Jɛremaya 32 - EBƆRƐ BE KAWƆL

Jɛremaya ka tɔ kasawule be asheŋ

¹ Zɛdikaya ka ji Juda be efuli so be kuwura be kafɛ kudusopo nɛ k la Babilɔn be ewura Nebukadneeza ka ji kuwura be kafɛ kuduaburwasopo na to, nɛ Enyɛnpe Ebɔrɛ na malga ma kutɔ.

² Loŋ be jemanɛ na nɛ Babilɔn be benapo kre kena m ba kulti Jerusalɛm n wɔtɔ a fin kekɔ kumo kena, nɛ ma alɛ wɔ kabuti to ashi ewurkpa be bekumpo be kakpa na.

³ Ewura Zɛdikaya daŋ ku ma kɔnɔ nna fanɛ ma ere e kaŋɛ ekama fanɛ Enyɛnpe Ebɔrɛ yɛ e beeŋ shin nɛ Babilɔn be ewura e ba kɔ m pɔɔ Jerusalɛm so n suge kumo, nseŋ kpal loŋ so n ti ma ebu.

⁴ Ewura Zɛdikaya maaŋ nya n shile. Baaŋ pɛ mo n ya sa Babilɔn be ewura nɛ mo nɛ mo e wu abar kenishiso nseŋ malga abar kutɔ.

⁵ Kumo be kaman nɛ b ta ewura Zɛdikaya n yɔ Babilɔn be efuli so, nɛ e ya kaa wɔ ndoŋ n ya fo fanɛ ŋ ka beeŋ wora mo kusɔ nɛ mee sha n loge. Nɛ e kɔ Babilɔnebi na kena gba, e beeŋ kɔ n tɔr. Ma, Enyɛnpe Ebɔrɛ e kaŋɛ na

⁶ Jemanɛ nɛ n daa wɔ kabuti to na nɛ Enyɛnpe Ebɔrɛ na kaŋɛ ma le:

⁷ “Jɛremaya, fo wɔpa Shallum pibinyɛn nɛ baa tre Hanamɛl na beeŋ ba kaŋɛ fo fanɛ fo tɔ mbe kasawule nɛ k wɔ Anatɔf be kade to ashi Bɛnjamin be yiri be Kebonfu to na. Ŋkpal manɛ so, fo e la mo kurgepo nɛ k daga fanɛ fo tɔ mbe kapetɛsawule, saŋɛ na so k maaŋ lar kanaŋ na to.”

⁸ Kumo be kaman nɛ Hanamɛl ba ma kutɔ ashi kakpa nɛ b ti ma ebu na, fanɛ kananɛ Enyɛnpe Ebɔrɛ na kaŋɛ na, m ba kaŋɛ ma fanɛ n tɔ mbe kasawule. Enyɛnpe Ebɔrɛ na ka teŋ ŋ kaŋɛ ma kumo be asheŋ so

⁹ nɛ tɔ kasawule na ashi Hanamɛl kutɔ nseŋ karga amansherbi na n sa mo. Kumo be yawu daa la gbiti be ndarbi kudu ashunu nna.

¹⁰ Pɔɛŋ nɛ ŋ ka mo amansherbi na, n daŋ yisi enɔ kumo be nwɔl so nna n shin nɛ eshɛdajipo ko gba yisi enɔ kumo so. Kumo be kaman nɛ n ta kawɔl be kebersobi m ber nwɔl nɛ an wora na be kuko so nseŋ ta kusɔ nɛ k bee ta asɔ be egbɛ na ŋ karga gbiti na.

¹¹ Kede be kaman nɛ n ta nwɔl nɛ e bee ŋini fanɛ n tɔ kasawule na be anyɔ, kumo nɛ k ber so na nɛ kumo nɛ k maŋ ber so na

¹² n sa Neria pibinyɛn Baruk nɛ mo nananyɛn la Maaseia na. Hanamɛl nɛ eshɛdajipoana nɛ b yisi enɔ kasawule na be ketɔ be nwɔl na so na nɛ basa nɛ b wɔ ewurkpa be kelɔnɛ na so na kikɛ be anishito nɛ b daŋ ta nwɔl na n sa Baruk.

¹³ Basa na kikɛ be anishito ndoŋ nɛ ŋ kaŋɛ Baruk le:

¹⁴ “Enyɛnpetale Ebɔrɛ na e kaŋɛ fanɛ fo sɔ kasawule na be ketɔ be nwɔl anyɔ na, kumo nɛ k ber so nɛ kumo nɛ k maŋ ber so na kikɛ n ya wɔtɔ kapuya to, saŋɛ na so a beeŋ yili ndoŋ nfɛ damta.

