Jɛremaya 38 - EBƆRƐ BE KAWƆL

B ka ta Jɛremaya n wɔtɔ ketirbu wɔlso to be asheŋ

¹ Kachako nɛ Shefatiya nɛ Gɛdaliya nɛ Jehukal nɛ Pashɔ nu ŋ ka bee kaŋɛ basa na fanɛ

² Enyɛnpe Ebɔrɛ na yɛ: “Kena ŋko akoŋ ŋko kulɔ beeŋ mɔ esa kama nɛ e kraa wɔ Jerusalɛm to. Ama bekama nɛ baŋ lar n ya ta bumo be amu m bɔɔ Babilɔnebi na enɔ bre maaŋ wu. Abaanaaworasheŋ bumo ere beeŋ ji efute.”

³ Ma alɛ daa naa kaŋɛ bumo fanɛ Enyɛnpe Ebɔrɛ na kaŋɛ fanɛ e beeŋ shin nɛ Babilɔn be benapo e kɔ n sɔ kadegboŋ na nna.

⁴ Ndoŋ nna nɛ ewurkpa be ekrachi na yɔ ewura kutɔ n ya kaŋɛ mo le: “Kanyɛn ere daga luwu. Kananɛ e bee malga ere beeŋ tiŋ n shin nɛ esoji na e pɔ aba nsaa maŋ naa kɔ kenyɛn. Kumo kesheŋ koŋwule na nɛ e bee wora ekama nɛ e wɔ kadegboŋ na to na. Mannɛ fanɛ basa na be kechɛto so nɛ e bee wora loŋ, ama e bee tɔrɔ bumo nna na.”

⁵ Nɛ ewura Zɛdikaya kaŋɛ: “To, kumo ere men wora mo kusɔ kama nɛ menyee sha. M maaŋ tiŋ ŋ kuŋ menyi ekpa.”

⁶ Ndoŋ nna nɛ b chɛ ma efɔl nseŋ pɛ kumo to n ta ma n wɔtɔ ewura pibinyɛn nɛ baa tre Malkiya na be ketirbu nɛ k daa wɔ ewurkpa be kelɔnɛ so na to. Nchu daa maŋ wɔ ketirbu na to ama edepɔ nawule e daa wɔtɔ nɛ n nia amo to.

⁷ Ndoŋ nna nɛ Itiopia be efuli so be kanyɛn ko nɛ baa tre mo Ebedmɛlɛk, nɛ e la ndoŋ be ewurkpa be ekrachi to be eko, nu fanɛ b ta ma n wɔtɔ ketirbu na to. Loŋ be jemanɛ na nɛ ewura Zɛdikaya nɛ mbe ewurkpa be ekrachi bee to jina ashi Bɛnjamin be Kabunagboŋ na ase.

⁸ Nɛ Ebedmɛlɛk yɔ ndoŋ n ya kaŋɛ ewura na le:

⁹ “Yiramu, kusɔ nɛ basa ere wora ere maŋ walɛ. B ta Jɛremaya n wɔtɔ ketirbu to, kakpa nɛ akoŋ beeŋ mɔ mo, ŋkpal manɛ so, ajibi kikɛ maŋ naa wɔ kadegboŋ na to.”

¹⁰ Ndoŋ nna nɛ ewura na sa Ebedmɛlɛk ekpa fanɛ e keta basa asa n ti mbe kumu so nɛ b ya gberge ma n lara ketirbu na to pɔɛŋ nɛ n wu.

¹¹ Nɛ Ebedmɛlɛk nɛ basa asa na yɔ ewurkpa be kakpa nɛ baa yili asɔ na n ya nya asɔbuuso nɛ kpɛa to nɛ b ta efɔl n chɛ amo nseŋ yɔɔ amo to n sa ma ketirbu na to.

¹² Kumo be kaman nɛ e kaŋɛ ma fanɛ n ta achɛbi na n ta ma aba to, saŋɛ na so efɔl na maaŋ doro ma. Ndoŋ nna nɛ n wora loŋ,

¹³ nɛ b gberge ma n lar ketirbu na to. Kumo be kaman nɛ b ta ma n yɔ ewurkpa be bekumpo na be kakpa nɛ baa ti basa na.

Ewura Zɛdikaya ka tre Jɛremaya m bishi mo asheŋ be asheŋ

¹⁴ Ade kikɛ be kaman, kachako nɛ Ewura Zɛdikaya shuŋi fanɛ b ya bar ma mo kutɔ ashi bɔrɛlambu na be kabuna sasopo na ase. Ndoŋ nna nɛ e kaŋɛ ma le: “Mee sha kebishi fo kusɔ ko nna. Ma alɛ bee sha fo kaŋɛ kashenteŋ nɛ k wɔ kumo to kikɛ.”

