Jɛremaya 47 - EBƆRƐ BE KAWƆL

Kubɔya nɛ Enyɛnpe Ebɔrɛ ta n sa Filistiebi be asheŋ

¹ Pɔɛŋ nɛ Ijipt be ewura ya kɔ kade nɛ baa tre Gaaza na kena, Enyɛnpe Ebɔrɛ na daŋ kaŋɛ ma nna fanɛ ŋ kaŋɛ Filistiebi na le.

² E yɛ: “Keni! Nchu bee bɔlɔ a dii kelargato be esoso; amo alɛ beeŋ ba fanɛ lɔr ka bɔlɔ n dii apla na. Nchu na beeŋ ba buu kasawule nɛ kusɔ kama so, a beeŋ buu ndegboŋana nɛ basa nɛ b wɔ amo to kikɛ so. Edimɛdi beeŋ boŋ to a shu a fin kechɛto nɛ durnya to be basa kikɛ e shu kenishipereso ga.

³ Baaŋ nu egbaŋɛ be aya ka bee gbri kasawule so, nseŋ nu egbaŋɛturko be egbri gba kasawule so. Betuto nɛ benio maaŋ naŋ bɛta n ya ta bumo be mbia; ŋkpal manɛ so baaŋ paŋ kenyɛn nseŋ chɛl nɛ bumo be mbre maaŋ naa kɔ eleŋ.

⁴ Filistiebi be kemur be saŋɛ fo, saŋɛ fo nɛ bumo be ndegboŋ nɛ baa tre Tayɛ nɛ Sidɔn na e mur nɛ b maaŋ naŋ nya kechɛto. Ma, Enyɛnpe Ebɔrɛ na e naaŋ mur Filistiebi nɛ b shi keplasawule nɛ baa tre Kriit na m ba na.

⁵ Kebɔltofinfin damta tɔr basa nɛ b wɔ Gaaza na so, nɛ kɔnɔ mɔ basa nɛ b wɔ Ashkɛlɔn na, nɛ b wora shruum. Nchɛ afanɛ nɛ basa nɛ b wɔ Filisti be mboŋ nɛ a ka na beeŋ chena a wora fanɛ b ka bee shu keeli na?

⁶ Menyee shu a kaŋɛ le: ‘Enyɛnpe Ebɔrɛ be Tokobi! Saŋɛ mo nɛ feeŋ yige anyi be kemɔ? Bɛta n luri fo efar to n ya kaa wɔ kumo to a wushi!’

⁷ Ama nuso nɛ k beeŋ tiŋ n wushi, jemanɛ nɛ n sa kumo kushuŋ fanɛ k shuŋ? Ŋ kaŋɛ kumo kenishipereso fanɛ k kɔ Ashkɛlɔn nɛ basa nɛ b chena teku be ekarso na.”