Jɛremaya 39 - EBƆRƐ BE KAWƆL

Jerusalɛm ka kɔ n tɔr be asheŋ

^1-3 Zɛdikaya ka ji Juda be efuli so be kuwura be kafɛ kpanusopo to be kufɔl kudusopo to nɛ Babilɔn be ewura Nebukadneeza nɛ mbe benapo kikɛ fara a kɔ Jerusalɛm kena. Beeŋ wora fanɛ kafɛ nɛ bargato nɛ b daŋ kulti kadegboŋ na n wɔtɔ. Ewura Zɛdikaya ka ji kuwura be kafɛ kudukakosopo to be kufɔl nasopo to be kachɛ kpanusopo na nɛ b bure egbalana na n luri Jerusalɛm to. B ka kɔ n suge Jerusalɛm na be kaman, nɛ Babilɔn be ewura Nebukadneeza be benimugboŋana yili bumo be mbɛ n chena so ashi Nferinto be Kabunagboŋ na ase a ŋini fanɛ bumo e wɔ kadegboŋ na a keni so. Benimugboŋana na e daa la Nɛgal Shareza nɛ e shi Samga nɛ Nebo Sasekim nɛ e la krachigboŋ nimuso, n ta Nɛgal Shareza ko nɛ mo alɛ gba la krachi nimuso nɛ Babilɔn be ewura be ekrachi pɔtɛana kikɛ.

⁴ Ewura Zɛdikaya nɛ mbe esoji ka wu kusɔ nɛ k bee wora na nɛ b wora ania fanɛ baaŋ lar kadegboŋ na to kanyɛso n shile m mɔlga bumo be amu. Ewura be kudɔbi na to nɛ b daŋ bɔla n ya bɔla kabunabi nɛ k daa wɔ kadegboŋ na be egbal anyɔ na be nferinto na to n sɔ ekpa nɛ k bee yɔ Jɔɔdan be Lɔrgboŋ na be ketaŋɛ to be kaba so na a shile a mɔlga bumo be amu.

⁵ Ama Babilɔn be benapo na daŋ ju bumo nna n ya pɛ ewura Zɛdikaya a mata keplasawule nɛ k mata kade nɛ baa tre Jɛriko na, nɛ mbe benapo kikɛ pesaŋ to n shile ŋ ka mo. Kumo be kaman nɛ b keta mo n yɔ ewura Nebukadneeza kutɔ ashi kade nɛ baa tre Ribla ashi Hamaf be kebonfu to na. Ndoŋ nna nɛ ewura Nebukadneeza ji mo demu ndoŋ nseŋ kaŋɛ fanɛ e ji n tɔr.

⁶ Kumo be kaman nɛ e mɔ ewura Zɛdikaya be mbinyɛnsobi nɛ Juda be benimuana na nɛ e yil a keni.

⁷ Ade be kaman nɛ e shin nɛ b chule ewura Zɛdikaya be anishi nseŋ chɛ mo ŋgbɛlɛbi n ta mo n yɔ Babilɔn be efuli so.

⁸ Pɔɛŋ nɛ le ere kikɛ wora na nɛ Babilɔnebi na teŋ nya edɛ n wɔtɔ Jerusalɛm to be ewurkpa nɛ basa na be nwu kikɛ to a chɔɔ nsaa da amo be egbalana a lɛ.

⁹ Kumo be lalaloge, nɛ Nebuzaradan nɛ e la benapo nɛ baa kuŋ ewura na be enimu na, pɛ basa nɛ b kraa wɔ kadegboŋ na to na nɛ bekama nɛ b daŋ shile n ya buu bumo na ŋ keta bumo kikɛ n yɔ Babilɔn be efuli so fanɛ anya.

¹⁰ Betirpo gbagba nɛ b maŋ kɔ shɛŋ na nawule nɛ e daŋ yige Juda be kasawule so nseŋ sa bumo adɔsawule nɛ ndibi sɔrso be adɔ.

B ka lara Jɛremaya kabuti to be asheŋ

¹¹ Ade kikɛ be kaman nɛ ewura Nebukadneeza kaŋɛ Nebuzaradan le:

¹² “Yɔ n ya fin Jɛremaya nsaa keni mo so nɛnɛ. Sa maŋ kaŋ tɔrɔ mo, ama baa wora kusɔ kama nɛ e bee sha a sa mo.”

¹³ Nɛ Nebuzaradan nɛ Nebushazban nɛ Nɛgal Shareza nɛ b la benimugboŋana nɛ Babilɔn be ewura be benimuana nɛ b ka na kikɛ,

¹⁴ shin nɛ b ya lara ma kabuti to ashi ewurkpa m ba. Ahikam pibinyɛn, Gɛdaliya nɛ mo nana daa la Shafan na nɛ b daŋ shin nɛ e keni ma so nɛ n ya fo epe nɛ alenfia. B daŋ yige ma ŋ gbagba be basa to nna ashi Juda be efuli so.

Tama nɛ k wɔtɔ n sa Ebedmɛlɛk na be asheŋ

¹⁵ Jemanɛ nɛ n daa wɔ kabuti to ashi ewurkpa na, Enyɛnpe Ebɔrɛ na daŋ kaŋɛ ma nna fanɛ

¹⁶ ŋ kaŋɛ Ebedmɛlɛk nɛ e shi Itiopia be efuli so na fanɛ mo Enyɛnpetale, Israɛl be Ebɔrɛ na yɛ: “Kananɛ ŋ kaŋɛ fanɛ meeŋ shin nɛ kemur nɛ mannɛ kedamaya e ba kadegboŋ ere so na, nɛ meeŋ wora. Nɛ kumo be jemanɛ kaŋ fo malɛ feeŋ baa wɔ ŋkpa to n wu kumo.

¹⁷ Ama ma, Enyɛnpe Ebɔrɛ na beeŋ kuŋ fo loŋ be kachɛ na nɛ b sa maŋ ta fo n sa Juda be benimuana nɛ fee ŋana na.

¹⁸ Meeŋ mɔlga fo nɛ b sa maŋ mɔ fo. Feeŋ nya ekpa n shile m mɔlga fo kumu ŋkpal fo ka ta fo yirda n wɔtɔ ma to so. Ma, Enyɛnpe Ebɔrɛ e kaŋɛ na.”