¹⁵ Nɛ ŋ kaŋɛ mo le: “Nɛ ŋ kaŋɛ fo kashenteŋ na, feeŋ shin nɛ b mɔ ma. Nɛ ma alɛ naŋ ji fo asoe to gba, fo maaŋ nu n sa ma.”

¹⁶ Nɛ Ewura Zɛdikaya nase kɔnɔ ashiri to ŋ kaŋɛ ma le: “M bɔ Ebɔrɛ nɛ e sa anyi ŋkpa ere fanɛ m maaŋ mɔ fo ŋko n ta fo n sa basa nɛ baa fin fo kemɔ na nɛ b mɔ.”

¹⁷ Ndoŋ nna nɛ ŋ kaŋɛ ewura Zɛdikaya kusɔ nɛ Enyɛnpetale, Israɛl be Ebɔrɛ na kaŋɛ. E yɛ: “Nɛ fanɛ fo shuli n ta fo kumu n ya bɔɔ Babilɔn be ewura be benimuana na enɔ, feeŋ ji ŋkpa nɛ b maaŋ naŋ chɔɔ kadegboŋ ere n lɛ. Fo nɛ fo kanaŋ kikɛ beeŋ nya menyi be amu.

¹⁸ Ama nɛ fo maŋ shuli n sɔ kapɔshi nseŋ tɔr n sa bumo, meeŋ ta kadegboŋ ere m bɔɔ Babilɔnebi na enɔ nɛ b chɔɔ kumo n lɛ, fo alɛ maaŋ nya n shile bumo.”

¹⁹ Nɛ ewura Zɛdikaya kaŋɛ ma le: “Anyi gbagba be basa nɛ b shile n ya ti Babilɔnebi na so na nɛ mee ŋana. Ashere Babilɔnebi na beeŋ ta ma n sa bumo nɛ b kɔrfɛ ma.”

²⁰ Ndoŋ nna nɛ ŋ kaŋɛ mo le: “B maaŋ ta fo n sa bumo. Mee kule fo nna nɛ fo wora Enyɛnpe Ebɔrɛ na kasonu, saŋɛ na so asheŋ beeŋ nite nɛnɛ nɛ fo alɛ e nya fo ŋkpa.

²¹ Ama Enyɛnpe Ebɔrɛ na teŋ n lara kusɔ nɛ k beeŋ wora ŋ ŋini ma bɔrɛdare to nɛ fo kini kesɔ kapɔshi nna na.

²² Ashi bɔrɛdare na to n wu beche ka lar Juda be ewurkpa a yɔ Babilɔn be ewura be benimuana na kutɔ. Kusɔ nɛ b daa kaŋɛ jemanɛ nɛ b daa yɔ na nde: ‘Ewura mo teri kpakpasoana e fule mo, nɛ e bɛ bumo be kɔnɔ so. Nɛ naniere mbe aya nia edepɔ to, nɛ mo teriana na shile mo.’ ”

²³ Kumo be kaman nɛ n naŋ kaŋɛ le: “Baaŋ keta beche nɛ mbia kikɛ n ya sa Babilɔnebi na, nɛ fo gbagba maaŋ nya n shile m mɔlga fo kumu. Babilɔn be ewura beeŋ pɛ fo kenya nseŋ chɔɔ Jerusalɛm n lɛ.”

²⁴ Nɛ Ewura Zɛdikaya malɛ kaŋɛ: “Sa maŋ shin nɛ esa kikɛ e nu ma nɛ fo be kelijima ere, nɛ mannɛ aloŋ feeŋ paŋ fo ŋkpa.

²⁵ Nɛ ewurkpa be ekrachi na nu fanɛ ma nɛ fo ber kelijima, baaŋ bishi fo kusɔ nɛ an malga. Baaŋ nase kɔnɔ fanɛ nɛ fo kaŋɛ bumo kusɔ kama gba, b maaŋ mɔ fo.

²⁶ Nɛ k kaŋ ba loŋ fo ere kaŋɛ bumo fanɛ fo baa kule ma nna fanɛ n sa maŋ naŋ yɛr fo kabuti to nɛ fo ya wu ndoŋ.”

²⁷ Kumo be kaman nɛ ekrachi na ba bishi ma, nɛ ŋ kaŋɛ bumo kusɔ nɛ ewura na kaŋɛ na gbagba chap. B daa maŋ naŋ tiŋ nɛ b wora shɛŋ, ŋkpal manɛ so, esa kama daa maŋ nu anyi be kelijima na.

²⁸ Nɛ b yige ma ewurkpa be bekumpo be kakpa na n ya fo kachɛ nɛ b ba kɔ n pɔɔ Jerusalɛm so n sɔ kumo na.