Jɛremaya 48 - EBƆRƐ BE KAWƆL

Mowab be kemur be asheŋ

¹ Kusɔ nɛ Enyɛnpetale, Israɛl be Ebɔrɛ na kaŋɛ a laŋɛ efuli nɛ baa tre Mowab na be kaplɛa so nde: “Asheŋ maaŋ nyalɛ n sa kade nɛ baa tre Nebo na; ŋkpal manɛ so, k beeŋ mur cheche. Bedoŋ beeŋ kɔ n suge Kiriataim, kumo be mboŋ lempoana beeŋ bure n tɔr nɛ kumo be basa e ji anishinyɔr.

² Mowabebi, esa kikɛ maaŋ naaŋ maŋkura menyi. Bedoŋ bee kre keku menyi be ŋkpa so ashi men be kadegboŋ nɛ baa tre Hɛshbɔn na to. Kusɔ nɛ ma tokobi beeŋ wora e la keshin nɛ kakpa a wora shruum ashi kade nɛ baa tre Madmen na.

³ Basa nɛ b wɔ Horoneem na beeŋ shu n fin kechɛto jemanɛ nɛ bedoŋ beeŋ kɔ bumo be kade m mur kumo na.

⁴ Mowab be efuli na beeŋ mur! Kumo be mbia beeŋ shu;

⁵ baaŋ shu anishichubi m bɔla ekpa a yɔ kade nɛ baa tre Luhif nɛ k wɔ Horoneem be ekpa to na. Baaŋ baa kute ejɛrbi nɛ b ji na be asheŋ.

⁶ Men shile manaŋ m mɔlga menyi be efute! Men ta kumu n shoŋi keshishɛrsawule so a yɔ fanɛ kurma nɛ e yeŋ na.

⁷ Mowabebi, men ta menyi be yirda nna n wɔtɔ menyi be eleŋ nɛ kedamaya to, ama naniere bedoŋ beeŋ kɔ m pɔɔ menyi so nseŋ yɛr menyi be kegbir nɛ baa tre Chemɔsh na nɛ kumo be agbirwuraana nɛ benimuana na efuli pɔtɛ wɔfɔ so.

⁸ Menyi be ndeana na be kukoŋwule gba maaŋ lar kemur na to. Menyi be apreŋsawule nɛ ataŋɛ kikɛ gba beeŋ mur. Ma, Enyɛnpe Ebɔrɛ e kaŋɛ na.

⁹ Men chulgi nfɔl n wurge Mowab be kasawule so nɛ kasawule na e ki kasawule wuso nsaa maaŋ naŋ tiŋ n wora adɔjibi; kumo be ndeana gba beeŋ ki nde fuloŋ a dese, nɛ esa kikɛ maaŋ naa wɔ amo to.

¹⁰ Mee sha fanɛ men mɔ Mowabebi na nna; men kaŋ shin nɛ b nya n shile m mɔlga bumo be amu meeŋ sho menyi kɔnɔ.”

¹¹ Ade be kaman nɛ Enyɛnpe Ebɔrɛ naŋ kaŋɛ: “Mowab be basa wɔtɔ nna nɛ shɛŋ maa tɔrɔ bumo. Bumo alɛ maŋ naŋ yɔ kenyaya to ashi efuli pɔtɛ wɔfɔ so kikɛ. Mowabebi na du fanɛ yabra nɛ a yil nɛ b maa baga amo to ŋko a chulgi amo a wɔtɔ a wɔtɔ mpuya to nna. Amo be efɛ maa chɛrga, amo be ebel malɛ baa du kananɛ a du nna.

¹² Amoso saŋko bee ba nɛ n shuŋi basa ko nɛ b ba ju Mowabebi na n lar fanɛ b ka chulgi yabra na. Baaŋ ju Mowabebi na n lar fanɛ b ka chulgi yabra mpuya to n lɛ nseŋ bure amo cheche na.

¹³ Saŋɛ na so Mowabebi na maaŋ naŋ yirda bumo be kegbir nɛ baa tre Chemɔsh na, fanɛ kananɛ Israɛlebi na maŋ naŋ yirda kade nɛ baa tre Bɛtɛl nɛ b daŋ ta yirda n wɔtɔ kumo to jemanɛ ko na.

¹⁴ Mowab be benyɛn bee kaŋɛ nna fanɛ bumo ere la benapo lempo nɛ b kɔ kenyɛn nna.

¹⁵ Ama ma e la Enyɛnpe Ebɔrɛ; Ewura nɛ e kɔ eleŋ ga na. Mee nase kɔnɔ nna fanɛ bedoŋ beeŋ ba kɔ kena m pɔ menyi be ndeana so. Menyi be benapo lempo gba beeŋ wu kena na to.

