Jɛremaya 31 - EBƆRƐ BE KAWƆL

Israɛl be basa ka beeŋ bɛta m ba Ebɔrɛ kutɔ be asheŋ

¹ Enyɛnpe Ebɔrɛ na yɛ: “Jemanɛ ko bee ba nɛ m baa la Israɛl be eyiriana na kikɛ be Ebɔrɛ, nɛ bumo alɛ e baa la ma basa.

² N daŋ wu basa nɛ b daŋ gelge luwu na kuwɔr nna ashi keshishɛrsawule na so. Menyi basa nɛ men shi Israɛl be kuwurgboŋ nɛ k wɔ kelargato be esoso be kaba so na ka daa yila kenishi to a fin ewushi na,

³ n daa wɔ kufɔ nna nseŋ lara ma kumu ŋ ŋini menyi. Ŋ ka bee sha menyi saŋɛ kama na so, nɛ mee ŋini menyi ma kasha nɛ k wɔtɔ mbaanaayɔ na.

⁴ Ŋ kraa beeŋ lɔŋɛ menyi be efuli na m pɔr. Menyi alɛ kraa beeŋ ta menyi be echakachaka m boŋ nshɛ n cha kagbenefuliso

⁵ Menyi kraa beeŋ nase ndibi sɔrso be adɔ ashi Samɛria be apreŋsawule so, nɛ bumo nɛ b duu ndibi sɔrso na e nya amo be asɔrso n ji.

⁶ Kashenteŋto, jemanɛ ko bee ba nɛ basa nɛ b yil Efrayim be apreŋ so a keni ma ekpa na e boŋ to ŋ kaŋɛ le: ‘Men shin nɛ an dii n yɔ Enyɛnpe anyi be Ebɔrɛ na kutɔ ashi Zayɔn be kebee na so n ya bunyaŋ mo.’ ”

⁷ Kede be kaman, nɛ Enyɛnpe Ebɔrɛ na naŋ kaŋɛ le: “Men boŋ kagbenefuli be nshɛ n sa Israɛl be efuli, nɛ k la efuligboŋ ashi efuliana na kikɛ to na. Men boŋ nshɛ ŋ kpaŋ ma ŋ kaŋɛ le: ‘Enyɛnpe Ebɔrɛ na mɔlga mbe basa; mo e kɔ n sɔ bekama nɛ b ka na.’

⁸ Ma, Enyɛnpe Ebɔrɛ na beeŋ bɛta ma basa nɛ b wɔ Babilɔn be efuli nɛ k wɔ kelargato be esoso na, nɛ bumo nɛ b wɔ durnya be kaplɛkama na m ba. Etanpo nɛ ebobi beeŋ ti bumo so, nɛ bedampoche nɛ beche nɛ kakurge ta bumo kikɛ beeŋ ti bumo so m ba. Baaŋ baa la efuligboŋ be basa nna m bɛta m ba.

⁹ Ma basa beeŋ ta kushu kabɔrɛkule nna a ba, saŋɛ nɛ n juŋkpar bumo m bɛta a ba epe na. Meeŋ juŋkpar bumo m bɔla ekpa nɛ k walɛ nɛ b maaŋ fiti kumo so n yɔ mbombi be nchu ase. Ŋkpal manɛ so, ma e la Israɛl mo tuto nɛ Efrayim malɛ la m pibinyɛn wurkoŋ.”

¹⁰ Enyɛnpe Ebɔrɛ na yɛ: “Menyi efuliana nɛ e taga to nɛ amo nɛ a wɔ teku be apla so kikɛ na e nu nfe. Ma e daŋ pesaŋ Israɛl be basa na to, ama ma alɛ beeŋ naŋ gama bumo abar so. Meeŋ baa kuŋ bumo fanɛ kananɛ mbolpɔkpapo bee keni so a kuŋ mbe mbolpɔ na.

¹¹ Meeŋ kɔ n suge bumo ashi bedoŋ nɛ baaŋ tiŋ m pɔɔ bumo so be enɔ to.

¹² Ma basa beeŋ ba Zayɔn be kebee na so m ba boŋ nshɛ kagbenefuliso, nɛ bumo be ŋgbene e fuli ŋkpal ŋ ka nɛfa bumo so. Meeŋ sa bumo ayu be yiri yiri nɛ yabra nɛ ŋku nɛ mbolpɔ nɛ ana. Israɛl beeŋ baa du fanɛ kudɔbi nɛ k nya nchu nɛnɛ nna, kumo be basa na beeŋ nya kusɔ kama nɛ ketir bumo.

¹³ Saŋɛ na so mbifɔlbi nɛ basa kpar kikɛ cha abar n ji eyur nseŋ cha kagbenefuliso Ŋkpal manɛ so, meeŋ lolo bumo nseŋ shin nɛ bumo be kushu e ki emushe nɛ bumo be kagbenejija e ki kagbenefuli.

