Jɛremaya 49 - EBƆRƐ BE KAWƆL

Enyɛnpe Ebɔrɛ ka ji Ammɔn demu be asheŋ

¹ Kusɔ nɛ Enyɛnpe Ebɔrɛ na kaŋɛ a laŋɛ Ammɔn be efuli so be kaplɛa so nde: “Israɛl be basa kɔ mbi damta nɛ baaŋ ji kasawule na be kapetɛ. Nɛ manɛ nna nɛ b shin nɛ basa nɛ baa shuŋ kegbir nɛ baa tre Mɔlɛk na sɔ Gad be yiri to ebi be kebonfu be nsawule so n chena so?

² Kachako bee ba nɛ n shin nɛ benapo ko e ba kɔ basa nɛ b wɔ efuli na be kadegboŋ nɛ baa tre Rabba to na kena m mur kumo cheche nseŋ chɔɔ ndekarso na n lɛ. Kumo be kaman nɛ Israɛl be basa e naŋ sɔ bumo be kasawule ashi basa nɛ b daŋ suge kumo na kutɔ.

³ Menyi basa nɛ men wɔ Hɛshbɔn be kade to na beeŋ shu awɔrso. Kade nɛ baa tre Ai na beeŋ mur! Rabba be beche, menyeeŋ ta nli be asɔbuuso m buu a shu keeli! Ekama beeŋ wulto a shile a kulti kaplɛkama. Baaŋ ta menyi be kegbir, Mɔlɛk nseŋ pɛ agbirwuraana nɛ kegbir ase be benimuana na tintiŋ so n yɔ efuli pɔtɛ wɔfɔ so.

⁴ Manɛ so nɛ menyi, Ammɔnebi, nɛ menyee maa ji kashenteŋ ere bee puchi? Menyi be eleŋ bee duga so nna na nɛ manɛ nna nɛ men kraŋ yirda menyi be yuku nsaa kaŋɛ fanɛ esa kikɛ maaŋ tiŋ ŋ kɔ menyi kena?

⁵ Meeŋ shin nɛ kenishipere gboŋgboŋi nɛ k bee keta kufu a shi kaba kama so m ba menyi so nɛ men shile m mɔlga menyi be amu. Esa kikɛ maaŋ naa wɔtɔ nɛ e naŋ gama menyi be benapo abar so.

⁶ Ama kachako meeŋ naŋ bɛta Ammɔn be basa m ba epe n shin nɛ b naŋ nya asɔ nɛ b paŋ na. Ma, Enyɛnpe Ebɔrɛ e kaŋɛ na.”

Enyɛnpe Ebɔrɛ ka beeŋ ji Edɔm be basa demu be asheŋ

⁷ Kusɔ nɛ Enyɛnpetale Ebɔrɛ na kaŋɛ a laŋɛ Edɔm be efuli so nde: “Edɔm be basa maŋ kɔ nfɛra nna a? Basa nɛ baa ji bumo asoeto na maa kaŋɛ bumo kusɔ nɛ baaŋ baa wora nna a? Bumo be kanyiasheŋ kikɛ loge nna a?

⁸ Menyi basa nɛ men wɔ kadegboŋ nɛ baa tre Dedan na e shile n ya ŋana! Meeŋ shin nɛ Isɔɔ be kaman to ebi e ji jɛrbi, ŋkpal manɛ so, jemanɛ fo nɛ ŋ gberge bumo kusoe.

⁹ Basa nɛ baa teŋi ayu ŋko a chuge asɔrso bee teŋi ŋko a chuge nna nsaa ka ako nɛ betirpo malɛ e baa shishi amo. Beyu malɛ baa yɔ kayu to kanyɛso, asɔ nɛ baa sha nawule nɛ baa ta.

¹⁰ Ama ma ere beeŋ ta kusɔ kama nɛ k la menyi Isɔɔ be kaman to ebi peya nseŋ bugi menyi so n lɛ ashi kakpa nɛ menyeeŋ ŋana, saŋɛ na so menyi maaŋ naŋ tiŋ n ta menyi be amu ŋ ŋana. Edɔm be efuli so be basa kikɛ beeŋ mur nɛ ekoŋwule gba maaŋ ka.

¹¹ Ama menyeeŋ tiŋ n yirda ma nseŋ yige menyi be amunibi nɛ bekulpoche n sa ma nɛ m baa keni bumo so.

¹² Efuliana nɛ bumo be basa maŋ daga kasogberge gba ka beeŋ nuu ma agbo be kawiebi to, manɛ nna nɛ menyi ere maaŋ nya kasogberge? Menyi alɛ gba beeŋ nuu kawiebi na to.

