Jɛremaya 5 - EBƆRƐ BE KAWƆL

Kulubi nɛ k wɔ Jerusalɛm to be asheŋ

¹ Jerusalɛm to be basa, men nite agbembi so ŋ keni kusɔ nɛ k bee wora, Men keni ŋ kulti, menyi gbagba beeŋ wu fanɛ esa ko wɔtɔ a wora kusɔ nɛ keniŋi nsaa wora ania fanɛ e beeŋ baa ji kashenteŋ a sa Ebɔrɛ a? Menyeeŋ wu loŋ be esa ashi kakpa nɛ menyi bee ji kebɛ a? Nɛ men kaŋ nya loŋ be esa ma, Enyɛnpe Ebɔrɛ na beeŋ ta Jerusalɛm be basa be alubi m paŋ bumo.

² Menyee kaŋɛ fanɛ Enyɛnpe Ebɔrɛ na nɛ menyee shuŋ, ama kumo alɛ maŋ shi menyi be ŋgbene to.

³ Kashenteŋto, kashenteŋji nɛ Enyɛnpe Ebɔrɛ na bee keni a fin ashi men kutɔ. Mo e daŋ gberge menyi kusoe, ama men maŋ wɔtɔ lakel; e daŋ tintiŋ menyi nɛ men wora kusɔ nɛ k daga, ama men kini kekoya kusɔ ko kumo to. Men daŋ wora menyi be ŋgbene kpakpa nna nseŋ kini kelar menyi be alubi to.

⁴ Kumo be kaman nɛ le be nfɛra ba ma to: “Basa ere la betirpo nna nsaa maŋ nyi shɛŋ. Baa wora asheŋ kawuli so nna. B maŋ nyi kusɔ nɛ bumo be Ebɔrɛ bee sha, ŋko kusɔ nɛ Enyɛnpe Ebɔrɛ na bee sha fanɛ b baa wora.

⁵ To, meeŋ yɔ n ya malga bumo be benimuana kutɔ. Bumo ere nyi kusɔ nɛ bumo be Ebɔrɛ bee sha, ŋko kusɔ nɛ Enyɛnpe Ebɔrɛ na bee sha fanɛ b baa wora. Ama bumo kikɛ wora kɔnɔ nna ŋ kini kebaawora Enyɛnpe Ebɔrɛ na kasonu.

⁶ Amoso bedoŋ beeŋ ba bumo so fanɛ kupo to be ebuluŋ, ŋko keshishɛrsawule so be ekuntuŋ m ba pɛ bumo ŋ kpɛa to n we, nɛ ekarmɛ e sɔ bumo be ndeana to be abɔrbi so a nite a kulti. Nɛ basa na kaŋ lar kowu asɔbɔya na beeŋ pɛ bumo n ji ŋkpal b ka wora alubi damta nseŋ lar Ebɔrɛ kaman na so.

⁷ Kumo be kaman nɛ Enyɛnpe Ebɔrɛ bishi le: Manɛ so nɛ meeŋ ta ma basa be alubi m paŋ bumo? B kplaŋ ma so nseŋ lar ma kaman n ya kaa shuŋ agbirana nɛ e maŋ la Ebɔrɛ na. N sa ma basa kusɔ kama kanaŋkamaso nɛ baa sha, ama b kraŋ yige ma nseŋ lar bumo be beche be mman n ya kaa wɔ esakaleche kutɔ.

⁸ Bumo nɛ asɔbɔya maŋ kɔr abar to. Ŋkpal manɛ so, b daa sha kebaadi bumo braana be eche jemanɛ kikɛ nna.

⁹ Manɛ so nɛ m maaŋ gberge Juda be efuli so be basa kusoe?

¹⁰ Meeŋ shin nɛ bedoŋ e ba ku ma basa be ndibi sɔrso n lɛ, ama b maaŋ mur ndibi sɔrso be adɔ na bre cheche. Meeŋ kaŋɛ bumo fanɛ b kpele ayabiana na n lɛ; ŋkpal manɛ so, loŋ be basa na maa sha kebaanyi ma.

¹¹ Ekpa kikɛ so, Israɛl nɛ Juda be basa maŋ ji kashenteŋ n sa ma kuraa. Ma, Enyɛnpe Ebɔrɛ e kaŋɛ na.”

Enyɛnpe Ebɔrɛ ka kini Israɛl n lɛ be asheŋ

¹² Nɛ Enyɛnpe Ebɔrɛ na be basa ku efɛ ŋ kaŋɛ le: “E maaŋ wora shɛŋ! Mo alɛ maaŋ shin nɛ kena ŋko akoŋ e ba anyi so.”

^13-14 Bumo alɛ naŋ kaŋɛ fanɛ anebiana na la befɛpo nna nɛ bumo be mmalga maŋ shi Enyɛnpe Ebɔrɛ na kutɔ. Ndoŋ nna nɛ Enyɛnpetale Ebɔrɛ na kaŋɛ ma le: “Jɛremaya, ŋkpal basa ere ka bee kaŋɛ le so, meeŋ shin nɛ ma mmalga e baa du fanɛ edɛ fo kɔnɔ to. Basa na malɛ beeŋ baa du fanɛ ndibi, nɛ edɛ na e chɔɔ amo m mur.”

