Jɛremaya 37 - EBƆRƐ BE KAWƆL

Ewura Zɛdikaya ka kaŋɛ Jɛremaya fanɛ e kule Ebɔrɛ be asheŋ

¹ Babilɔn be ewura Nebukadneeza daŋ lara ewura Jehowakim pibinyɛn Jehowachin kuwura to nna nseŋ buu ewura Josaya pibinyɛn, Zɛdikaya Juda be efuli so be kuwura.

² Ama ewura Zɛdikaya ŋko mbe benimuana na ŋko Juda be efuli so be esa kikɛ daa maŋ wora kubɔya nɛ Enyɛnpe Ebɔrɛ daŋ ta sa ma na kasonu.

³ Ewura Zɛdikaya daŋ shuŋi Shelemaya pibinyɛn, Jehukal nɛ bɔrɛmatapo Zefanaiya nɛ e la Maaseia pibinyɛn na nna fanɛ b ba kaŋɛ ma fanɛ n yili mbe katelamu to ŋ kule Enyɛnpe, anyi be Ebɔrɛ na n sa mo.

⁴ Loŋ be jemanɛ na nɛ m maŋ naŋ yɔ kabuti to nseŋ daa wɔ basa na to a yɔ a ba kananɛ mee sha.

⁵ Babilɔn be efuli so be benapo daŋ kre kena nna m ba kulti Jerusalɛm n wɔtɔ, ama b ka nu fanɛ Ijipt be efuli so be benapo teŋ lar bumo be efuli so a ba na nɛ b bɛta bumo be ayamu so.

⁶ Kumo be kaman nɛ Enyɛnpe, anyi be Ebɔrɛ na naŋ kaŋɛ ma fanɛ

⁷ ŋ kaŋɛ ewura Zɛdikaya le: “Ijipt be efuli so be benapo bee ba nɛ b ba chɛ menyi to, ama baaŋ bɛta n yɔ epe.

⁸ Saŋɛ na so Babilɔnebi na beeŋ naŋ bɛta m ba kɔ m pɔɔ Jerusalɛm so nseŋ chɔɔ kumo n lɛ.

⁹ Ma, Enyɛnpe Ebɔrɛ na bee kpele menyi kusoe nna fanɛ men sa maa fɛ fanɛ Babilɔnebi na maaŋ naŋ bɛta m ba, ŋkpal manɛ so, baaŋ bɛta m ba.

¹⁰ Hale nɛ men tiŋ ŋ kɔ m pɔɔ Babilɔn be benapo na kikɛ so gba, bumo be basa nɛ b doro a dese bumo be ewajɛbu to kraa beeŋ koso n chɔɔ kadegboŋ ere n lɛ.”

¹¹ Babilɔn be benapo na daŋ shi Jerusalɛm m bɛta bumo be ayamu so nna ŋkpal Ijiptebi na ka daa ba so.

¹² Ma ere daŋ lar Jerusalɛm to nna a yɔ Bɛnjamin be yiri be kebonfu to nɛ n ya sɔ ma kachige nɛ k la ma kanaŋ to be kapetɛ na.

¹³ Ama jemanɛ nɛ n ya fo Bɛnjamin be Kabunagboŋ na ase na, nɛ kanyɛn nɛ baa tre Irija nɛ e la Shelemaya pibinyɛn nsaa keni esoji nɛ b daa keni kabunagboŋ na so na pɛ ma nseŋ kuŋ ma ekpa. Kumo be kaman nɛ e kaŋɛ ma le: “Fee sha keshile n ya ti Babilɔnebi na so nna na!”

¹⁴ Ndoŋ nna nɛ ŋ kaŋɛ: “Manɛ aloŋ nna! Maa shile nna nɛ n ya ti Babilɔnebi na so.” Ama Irija maŋ nu kusɔ nɛ ŋ kaŋɛ na. E daŋ pɛ ma nna nseŋ ta ma n ya sa ewurkpa be ekrachi na.

¹⁵ B daŋ nya agbo ga nna n wɔtɔ ma nseŋ kaŋɛ esoji na fanɛ b bri ma. Kumo be kaman nɛ b keta ma n yɔ Jonatan nɛ e la ewurkpa be ekrachi na be eko be laŋ nɛ b ta ŋ ki kabuti be kakpa na n ya ti ebu.

¹⁶ Kasawule to be ebubi ko to nɛ b daŋ ta ma n wɔtɔ nɛ n daŋ chɛr ndoŋ ga.

¹⁷ Ndoŋ nna nɛ ewura Zɛdikaya shuŋi fanɛ b ya bar ma mo kutɔ. Ma nɛ mo nawule ka daa la na nɛ e bishi ma le: “Kubɔya ko wɔtɔ nɛ k shi Enyɛnpe Ebɔrɛ na kutɔ a ba anyi kutɔ a?” Nɛ n shuli ŋ kaŋɛ: “Mm, Yiramu, kubɔya wɔtɔ. Enyɛnpe Ebɔrɛ na beeŋ shin nɛ Babilɔn be ewura e pɛ fo ŋ ki kenya.”

¹⁸ Kumo be kaman nɛ m bishi mo le: “Manɛ be kulubi nɛ n wora n da fo so ŋko fo ekrachi so ŋko basa ere so, nɛ men ta ma n ti ebu?

¹⁹ Manɛ nɛ men wora menyi be anebi fɛpoana nɛ b fule ŋ kaŋɛ menyi fanɛ Babilɔn be ewura maaŋ kɔ menyi ŋko efuli na kena? Men ti bumo ebu a?

²⁰ To, Yiramu, naniere mee kule fo nna. Jande nu ma kekule nsaa maŋ naŋ bɛta ma n yɔ kabuti to ashi Jonatan be laŋ to. Fo baŋ bɛta ma n yɔ, meeŋ wu ndoŋ.”

²¹ Ndoŋ nna nɛ ewura Zɛdikaya sa ebɔl fanɛ b ya ti ma ewurkpa be bekumpo be kakpa nɛ baa ti basa ebu na. Karechɛ kikɛ b daa sa ma ebodobodo nɛ baa tɔ na be kukoŋwule nna n ya fo fanɛ ebodobodo kikɛ ka loge kadegboŋ na to.