¹³ Ŋ gbagba e bɔ ntaŋ fanɛ Bozra nɛ k la Edɔm be efuli so be kadegboŋ na beeŋ ki keshishɛrsawule nɛ basa e wu kumo nɛ k chinchiŋ bumo nseŋ keta bumo kufu. Basa beeŋ baa wora kumo eyurto nsaa ta kumo be ketre a shoduu basa. Ndekarso nɛ a kulti kumo na kikɛ beeŋ ki alambure a dese mbaanaayɔ. Ma, Enyɛnpe Ebɔrɛ e kaŋɛ na.”

¹⁴ Kumo be kaman nɛ ma, Jɛremaya kaŋɛ le: “Edɔm be basa, kubɔya ko nɛ n nya shi Enyɛnpe Ebɔrɛ na kutɔ. E yɛ, e shuŋi kabɔ fanɛ e ya kaŋɛ efuliana na fanɛ b gama bumo be benapo abar so nseŋ bela ase m ba kɔ menyi kena.

¹⁵ Enyɛnpe Ebɔrɛ na malɛ beeŋ shin nɛ men ki basa pɔso nɛ esa kama maaŋ naa sa menyi bunyaŋ.

¹⁶ Menyi be kamoowuso nɛ menyee fɛ fanɛ efuliana na be basa bee ŋana menyi na. Menyi ka chena abee to nɛ abee be awɔlto so nɛ menyee fɛ loŋ, ama nɛ men wɔ awɔlto chilili fanɛ kusore gba, Enyɛnpe Ebɔrɛ na beeŋ tiŋ m bar menyi kaseto. Ma, Enyɛnpe Ebɔrɛ e kaŋɛ na.”

¹⁷ Kede be kaman, nɛ Enyɛnpe Ebɔrɛ na naŋ kaŋɛ le: “Kemur nɛ k beeŋ ba Edɔm be efuli so na be asheŋ beeŋ baa keta kufu. Ekama nɛ e beeŋ bɔla ndoŋ a choŋ nseŋ wu kumo, kufu beeŋ pɛ mo nɛ e baa chicha.

¹⁸ Kusɔ nɛ k daŋ wora ndegboŋ nɛ baa tre Sodɔm nɛ Gomɔra dra dra na e naaŋ wora Edɔm be efuli so gba jemanɛ nɛ amo nɛ nde nɛ a kulti amo na kikɛ daŋ mur na. Esa kama maaŋ naŋ chena Edɔm be efuli so kikɛ. Ma, Enyɛnpe Ebɔrɛ e kaŋɛ na.

¹⁹ Kananɛ buluŋ bee lar kupo nɛ k dese Jɔɔdan be Lɔrgboŋ na ase a ba asɔbɔya be ejikpa nɛ asɔbɔya na e baa shile na, nɛ ma, Enyɛnpe Ebɔrɛ na beeŋ ba nɛ Edɔmebi e shile epul to n lar bumo be kadegboŋ na to. Kumo be kaman nɛ ejuŋkparpo nɛ meeŋ lara na e ba chena n ji kuwura efuli na so. Wanɛ e naŋ tiŋ n ta mbe kumu m ber ma ŋko n to ma emaŋ? Ewurjipo kikɛ maŋ wɔtɔ nɛ e beeŋ tiŋ n tu ma ŋ kɔ.

²⁰ Amoso men nu kusɔ nɛ ŋ kre a laŋɛ Edɔm be basa be kaplɛa so nseŋ naŋ nu kusɔ nɛ mee sha kewora basa nɛ b wɔ kadegboŋ nɛ baa tre Tɛman na to na. Bedoŋ beeŋ pɛ menyi be mbia katinso ŋ gberge bumo n yɔ efuli pɔtɛana so nɛ menyi be efuli na e mur.

²¹ Jemanɛ nɛ Edɔm beeŋ tɔr na, egbri nɛ k beeŋ gbri na beeŋ shin nɛ durnya kikɛ e gbuŋgbuŋ, nɛ bumo be basa be kushu be awɔr e ya fo Teku Peper na ase.

²² Bedoŋ na beeŋ ba kɔ Bozra be basa eleŋso fanɛ kusore ka ber atɛ to ŋ gbelge m ba kasawule so eleŋso na. Kachɛ na kaŋ fo, Edɔm be benapo be ŋgbene beeŋ jija bumo ga fanɛ eche nɛ kakurge ta mo na.”

Enyɛnpe Ebɔrɛ ka beeŋ ji Damaskɔs demu be asheŋ

²³ Kusɔ nɛ Enyɛnpe Ebɔrɛ na kaŋɛ a laŋɛ Damaskɔs be kaplɛa so nde: “Kagbenejija nɛ kabɔlar daŋ tɔr basa nɛ b daa wɔ ndegboŋ nɛ baa tre Hamaf nɛ Apad na so nna ŋkpal b ka daŋ nu baru lubi so. Kafɔŋ damta daŋ luri bumo to nna fanɛ kananɛ teku be nchu bee ku a ba kaa buu kumo be ekarso so na nna.