¹⁵ Enyɛnpetale Ebɔrɛ na kaŋɛ fanɛ basa beeŋ naŋ tɔ nwu nɛ nsawule nɛ ndibi sɔrso be adɔ ashi efuli ere so.”

Jɛremaya be kabɔrɛkule be asheŋ

¹⁶ Ŋ ka ta kasawule na be ketɔ be nwɔl na n sa Baruk n loge nɛ ŋ kule Ebɔrɛ ŋ kaŋɛ le:

¹⁷ “Enyɛnpetale Ebɔrɛ, fo e bɔla fo eleŋgboŋ nɛ yuku so n to esoso nɛ kasawule. Sheŋ malɛ maŋ du kpakpa n sa fo.

¹⁸ Fo lara fo kasha nɛ k maa chɛrga na ŋ ŋini basa ŋgboŋ to ŋgboŋ to, nseŋ gberge basa asoe ŋkpal bumo tutoana nɛ bumo nioana be alubi so. Fo la Ebɔrɛ gboŋgboŋi nsaa kɔ yuku nna nɛ fo ketre la Enyɛnpetale Ebɔrɛ.

¹⁹ Fee kre asheŋ kanyiasheŋ so nna nsaa wora asheŋgboŋ. Fo alɛ bee wu kusɔ kama nɛ basa bee wora nsaa yili bumo be aworbi so a ka bumo kukɔ nna.

²⁰ Fo daŋ wora emamachisheŋ nɛ asheŋ tumase ashi Ijipt be efuli so dra dra na, jemanɛ nɛ fo daŋ lara fo basa Israɛlebi na kenyaya to ashi ndoŋ na, nseŋ kraa wora amo hale kabre gba ashi Israɛl nɛ efuli pɔtɛana so. Amoso ekama nyi fo asheŋ kaplɛkama nna.

²¹ Emamachisheŋ nɛ asheŋ tumase nɛ fo wora na ta kufugboŋ nna n lɛ an doŋana so.

²² Kumo be kaman nɛ fo ta kasawule nɛ k kɔ eleŋ a wora adɔjibi nɛnɛ ga na n sa Israɛlebi bumo nananyɛnana.

²³ Ama b ka ba kasawule ere so m ba sɔ kumo ŋ ki bumo peya na be kaman, b maŋ wora fo kasonu ŋko m bɛ fo mbra so. Kusɔ kama nɛ fo yili bumo fanɛ b wora na b maŋ wora kumo. Amoso nɛ fo shin nɛ kemur ere ba bumo so na.

²⁴ Babilɔnebi na daŋ ba dɔ ashigboŋ nna m mata egbal nɛ k kulti Jerusalɛm na nna nɛ b dii so n luri to ŋ kɔ kumo kena. Kena na nɛ akoŋ nɛ alɔ e naaŋ shin nɛ b tiŋ ŋ kɔ n sɔ kadegboŋ na. Kusɔ kama nɛ fo kaŋɛ na bɔlɔ so kashenteŋto.

²⁵ Amo nɛ amo kikɛ, Enyɛnpetale Ebɔrɛ, fo kraŋ kaŋɛ ma fanɛ n ya tɔ kasawule ashi eshɛdajipoana be anishito jemanɛ nɛ Babilɔnebi bee sha kekɔ n sɔ Jerusalɛm na.”

²⁶ Ndoŋ nna nɛ Enyɛnpe Ebɔrɛ na naŋ kaŋɛ ma le:

²⁷ “Ma, e la Enyɛnpe Ebɔrɛ nɛ e bee ji durnya kikɛ so kuwura na. Shɛŋ shɛŋ maŋ du ma so kpakpa.

²⁸ Meeŋ shin nɛ Babilɔn be ewura, Nebukadneeza nɛ mbe benapo, e kɔ m pɔɔ Jerusalɛm be basa so

²⁹ nseŋ nya edɛ n wɔtɔ kumo to n chɔɔ m mur. Kananɛ basa daa chɔɔ eduwu nwu na be adamta be achoŋi so a sa kegbir nɛ baa tre Baal na nseŋ naa ta yabra a to nchu a sa agbir pɔtɛana na, e shin nɛ n nya agbo na.

³⁰ Israɛl nɛ Juda be basa be edaŋkaresheŋ to be sososo kikɛ, b maŋ tiŋ n wora asheŋ nɛ a par ma. Bumo be asheŋ woraso bee wɔtɔ ma agbo to nna.

