Jɛremaya 44 - EBƆRƐ BE KAWƆL

Enyɛnpe Ebɔrɛ ka beeŋ mur Juda be basa ashi Ijipt be asheŋ

¹ Nɛ Enyɛnpe Ebɔrɛ na malga ma kutɔ a laŋɛ Israɛlebi nɛ b wɔ Ijipt be efuli so be ndegboŋana nɛ baa tre Migdɔl nɛ Taapanes nɛ Mɛmfis nɛ e wɔ efuli na be kelargato be esoso na nɛ bumo nɛ a wɔ efuli na be kelargato be kaseto be kaba so na be kaplɛa so.

² Kusɔ nɛ Enyɛnpetale, Israɛl be Ebɔrɛ na kaŋɛ nde: “Menyi gbagba wu kemur nɛ n shin nɛ k ba Jerusalɛm nɛ Juda be efuli so be ndegboŋana na kikɛ so. Hale nɛ mbre a kraa dese fuloŋ nɛ esa kikɛ maŋ wɔ amo to,

³ ŋkpal manɛ so, bumo be basa daŋ wora asheŋ lubi nna n shin nɛ n nya agbo. B daa lara esarga nna a sa agbir nseŋ shuŋ agbirana nɛ bumo gbagba ŋko bumo nananyɛnana maŋ naŋ shuŋ ŋ ku so.

⁴ Ma alɛ kraa shuŋi ma anya anebiana na menyi kutɔ nɛ baa kaŋɛ menyi fanɛ men sa maa wora asheŋ lubi nɛ ŋ kishi na.

⁵ Ama menyi maa nu ŋko n wɔtɔ lakal kusɔ nɛ baa kaŋɛ na to. Men kini keyige kebaalara esarga a sa agbirana na.

⁶ Amoso nɛ n chulgi ma agbogboŋ n wurge Juda be ndeana nɛ Jerusalɛm be agbembi so nseŋ puga edɛ n lɛ amo so na. A daŋ ba dese fuloŋ nna nseŋ ki mboŋ nɛ amo be asheŋ bee chinchiŋ basa nsaa keta kufu hale nɛ mbre.

⁷ To, ma, Enyɛnpetale, Israɛl be Ebɔrɛ na bee bishi nna fanɛ manɛ so nɛ menyee wora menyi gbagba be amu le be kulubi ere? Menyee sha fanɛ benyɛn nɛ beche nɛ mbia wurbi nɛ mbi popɔrbi kikɛ e mur nna nɛ menyi be esa kama maaŋ naŋ ka a wɔtɔ a?

⁸ Manɛ nna nɛ menyee bunyaŋ agbirana nsaa lara esarga a sa amo ashi Ijipt a wɔtɔ ma agbo to? Menyee wora le nna nɛ men mur menyi be amu, saŋɛ na so durnya to be efuli kama so be basa beeŋ baa keni menyi jiga nsaa ta menyi be ketre a sho basa kɔnɔ a?

⁹ Menyi ka daa wɔ Jerusalɛm nɛ Juda be efuli so na, asheŋ lubi nɛ men nananyɛnana nɛ menyi be bewuraana nɛ bewurcheana daŋ wora na nɛ menyi alɛ gba daa kute to a wora.

¹⁰ Hale naniere gba, menyi be kamoowuso menyi maa sa ma bunyaŋ gba a bishi nɛ menyee wora ma mbraana nɛ keŋini nɛ n ta n sa men nananyɛnana na kasonu.

¹¹ Amoso ma, Enyɛnpetale, Israɛl be Ebɔrɛ na yili kumo fanɛ meeŋ shin nɛ men ji jɛrbi m mur.

¹² Juda be basa nɛ b ka efuli na so ndoŋ nseŋ yili kumo bumo be ŋgbene to fanɛ baaŋ yɔ Ijipt be efuli so na bre, meeŋ shin nɛ bumo kikɛ e mur. Bumo to be benimu nɛ mbia kikɛ beeŋ wu ashi Ijipt ashi kena to ŋko akoŋ beeŋ mɔ bumo. Bumo be asheŋ beeŋ baa chinchiŋ basa nɛ b baa wora bumo eyurto nsaa ta bumo be ketre a sho basa kɔnɔ.

¹³ Kananɛ n ta kena nɛ akoŋ nɛ alɔ ŋ gberge Jerusalɛm to be basa kusoe na, aloŋ nɛ meeŋ gberge bumo nɛ b wɔ Ijipt na kusoe.

¹⁴ Basa nɛ b daŋ ka a wɔ Juda be efuli so nseŋ lar m ba kaa wɔ Ijipt na be ekama maaŋ nya n shile m mɔlga mbe kumu ŋko n ji efute. Bumo to be esa koŋwule gba maaŋ bɛta n yɔ Juda, kakpa nɛ b naa yɛlga kebɛta n yɔ na. Bumo to be basa gbrɛbi ko e naŋ nya m bɛta n yɔ.”

¹⁵ Ndoŋ nna nɛ benyɛn nɛ b nyi bumo be beche ka bee lara esarga a sa agbirana nɛ beche nɛ b daa yil ndoŋ na, n ta Israɛlebi nɛ b daa wɔ Ijipt be kelargato be kaseto be kaba so na nɛ jimaŋ damta na kikɛ boŋ to awɔrso ŋ kaŋɛ ma le:

¹⁶ “An kini kenu kusɔ nɛ fo kaŋɛ anyi ashi Enyɛnpe Ebɔrɛ na be ketre to nna.

