Jɛremaya 40 - EBƆRƐ BE KAWƆL

B ka lara Jɛremaya kabuti to be asheŋ

¹ Nebuzaradan nɛ e la benapo nɛ baa kuŋ Babilɔn be ewura na be enimu na ka sɔ ma n yige ashi Rama na be kaman nɛ Enyɛnpe Ebɔrɛ na malga ma kutɔ. B daŋ chɛ ma ŋgbɛlɛbi nna nseŋ daŋ keta ma nɛ Juda nɛ Jerusalɛm be basa nɛ b pɛ a yɔ Babilɔn be efuli so na nna n yɔ ndoŋ.

² Nebuzaradan daŋ keta ma nna n lar ekarso nseŋ ya kaŋɛ ma le: “Enyɛnpe fo Ebɔrɛ na daŋ kpele fo basa kusoe fanɛ e beeŋ mur kasawule ere,

³ naniere e wora kusɔ nɛ e kaŋɛ e beeŋ wora na. Ade kikɛ malɛ wora nna ŋkpal fo basa ka wora alubi n da mo ere Enyɛnpe Ebɔrɛ na so nsaa maŋ wora mo kasonu so.

⁴ To, kabre mee lara ŋgbɛlɛbi ere fo enɔana to nna nɛ fo nya fo kumu. Nɛ fee sha ketu ma n yɔ Babilɔn be efuli so, feeŋ tiŋ n yɔ nɛ m baa keni fo so. Nɛ fo maa sha keyɔ malɛ, feeŋ tiŋ ŋ kini keyɔ. Efuli ere kikɛ dese nna n sa fo nɛ fo lara kusɔ nɛ fee sha. Feeŋ tiŋ n yɔ kaplɛkama nɛ fee sha.”

⁵ Pɔɛŋ nɛ ŋ kilgi n yɔ, nɛ Nebuzaradan naŋ kaŋɛ le: “Bɛta n yɔ Ahikam pibinyɛn, Gɛdaliya nɛ mo nananyɛn daa la Shafan na kutɔ. Mo nɛ Babilɔn be Ewura Nebukadneeza ta ŋ ki Juda be ndeana so be gomena. Feeŋ tiŋ n ya tu mo a wɔ basa na to, ŋko feeŋ tiŋ n yɔ kaplɛkama nɛ fee sha.” Kumo be kaman nɛ e sa ma ŋkɛ ko nɛ ajibi nɛ meeŋ ta a yɔ nseŋ to ma ekpa fanɛ m baa yɔ.

⁶ Nɛ n yɔ Gɛmaliya kutɔ ashi kade nɛ baa tre Mizpa na nseŋ ya kaa wɔ basa nɛ b ka kasawule na so na to.

B ka mɔ Gɛmaliya be asheŋ

⁷ Juda be benapo na nɛ bumo be benimuana na be beko bre daŋ maŋ shuli n ta bumo be amu n sa Babilɔnebi na nseŋ daŋ shile n luri kupuŋ to. B daŋ nu fanɛ Babilɔn be ewura ta Gɛdaliya nna ŋ ki gomena n chena kasawule na so nɛ e baa keni kasawule na so be betirpo gbagba nɛ b maŋ keta n yɔ Babilɔn be efuli so na so.

⁸ Amoso Netaniya pibinyɛn, Ishmaɛl nɛ Kariya be bibinyɛn, Johanan nɛ Jonatan nɛ Tanhumɛf pibinyɛn, Seria nɛ Efai be mbinyɛnsobi nɛ b shi Netofa na nɛ Jezaniya nɛ mo alɛ shi Maaka nɛ bumo be benapo yɔ Gɛdaliya kutɔ ashi Mizpa.

⁹ Ndoŋ nna nɛ Gɛdaliya kaŋɛ bumo le: “Ma e kaŋɛ menyi na fanɛ a maŋ daga fanɛ men tɔr kapɔŋ n sa Babilɔnebi na. Menyeeŋ tiŋ n chena nfe nsaa shuŋ Babilɔn be ewura nɛ asheŋ e nite nɛnɛ n sa menyi.

¹⁰ Ŋ gbagba beeŋ chena Mizpa nfe, saŋɛ na so Babilɔnebi na ya ba nfe meeŋ yili menyi be katelamu ashi bumo be anishito. Menyeeŋ tiŋ m bɛta n yɔ menyi be ndeana to n ya kaa chala eyabra nɛ asɔrsoana nɛ ɔlif be ŋkuana a yili.”

¹¹ Israɛlebi nɛ b daa wɔ Mowab nɛ Ammɔn nɛ Edɔm be nsawule so nɛ efuli pɔtɛana so na ka nu fanɛ Babilɔn be ewura yige Israɛlebi na be beko ashi Juda be efuli so nseŋ ta Gɛdaliya ŋ ki gomena,

¹² nɛ b lar mboŋ nɛ b daŋ pesaŋ to n yɔ na m bɛta m ba Juda be efuli so. B daŋ ba Gɛdaliya kutɔ ashi Mizpa nna m ba chɛ to nɛ b chala eyabra nɛ asɔrso damta nɛ a chɔ nfɛ nɛ e choŋ na peya.

B ka mɔ Gɛdaliya be asheŋ

¹³ Kede be kaman nɛ Johanan nɛ benapo nɛ b daŋ kini ketɔr kapɔŋ nsaa wɔ kupuŋ to na be benimuana na ba Gɛdaliya kutɔ ashi Mizpa

¹⁴ nseŋ ba kaŋɛ mo le: “Fo maŋ nyi fanɛ Ammɔn be ewura Baalis shuŋi Ishmaɛl nna fanɛ e ba mɔ fo a?” Ama Gɛdaliya daa maŋ yirda kumo.

¹⁵ Ndoŋ nna nɛ Johanan nawule yɔ Gɛdaliya kutɔ n ya kaŋɛ mo le: “Shin nɛ n ya mɔ Ishmaɛl nɛ esa kikɛ maaŋ pin esa nɛ e wora loŋ. Basa gbrɛbi ko e ka Juda be efuli so, ama fo nɛ bumo alɛ kikɛ baa keni na. Nɛ fo baŋ wu baaŋ pesaŋ to ŋko n wu gba.”

¹⁶ Ama kusɔ nɛ Gɛdaliya daŋ kaŋɛ e la fanɛ: “Sa maŋ mɔ mo. Kusɔ nɛ fo kaŋɛ a laŋɛ Ishmaɛl be kaplɛa so na maŋ la kashenteŋ!”