Jɛremaya 4 - EBƆRƐ BE KAWƆL

Israɛl be basa be kebɛta m ba Enyɛnpe Ebɔrɛ na kutɔ be asheŋ

¹ Nɛ Enyɛnpe Ebɔrɛ yɛ: “Israɛl be basa, nɛ fanɛ menyeeŋ bɛta kashenteŋto, men bɛta m ba ŋ kutɔ. Nɛ fanɛ menyeeŋ ji kashenteŋ n sa ma nseŋ yige kebaashuŋ agbirana nɛ ŋ kishi amo be asheŋ na,

² kumo ere menyeeŋ tiŋ n ta ma ketre n nase nnɔ. Kumo be kaman nɛ efuliana na be basa e kpaŋ ma nɛ ma alɛ e nɛfa bumo.”

³ Kede be kaman nɛ Enyɛnpe Ebɔrɛ na kaŋɛ Juda be efuli so nɛ Jerusalɛm be kadegboŋ na to be basa le: “Menyi be ŋgbene ki kpakpa nna fanɛ kasawule nɛ b maŋ naŋ dɔ kumo so ŋ ku so nɛ e du fanɛ kakpa nɛ ewi kɔr so. Amoso men lar menyi be ŋgbene kpakpaso na to.

⁴ Men ta menyi be ŋgbene kikɛ m bɛ ma, Enyɛnpe Ebɔrɛ na nɛ menyi be kɔnɔkoŋwule be ŋkre na so. Nɛ menyi Juda nɛ Jerusalɛm be basa maŋ wora loŋ, ma kanya agbo beeŋ suse so fanɛ edɛ ŋkpal asheŋ lubi nɛ men wora so, nɛ esa kama maaŋ tiŋ n duŋ kumo.”

Kemur nɛ k bee ba Juda so be asheŋ

⁵ Men foŋ kabel ashi kasawule na kikɛ so! Men ponte awɔrso nɛ k baa nu to nɛnɛ! Men kaŋɛ Juda nɛ Jerusalɛm be basa fanɛ b shile n yɔ ndegboŋ nɛ b pɔr egbal ŋ kulti amo na to.

⁶ B ŋini ekpa nɛ k bee yɔ Jerusalɛm be kadegboŋ na to a yɔ! Men shile m mɔlga menyi be amu nsaa maŋ wora epel! Ŋkpal manɛ so, Enyɛnpe Ebɔrɛ na beeŋ shin nɛ kemur cheche gboŋgboŋi e shi kelargato be esoso m ba.

⁷ Kananɛ buluŋ bee shi kumo be eŋanakpa a lar na nɛ bekɔpo nɛ baa mur efuliana na lar a ba. Baa ba nɛ b ba mur Juda nna nɛ kumo be ndegboŋ e ki alambure nɛ esa kikɛ maaŋ naa wɔ amo to.

⁸ Amoso men ta nli be asɔbuuso m buu nsaa shu a boŋ to, ŋkpal manɛ so, Enyɛnpe Ebɔrɛ na be kanya agbogboŋ maaŋ wushi Juda be efuli so be basa so.

⁹ Kede be kaman, nɛ Enyɛnpe Ebɔrɛ na naŋ kaŋɛ le: “Loŋ be kachɛ na kaŋ fo, kɔnɔ beeŋ mɔ bewuraana nɛ benimuana na nɛ bɔrɛmatapoana na nɛ anebiana na nɛ kufu e pɛ bumo nɛ b baa chicha.”

¹⁰ Ndoŋ nna nɛ ma, Jɛremaya, kaŋɛ le: “Enyɛnpetale Ebɔrɛ, kumo ere k du fanɛ fo fule Jerusalɛm be basa na nna na. Fo yɛ kayurwushi beeŋ baa wɔtɔ, ama naniere tokobi e yuu bumo be elɔŋtɔr so na.

¹¹ Jemanɛ ko bee ba nɛ Jerusalɛm to be basa e nu fanɛ afu tushiso ko bee shi keshishɛrsawule so a ber a ba bumo so. K maaŋ baa la afu nɛ k bee chela a ber amimi a lɛ na nna.

¹² Afu nɛ Enyɛnpe Ebɔrɛ na beeŋ shin nɛ k chela na beeŋ baa kɔ eleŋ ga, ŋkpal manɛ so mo gbagba be demuji nɛ e kɔ a ba mbe basa so.

Bedoŋ ka ba kulti Juda n wɔtɔ be asheŋ

¹³ Men keni, edoŋ be benapo e naa ba fanɛ awɔlpa na. Bumo be kena to be egbaŋɛturko bee shile nna fanɛ kawuliwuli nɛ bumo be egbaŋɛ malɛ bee shile a chɔ kusore ka bee firgi. To, an wu m mur nna na!

¹⁴ Jerusalɛm to ebi, men lara asheŋ lubi men be ŋgbene to nseŋ yige nfɛra lubi be kebaafɛ, saŋɛ na so menyi beeŋ nya kumɔlga.

¹⁵ Mbɔ shi Dan be kadegboŋ to nɛ Efrayim be abeesawule nɛ e wɔ kelargato be esoso be kaba so a ber baru lubi be kebomboŋ a ba.