¹⁵ Israɛl be basa, Enyɛnpe Ebɔrɛ na beeŋ shin nɛ efuli ko so be basa e shi kufɔ kufɔ m ba kɔ menyi kena. B la basa lempo nɛ b wɔtɔ dra dra kikɛ nna nɛ menyi alɛ maŋ nyi ŋgbar nɛ baa gbar.

¹⁶ Bumo be benapo nɛ b kɔ ata a kɔ kena na la belempo nɛ b maa wu kuwɔr nna.

¹⁷ Baaŋ ji menyi be adɔjibi m mur nseŋ mɔ menyi be mbia. Bumo alɛ beeŋ mur menyi be asɔbɔya nɛ ndibi sɔrso kikɛ. Bumo be benapo beeŋ bure menyi be ndeana nɛ men pɔr egbalana ŋ kulti a wɔ amo to nsaa fɛ fanɛ shɛŋ maaŋ tiŋ n wora menyi na kikɛ n lɛ.

¹⁸ Kede be kaman nɛ Enyɛnpe Ebɔrɛ na naŋ kaŋɛ le: “Jɛremaya, bedoŋ be benapo na maaŋ mɔ ekama nɛ e wɔ Juda be efuli so.

¹⁹ Basa nɛ baaŋ ji efute kaŋ bishi le: ‘Manɛ nna nɛ Enyɛnpe, anyi be Ebɔrɛ na shin nɛ le be asheŋ lubi ere tu anyi?’ Nɛ fo kaŋɛ bumo fanɛ kananɛ b kini ma nseŋ shuŋ efuli pɔtɛana so be agbirana ashi bumo gbagba be kasawule so na, aloŋ nɛ baaŋ ya shuŋ basa pɔtɛ ashi efuli pɔtɛ so.”

Ebɔrɛ ka kpele mbe basa kusoe be asheŋ

²⁰ Enyɛnpe Ebɔrɛ na yɛ: “Bɔ kubɔya ere n sa Juda be efuli so be basa nɛ b la bumo nananyɛn Jeekɔb be kaman to ebi na.

²¹ Men nu nfe! Menyi basa wulpo nɛ men maŋ nyi asheŋ ere! Manɛ so nɛ menyi maa nu ma mmalga a bɛ amo so? Manɛ so nɛ menyi maa pin to fanɛ

²² ma e la Enyɛnpe Ebɔrɛ nɛ a daga fanɛ men baa ta kufu nɛ kechicha chicha a bunyaŋ ma? Ma e ta eshishɛr ŋ kuŋ teku nɛ k maŋ tiŋ n dii amo so. Teku so beeŋ tiŋ ŋ kaa ketili n wora awɔr ga, ama kumo alɛ maaŋ tiŋ n dii eshishɛr na so.

²³ Ama menyi ŋgbene kpakpasowuraana ere kini ma nseŋ pal kaman n sa ma.

²⁴ Men kini kekaŋɛ le: ‘Men shin nɛ an shuŋ Enyɛnpe Ebɔrɛ na! Mo e naa shin nɛ dɔchubɔrɛ so nɛ kpaŋchala so be bɔrɛ bee ba nɛ anyee nya a dɔ a teŋi kafɛ kikɛ na.’

²⁵ Ama menyi be alubi so, men maŋ nya asɔ lela ere kikɛ.

²⁶ Basa nɛ baa wora asheŋ lubi wɔ ma basa to nna a pɛ bumo anya fanɛ kananɛ basa bee sho ashewu a pɛ mbuibi na.

²⁷ Kananɛ ekpampo bee pɛ mbuibi a bɔlɔ katurwe na, aloŋ nɛ baa suge ma basa be asɔ a bɔlɔ bumo be elaŋana to. Amoso nɛ b dii kedama nsaa kɔ eleŋ ga

²⁸ nseŋ naa ji a daŋ apurfu na. Bumo be asheŋ lubi maŋ kɔ ekar. B maa sa amunibi asɔ nɛ e daga bumo ŋko a ji a chɛ betirpo nɛ b kɔ kashenteŋto.

²⁹ Ma, Enyɛnpe Ebɔrɛ na beeŋ gberge bumo kusoe ŋkpal asheŋ ere kikɛ so. Meeŋ wora n tal efuli na kikɛ be basa to.

³⁰ Kesheŋ lubi ko nɛ k bee jija kagbene nsaa mɔ kɔnɔ wora kasawule na so.

³¹ Kumo e la fanɛ anebiana na kikɛ be mmalga la efɛ nna. Kusɔ nɛ b kaŋɛ malɛ nɛ bɔrɛmatapoana na kɔ a shuŋ nɛ ma basa malɛ bee sha kumo be loŋ. To, jɛrbi be jemanɛ kaŋ fo nɛ asheŋ ere kikɛ fo ekar, nnɛ nɛ menyeeŋ yɔ n ya nya kechɛto?”