Jɛremaya 41 - EBƆRƐ BE KAWƆL

¹ Kafɛ nɛ Johanan ya ji Gɛdaliya asoe to a laŋɛ kemɔ Ishmaɛl be kaplɛa so na be kufɔl shunusopo to nɛ Ishmaɛl nɛ e la Netaniya pibinyɛn nɛ Ɛlshama mo nanabi nseŋ shi kuwurji be kanaŋ to a la ewura be ekrachi na to be eko na yɔ Mizpa. Mo nɛ basa kudu ko e daŋ yɔ ndoŋ nɛ b ya wu Gɛdaliya nɛ e la gomena na. Jemanɛ nɛ bumo kikɛ daŋ chena a ji na

² nɛ Ishmaɛl nɛ basa kudu nɛ b daa wɔ mo kutɔ na pee etokobi m mɔ Gɛdaliya.

³ Ishmaɛl daŋ mɔ Israɛlebi nɛ Babilɔnebi be benapo nɛ b daa wɔ Gɛdaliya kutɔ ashi Mizpa na nna n ti so.

⁴ Kumo be ŋklade, pɔɛŋ nɛ esa kikɛ pin Gɛdaliya be kemɔ na be asheŋ,

⁵ benyɛn aduburwa ko daŋ shi nde nɛ baa tre Shɛkɛm nɛ Shilo nɛ Samɛria na nna m ba. B daa kɔ ayu nɛ eduwu be ŋkɛ nna a yɔ nɛ b ya sa Enyɛnpe Ebɔrɛ na bɔrɛlambu na to ashi Jerusalɛm. Bumo alɛ daŋ she bumo be ntɔl nna nseŋ kpɛa bumo be asɔbuuso to nseŋ naŋ ku ŋ ku bumo be eyurana, ŋkpal b ka daa shu keeli so.

⁶ Ishmaɛl daŋ wora fanɛ e ka bee shu nna n lar Mizpa to n ya shɛr bumo to. E ka ba fo bumo nɛ e kaŋɛ bumo le: “Men jande, men luri m ba keni Gɛdaliya.”

⁷ B ka baŋ ya ka luri kade na to, epul na to nɛ Ishmaɛl kaŋɛ mbe benapo fanɛ b mɔ bumo nseŋ ta bumo n lɛ ketirbu to.

⁸ Ama pɔɛŋ nɛ b mɔ bumo, basa na to be basa kudu ko daŋ kaŋɛ Ishmaɛl le nna: “Jande, sa maŋ mɔ anyi! An kɔ ayu be yiri yiri nɛ ɔlif be ŋku nɛ mushoŋ nɛ an ta ŋ ŋana kupuŋ to. Amoso e daa maŋ shin nɛ b mɔ bumo ere.

⁹ Ketirbu nɛ Ishmaɛl nɛ mbe benapo daŋ ta basa nɛ b daŋ mɔ n ti Gɛdaliya so n lɛ to na daa la ketirbu nɛ Juda be ewura Asa na daŋ kur a suse bɔrɛchu jemanɛ nɛ Israɛl be kuwurgboŋ nɛ k wɔ kelargato be esoso na be ewura Baasha na daa kɔ mo kena na nna. Ishmaɛl daŋ mɔ basa na nna m bɔlɔ ketirbu na.

¹⁰ Kumo be kaman, nɛ e pɛ ewura Zɛdikaya be mbichesobi nɛ basa nɛ Nebuzaradan, nɛ e la benapo nɛ baa kuŋ Babilɔn be ewura na be enimu na, daŋ yige n sa Gɛdaliya fanɛ e baa keni so na ŋ keta bumo a yɔ Ammɔn be efuli so ashi Lɔr nɛ baa tre Jɔɔdan na be kaba ndoŋ.”

¹¹ Johanan nɛ benapo be benimuana nɛ b wɔ mo kutɔ na ka nu kushuŋ lubi nɛ Ishmaɛl shuŋ na be asheŋ

¹² nɛ b keta bumo be benapo n ju m buu bumo so n ya tu bumo ashi kepa nɛ k wɔ Gibiɔn na.

¹³ Basa nɛ Ishmaɛl pɛ ashi Mizpa a yɔ na ka wu Johanan nɛ benapo be benimuana na nɛ bumo be ŋgbene fuli bumo

¹⁴ nɛ b kilgi a shile a yɔ Johanan kutɔ.

¹⁵ Ama Ishmaɛl nɛ mbe basa na be basa aburwa bre nya n shile n yɔ Ammɔn be kasawule so nɛ Johanan maŋ nya bumo m pɛ.

¹⁶ Ndoŋ nna nɛ Johanan nɛ benapo be benimuana mɔlga beche nɛ mbia nɛ ewurkpa be ekrachi nɛ Ishmaɛl daŋ mɔ Gɛdaliya ashi Mizpa nseŋ pɛ bumo a yɔ na. Nɛ Johanan juŋkpar basa na n shi Gibiɔn

^17-18 a yɔ Ijipt be efuli so. B daa yɔ ndoŋ nna ŋkpal b ka daa ŋana kufu a laŋɛ kusɔ nɛ Babilɔnebi beeŋ wora nɛ b kaŋ pin fanɛ Ishmaɛl mɔ Gɛdaliya nɛ ewura Nebukadneeza daŋ lara fanɛ efuli na so be gomena na be asheŋ. B ka wɔ ekpa to a yɔ Ijipt na nɛ b ya chena kade nɛ baa tre Gɛrut Kimham nɛ k mata Bɛtlɛhɛm na n wushi.