¹⁶ Baa ba nna nɛ b ba kaŋɛ efuli pɔtɛana na kusɔ ko nseŋ kpele Jerusalɛm to ebi kusoe fanɛ bumo doŋana shi efuli wɔfɔ wɔfɔ a ba. Bedoŋ ere bee ponte a malga a gbiti Juda be ndegboŋana nna

¹⁷ nsaa ba nɛ b ba kulti Jerusalɛm ŋ kɔ kumo kena. Ŋkpal manɛ so, basa na kini Enyɛnpe Ebɔrɛ na nseŋ lar mbe kaman. Ma, Enyɛnpe Ebɔrɛ e kaŋɛ na.”

¹⁸ Menyi Juda be basa be kebaawɔtɔ nɛ men wɔ kumo to na e bar le menyi so na. Menyi be asheŋ lubi e shin nɛ menyee ji awurfoŋ na nɛ k wora fanɛ b ka ta kasaŋɛ n da menyi be ŋgbene to na.

Jɛremaya ka ku kasogberge be bɔrɛdare be asheŋ

¹⁹ Ebesa nɛ k wɔ ma to na shi ga! M maaŋ tiŋ ŋ keta kumo! Ma kagbene bee ku ma alegaiso nna! Ma alɛ maaŋ tiŋ n lo ma kɔnɔ to. Ŋkpal manɛ so, mee nu mbel ka bee shu nseŋ naa nu kena be awɔr nna.

²⁰ Jemanɛ kikɛ nɛ anyi nɛ edoŋ na baa kɔ kena, mee wu fanɛ e bee kɔ a pɔɔ anyi so nna nsaa mur kusɔ kama ashi kasawule na so. Epul to nɛ e mur ŋ gbagba be laŋ.

²¹ Jemanɛ mo, nɛ m maaŋ naa wu kena ka bee kɔ, ŋko kena be mbel be kushu?

²² Ndoŋ nna nɛ Enyɛnpe Ebɔrɛ na kaŋɛ le: “Ma basa maŋ kɔ nfɛra, bumo alɛ maŋ naa nyi ma. B du fanɛ mbia wulpo nɛ b maa pin asheŋ to nna. Asheŋ lubi be kebaawora nɛ b nyi ga, ama asheŋ lela bre b maŋ nyi amo be kewora.”

Jɛremaya ka ku kemur be bɔrɛdare be asheŋ

²³ Ade be kaman nɛ ŋ to kenishi ŋ keni ŋ kulti, nseŋ wu fanɛ edimɛdi nɛ asɔbɔya kikɛ maŋ naa wɔtɔ. Nɛ n naŋ to kenishi ŋ keni awɔlpa so, nɛ kefulto kikɛ maŋ wɔ kumo so.

²⁴ Kumo be kaman nɛ ŋ keni n wu abeegboŋ ka bee gbuŋgbuŋ to, nɛ abeebi malɛ bee laŋte a yɔ a ba.

²⁵ Basa daa maŋ naa wɔtɔ; hale mbuibi kikɛ gba firgi n choŋ.

²⁶ Kasawule lela nɛ k bee wora adɔjibi na ki keshishɛrsawule nɛ ndegboŋana na kikɛ ki alambure. Ŋkpal manɛ so, Enyɛnpe Ebɔrɛ daŋ nya agbo ga nna.

²⁷ Nɛ Enyɛnpe Ebɔrɛ na kaŋɛ le: “Kasawule na kikɛ beeŋ mur a dese fuloŋ, ama ma alɛ maaŋ mur kumo cheche.

²⁸ Durnya to beeŋ ki fanɛ b kaa bee shu keeli na, nɛ esoso e ki m biri to. Ŋkpal manɛ so, Enyɛnpe Ebɔrɛ na teŋ malga, mo alɛ maaŋ chɛrga mbe nfɛra n leŋi kamalga na. E teŋ yili kusɔ nɛ e beeŋ wora, mo alɛ maaŋ yige kusɔ nɛ e yili na be kewora.

²⁹ Kade kama to be basa ka baŋ nu egbaŋɛ diipoana nɛ basa nɛ b kɔ ata a kɔ be asheŋ baŋ lara aya fuful n shile. Beko beeŋ shile n yɔ kupo to, nɛ beko malɛ e shile n ya ŋana afaltagboŋ to. Kade kikɛ beeŋ dese fuloŋ, nɛ esa kikɛ maaŋ naa wɔ amo to.

³⁰ Jerusalɛmebi, menyi be kasawule mur cheche nna na. Ama men kraa wora asheŋ nna a fin fanɛ men doŋana e baa sha menyi; fanɛ kananɛ sakaleche bee ji kebita a fin beshapo na. Ama kumo alɛ maŋ chɛ menyi to kikɛ, ŋkpal manɛ so menyi be beshapo na bee fin menyi nɛ b mɔ nna.

³¹ N nu esa ko ka bee tekeŋto fanɛ eche nɛ kakurge ta na, nseŋ naŋ nu kushu fanɛ eche ka bee kurge mo pibi sososo. Jerusalɛm e daa fute a gben nsaa shu a lɛ mbre a kaŋɛ le: ‘Mee wu nna na! Bedoŋ e naa ba nɛ b ba mɔ ma!.’ ”