²⁴ Damaskɔs be basa na daŋ pɔ aba nna ga nseŋ daŋ ta kufu nɛ keyeŋi yeŋi n shile. Ebesa nɛ kagbenejija damta e daa wɔ bumo to fanɛ eche nɛ e bee kurge na.

²⁵ Jemanɛ ko ma kagbene daŋ fuli menyi be kadegboŋ nɛ k kɔ ketre na so nna. Ama naniere mee kpele menyi kusoe nna fanɛ men lar kumo to n shile m mɔlga menyi be amu.

²⁶ Loŋ be kachɛ na kaŋ fo bedoŋ beeŋ mɔ mbrantiɛfɔlbi na agbembi so nseŋ mur bumo be benapo kikɛ.

²⁷ Meeŋ nya edɛ n wɔtɔ Damaskɔs be nwu to nseŋ chɔɔ ewura Bɛnhadad be ewurkpa lempoana n lɛ. Ma, Enyɛnpe Ebɔrɛ e kaŋɛ na.”

Demuji nɛ k bee ba Kɛda be yiri nɛ Hazɔɔ be kadegboŋ so be asheŋ

²⁸ Kusɔ nɛ Enyɛnpe Ebɔrɛ na kaŋɛ a laŋɛ Kɛda be yiri nɛ keshishɛrsawule so be ndekarso na be kaplɛa so nde: “Men nu nfe, Kɛda be basa nɛ eyiriana nɛ a wɔ keshishɛrsawule nɛ k wɔ a laŋɛ epeŋilarkpa be kaba so na. Ŋ kaŋɛ Babilɔn be Ewura Nebukadneeza fanɛ e ba kɔ menyi kena m mur menyi.

²⁹ Mbe benapo nɛ bumo be asheŋ bee keta kufu na beeŋ ba kulti menyi n wɔtɔ nseŋ suge menyi be ewajɛbu nɛ asɔ kikɛ. Bumo alɛ beeŋ naŋ suge menyi be mbolpɔ nɛ enyɔma gba n ti so.

³⁰ Hazɔɔ be basa, ma, Enyɛnpe Ebɔrɛ na e naa kaŋɛ menyi na fanɛ men shile n yɔ kufɔ n ya ŋana. Babilɔn be ewura Nebukadneeza kre kulubi a laŋɛ menyi be kaplɛa so. Kusɔ nɛ e kaŋɛ nde:

³¹ ‘Men shin nɛ an ya kɔ basa nɛ baa fɛ fanɛ shɛŋ maaŋ tiŋ n wora bumo na! Bumo be kadegboŋ na maŋ kɔ egbalana nɛ mbunagboŋana a kuŋ kumo.’

³² Meeŋ suge bumo be enyɔma nɛ asɔbɔya kikɛ! Meeŋ pesaŋ basa nɛ baa kuya bumo be emin so na n sɔ kaplɛkama, nseŋ naŋ shin nɛ jɛrbi e shi kaba kama so m ba bumo so.

³³ Hazɔɔ beeŋ ki keshishɛrsawule mbaanaayɔ nɛ ejiŋkaamu e baa wɔ kumo so. Esa kikɛ maaŋ naŋ chena kumo so kikɛ. Ma, Enyɛnpe Ebɔrɛ e kaŋɛ na.”

Enyɛnpe Ebɔrɛ ka ji Elam demu be asheŋ

³⁴ Zɛdikaya ka ji Juda be efuli so be kuwura, k maŋ chɛr ko nɛ Enyɛnpetale Ebɔrɛ na malga ma kutɔ a laŋɛ Elam be efuli be kaplɛa so.

³⁵ E yɛ: “Meeŋ shin nɛ b mɔ basa nɛ b ta ata ŋ kɔ n shin nɛ Elam be efuli na nya eleŋ ga na.

³⁶ Bedoŋ beeŋ shi kaba kama so m ba kɔ Elam be basa nseŋ pɛ bumo tintiŋso n yɔ durnya to be efuli kama so.

³⁷ Meeŋ shin nɛ Elam be basa bumo bedoŋana e mɔ bumo n jija bumo kuraa nseŋ naŋ shin nɛ b ji jɛrbi nɛ ma agbogboŋ beeŋ shin nɛ k ba bumo so na.

³⁸ Meeŋ mur bumo be bewura nɛ bejuŋkparpoana nseŋ nase ma kuwurputi ndoŋ n ji kuwura efuli na so.

³⁹ Ama kachako meeŋ naŋ bɛta Elam be basa m ba bumo be kasawule so nɛ b naŋ dii kedama. Ma, Enyɛnpe Ebɔrɛ e kaŋɛ na.”