Jɛremaya 35 - EBƆRƐ BE KAWƆL

Jɛremaya nɛ Reekabebi na be asheŋ

¹ Jemanɛ nɛ ewura Josaya pibinyɛn Jehowakim daa ji Juda be efuli so be kuwura na nɛ Enyɛnpe Ebɔrɛ na kaŋɛ ma le:

² “Jɛremaya, yɔ Reekab be kanaŋ to be basa kutɔ n ya kaŋɛ bumo fanɛ b shin nɛ fo nɛ bumo e yɔ bɔrɛlambu na to be ebuana na be kuko to. Men kaŋ yɔ ndoŋ nɛ fo ya sa bumo yabra.”

³ Ndoŋ nna nɛ ŋ keta Jaazania nɛ mo tuto la Jɛremaya nɛ mo alɛ mo tuto daa la Habazzinaya na nɛ bumo be kanaŋ na be benyɛn kikɛ

⁴ m ba bɔrɛlambu na to. Kumo be kaman nɛ ŋ keta bumo n luri anebi Hanan nɛ mo tuto daa la Igdaliya na be bebɛsopo be ebu to. Ebu na daa wɔ Shallum pibinyɛn, Maaseia nɛ e daa la bɔrɛlambu na to be beshumpo na be enimugboŋ ko na be ebu be awɔlto nna nɛ k mata benimuana na be beko be peya.

⁵ Ndoŋ nna nɛ n ta ekurwa nuu nchu nɛ yabra bɔlɔ amo m ba yili Rekabebi na be anishito nseŋ kaŋɛ bumo: “Yabra nde, men baa nuu!”

⁶ Ama le nɛ b daŋ kaŋɛ: “Anyi maa nuu yabra. An nananyɛn Jonadab nɛ e daa la Rekab pibinyɛn na daŋ kaŋɛ anyi fanɛ, anyi ŋko anyi be kaman to ebi be esa kama maŋ daga fanɛ e nuu yabra be yiri kikɛ.

⁷ Mo alɛ daŋ naŋ kaŋɛ anyi fanɛ an sa maŋ pɔr nwu ŋko n dɔ adɔjibi ŋko ndibi sɔrso be adɔ. E daŋ kaŋɛ anyi kenishipereso fanɛ an baa wɔ ewajɛbu to nna jemanɛ kikɛ, saŋɛ na so anyi ere beeŋ baa wɔ kasawule ere so fanɛ befɔ.

⁸ Anyi be kabuna ebi bee wora kusɔ kama nɛ an nananyɛn Jonadab kaŋɛ anyi kenishipereso na kasonu nna. Amoso anyi ŋko anyi be beche ŋko mbia be ekama maŋ naŋ nuu yabra ŋ ku so kikɛ;

⁹ anyi alɛ maŋ naŋ pɔr nwu n chena to ŋko n dɔ adɔjibi ŋko ndibi sɔrso be adɔ gba kikɛ.

¹⁰ Ewajɛbu to nɛ anyi ere wɔ nsaa bɛ nananyɛn Jonadab be kamalga so.

¹¹ Ama jemanɛ nɛ ewura Nebukadneeza nɛ Babilɔn be efuli nɛ Siriya be efuli so be benapo ba fara a kɔ a sha kesɔ efuli na nɛ an koso m ba Jerusalɛm to m ba chena, saŋɛ na so anyeeŋ shile bumo m mɔlga anyi be amu. Kusɔ nɛ k ba nɛ an baa kaa wɔ Jerusalɛm to nna na.”

^12-13 Ndoŋ nna nɛ Enyɛnpetale, Israɛl be Ebɔrɛ na kaŋɛ ma fanɛ n ya kaŋɛ Juda nɛ Jerusalɛm be basa na le: “Ma, Enyɛnpe Ebɔrɛ na bee bishi menyi nna fanɛ manɛ nna nɛ men kini kenu n sa ma nsaa maŋ wora kusɔ nɛ ŋ ŋini menyi?

¹⁴ Jonadab be kaman to ebi wora kusɔ nɛ e kaŋɛ bumo kenishipereso na kasonu nsaa maa nuu yabra. Hale nɛ mbre bumo to be ekama maŋ naŋ nuu yabra be yiri kikɛ. Ama mee malga a sa menyi saŋkama, menyi alɛ maa wora ma kasonu.

¹⁵ Ŋ kraa shuŋi ma anya anebiana na menyi kutɔ, nɛ baa kaŋɛ menyi fanɛ men yige menyi be asheŋ lubi na nsaa wora kusɔ nɛ k niŋi. B kpele menyi kusoe fanɛ men sa maa bunyaŋ nsaa shuŋ agbir pɔtɛana, saŋɛ na so menyi kraa beeŋ chena kasawule nɛ n ta n sa men nananyɛnana na so. Ama men kini kenu n sa ma nsaa maŋ wora lakal a laŋɛ kumo be kaplɛa so.

¹⁶ Jonadab be kaman to ebi bre wora kusɔ nɛ bumo nananyɛn kaŋɛ bumo kenishipereso na kasonu, ama menyi ere maŋ wora ma kasonu.

¹⁷ Amoso, naniere, ma Enyɛnpetale, Israɛl be Ebɔrɛ na beeŋ shin nɛ kemur nɛ n nase kumo be kɔnɔ na e ba menyi Juda nɛ Jerusalɛm be basa so. Meeŋ shin nɛ le a wora ŋkpal manɛ so, ŋ ka malga n sa menyi, menyi maŋ nu; ma alɛ ka tre menyi, menyi maŋ shuli so.”

¹⁸ Ade kikɛ be kaman nɛ Enyɛnpetale, Israɛl be Ebɔrɛ na naŋ kaŋɛ ma fanɛ ŋ kaŋɛ Rekab be kabuna ebi na le: “Menyi ere wora kusɔ nɛ men nananyɛn Jonadab kaŋɛ menyi kenishipereso na kasonu nseŋ bɛ mbe keŋini kikɛ so n wora kusɔ nɛ k daga.

¹⁹ Amoso ma, Enyɛnpetale, Israɛl be Ebɔrɛ na bee nase kɔnɔ nna a sa Rekab be kabuna ebi fanɛ b maa ba nɛ b paŋ esa nɛ e beeŋ shuŋ ma kikɛ.”