³¹ Yili kachɛ nɛ Jerusalɛm be kadegboŋ ere taŋɛ kikɛ, kumo to be basa baa shin nna nɛ ma kagbene bee kaa ga. Amoso n yili kumo nna fanɛ meeŋ mur kumo

³² ŋkpal asheŋ lubi nɛ Juda nɛ Jerusalɛm to be basa nɛ bumo be bewuraana nɛ bejuŋkparpoana nɛ bɔrɛmatapoana nɛ anebiana na wora na kikɛ so.

³³ Ŋ ka wora ania fanɛ meeŋ ŋini bumo nɛ b baa wora ma kasonu na kikɛ be kaman, b maŋ nu nseŋ koya shɛŋ. B pal kaman nna n sa ma.

³⁴ B ta bumo be agbirana nɛ ŋ kishi amo be asheŋ ga na nna n yili ma bɔrɛlambu nɛ k daga fanɛ b baa shuŋ ma kumo to na to, n shin nɛ k wora eyurpi daŋkare be ekpa so.

³⁵ Bumo alɛ daŋ naŋ pɔr agbirsure nna n yili Hinnɔm be Ketaŋɛ to n sa Baal be kegbir nsaa ta bumo be mbia a lara esarga a sa kegbir nɛ baa tre Mɔlɛk na. N daŋ maŋ yili bumo fanɛ b ba wora loŋ. K daŋ maŋ ba ma nfɛra to gba fanɛ baaŋ wora le be ekishisheŋ ere n shin nɛ Juda be basa e luri kulubi to.”

Tama be kɔnɔ naseso be asheŋ

³⁶ Kede be kaman nɛ Enyɛnpe, Israɛl be Ebɔrɛ na kaŋɛ ma le: “Jɛremaya, kashenteŋ nɛ fo kaŋɛ fanɛ basa na bee kaŋɛ fanɛ kena nɛ akoŋ nɛ alɔ e shin nɛ Babilɔn be ewura tiŋ ŋ kɔ n sɔ Jerusalɛm be kadegboŋ na. To, naniere nu kusɔ nɛ ŋ kɔ nɛ ŋ kaŋɛ.

³⁷ Kachako meeŋ gama basa na abar so ashi efuli pɔtɛana nɛ n daŋ nya agbo ga nseŋ daŋ pesaŋ bumo to n yɔ amo so na n naŋ m bɛta bumo m ba nfe nɛ b baa ka wɔtɔ nɛ shɛŋ maŋ naa tɔrɔ bumo.

³⁸ Saŋɛ na so baaŋ baa kraa la ma basa nɛ ma alɛ e baa kraa la bumo be Ebɔrɛ.

³⁹ Meeŋ shin nɛ b baa bunyaŋ ma jemanɛ kikɛ kenishipereso, ŋkpal bumo gbagba nɛ bumo be kaman to ebi be nɛnɛ so.

⁴⁰ Ma nɛ bumo malɛ beeŋ wora kɔnɔkoŋwule be ŋkre nɛ k beeŋ baa wɔtɔ mbaanaayɔ. Ma alɛ maaŋ yige kebaawora asheŋ lela a sa bumo nseŋ shin nɛ b baa ŋana ma ashi bumo be ŋgbene to, a maaŋ naaŋ shile ma.

⁴¹ Kebaawora bumo kelela e naaŋ baa fuli ma kagbene. Amoso meeŋ shin nɛ b chena kasawule ere so hale mbaanaayɔ.

⁴² Kananɛ m baŋ shin nɛ basa ere ji jɛrbi na, aloŋ nɛ meeŋ shin nɛ b nya asɔ lela nɛ n nase amo be kɔnɔ na.

⁴³ Basa bee kaŋɛ fanɛ kasawule ere beeŋ ki fanɛ keshishɛrsawule nɛ edimɛdi ŋko asɔbɔya maaŋ naa wɔ kumo so nseŋ naa kaŋɛ fanɛ k beeŋ ki Babilɔnebi peya. Ama kachako basa beeŋ naŋ tɔ nsawule kumo so.

⁴⁴ Basa beeŋ naŋ tɔ nsawule nseŋ wora amo be nwɔl n shin nɛ eshɛdajipoana nɛ bumo gbagba e yisi enɔ nwɔl na to a ŋini fanɛ b tɔ nsawule na nna. Mboŋ nɛ le beeŋ wora e la Bɛnjamin be yiri be kebonfu to nɛ ndekarso nɛ a kulti Jerusalɛm be kadegboŋ na nɛ Juda be efuli so be nde to nɛ nde nɛ a wɔ abee so nɛ amo nɛ a wɔ abeemase nɛ Juda be kelargato be kaseto be kaba so kikɛ na. Meeŋ naŋ bɛta basa na m ba chena bumo be kasawule so. Ma, Enyɛnpe Ebɔrɛ e kaŋɛ na.”