Jɛremaya 43 - EBƆRƐ BE KAWƆL

B ka keta Jɛremaya n yɔ Ijipt be asheŋ

¹ Ŋ ka kaŋɛ basa na kusɔ kama nɛ Enyɛnpe, bumo be Ebɔrɛ na kaŋɛ na n loge,

² nɛ Hoshaya pibinyɛn, Azariya nɛ Kerii pibinyɛn, Johanan nɛ basa kpeŋso na be beko kaŋɛ ma le: “Efɛ nɛ fee ku! Enyɛnpe, anyi be Ebɔrɛ na maŋ shuŋi fo fanɛ fo ba kaŋɛ anyi fanɛ an sa maŋ ya chena Ijipt be efuli so.

³ Neriya pibinyɛn, Baruk e susu fo n wɔtɔ anyi, saŋɛ na so Babilɔnebi na beeŋ nya eleŋ anyi so nseŋ mɔ anyi ŋko ŋ keta anyi n yɔ Babilɔn be efuli so.”

⁴ Amoso Johanan nɛ benapo be benimuana na nɛ basa pɔtɛana na be ekama daa maŋ wora kusɔ nɛ Enyɛnpe Ebɔrɛ kaŋɛ na kasonu n chena Juda be kasawule so.

⁵ Johanan nɛ benapo be benimuana na keta basa nɛ b daŋ pesaŋ to n shile n yɔ efuli pɔtɛana so nseŋ naŋ bɛta m ba Juda be kasawule so na nna n yɔ Ijipt be efuli so.

⁶ Bumo alɛ daŋ naŋ keta ma nɛ Baruk nɛ benyɛn nɛ beche nɛ mbia nɛ ewura Zɛdikaya be mbichesobi nɛ Nebuzaradan nɛ e daa la benapo nɛ baa kuŋ Babilɔn be ewura na be enimu na daŋ yige n sa Gɛdaliya fanɛ e baa keni so na gba nna n ti so n yɔ Ijipt be efuli so.

⁷ B daa maŋ wora Enyɛnpe Ebɔrɛ na kasonu nseŋ daŋ yɔ Ijipt n ya chena kadegboŋ nɛ baa tre Taapanes na.

⁸ Ashi Taapanes ndoŋ nɛ Enyɛnpe Ebɔrɛ na kaŋɛ ma le:

⁹ “Fin ajembu nɛ a shishibi nsaa du peŋgeleŋ peŋgelembi n sulɔ amo n yɔ Ijipt be ewura Fɛɛro be ewurkpa nɛ k wɔ Taapanes be kadegboŋ na to na be kabuna n ya pulgi ebirkesi nɛ b ta m pɔr akpabi a nite so a luri ewurkpa na nseŋ kur m puli ajembu na ndoŋ. Shin nɛ Israɛlebi na be beko e wu fo nɛ fee wora loŋ.

¹⁰ Kumo be kaman nɛ fo kaŋɛ bumo fanɛ ma, Enyɛnpetale, Israɛl be Ebɔrɛ na beeŋ shin nɛ ma kenya, Babilɔn be ewura Nebukadneeza e ba nfe m ba ta mbe kuwurputi n nase ajembu nɛ fo puli ere so nseŋ chena kumo so n ji kuwura bumo so.

¹¹ Ewura Nebukadneeza beeŋ ba kɔ Ijipt be basa kena nseŋ mɔ bumo be basa damta. Alɔ beeŋ mɔ beko nɛ b pɛ beko malɛ ŋ gberge bumo n yɔ Babilɔn be efuli so.

¹² Meeŋ shin nɛ Ijipt be agbirlambuana e ji edɛ nɛ Babilɔn be ewura e chɔɔ agbirana na be ako nseŋ sulɔ ako malɛ n yɔ. Kananɛ mbolpɔkpapo bee gbaŋ gbaŋ mbe piŋi to a buu nɛ shɛŋ maa nya mo n duŋ kumo to na aloŋ nɛ e beeŋ gbaŋgbaŋ Ijipt to fanɛ piŋi nseŋ lar n choŋ nɛ shɛŋ maaŋ wora mo.

¹³ Babilɔn be ewura beeŋ mur kegbirlambu nɛ baa shuŋ epeŋi kumo to ashi kadegboŋ nɛ baa tre Hiliopolis ashi Ijipt be efuli so na nseŋ chɔɔ Ijipt be agbirana be elambuana kikɛ.”