Jɛremaya 34 - EBƆRƐ BE KAWƆL

Kubɔya nɛ k yɔ Zɛdikaya kutɔ be asheŋ

¹ Jemanɛ nɛ Babilɔn be ewura Nebukadneeza nɛ mbe benapo nɛ efuli pɔtɛana be benapo daa chɛ bumo to na daŋ ba kaa kɔ Jerusalɛm nɛ nde nɛ a kulti kumo na kena na nɛ Enyɛnpe Ebɔrɛ na kaŋɛ ma fanɛ ŋ kaŋɛ Juda be ewura Zɛdikaya le:

² “Ma, Enyɛnpe Ebɔrɛ na beeŋ shin nɛ Babilɔn be ewura Nebukadneeza e kɔ m pɔɔ kadegboŋ ere so nseŋ chɔɔ kumo n lɛ.

³ Baaŋ pɛ fo n yɔ ewura Nebukadneeza kutɔ nɛ fo nɛ mo e wu abar kenishiso nseŋ malga abar kutɔ. Kumo be kaman nɛ b yɛr fo Babilɔn be efuli so.

⁴ Ewura Zɛdikaya, kaŋ kusoe n nu kusɔ nɛ mee kaŋɛ fo ere. B maaŋ mɔ fo kena to.

⁵ Feeŋ wu kayurwushi so nɛ b puga ndishiŋ n shu fo keeli m a ŋini bunyaŋ nɛ b kɔ a sa fo. Baaŋ shu fo keeli fanɛ kananɛ b shu fo nananyɛnana nɛ b daa la bewura nseŋ wu na be nli na. Baaŋ baa shu fo keeli a kaŋɛ: ‘Anyi be ewura e wu! Anyi be ewura e wu o!’ Ma, Enyɛnpe Ebɔrɛ e kaŋɛ na.”

⁶ Ndoŋ nna nɛ n ta kubɔya na n ya sa ewura Zɛdikaya ashi Jerusalɛm to.

⁷ Loŋ be jemanɛ na nɛ Babilɔn be ewura be benapo daa wora ania nɛ b bure egbalana nɛ a kulti ndegboŋ nɛ baa tre Lakish nɛ Azeka nɛ Jerusalɛm na. Ndegboŋ asa ere nɛ b daa maŋ naŋ kɔ n sɔ ashi Juda be efuli so.

Basa na ka maŋ bɛ bumo be kɔnɔ naseso so be asheŋ

⁸ Ewura Zɛdikaya nɛ Jerusalɛm to be basa na daŋ wora kɔnɔkoŋwule nna ŋ kaŋɛ fanɛ baaŋ yige

⁹ Hibruwebi be benyɛn nɛ beche nɛ b tɔ anya na kikɛ, saŋɛ na so esa kama maaŋ baa kɔ Israɛl be esa fanɛ kenya.

¹⁰ Bejuŋkparpoana na nɛ basa na kikɛ daŋ shuli so fanɛ baaŋ yige bumo be anya na nɛ b ya kaa wɔtɔ bumo be amu so nsaa maŋ naa la anya kikɛ.

¹¹ Kumo be kaman nɛ b naŋ chɛrga bumo be nfɛra nseŋ bɛta m pɛ bumo n ya nyaŋ bumo ŋ ki anya.

^12-13 Ndoŋ nna nɛ Enyɛnpe, Israɛl be Ebɔrɛ na naŋ kaŋɛ ma fanɛ ŋ kaŋɛ basa na le: “Jemanɛ nɛ n daŋ lara menyi nananyɛnana Ijipt be efuli so ashi kenyaya to na dra dra na, ma nɛ bumo daŋ wora kɔnɔkoŋwule be ŋkre nna. N daŋ kaŋɛ bumo fanɛ

¹⁴ nfɛ ashunu kikɛ be kaman, a daga fanɛ b yige bumo braana Hibruwebi nɛ b tɔ anya nɛ b shuŋ bumo n fo nfɛnshe na nɛ b ya kaa wɔ bumo be amu a ji. Ama b maŋ nu kusɔ nɛ ŋ kaŋɛ bumo na.

¹⁵ Ama menyi ere daŋ wora kusɔ nɛ k par ma. Men kikɛ daŋ shuli so nna fanɛ menyeeŋ yige men braana Israɛlebi na nseŋ ba yili ma anishi to ashi bɔrɛlambu nɛ menyee shuŋ ma na to n wora kɔnɔkoŋwule be ŋkre.

¹⁶ Ama kumo be kaman nɛ men kini kesa ma kemaŋkura nseŋ chɛrga menyi be nfɛra. Men kikɛ daŋ naŋ bɛta n ta menyi be anya nɛ men daŋ yige na nna nseŋ naŋ tintiŋ bumo n wɔtɔ kenyaya to.

¹⁷ Amoso nɛ ma Enyɛnpe Ebɔrɛ na kaŋɛ fanɛ menyi maŋ wora ma kasonu na. Menyi maŋ sa Israɛlebi na kikɛ ekpa nɛ b nya bumo be amu. To, ma ere beeŋ sa ekpa nɛ men wu kena to ŋko n lɔ n wu ŋko nɛ akoŋ a mɔ menyi. Ma n alɛ beeŋ shin nɛ menyi be asheŋ e baa keta durnya to be efuliana so be basa kejijɛ ŋkpal kusɔ nɛ meeŋ wora menyi na so.

^18-19 Juda nɛ Jerusalɛm be benimuana na nɛ ewurkpa be benimuana na nɛ bɔrɛmatapoana na nɛ bejuŋkparpoana na kikɛ nɛ ma e daŋ wora kɔnɔkoŋwule be ŋkre na. B daŋ mɔ gbolu nna nseŋ ku kumo to anyɔ n nase nseŋ bɔla amo nferinto n choŋ m mɔ ŋkre na so. Ama b maŋ wora m bɔlɔ kɔnɔkoŋwule be ŋkre na so, amoso meeŋ wora bumo kusɔ nɛ b wora gbolu na.

²⁰ Meeŋ shin nɛ men doŋana e mɔ bumo nɛ bumo be kebuniana e ki kusɔ jiso n sa mbuibi nɛ kupuŋ to be asɔbɔya.

²¹ Ma alɛ beeŋ ta Juda be ewura Zɛdikaya nɛ mbe benimuana m bɔɔ Babilɔn be ewura nɛ mbe benapo nɛ b maŋ naa kɔ menyi kena na enɔ nɛ b mɔ.

²² Meeŋ kaŋɛ bumo nɛ b bɛta m ba kadegboŋ ere to m ba kɔ n sɔ nseŋ chɔɔ kumo n lɛ. Meeŋ shin nɛ Juda be ndeana e ki fanɛ keshishɛrsawule nɛ esa kama maŋ wɔ amo to. Ma, Enyɛnpe Ebɔrɛ e kaŋɛ na.”