¹⁶ K maaŋ chɛr ko nɛ Mowab be basa e ji jɛrbi;

¹⁷ nɛ menyi efuliana nɛ men taga Mowab be efuli so to na, nɛ menyi kikɛ nɛ men nyi kananɛ k daa du na e shu n sa kumo. Menyeeŋ kaŋɛ le: ‘Kumo be eleŋgboŋ nɛ k kɔ a ji kuwura na nɛ kumo be kemaŋkura nɛ yuku na kikɛ maŋ naa wɔtɔ.’ ”

¹⁸ Menyi bumo nɛ men yɔ kade nɛ baa tre Dibɔn na e gbelge menyi be kemaŋkura so m ba chena kasawule eshishɛrpumpuŋ to; ŋkpal manɛ so, emo nɛ e beeŋ mur Mowab na ba nɛ e ba mur menyi be ndegboŋ lempoana na cheche.

¹⁹ Menyi basa nɛ men wɔ kade nɛ baa tre Aruwa na e yili ekpakar a jo; saŋɛ na so bumo nɛ b shile a choŋ na kaŋ tu menyi nɛ men bishi bumo kusɔ nɛ k wora.

²⁰ Baaŋ kaŋɛ menyi le: “Mowabebi kɔ kena n tɔr nna! Men shu n sa bumo. B ji anishinyɔr. Men ber kumo be kebomboŋ ashi Aanɔn be Lɔr na be ekarso, fanɛ Mowab be efuli na mur!

^21-24 Meeŋ gberge basa nɛ b wɔ Mowab be efuli so be ndeana to, fɔŋfɔŋ Holon nɛ Jaaza nɛ Mefaaf nɛ Dibɔn nɛ Nebo nɛ Bɛf Diblateem nɛ Kiriataim nɛ Bɛf Gamul nɛ Bɛf Mɛɔn nɛ Keriɔf nɛ Bozra kusoe.

²⁵ Mowab be eleŋgboŋ nɛ yuku kikɛ mur; bumo be benapo maaŋ naŋ tiŋ n wora shɛŋ. Ma, Enyɛnpe Ebɔrɛ e kaŋɛ na.”

²⁶ Kumo be kaman nɛ Enyɛnpe Ebɔrɛ na naŋ kaŋɛ le: “Ŋkpal Mowabebi ka keni ma, Enyɛnpe Ebɔrɛ na jiga nseŋ kaŋɛ fanɛ b kɔ eleŋ a chɔ ma so, meeŋ kaŋɛ efuli pɔtɛana na be basa fanɛ b shin nɛ Mowab be basa e nuu nsa m boo nseŋ kwiɛ n dese amo to a melti; saŋɛ na so basa beeŋ mushe bumo.”

²⁷ Mowab be basa, men baa nyiŋi kananɛ men daŋ wora Israɛl be basa eyurto. Men daŋ wora bumo nna fanɛ b ka la beyu nɛ besugepo na.

²⁸ Menyi basa nɛ men wɔ Mowab be efuli so na e lar menyi be ndeana to nseŋ ya kaa wɔ abeelaŋ to fanɛ kananɛ elepɔ bee tɔ asha abeelaŋ to a di to na.

²⁹ N nyi kananɛ Mowab be basa bee wu bumo be amu nseŋ kpeŋ nsaa ŋini to fanɛ bumo ere e baa la basa a chɔ bekama.

³⁰ Ma, Enyɛnpe Ebɔrɛ na nyi bumo be ŋkpensheŋ, ama bumo be mpuchi maaŋ tiŋ m mɔlga bumo.

³¹ Amoso meeŋ shu anishichubi n sa ekama nɛ e wɔ Mowab be efuli so nɛ basa nɛ b wɔ kade nɛ baa tre Kir Hɛrɛs to na.

³² Ma alɛ beeŋ shu n sa basa nɛ b wɔ kade nɛ baa tre Sibma nseŋ shu a chɔ loŋ n sa basa nɛ b wɔ kade nɛ baa tre Jaza na. Fo, kadegboŋ Sibma du fanɛ kefeelebi nɛ kumo be ayabi salga to n ya fo Teku Wuso na ashi epeŋitɔrkpa be kaba so hale n ya fo Jaza nna. Ama naniere fo asɔrso nɛ baa tre greeps nɛ fee sɔr kechali so na mur.

³³ Kagbenefuli nɛ kagbenewushi maŋ naa wɔ basa to ashi Mowab be adɔsawule nɛ ndibisɔrso be adɔana so ŋkpal b ka maŋ naa nya adɔjibi nɛ greeps, a wora yabra so.

