Jɛremaya 36 - EBƆRƐ BE KAWƆL

Ewura Jowakim ka chɔɔ Jɛremaya be sososo be kawɔl be asheŋ

¹ Ewura Josaya pibinyɛn, Jehowakim ka ji Juda be efuli so be kuwura be kafɛ nasopo to nɛ Enyɛnpe Ebɔrɛ na kaŋɛ ma le:

² “Ta kawɔl n sibɛ asɔ kama nɛ ŋ kaŋɛ fo a laŋɛ Israɛl nɛ Juda nɛ efuliana na kikɛ be kaplɛa so na n wɔtɔ kumo to. Sibɛ asɔ kama nɛ ŋ kaŋɛ fo, yili kachɛ nɛ n fara a malga fo kutɔ na, fɔŋfɔŋ jemanɛ nɛ Josaya fara mbe kuwurji m ba fo mbre na, kikɛ n wɔtɔ kawɔl na to.

³ Ashere nɛ Juda be basa nu kemur nɛ ŋ kre fanɛ meeŋ bar bumo so ere be asheŋ baaŋ chɛrga bumo be nfɛra nseŋ lar bumo be asheŋ lubi to. Saŋɛ na so meeŋ ta bumo be alubi m paŋ bumo.”

⁴ Ndoŋ nna nɛ n tre Neriya pibinyɛn, Baruk fanɛ e ba chɛ ma to. Ŋ kaa bee kute asɔ nɛ Enyɛnpe Ebɔrɛ na kaŋɛ ma na kikɛ nɛ mo alɛ bee sibɛ amo a nase kawɔl to.

⁵ Ndoŋ nna nɛ ŋ kaŋɛ Baruk le: “M maŋ naa kɔ ekpa nɛ n yɔ bɔrɛlambu na to ŋkpal benimuana na ka maaŋ sa ma ekpa nɛ n luri kumo to so.

⁶ Ama mee sha fanɛ fo yɔ ndoŋ jemanɛ nɛ basa na beeŋ kishi a kule Ebɔrɛ ashi bɔrɛlambu na to n ya kraŋ kawɔl na awɔrso, saŋɛ na so baaŋ nu kusɔ kama nɛ Enyɛnpe Ebɔrɛ na kaŋɛ ma nɛ ma alɛ kute amo n sa fo na. Feeŋ kraŋ kumo nɛ ekama nɛ Juda be basa nɛ b shi ndeana to m ba na kikɛ e nu.

⁷ Ashere baaŋ kule Enyɛnpe Ebɔrɛ na ketampaŋ nseŋ lar bumo be asheŋ lubi to, ŋkpal manɛ so, Enyɛnpe Ebɔrɛ na nya agbo ga nna n wɔtɔ bumo.

^8-10 Jehowakim ka ji Juda be efuli so be kuwura be kafɛ nusopo to be kufɔl kpanusopo to nɛ basa na kishi a kule Enyɛnpe Ebɔrɛ fanɛ e wu bumo kuwɔr. Basa nɛ b wɔ Jerusalɛm to nɛ bumo nɛ b shi Juda be ndeana to m ba na kikɛ e daa wɔ ekishi na to. Jemanɛ nɛ basa na daŋ kaŋ asoe a nu na nɛ Baruk kraŋ kusɔ kama nɛ n daŋ kaŋɛ na n sa bumo. E daŋ yili bɔrɛlambu na be awɔlto be kelɔnɛ, a laŋɛ Shafan nɛ e daa la esibɛpo na pibinyɛn, Gɛmariya be ebu be kaba so nna ŋ kraŋ kumo. Gɛmariya be ebu na daa wɔ bɔrɛlambu na be kelɔnɛ nɛ k mata Kabunagboŋ Popɔr na ase nna.

B ka kraŋ kawɔl na n sa benimuana na be asheŋ

¹¹ Gɛmariya pibinyɛn, Mikaya gba daa wɔ ndoŋ nseŋ nu Baruk ka kraŋ kusɔ nɛ Enyɛnpe Ebɔrɛ na kaŋɛ kawɔl na to na.

¹² Kumo be kaman nɛ e yɔ ewurkpa be esibɛpo na be ebu to nɛ ewura be benimuana na bee wora nshɛr. Bumo nɛ b daa wora nshɛr na e daa la Elishama nɛ e la ewura be esibɛpo na, nɛ Shemayaya pibinyɛn, Delaiya nɛ Akbɔ pibinyɛn, Ɛlnatan nɛ Shafan pibinyɛn, Gɛmariya nɛ Hananiya pibinyɛn, Zedekaya nɛ benimuana na kikɛ.

¹³ Ndoŋ nna Mikaya kaŋɛ bumo kusɔ kama nɛ e nu Baruk ka kraŋ n sa basa na.

¹⁴ Kumo be kaman nɛ benimuana na shuŋi Jehudi nɛ e la Netaniya pibinyɛn nɛ mo alɛ la Kushi pibinyɛn nɛ Shelemaya mo nanabi, fanɛ e ya kaŋɛ Baruk fanɛ e ta kawɔl nɛ e kraŋ n sa basa na m ba. Nɛ Baruk ta kawɔl na n ya sa bumo.

¹⁵ E ka bar kumo nɛ b yɛ e chena ŋ kraŋ kawɔl na n sa bumo alɛ gba. Ndoŋ nna nɛ Baruk kraŋ kumo n sa bumo.

