Jɛremaya 46 - EBƆRƐ BE KAWƆL

Kubɔya nɛ k wɔtɔ a laŋɛ Ijipt be kaplɛa so be asheŋ

¹ Enyɛnpe Ebɔrɛ na daŋ malga ma kutɔ a laŋɛ efuliana na be kaplɛa so nna.

² Ijipt be asheŋ nɛ e daŋ juŋkpar m malga. Kusɔ nɛ e daŋ kaŋɛ a laŋɛ Ijipt be ewura Niko nɛ Babilɔn be ewura Nebukadneeza daŋ kɔ m pɔɔ so ashi kadegboŋ nɛ baa tre nɛ k mata Lɔrgboŋ nɛ baa tre Yufreetes na be benapo be kaplɛa so. Ewura Jehowakim ka ji Juda be kuwura be kafɛ nasopo to na nɛ loŋ wora. Kusɔ nɛ Enyɛnpe Ebɔrɛ na daŋ kaŋɛ ma nde:

³ “Ijipt be benapo be benimuana na ponte ŋ kaŋɛ bumo be benapo le: ‘Men wora menyi be abɛlso be asɔ kuŋkumuso shiriya, nseŋ bɛ abar so n yɔ kena to!

⁴ Men ta egaare n deŋi menyi be egbaŋɛ so n dii n chena amo so! Men ta menyi be abɛlso be akpaŋwuro m buu, nseŋ yili m bɛ abar so folee! Men yee menyi be akpaana be nnɔ, nseŋ buu menyi be abɛlso be ekpaŋkale!’ ”

⁵ Nɛ Enyɛnpe Ebɔrɛ na bishi le: “Manɛ nɛ mee wu ere? Kufugboŋ e tɔr bumo so nɛ b bɛta a shile. Bedoŋ pɔɔ bumo be benapo so nna nɛ b bɛta n ta kufu a shile bumo be eshile kikɛ nsaa maŋ naa gbɛ a keni kaman gba.

⁶ Bumo nɛ baa shile ga gba maŋ tiŋ n shile m mɔlga bumo be amu; benapo na maaŋ tiŋ n shile m mɔlga bumo be amu. B fiti n tɔr kena to nna ashi kelargato be esoso, a mata Yufreetes be Lɔrgboŋ na.

⁷ Efuli mo nde, nɛ k koso fanɛ kananɛ Nail be Lɔrgboŋ na bee bɔlɔ a dii kumo be agurɔŋgu so ashi Ijipt be efuli so?

⁸ Ijipt e koso fanɛ Nail na; k koso fanɛ lɔr ka bɔlɔ n dii kumo be agurɔŋgu so nna. Ijiptebi yɛ: ‘Anyeeŋ koso m buu durnya kikɛ so, anyeeŋ mur ndegboŋana nɛ amo to be basa.

⁹ Kaŋɛ egbaŋɛ na kenishipereso fanɛ b baa shile a yɔ nɛ egbaŋɛturko na malɛ e baa shil a chɔ so! Kaŋɛ menyi be esoji na fanɛ b lar m bɛ abar so a yɔ, Itiopiaebi nɛ Libiyaebi na e keta abɛlso be asɔ kuŋamuso, Lidiya be basa na keta ata nɛ atanyembi nna.’ ”

¹⁰ Enyɛnpetale Ebɔrɛ na be kachɛ nna na; e beeŋ wora n tal to kabre; kabre e beeŋ gberge mo doŋana kusoe. Mbe tokobi beeŋ mɔ bumo kumo be keparso, nɛ ŋklaŋ e gbiti kumo be kaplɛkama le gbetɛɛ. Enyɛnpetale Ebɔrɛ na beeŋ ta bumo n lara sarga ashi kelargato be esoso a mata Yufreetes be Lɔrgboŋ na.

¹¹ Ijipt be basa, men yɔ Giliad be kasawule so n ya fin kudur! Menyi be adur kikɛ la adur jiga nna; a maaŋ tiŋ n chɛ menyi.

¹² Efuliana na nu men be ŋaba be asheŋ; esa kama malɛ nu men be kushu. Soja ko bee fiti mo barkasa nna nɛ bumo benyɔ na kikɛ e tɔr kasawule.

Nebukadneeza be keba be asheŋ

¹³ Jemanɛ nɛ Babilɔn be ewura Nebukadneeza nɛ e ba kɔ Ijipt be efuli so kena na nɛ Enyɛnpe Ebɔrɛ na malga ma kutɔ.

¹⁴ E yɛ: “Ber kebomboŋ ashi Ijipt be ndeana to; fɔŋfɔŋ ashi Migdɔl nɛ Mɛmfis nɛ Taapanes, ŋ kaŋɛ le: ‘Men wora shiriya ŋ kɔ n suge menyi be amu; asɔ kama nɛ men kɔ na kikɛ beeŋ mur kena to!