³⁴ Basa nɛ b wɔ nde nɛ baa tre Ɛleale nɛ Jahaz na bee nu basa nɛ b wɔ kade nɛ baa tre Hɛshbɔn na be kushu nna. Nɛ bumo nɛ b wɔ Horoneem nɛ Eglaf Shelishima be ndeana to bee nu Zowaebi be kushu. Ŋkpal manɛ so, kabombi nɛ baa tre Nimrim na gba wɔlto nna.

³⁵ Meeŋ shin nɛ Mowab be basa e yige kebaalara esarga nsaa chɔɔ eduwu ashi bumo be agbirase a sa bumo be agbirana. Ma, Enyɛnpe Ebɔrɛ e kaŋɛ na.

³⁶ “Mee shu ma kagbene to nna a sa Mowab nɛ Kir Hɛrɛs be basa, fanɛ kananɛ esa bee foŋ kalopi a boŋ keeli be kasha na, ŋkpal manɛ so, bumo ere be asɔ nɛ b kɔ kikɛ mur.

³⁷ Benyɛn na kikɛ daŋ she bumo be amu nɛ ntɔl nna nɛ basa na kikɛ ta asɔ ŋ kpɛa ŋ kpɛa bumo be enɔana nseŋ ta nli be asɔbuuso m buu.

³⁸ Bumo be achoŋi nɛ alɔnɛ kikɛ so, b baa shu nli nna, ŋkpal manɛ so, ma, Enyɛnpe Ebɔrɛ na farnyaŋ Mowab be basa to nna fanɛ kapuya nɛ esa kikɛ maa sha nɛ b ta n lɛ nɛ k bure na nna.

³⁹ Mowab be efuli bure cheche a dese nɛ kumo be basa ji anishinyɔr nɛ efuliana nɛ a kulti kumo na be basa kikɛ wu kumo nɛ k chinchiŋ bumo nɛ b wora bumo eyurto. Ma, Enyɛnpe Ebɔrɛ e kaŋɛ na.”

⁴⁰ Enyɛnpe Ebɔrɛ na daŋ nase kɔnɔ nna fanɛ efuli ko beeŋ ba parga kumo be atɛ to m buu Mowab so n fuu kumo fanɛ kusore na.

⁴¹ Baaŋ kɔ n suge ndeana na nɛ mboŋ lempoana na kikɛ. Loŋ be kachɛ na kufu beeŋ pɛ Mowab be benapo fanɛ kananɛ kufu bee pɛ eche nɛ kakurge ta mo na.

⁴² Mowab be efuli na beeŋ mur nsaa maaŋ naa wɔtɔ, ŋkpal manɛ so, kumo be basa pal kaman nna n sa ma, Enyɛnpe Ebɔrɛ na.

⁴³ Kenishipere gboŋgboŋi nɛ k bee keta kufu nɛ amaŋgboŋ nɛ ajigbelɛ e dese a jo Mowab be basa.

⁴⁴ Esa kama nɛ e beeŋ nya n shile kenishipere gboŋgboŋi na to na beeŋ tɔr amaŋgboŋ na to. Ekama nɛ e beeŋ nya n dii n lar amaŋgboŋ na to malɛ beeŋ tɔr ajigbelɛ na to nɛ a pɛ mo, ŋkpal manɛ so, Enyɛnpe Ebɔrɛ teŋ n yili jemanɛ nɛ Mowab be efuli na beeŋ nya kumo be kasogberge nna.

⁴⁵ Basa nɛ b shile kena na daŋ shile n yɔ Hɛshbɔn nna, kadegboŋ nɛ ewura Sihɔn daŋ chena ndoŋ n ji kuwura dra dra na. B daa shile nna a mɔlga bumo be amu, ama b ka yɔ nɛ kadegboŋ na bee ji edɛ. Mowab be basa bee sha anasheŋ nna ga, ama edɛ na teŋ n ji bumo be ndekarso nɛ abee so kikɛ m mur.

⁴⁶ Asheŋ maaŋ nyalɛ n sa menyi, Mowab be basa! Men shuŋ menyi be kegbir Chemɔsh na, ama naniere menyi e mur nɛ b pɛ menyi be mbia malɛ katinso n yɔ efuli pɔtɛ wɔfɔ so na.

⁴⁷ Ama kachako, ma, Enyɛnpe Ebɔrɛ na beeŋ naŋ bɛta Mowab be basa m ba nɛ b naŋ dii kedama. Ma, Enyɛnpe Ebɔrɛ e kaŋɛ na.