¹⁶ E ka kraŋ kumo n loge, nɛ kufu pɛ bumo nɛ b kilgi ŋ keni abar nseŋ kaŋɛ Baruk le: ‘A daga ewura ka nu demu ere!’

¹⁷ Kumo be kaman nɛ b bishi mo le: ‘Kaŋɛ anyi naniere, nuso nɛ fo wora n sibɛ kawɔl ere? Jɛremaya e kute kumo n sa fo nɛ fo sibɛ a?’ ”

¹⁸ Nɛ Baruk shuli so ŋ kaŋɛ: “Jɛremaya e kute kumo be kamalga kama n sa ma nɛ ma alɛ sibɛ amo n nase kawɔl ere to”

¹⁹ Ndoŋ nna nɛ benimuana na kaŋɛ Baruk le: “A daga fo nɛ Jɛremaya ka ya ŋana kakpa nɛ esa kikɛ maaŋ pin menyi be asheŋ.”

²⁰ Kumo be kaman nɛ benimuana na ta kawɔl na n nase Elishama nɛ e la ewurkpa be esibɛpo na be ebu to nseŋ yɔ ewura be lambu to n ya bɔ mo kumo be kubɔya.

²¹ Ndoŋ nna nɛ ewura shuŋi Jehudi fanɛ e ya bar kawɔl na. Nɛ e ya ta kawɔl na ashi Elishama be ebu to m ba kraŋ n sa ewura na nɛ benimuana nɛ b yil ŋ kulti mo na.

²² Kumo be jemanɛ daa la gbaŋgbaŋ to nna nɛ ewura daa tase mbe gbaŋgbaŋ to be lambu to nɛ edɛ wɔ edɛtɔl to a yil mbe anishito.

²³ Jehudi ka baŋ kraŋ kawɔl na be egbaŋ asa ŋko ana n loge nɛ ewura na ta kasaŋɛbi ŋ ku ndoŋ n lɛ edɛ na to. Aloŋ nɛ e wora n chɔɔ kawɔl na kikɛ m mur.

²⁴ Ama ewura na nɛ mbe benimuana nɛ b nu kawɔl na be kakraŋ na maŋ wora kusɔ ko a ŋini fanɛ kagbene jija bumo ŋko kufu pɛ bumo.

²⁵ Ɛlnatan nɛ Delaiya nɛ Gɛmariya daŋ kule ewura na fanɛ e sa maŋ chɔɔ kawɔl na, ama e maŋ tuge bumo.

²⁶ Kumo be kaman nɛ e ponte mo pibinyɛn, Jeramiil nɛ Azriɛl pibinyɛn, Seraiya nɛ Abdiil pibinyɛn Selemaiya so fanɛ b ya pɛ ma, anebi Jɛremaya nɛ ma esibɛpo, Baruk. Ama Enyɛnpe Ebɔrɛ na daŋ ta anyi nna ŋ ŋana.

Jɛremaya ka naŋ sibɛ kawɔl nyɔsopo be asheŋ

²⁷ Ewura Jehowakim ka chɔɔ kawɔl nɛ n daŋ kute n sa Baruk nɛ e sibɛ n nase na be kaman, nɛ Enyɛnpe Ebɔrɛ na naŋ kaŋɛ ma fanɛ

²⁸ n naŋ ta kawɔl pɔtɛ n sibɛ kusɔ kama nɛ k daa wɔ sososo be kawɔl na to na n nase.

²⁹ Kumo be kaman nɛ e yɛ ŋ kaŋɛ ewura na le: “Fo chɔɔ kawɔl na nseŋ bishi Jɛremaya kusɔ nɛ k ba nɛ e sibɛ fanɛ Babilɔn be ewura beeŋ ba mur kasawule ere nseŋ mɔ kumo so be basa nɛ asɔbɔya kikɛ.

³⁰ To, naniere ma Enyɛnpe Ebɔrɛ na bee kaŋɛ fo, Ewura Jehowakim nna fanɛ fo kaman to ebi be esa kikɛ maaŋ naŋ chena men nananyɛn, ewura Deevid be kuwurputi so n ji kuwura. Baaŋ ta fo kebuni n lɛ kakpa nɛ k beeŋ dese nɛ epeŋi a ŋmɛa kumo kapaso nɛ bunyaŋ wushiso malɛ e tɔr kumo so kanyɛso.

³¹ Meeŋ gberge fo nɛ fo kaman to ebi nɛ benimuana na kusoe ŋkpal alubi nɛ men wora kikɛ so. Fo nɛ Juda nɛ Jerusalɛm be basa na be ekama maŋ wɔtɔ lakal kasokpele nɛ n sa menyi na to. Amoso asheŋ maaŋ nyalɛ n sa menyi kikɛ!”

³² Ade kikɛ be kaman nɛ n ta kawɔl pɔtɛ n sa Baruk nɛ e la ma esibɛpo na, nɛ e naŋ sibɛ kusɔ kama nɛ ŋ kute n sa mo na n nase. Kusɔ kama nɛ k daa wɔ sososo be kawɔl nɛ Ewura Jehowakim chɔɔ na to nɛ abɔya popɔr nɛ a chɔ adra na kikɛ nɛ e sibɛ n wɔtɔ kumo to.