¹⁴ Meeŋ sa bɔrɛmatapoana na kusɔ jiso alegaiso, nseŋ sa ma basa asɔ kama nɛ a daga bumo. Ma, Enyɛnpe Ebɔrɛ e kaŋɛ na.”

Enyɛnpe Ebɔrɛ ka wu Israɛl kuwɔr be asheŋ

¹⁵ Enyɛnpe Ebɔrɛ na yɛ: “Awɔr ko bee cha ashi Raama be kade to; k la kenishipereso be kushu be awɔr nna. Reechel e naa shu nseŋ kini kelolo ŋkpal mbe mbia ka wu so.

¹⁶ Ama ma, Enyɛnpe Ebɔrɛ na yɛ: ‘Yige fo kushu na nseŋ kpra fo anishichubi. Kusɔ kama nɛ fo wora n sa fo mbia ere maaŋ to jiga kikɛ. Fo mbia na beeŋ shi bedoŋ be kasawule so m bɛta m ba.

¹⁷ Tama kraa wɔtɔ n sa fo echefoso. Fo mbia beeŋ bɛta m ba epe.’ Ma, Enyɛnpe Ebɔrɛ na e kaŋɛ.

¹⁸ N nu Israɛl be basa na ka bee shu a kaŋɛ le: ‘An daa du fanɛ asɔbɔya yenso nna, ama fo bela anyi nɛ anyee wora fo kasonu. Naŋ bɛta anyi m ba fo kutɔ, ŋkpal manɛ so, an wora shiriya naniere nɛ an bɛta m ba fo Enyɛnpe anyi be Ebɔrɛ na kutɔ nna.

¹⁹ An daŋ shile fo nna, ama naniere anyi naa sha kebɛta m ba fo kutɔ nna. Fo ka gberge anyi kusoe na be kaman, nɛ kagbenejija tɔr anyi so nɛ an kurgi amu n yuu to. Nyɔmɔ daŋ pɛ anyi nna nɛ an ji anishinyɔr ŋkpal an ka wora alubi saŋɛ nɛ an daa la mbifɔlbi kikɛ na so.’

²⁰ Israɛl be basa, menyi e la ma mbia nɛ mee sha ga. Kashenteŋ nna fanɛ mee kaa malga a gbiti menyi kenishipereso, ama ma alɛ kraa nyiŋi menyi be asheŋ. Amoso ma kagbene kraa wɔ menyi so. Ŋ kraa beeŋ wu menyi kuwɔr. Ma Enyɛnpe Ebɔrɛ e kaŋɛ na.

²¹ Men chiya abɔrdia n dulgi ekpa nɛ menyeeŋ bɔla so n yɔ na. Israɛl be basa, men bɛta m ba epe; men bɛta m ba nde nɛ men lar amo to n yɔ na.

²² Saŋɛ mo nɛ menyeeŋ chɛrga a ji kashenteŋ? Kachako meeŋ shin nɛ asheŋ e baa kɔr to, kumo e la fanɛ eche ka beeŋ baa kuŋ enyɛn.”

Enyɛnpe Ebɔrɛ na ka beeŋ bɛta Judaebi m ba epe be asheŋ

²³ Enyɛnpetale, Israɛl be Ebɔrɛ na yɛ: “Ŋ kaŋ bɛta basa na m ba chena bumo gbagba be kasawule so n loge, baaŋ naa kaŋɛ le ashi nde nɛ a wɔ Juda be kasawule so na: ‘Ebɔrɛ e nɛfa Zayɔn be kebee nɛ bɔrɛlambu na nɛ ewura be laŋ yil so ashi Jerusalɛm nɛ k la kakpa cheembi nɛ e wɔ na.’

²⁴ Basa na beeŋ baa wɔ Jerusalɛm nɛ nde nɛ e wɔ Juda be efuli so na to. Bumo be beko beeŋ baa la bedɔpo nɛ beko e baa la mbolpɔkpapoana.

²⁵ Meeŋ sa basa nɛ b gbeŋ a chul to na eleŋ popɔr nseŋ sa bumo nɛ akoŋ bɛlɛ na ajibi nɛ b ji m moɛ.

²⁶ Saŋɛ na so basa beeŋ kaŋɛ le: ‘N di nna ŋ koso nɛ eleŋ popɔr.’

²⁷ Ma, Enyɛnpe Ebɔrɛ na bee kaŋɛ nna fanɛ kacha ko bee ba nɛ n shin nɛ edimɛdi nɛ asɔbɔya e ba bɔlɔ Israɛl be kasawule nɛ Juda be efuli so kikɛ.

²⁸ Kananɛ n daa keni nɛ b tia bumo nseŋ lara bumo n lɛ m mur bumo na, a loŋ nɛ meeŋ naa keni nɛ b naŋ laŋɛ bumo m ba chena nseŋ chɛ bumo to nɛ b salga to.

