɛ men ki bewulpo.

³⁹ Edimɛdi maaŋ naŋ chena Babilɔn be kasawule so kikɛ. Kupuŋ to be asɔbɔya fanɛ ejiŋkaamu nɛ ebuluŋ nɛ ekarmɛ nɛ ekuntuŋ nɛ mbuibi nɛ e maŋ walɛ keji daŋkare be ekpa so e naaŋ baa wɔ kumo kikɛ so.

⁴⁰ Kusɔ nɛ k wora ndegboŋ nɛ b daa tre Sodɔm nɛ Gomɔra nɛ ndewurbi nɛ a kulti amo jemanɛ nɛ n daŋ mur amo na, koŋwule e naaŋ wora Babilɔn be efuli so gba. Esa kama maaŋ naŋ chena kumo so kikɛ. Ma, Enyɛnpe Ebɔrɛ e kaŋɛ na.

⁴¹ Basa ko bee shi efuli ko nɛ k wɔ kelargato be esoso a ba, k la efuligboŋ nɛ k kɔ bewura damta nna. B shi kufɔ n wora kena be shiriya nna a ba.

⁴² B teŋ ta bumo be ata nɛ etokobi ŋ keta; bumo be benapo maŋ kɔ kushuso, bumo alɛ maa wu kuwɔr. B baa dii egbaŋɛ a ba k bee gbri nna fanɛ teku be nchu ka bee wɔr na. B bela ase nna a ba nɛ b ba kɔ Babilɔn be efuli so be basa kena.

⁴³ Babilɔn be ewura ka nu baru na, nɛ kufu pɛ mo nɛ mbe eyur wu mo. Ndoŋ nna nɛ kagbenejija damta tɔr mo so nɛ e bee kii kɔnɔ to fanɛ kakurge ka ta eche na.

⁴⁴ Kananɛ buluŋ bee lar kupo nɛ k dese Jɔɔdan be Lɔrgboŋ na ase a ba asɔbɔya be ejikpa nɛ asɔbɔya na e baa shile na, nɛ ma, Enyɛnpe Ebɔrɛ na beeŋ ba nɛ Babilɔnebi e shile epul to n lar bumo be kadegboŋ na to. Kumo be kaman nɛ ejuŋkparpo nɛ meeŋ lara na e ba chena n ji kuwura efuli na so. Wanɛ e naŋ tiŋ n ta mbe kumu m ber ma ŋko n to ma emaŋ? Ewurjipo kikɛ maŋ wɔtɔ nɛ e beeŋ tiŋ n tu ma ŋ kɔ.

⁴⁵ Amoso, men nu kusɔ nɛ ŋ kre a laŋɛ Babilɔn be kadegboŋ na be kaplɛa so nɛ kusɔ nɛ mee sha kewora kumo be basa. Bedoŋ beeŋ ba pɛ bumo be mbia katinso ŋ gberge bumo n yɔ efuli pɔtɛ wɔfɔ so nɛ bumo be efuli na a mur.

⁴⁶ Jemanɛ nɛ Babilɔn beeŋ tɔr na, egbri nɛ k beeŋ gbri na beeŋ shin nɛ durnya kikɛ e gbuŋgbuŋ, nɛ efuli pɔtɛana so be basa e nu egbri na.”