¹⁵ Manɛ nna nɛ menyi be kegbirgboŋ Apis na tɔr? Enyɛnpe Ebɔrɛ na e ŋmɛa kumo n lɛ!’

¹⁶ Menyi be esoji fiti abar nna n tɔr, nɛ eko kaŋɛ mo barkasa le: ‘Koso manaŋ nɛ an shile bedoŋ be tokobi m mɔlga anyi be amu nseŋ yɔ anyi be basa kutɔ epe!’ ”

¹⁷ Kede be kaman nɛ men ta ketre popɔr ere: “Awɔr Damta nɛ Sheŋ Maa wora; n nase Ijipt be ewura.

¹⁸ Ma, Enyɛnpe Ebɔrɛ na e la ewura. Ma e la Ebɔrɛ nɛ e bee sa ŋkpa na. Kananɛ Tabɔɔ be kebee baa du jeŋgreŋ a chɔ abeeana, nɛ Kaamɛl be kebee malɛ dii awɔlto a chɔ teku na, aloŋ nɛ edoŋ nɛ e beeŋ ba kɔ fo na be eleŋ beeŋ baa chɔ feya.

¹⁹ Ijipt be basa, men bela ase n wora shiriya; bedoŋ beeŋ ba pɛ menyi n yɔ kenyaya to. Menyi be kadegboŋ nɛ baa tre Mɛmfis na beeŋ bure a dese fuloŋ nɛ esa kikɛ maaŋ naa wɔ kumo to.

²⁰ Ijipt du fanɛ nache fɔlbi nɛ e walɛ kebita nɛ wuloŋ shi kelargato be esoso m ba duŋ mo nna.

²¹ Benapo nɛ e ber paa na gba du fanɛ anabi nɛ a ji n daŋ n wora ŋku nna. Bumo alɛ gba beeŋ kilgi n lara keya n shile; b maaŋ yili n tu bedoŋ na ŋ kɔ, ŋkpal manɛ so, jɛrbi be kachɛ bee ba bumo so nna, nɛ bumo be kasogberge be saŋɛ fo.

²² Ijipt bee fɛɛto nna fanɛ kuwɔ a shile, saŋɛ nɛ bedoŋ be benapo bee ba eleŋ so na. Akpanfu nɛ b ta m ba kaa kɔ mo fanɛ kananɛ basa bee kuya ndibi

²³ kupo to be ndibi a mur ndibi nɛ a mel abar so na. Bumo be benapo shi ga nɛ esa maaŋ tiŋ ŋ karga bumo; b shi ga a chɔ gba.

²⁴ Ijipt be basa ji anishinyɔr; basa nɛ b shi kelargato be esoso na kɔ m pɔɔ bumo so.”

²⁵ Kumo be kaman, nɛ Enyɛnpetale, Israɛl be Ebɔrɛ na naŋ kaŋɛ le: “Meeŋ gberge Tebes be kegbir nɛ baa tre Ammɔn na nɛ Ijipt be agbirana nɛ kumo be basa nɛ bewuraana nɛ bekama nɛ b ta bumo be yirda n deŋi Ijipt be eleŋgboŋ so na kusoe.

²⁶ Meeŋ ta bumo m bɔɔ ewura Nebukadneeza nɛ mbe benapo enɔ. Ama mee nase kɔnɔ nna fanɛ, kachako Ijipt beeŋ naŋ nya basa nɛ b chena nfe fanɛ kananɛ k daa du na. Ma, Enyɛnpe Ebɔrɛ e kaŋɛ na.”

Enyɛnpe Ebɔrɛ na ka beeŋ mɔlga mbe basa be asheŋ

²⁷ “Ma basa, men sa maa lɔ kufu. Israɛl be basa, men sa maa chicha kufuso. Kachako meeŋ lara menyi ashi efuli pɔtɛana so m bar menyi epe. Menyi nɛ menyi be kaman to ebi kikɛ beeŋ ba kaa wɔ kayurwushi to nɛ esa kikɛ maaŋ naŋ ta kufu n da menyi.

²⁸ Meeŋ ba menyi kutɔ m ba mɔlga menyi. Ma alɛ beeŋ mur efuliana nɛ n daŋ pesaŋ menyi to n yɔ amo so na, ama m maaŋ mur menyi ere. M maaŋ shin nɛ men wora kulubi nɛ m maŋ gberge menyi kumo be kusoe; ama meeŋ gberge menyi kusoe na nɛ kumo be ekpa so nna. Ma, Enyɛnpe Ebɔrɛ e kaŋɛ na.”