²⁹ Jemanɛ na kaŋ fo, basa maaŋ naa kaŋɛ le: ‘Betuto nɛ benio e ji asɔrso nyaŋnyaŋso, nɛ bumo be mbia be anyii bee nyiri bumo.’

³⁰ Kusɔ nɛ k beeŋ wora e la fanɛ basa nɛ b ji asɔrso nyaŋnyaŋso na gbagba be anyii e naaŋ baa nyiri bumo. Ekama nɛ e wora kulubi e naaŋ wu ŋkpal mbe kulubi na so.”

³¹ Kumo be kaman nɛ Enyɛnpe Ebɔrɛ na kaŋɛ le: “Jemanɛ nɛ ma nɛ Israɛl be basa nɛ Juda be basa beeŋ wora kɔnɔkoŋwule be ŋkre popɔr na bee ba.

³² Kɔnɔkoŋwule be ŋkre popɔr na beeŋ baa du fanɛ kedra nɛ ma nɛ bumo nananyɛnana daŋ wora jemanɛ nɛ n daŋ juŋkpar bumo n lar Ijipt be kasawule so nsaa ŋini bumo ekpa ashi bumo be enite to na nna. N daa du fanɛ ekul nɛ e bee sha mbe eche ga na nna n sa bumo, ama b daa maŋ bɛ ma nɛ bumo be kɔnɔkoŋwule be ŋkre na so.

³³ Kɔnɔkoŋwule be ŋkre popɔr nɛ ma nɛ Israɛl be basa beeŋ wora na e la fanɛ, meeŋ ta ma mbra n wɔtɔ bumo be nfɛra to nseŋ sibɛ kumo n wɔtɔ bumo be ŋgbene to. Meeŋ baa la bumo be Ebɔrɛ nɛ bumo alɛ e baa la ma basa.

³⁴ Bumo be ekama maaŋ naŋ ŋini mo barkasa kananɛ e beeŋ wora m pin Enyɛnpe Ebɔrɛ na, ŋkpal manɛ so, bumo be bewura nɛ bebɔlpo kikɛ beeŋ pin ma nsaa wora ma kasonu. Ma alɛ beeŋ ta bumo be alubi m paŋ bumo nsaa maaŋ naŋ nyiŋi amo kikɛ. Ma, Enyɛnpe Ebɔrɛ e kaŋɛ na.”

³⁵ Enyɛnpe Ebɔrɛ na e naa shin nɛ epeŋi bee fuli to kapaso, nɛ kufɔl nɛ achɛkpabi malɛ bee fuli to kanyɛso. Mo e naa baga teku to nɛ k bee ku atili nsaa wora awɔr na. Mo ketre e la Enyɛnpetale Ebɔrɛ na.

³⁶ Kananɛ e baŋ yili asheŋ, nɛ e bee wora mbaanaayɔ na, a loŋ nɛ Israɛl beeŋ baa la efuli kumo be kumu so mbaanaayɔ.

³⁷ Kusɔ nɛ Enyɛnpe Ebɔrɛ na kaŋɛ e la fanɛ, kananɛ k du kpakpa nɛ esa e tiŋ m pin kananɛ awɔlpa be palɛlɛ sa na, ŋko nseŋ tiŋ m pin kakpa nɛ durnya be gbaltɔlase dese na, aloŋ nɛ k beeŋ baa du kpakpa nɛ n sa ma nɛ ŋ kini Israɛl be basa ŋkpal asɔ lubi kama nɛ b wora so.

³⁸ Kede be kaman nɛ Enyɛnpe Ebɔrɛ na kaŋɛ le: “Jemanɛ nɛ baaŋ yili Hananɛl be Ebu jeŋgreŋ na be egbaŋ to n ya fo Kukɔlɔto be Kabunagboŋ na be egbaŋ to n lɔŋɛ Jerusalɛm kikɛ m pɔr fanɛ kadegboŋ n sa ma na bee ba.

³⁹ Kumo be gbaŋ na beeŋ niŋi loŋ n ya lar kepreŋ nɛ baa tre Garɛb na nseŋ kilgi n sɔ to a yɔ Goa nɛ k wɔ a laŋɛ Jerusalɛm be epeŋitɔrkpa be kaba so na.

⁴⁰ Ketaŋɛ nɛ baa puli basa nsaa lɛ nsunɔ kumo to na kikɛ nɛ adɔsawule nɛ a dese Kidrɔn be Kabombi ase na m ba choŋ Egbaŋɛ be Kabunagboŋ na kikɛ beeŋ ki cheembi n sa Enyɛnpe Ebɔrɛ na. Jerusalɛm maŋ naa ba nɛ k bure ŋko m mur kikɛ.”