¹⁷ Kusɔ kama nɛ an kaŋɛ fanɛ anyeeŋ wora na nɛ anyeeŋ wora. Anyeeŋ lara esarga n sa anyi be kegbirche nɛ e la ebɔrɛso be Ewurche na, nseŋ naŋ ta yabra n to nchu n sa mo, fanɛ kananɛ an nananyɛnana nɛ anyi be ewura nɛ bejuŋkparpoana na daŋ wora ashi Juda be ndeana to nɛ Jerusalɛm be agbembi so na. Kumo be kaman, an daa kɔ ajibi damta nseŋ daŋ dii dama nɛ etɔrɔbi kikɛ malɛ daa maŋ wɔ anyi to.

¹⁸ Ama baŋ yili jemanɛ nɛ an yige kebaalara esarga a sa ebɔrɛso be Ewurche na nseŋ yige kebaata yabra a to nchu a sa mo na, anyi alɛ maŋ naa kɔ shɛŋ nɛ anyi be basa malɛ naŋ wu kena to nɛ akoŋ mɔ beko.”

¹⁹ Kede be kaman nɛ beche na naŋ kaŋɛ le: “Anyi ka daa wɔ Juda be efuli so na an daa bunyaŋ ebɔrɛso be Ewurche na nna nsaa ta yabra nɛ ebodobodo nɛ an lɔŋɛ fanɛ mbe kaduli a lara esarga a sa mo. An kulana malɛ daa nyi kusɔ nɛ an daa wora na nseŋ daa yil anyi be kaman ashi amo kikɛ to nna.”

²⁰ Ndoŋ nna nɛ ma alɛ kaŋɛ jimaŋ na le:

²¹ “Enyɛnpe Ebɔrɛ na daa nyi esarga nɛ menyi nɛ men nananyɛnana nɛ menyi be bewuraana nɛ bejuŋkparpoana na nɛ kasawule na so be basa kikɛ daa lara ashi Juda be ndeana to nɛ Jerusalɛm be agbembi so na be asheŋ.

²² Kabre ŋ ka bee malga ere, menyi be kasawule na dese fuloŋ nɛ esa kikɛ maŋ naa wɔ kumo so. K ki kakpa nɛ kumo be asheŋ bee keta kejijɛ nɛ basa bee ta kumo be ketre a sho basa kɔnɔ ŋkpal Enyɛnpe Ebɔrɛ na ka daa maŋ naŋ nyiti menyi be kumu kpakpaso nɛ asheŋ woraso lubi na so.

²³ Jɛrbi nɛ men ji ere ba nna ŋkpal men ka lara esarga n sa agbirana nseŋ wora kulubi n da Enyɛnpe Ebɔrɛ na so nsaa maŋ wora mbe mbraana nɛ keŋini kikɛ kasonu so.

^24-25 Ade be kaman nɛ ŋ kaŋɛ basa na kikɛ, fɔŋfɔŋ beche na, kusɔ nɛ Enyɛnpetale, Israɛl be Ebɔrɛ na bee kaŋɛ a sa Juda be basa nɛ b wɔ Ijipt na. E yɛ: ‘Menyi nɛ menyi be beche kikɛ bɔ ntaŋ n nase nnɔ n sa ebɔrɛso be Ewurche na. Men nase kɔnɔ fanɛ menyeeŋ lara esarga n sa mo, menyi alɛ wora m bɔlɔ menyi be nnɔ naseso na so. To, kumo be loŋ walɛ! Men baa wora a bɔlɔ menyi be nnɔ naseso na so! Men baa tia menyi be nnɔ na!’

²⁶ Ama naniere men kaŋ asoe n nu kɔnɔ nɛ ma, Enyɛnpe Ebɔrɛ na bee nase ashi ma ketregboŋ na to a sa menyi Israɛlebi kikɛ nɛ men wɔ Ijipt na. M maaŋ naŋ shin nɛ menyi be ekama e naŋ ta ma ketre n nase kɔnɔ a kaŋɛ le: ‘M bɔ Enyɛnpetale Ebɔrɛ nɛ e bee sa ŋkpa na!’

²⁷ Meeŋ shin nɛ menyi maaŋ nyalɛ kikɛ! Menyeeŋ mur. Menyi be galeŋga beeŋ wu kena to ŋko alɔ beeŋ mɔ menyi n ya fo fanɛ menyi to be esa koŋwule gba maaŋ ka.

²⁸ Menyi to be gbrɛbi ko e naŋ nya ŋ gelge luwu nseŋ shi Ijipt m bɛta n yɔ Juda be efuli so. Aloŋ, bumo nɛ baaŋ ji efute na beeŋ pin ma nɛ menyi be mmalga be amo nɛ a la kashenteŋ.

²⁹ Ma, Enyɛnpe Ebɔrɛ na beeŋ ŋini menyi kusɔ ko nɛ k shin nɛ men pin fanɛ meeŋ gberge menyi kusoe nfe nseŋ naŋ pin fanɛ ŋ ka nase kɔnɔ fanɛ meeŋ mur menyi na la kashenteŋ nna.

³⁰ Meeŋ ta Ijipt be ewura Hofra m bɔɔ mo doŋana nɛ baa fin mo nɛ b mɔ na enɔ, fanɛ kananɛ n daŋ ta Juda be ewura Zɛdikaya m bɔɔ Babilɔn be ewura Nebukadneeza nɛ e daa la mo doŋ nseŋ daa fin mo nɛ e mɔ na enɔ na.”